(vovworld)- ໂດຍຫ່າງຈາກນະຄອນຫລວງ ກົວລາລຳເປີ 414 ກິໂລແມັດ, ເກາະ Langkawi ນອນໃນໝູ່ເກາະ Langkawi ທີ່ມີຊື່ສຽງຂອງມາເລເຊຍ ດ້ວຍເນື້ອທີ່ດິນ 414 ຕາລາງກິໂລແມັດ, ກວ້າງທົບສອງເທົ່າເມື່ອທຽບໃສ່ເນື້ອທີ່ດິນຂອງນະຄອນຫລວງ ກົວລາລຳເປີ. ຍ້ອນຄວາມສວຍສົດງົດງາມຂອງເກາະແຫ່ງນີ້ ສະນັ້ນ ນັກທ່ອງທ່ຽວຈຶ່ງຕັ້ງຊື່ໃຫ້ເກາະ Langkawi ວ່າ ແມ່ນແດນສະຫວັນແຫ່ງການທ່ອງທ່ຽວ, ເພາະວ່າ ຢູ່ທີ່ນີ້ບໍ່ພຽງແຕ່ມີຫາດຊາຍທະເລສວຍງາມຫລາຍແຫ່ງເທົ່ານັ້ນ ຫາກຍັງແມ່ນບ່ອນອາໄສຂອງນົກອີນຊີເປັນຈຳນວນຫລວງຫລາຍ.
ໄປເຖິງ Langkawi ນັກທ່ອງທ່ຽວມີຫລາຍວິທີເລືອກເຟັ້ນ ແຕ່ຂີ່ຍົນຈາກ ກົວລາລຳເປີແມ່ນວິທີເໝາະສົມທີ່ສຸດເພາະນັກທ່ອງທ່ຽວຈະປະຢັດເວລາໄດ້. ພາຍຫລັງ ຂີ່ຍົນໃນເວລາຫນຶ່ງຊົ່ວໂມງ ນັກທ່ອງທ່ຽວຈະມາຮອດເກາະ Langkawi. ຢູ່ເທິງເຮືອບິນ ຫລຽວລົງ, ນັກທ່ອງທ່ຽວຈະເຫັນເກາະ Langkawi ປະກົດອອກຄືແກ້ວມະນີດ້ວຍຫາດຊາຍທະເລຂາວ ແລະ ນຳ້ທະເລຂຽວສະອາດ, ຢູ່ອ້ອມແອ້ມເກາະມີສວນຕົ້ນໝາກພ້າວຂຽວອຸ່ມທຸ່ມ.
Langkawi ມີຫາດຊາຍທະເລສວຍງາມຫລາຍແຫ່ງ, ໃນນັ້ນ ຫາດຊາຍທະເລ Tanjung Rhu ແມ່ນຫນຶ່ງໃນບັນດາຫາດຊາຍທະເລສວຍງາມກວ່າໝູ່ໃນໂລກ. Tanjung Rhu ມີຄວາມງາມແບບດັ້ງເດີມເປົ່າຫວ່າງ, ດ້ວຍຫາດຊາຍຂາວ ແລະຍາວຢຽດ, ນຳ້ທະເລຂຽວສະອາດ ນັກທ່ອງທ່ຽວສາມາດເຫັນທ້ອງທະເລໄດ້. ມາຢ້ຽມຢາມ Tanjung Rhu ແນ່ນອນວ່າ ນັກທ່ອງທ່ຽວຈະມີຄວາມຮູ້ສຶກຄ້າຍຄືເພື່ອນ ພະນາວັນ ຈິດສະມຸດ, ນັກທ່ອງທ່ຽວມາຈາກໄທ ຫາກໍໄປຢ້ຽມຢາມເກາະແຫ່ງນີ້ໃຫ້ຮູ້ວ່າ:
ສຽງ ພະນາວັນ ຈິດສະມຸດພາສາໄທ
ຖ້າຫາກພວກເພື່ອນມັກບັນຍາກາດອຶກກະທຶກຄືກໂຄມນັ້ນ Pantai Cenang ແມ່ນຫາດຊາຍທະເລທີ່ເປັນຫນ້າເລືອກເຟັ້ນ. ໂດຍຕັ້ງຢູ່ທິດໃຕ້ຂອງເກາະ Langkawi, ຫາດຊາຍທະເລ Pantai Cenang ມີໂຮງແຮມຫລາຍແຫ່ງ, ມີເຂດຕາກອາກາດ ແລະ ບັນດາຮ້ານຂາຍເຄື່ອງຂອງອັນດູດດື່ມ, ໃນນັ້ນມີຮ້ານຂາຍເຄື່ອງຍົກເວັ້ນພາສີ. Pantai Cenang ແມ່ນສະຖານທີ່ດຶງດູດນັກທ່ອງທ່ຽວຫລາຍກວ່າໝູ່ຢູ່ Langkawi ດ້ວຍການລະຫລິ້ນຕ່າງໆ. ມາແຫ່ງນີ້ ນັກທ່ອງທ່ຽວໄດ້ເຂົ້າຮ່ວມປະເພດກິລາໃຕ້ນຳ້ຄື: ດຳນຳ້, ຂີ່ລົດບົນຫນ້ານຳ້ທະເລ.
ສຳລັບນັກທ່ອງທ່ຽວຜູ້ໃດຢາກສູບອາກາດປອດໂປ່ງສະຫງົບງຽບ, ຫາດຊາຍທະເລ Pantai Kok ຈະແມ່ນການເລືອກເຟັ້ນຕົ້ນຕໍ. ໂດຍຕັ້ງຢູ່ທາງທິດໃຕ້ຂອງເກາະ Langkawi ແຕ່ຫາດຊາຍທະເລແຫ່ງນີ້ບັນຍາກາດບໍ່ອຶກກະທຶກຄືກໂຄມ. ນັກທ່ອງທ່ຽວຈະໄດ້ອາບນຳ້ທະເລຂຽວສະອາດ ຫລື ພັກຜ່ອນໃຕ້ຮົ່ມເຢັນຂອງຕົ້ນໄມ້ຂຽວອຸ່ມທຸ່ມ, ຮັບຟັງຄື້ນທະເລກະທົບໃສ່ຝັ່ງ. ນອກນັ້ນ ນັກທ່ອງທ່ຽວສາມາດເຊົ່າລົດຖີບໄປທ່ຽວອ້ອມແອ້ມເກາະ. ເພື່ອນ ເຈືອງທາຍງອກແອງ, ນັກທ່ອງທ່ຽວມາຈາກ ຫວຽດນາມ ແບ່ງປັນວ່າ:
“ຂ້າພະເຈົ້າມັກຂີ່ລົດຖີບໄປທ່ຽວອ້ອມແອ້ມເກາະ, ຊົມເບິ່ງນ້ອງນ້ອຍຂີ່ລົດຖີບ ແລະ ໂອ້ລົມກັບປະຊາຊົນຢູ່ເກາະແຫ່ງນີ້. ທິວທັດທຳມະຊາດຢູ່ທີ່ນີ້ສວຍງາມ ແລະ ສະຫງົບງຽບ, ອາກາດປອດໂປ່ງ, ລົມພັດມາເຢັນສະບາຍເຮັດໃຫ້ຄວາມອິດເມື່ອຍຫາຍໄປ.”
ເກາະ Langkawi ຍັງມີຈຸດພິເສດທີ່ດຶງດູດນັກທ່ອງທ່ຽວ ນັ້ນແມ່ນບ່ອນອາໄສຂອງນົກອີນຊີເປັນຈຳນວນຫລວງຫລາຍ. ນັກທ່ອງທ່ຽວຈະເຫັນປະຈັກຕານົກ.. ບິນຢູ່ເທິງທ້ອງຟ້າ…ເປັນຫນ້າປະທັບໃຈ. ເພື່ອນ ຫງວຽນຟູຢູງ, ນັກທ່ອງທ່ຽວມາຈາກຫວຽດນາມ ໃຫ້ຮູ້ວ່າ:
“ມາຢ້ຽມຢາມເກາະ Langkawi, ນັ່ງເທິງເຮືອຊົມເບິ່ງນົກອີນຊີບິນເຈີດໄປເຈີດມາເຮັດໃຫ້ຂ້າພະເຈົ້າມີຄວາມຮູ້ສຶກປະທັບໃຈ.. ເພາະວ່າ ປະຈຸບັນ ຍາກທີ່ມີໂອກາດໄດ້ຮັບຊົມນົກອີນຊີຫລາຍຄືແນວນັ້ນ. ສ່ິງດັ່ງກ່າວກໍພິສູດໃຫ້ເຫັນວ່າ: ອຳນາດການປົກຄອງຢູ່ທີ່ນີ້ໄດ້ປະຕິບັດວຽກງານອະນຸລັກຮັກສາດີທີ່ສຸດ.”
Langkawi ຍັງມີຖຳ້ຫີນປຸນຫລາຍແຫ່ງ ແລະ ປ່າດົງດີບທີ່ຂຽວອຸ່ມທຸ່ມ, ໃນນັ້ນ ມີລິງຫລາຍໂຕ. ແນ່ນອນວ່າ ນັກທ່ອງທ່ຽວມາຢ້ຽມຢາມເກາະແຫ່ງນີ້ລ້ວນແຕ່ມີຄວາມຫວັງຢາກກັບຄືນອີກຄັ້ງຫນຶ່ງ.