(vovworld)- ປະຊາຊົນ ມາເລເຊຍ ເຄີຍເອີ້ນເຂດ Sabah ແມ່ນເຂດດິນປະສົບກັບພາຍຸລົມແຮງ ຍ້ອນວ່າ Sabah ນອນໃນເຂດຖືກຜົນສະທ້ອນຈາກພາຍຸຫລາຍກວ່າໝູ່. ເຂດດິນນີ້ ບໍ່ພຽງແຕ່ດຶງດູດນັກທ່ອງທ່ຽວມາພັກຜ່ອນຕາກອາກາດຢູ່ບັນດາຫາດຊາຍທະເລ ເທົ່ານັ້ນ ຫາກຍັງດຶງດູດບັນດານັກທ່ອງທ່ຽວ ພະຈົນໄພ, ຄົ້ນຫາສາຍພູສູງ ແລະ ເລິກລັບອີກດ້ວຍ. ຍ້ອນເຫດນັ້ນ ໃນຊຸມປີຜ່ານມາ Sabah ໄດ້ກາຍເປັນສະຖານທີ່ທ່ອງທ່ຽວຊື່ງ ນັກທ່ອງທ່ຽວຫວຽດນາມ ຫລາຍຄົນເຄີຍເລືອກເຟັ້ນ, ພິເສດ ແມ່ນໄວຫນຸ່ມ.
ເກາະ Sabah
ພາບ:dulichmalaysia
|
ເປັນຄັ້ງທຳອິດ ທູເຮືອງພ້ອມກັບໝູ່ເພື່ອນມາຢ້ຽມຢາມ Sabah. ຄວາມໄຝ່ຝັນໄປຢ້ຽມຢາມເຂດດິນປະສົບກັບພາຍຸລົມແຮງຂອງເຂົາເຈົ້າໄດ້ປະກົດຜົນເປັນຈິງ. ຢູ່ Sabah ເຂົາເຈົ້າໄດ້ເຂົ້າຮ່ວມທຸກບໍລິການທ່ອງທ່ຽວ. ທູເຮືອງໃຫ້ຮູ້ວ່າ:
“ເປັນຄັ້ງທຳອິດໄດ້ມາຢ້ຽມຢາມເຂດ Sabah. ພວກນ້ອງຮູ້ສຶກປະທັບໃຈຫລາຍ. ບັນດາກິດຈະກຳສະຖາປັດຕະຍະກຳຢູ່ເກາະ Sabah ເປັນເອກະລັກສະເພາະທີ່ສຸດ. ເຂດປ່າດົງດິບ, ເກາະຫລາຍແຫ່ງພ້ອມກັບຫາດຊາຍທະເລຂາວຍາວຢຽດສຸດສາຍຕາ ແມ່ນສິ່ງທີ່ດຶງດູດນັກທ່ອງທ່ຽວຜູ້ທີ່ເປັນຄັ້ງທຳອິດມາຢ້ຽມຢາມ Sabah ຄືຂ້າພະເຈົ້າ. ນອກນັ້ນ ຊາວທ້ອງຖິ່ນ ແມ່ນຜູ້ຮັກແພງແຂກ ແລະ ສະຫນິດສະຫນົມທີ່ສດ.”
Sabah ແມ່ນລັດໃຫຍ່ອັນດັບ 2 ຂອງມາເລເຊຍ, ຖືກຕັ້ງຢູ່ ທາງທິດເຫນືອຂອງ ເກາະ Berneo ທີ່ສວຍງາມ ແລະ ໄດ້ຮັບຖືວ່າ ແມ່ນເກາະໃຫຍ່ທີ 3 ຂອງໂລກ. ທ່ານນາງ ຟານຫວີງຫາຍ, ພະນັກງານກົມໃຫຍ່ທ່ອງທ່ຽວ ມາເລເຊຍ ປະຈຳ ນະຄອນໂຮ່ຈິມີນ ໃຫ້ຮູ້ວ່າ:
“ນັກທ່ອງທ່ຽວ ຫວຽດນາມ ຫລາຍຄົນ ບໍ່ທັນຮູ້ຈັກເຖິງເກາະ Sabah. ນີ້ແມ່ນສະຖານທີ່ທ່ອງທ່ຽວສວຍງາມ, ບັນດາຄູບ່າວສາວເຄີຍມານີ້ເພື່ອຖ່າຍຮູບແຕ່ງດອງຫລືໄປທ່ອງທ່ຽວ honeymoon. ປະຈຸບັນ ກົມສົ່ງເສີມການທ່ອງທ່ຽວຫວຽດນາມ ພວມຢາກຮ່ວມມືກັບກົມສົ່ງເສີມການທ່ອງທ່ຽວຂອງ Sabah ເພື່ອເປີດບັນດາສາຍການບິນໂດຍກົງຈາກນະຄອນໂຮ່ຈິມີນ ເພື່ອປະຢັດເວລາໃຫ້ນັກທ່ອງທ່ຽວ. ກົມສົ່ງເສີມທ່ອງທ່ຽວ ມາເລເຊຍ ຈະເຮັດວຽກໂດຍກົງກັບບັນດາວິສາຫະກິດຢູ່ Sabah, ແລະ ໂຮງແຮມຕ່າງໆ ເພື່ອມີລາຍການສົ່ງເສີມການທ່ອງທ່ຽວໃຫ້ແກ່ນັກທ່ອງທ່ຽວ ຫວຽດນາມ.”
ດຳນ້ຳຊົມຫີນປະກາລັງ
ພາບ:tourist.com.vn
|
ນັກທ່ອງທ່ຽວທັງຫລາຍຖ້າຫາກໄປຄົ້ນຫາ, ທ່ອງທ່ຽວພະຈົນໄພນັ້ນ Sabah ຈະແມ່ນສະຖານທີ່ດຶງດູດນັກທ່ອງທ່ຽວດ້ວຍຈອມພູ Kinabalu ມີຄວາມສູງ 4.095 ແມັດ ແລະ ໄດ້ຮັບຖືວ່າ ແມ່ນ ຫລັງຄາເຮືອນ ອາຊີ ຕາເວັນອອກ ສ່ຽງໃຕ້. ສຳລັບ ຊາວທ້ອງຖິ່ນ, ສາຍພູ Kinabalu ແມ່ນສາຍພູທີ່ສັກສິດ. ເພື່ອຄົ້ນຫາສາຍພູທີ່ໃຫຍ່ໂຕມະໂຫຖານນີ້, ນັກປີນພູຕ້ອງກະກຽມຂອງກິນເຄື່ອງກິນ, ເຄື່ອງນອນ, ໂສ້ງເສື້ອເໝາະສົມ ພິເສດແມ່ນຮັບມືກັບອາກາດຫນາວໃນຍາມເຊົ້າຢູ່ຈອມພູ. ອາກາດດີສຸດເພື່ອປີນພູ Kinabalu ແມ່ນເດືອນ 4 ແລະ ໃນວັນເພງຈະເຮັດໃຫ້ນັກທ່ອງທ່ຽວຮູ້ສຶກປະທັບໃຈກວ່າເມື່ອໄດ້ເຫັນປະຈັກຕາຄວາມສວຍງາມຂອງທິວທັດທຳມະຊາດຢູ່ທີ່ນີ້.
Sabah ມີຝັ່ງທະເລຍາວກວ່າ 1.400 ກິໂລແມັດ ດ້ວຍເກາະນ້ອຍຫລາຍແຫ່ງ. ເກາະສ່ວນຫລາຍຖືກວາງແຜນຜັງເພື່ອຮັບໃຊ້ການທ່ອງທ່ຽວ ແລະ ອະນຸລັກຮັກສາສັດ, ພືດທີ່ຫາຍາກ. ນັກທ່ອງທ່ຽວ ບໍ່ພຽງແຕ່ມາອາບນ້ຳຢູ່ທະເລເທົ່ານັ້ນ ຫາກຍັງໄດ້ເຂົ້າຮ່ວມລາຍການດຳນ້ຳ, ພາຍເຮືອ ອີກດ້ວຍ. ເມື່ອມາຢ້ຽມຢາມບັນດາສະຖານທີ່ດຳນ້ຳຢູ່ Sabah, ນັກທ່ອງທ່ຽວຈະໄດ້ຮັບຊົມຫີນປະກາລັງຫລາຍປະເພດທີ່ສວຍງາມ. ນອກນັ້ນ ຢູ່ທີ່ນີ້ຍັງແມ່ນບ່ອນເພິ່ງພາອາໄສຂອງສັດນ້ຳຫາຍາກຫລາຍຊະນິດ ເຮັດໃຫ້ນັກທ່ອງທ່ຽວຮູ້ສຶກປະທັບໃຈເມື່ອມາທ່ອງທ່ຽວຢູ່ Sabah. ທ່ານນາງ ຟານຫວີງຫາຍ ໃຫ້ຮູ້ວ່າ:
“ເປັນຄັ້ງທຳອິດມາຢ້ຽມຢາມແຫ່ງນີ້ ຂ້າພະເຈົ້າຮູ້ສຶກມ່ວນຫລາຍ ເພາະວ່ານີ້ເປັນຄັ້ງທຳອິດໄດ້ເຂົ້າຮ່ວມບັນດາລາຍການກິລາທະເລທີ່ຈັບອົກຈັບໃຈ. ການເຄື່ອນໄຫວຄືແນວນີ້ຢູ່ຫວຽດນາມ ກໍມີ ແຕ່ບັນຍາກາດຢູ່ມາເລເຊຍ ແມ່ນແຕກຕ່າງຫລາຍ, ທິວທັດທຳມະຊາດກໍສວຍງາມ.”
ໄປຢ້ຽມຢາມ Sabah, ຜູ້ມັກໄປທ່ອງທ່ຽວທະເລເຄີຍຄົ້ນຫາເກາະນ້ອຍບາງແຫ່ງທີ່ສວຍງາມຢູ່ນອກຝັ່ງທະເລ Kota Kinabalu ຊື່ງຕ້ອງຂີ່ເຮືອກາໂນປະມານ 20 ນາທີຈຶ່ງຮອດ. ນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ ແຕ່ວຽກງານປົກປັກຮັກສາສິ່ງແວດລ້ອມຢູ່ເກາະແຫ່ງນີ້ແມ່ນເຂັ້ມງວດທີ່ສຸດ, ຫາດຊາຍທະເລຍາມໃດກໍສະອາດ, ບໍ່ມີຂີ້ເຫຍື້ອ, ມີຄວາມເປັນລະບຽບຮຽບຮ້ອຍ ແລະ ສະຫງົບ. ນັ້ນກໍແມ່ນສິ່ງທີ່ເຮັດໃຫ້ທຸກຄົນມາທ່ອງທ່ຽວຢູ່ Sabah ກໍລ້ວນແຕ່ຢາກກັບຄືນອີກ.