(vovworld)- ບໍລິການຈ່ອງລົດ taxi ຜ່ານໂທລະສັບທີ່ທັນສະໄຫມພວມໄດ້ຮັບການໝູນໃຊ້ ຈາກ ບັນດາປະເທດ ອາຊຽນ, ພິເສດແມ່ນຢູ່ ມາເລເຊຍ. ບໍລິການນີ້ໄດ້ປະກອບສ່ວນປັບປຸງຄຸນນະພາບຮັບໃຊ້ກໍຄືພາບພົດບໍລິການ taxi ຂອງ ມາເລເຊຍ ໃນສາຍຕາເພື່ອນມິດສາກົນ, ຊ່ວຍຍູ້ແຮງການພັດທະນາ ຂະແຫນງຂົນສົ່ງຂອງປະເທດ ມາເລເຊຍ.
ລົດ taxi ຢູ່ ມາເລເຊຍ
ພາບ:internet
|
ມີບາງໄລຍະ ບໍລິການຂົນສົ່ງ taxi ຂອງມາເລເຊຍ ໄດ້ຮັບຖືວ່າ: ຊ່ົວຮ້າຍທີ່ສຸດຢູ່ໃນໂລກ, ແລະ ເຄີຍໄດ້ຮັບການຕີລາຄາວ່າ: ຄ່າບໍລິການສູງໂພດ, ບໍ່ເປັນຕາເຊື່ອ. ແຕ່ສະພາບການນີ້ພວມໄດ້ຮັບການແກ້ໄຂ ແລະ ບັນດາ taxi ຂອງມາເລເຊຍ ໄດ້ສ້າງພາບພົດຄືນໃຫມ່ເທື່ອລະກ້າວ. ນີ້ແມ່ນໝາກຜົນຈາກບໍລິການຈ່ອງ taxi ຜ່ານໂທລະສັບມືຖືທີ່ທັນສະໄຫມ ຫຼືເອີ້ນວ່າ MyTeksi. ບໍລິການນີ້ໄດ້ຊ່ວຍໃຫ້ຜູ້ໂດຍສານເລືອກເຟັ້ນ taxi ທີ່ມີລາຄາເໝາະສົມ ແລະ ປອດໄພ. ນັບແຕ່ເປີດສະຫຼອງ MyTeksi, ບໍລິການຈ່ອງ taxi ໄດ້ຮັບນິຍົມໃຊ້ຫຼາຍກວ່າໝູ່ຢູ່ມາເລເຊຍໃນປະຈຸບັນ ແລະ ດຶງດູດຜູ້ເຂົ້າຊົມກວ່າ 400.000 ເທື່ອຄົນ. ຍັງມີບໍລິການອື່ນອີກທີ່ຄ້າຍຄືກັນ ນັ້ນແມ່ນ “ຈ່ອງ taxi ຢ່າງງ່າຍດາຍດ້ວຍ Brazil” ກໍມີຜູ້ເຂົ້າຊົມເຖິງ 90.000 ເທື່ອຄົນ ນັບແຕ່ເດືອນ 5/2013 ມາຮອດປະຈຸບັນ. ທ່ານນາງ Adelene Foo, ຜູ້ຄຸ້ມຄອງບໍລິການ MyTeksi ຢູ່ ມາເລເຊຍ ໃຫ້ຮູ້ວ່າ:
“ຄວາມປອດໄພແມ່ນຫນຶ່ງໃນບັນດາຄວາມສົນໃຈຕົ້ນຕໍຂອງຜູ້ໂດຍສານ ເມື່ອ ພວກຂ້າພະເຈົ້າປະຕິບັດການສຳຫລວດ. ແຕ່ເຮັດແນວໃດເພື່ອຮັບປະກັນຄວາມປອດໄພໃຫ້ແກ່ຜູ້ໂດຍສານ, ການບໍລິການດັ່ງກ່າວໄດ້ຊ່ວຍຜູ້ໂດຍສານຮູ້ຈັກໄດ້ວ່າ ຜູ້ຂັບລົດແມ່ນໃຜ ແລະ ມີຊື່ຫຍັງ, ໝາຍເລກປ້າຍລົດ, ນັບທັງໂທລະສັບຂອງຜູ້ຂັບລົດອີກ. ຜູ້ໂດຍສານສາມາດຕິດຕາມສາຍທາງເດີນຂອງ taxi ຊື່ງຕົນເອງໄດ້ຈ່ອງ. ເພາະວ່າ ຮູບພາບຂອງ taxi ນັ້ນຈະປະກົດອອກເທິງແຜນທີ່ ນັບທັງເວລາຜູ້ໂດຍສານພວມຢູ່ໃນລົດ. ຈາກນັ້ນຜູ້ໂດຍສານສາມາດແບ່ງປັນການເດີນທາງຂອງຕົນໃຫ້ໝູ່ເພື່ອນໄດ້.”
ຈ່ອງ taxi ຜ່ານ My Teksi ຫລື “ຈ່ອງ taxi ຢ່າງງ່າຍດາຍດ້ວຍ Brazil” ໂດຍອີງໃສ່ບັນດາບໍລິການໂທລະສັບທັນສະໄຫມທີ່ມີຢູ່ແລ້ວໃນໂທລະສັບມືຖື Iphone ແລະ ບັນດາອຸປະກອນອີງໃສ່ລະບົບ Android. ວິທີໃຊ້ກໍງ່າຍດາຍ. ຜູ້ໂດຍສານ ເຂົ້າລາຍການ, ຊອກຫາບ່ອນທີ່ຕົນຢາກໄປ. ຫລັງຈາກນັ້ນເຂົາເຈົ້າຈະຮູ້ຈັກລາຄາ ແລະ ສາຍທາງເດີນຢ່າງລະອຽດ. ຖ້າຕົກລົງລາຄາດັ່ງກ່າວ, ຊື່ຜູ້ຂັບລົດ, ໂທລະສັບ, ໝາຍເລກປ້າຍລົດ ຈະຖືກສົ່ງເຖິງ ຜູ້ໂດຍສານ. ບໍລິການດັ່ງກ່າວບໍ່ພຽງແຕ່ຊ່ວຍໃຫ້ຜູ້ໂດຍສານຮູ້ສຶກປອດໄພກວ່າເທົ່ານັ້ນ ຫາກຜູ້ຂັບລົດ ກໍໄດ້ຮັບຜົນປະໂຫຍດອີກດ້ວຍ. ຜູ້ຂັບລົດໃຫ້ຮູ້ວ່າ:
“ບໍລິການນີ້ແມ່ນສະດວກທີ່ສຸດໃຫ້ແກ່ພວກຂ້າພະເຈົ້າ. ບັນດາຄວາມຫຍຸ້ງຍາກເມື່ອໄປຊອກຫາ ຜູ້ໂດຍສານຕາມເສັ້ນທາງ ປະຈຸບັນ ບໍ່ມີອີກແລ້ວ.”
ບໍລິສັດຂົນສົ່ງ taxi ຫລາຍແຫ່ງຕີລາຄາວ່າ, ບໍລິການຈ່ອງ taxi ຜ່ານໂທລະສັບມືຖືທັນສະໄຫມ ໄດ້ຫລຸດຜ່ອນເວລາລໍຖ້າລົດຂອງຜູ້ໂດຍສານ ຈາກ 20 ນາທີ່ລົງເຫລືອພຽງ 5 ນາທີ່. ເລື່ອງຊັບຊ້ອນລົດກໍມີປະສິດທິຜົນກວ່າ ແລະ ປະຢັດນຳ້ມັນກວ່າ. ສະນັ້ນ ຕໍ່ຈາກຜົນສຳເລັດຢູ່ ມາເລເຊຍ, ບໍລິສັດຫລາຍແຫ່ງໄດ້ໝູນໃຊ້ບໍລິການດັ່ງກ່າວ. ແລະ My Teksi ໄດ້ຮັບການເປີດກວ້າງ ໄປສູ່ບັນດາປະເທດ ອາຊຽນຄື: ຟິລິບປີນ, ໄທ, ອິນໂດເນເຊຍ ແລະ ຊ້ຳບໍ່ຫນຳຢູ່ຕະຫລາດທີ່ມີຄວາມຕ້ອງການສູງຄື ສິງກະໂປອີກດ້ວຍ.