(vovworld)- ໃນໄລຍະມໍ່ໆມານີ້, ການເຊື່ອມໂຍງເຂົ້າກັບເສດຖະກິດ ອາຊຽນ ແມ່ນບັນຫາບໍ່ພຽງແຕ່ຫວຽດນາມ ມີຄວາມສົນໃຈເທົ່ານັ້ນ ຫາກນັບທັງບັນດາປະເທດໃນພາກພື້ນອາຊຽນອີກດ້ວຍ, ສິ່ງດັ່ງກ່າວສະແດງອອກຜ່ານເລື່ອງ ບັນດາປະເທດອາຊຽນ ຕັ້ງຫນ້າຜັນຂະຫຍາຍການເຄື່ອນໄຫວກະກຽມສ້າງຕັ້ງປະຊາຄົມເສດຖະກິດ ອາຊຽນ (AEC) ໃນປີ 2015. ເພື່ອກະກຽມໃຫ້ແກ່ການສ້າງຕັ້ງ AEC, ຫວຽດນາມ ໄດ້ຊຸກຍູ້ບັນດາການເຄື່ອນໄຫວພົວພັນແລກປ່ຽນທາງດ້ານເສດຖະກິດ, ການຄ້າ, ສົ່ງເສີມການລົງທຶນຄື: ຈັດຕັ້ງບັນດາເວທີປາໄສ, ງານຕະຫລາດນັດ, ໂຄສະນາ. ຫວ່າງແລ້ວນີ້, ງານຕະຫລາດນັດການຄ້າສາກົນ ຫວຽດນາມ ຄັ້ງທີ 25 – Vietnam Expo 2015 ດ້ວຍຫົວຂໍ້ “ຮ່ວມມືມຸ່ງໄປເຖິງປະຊາຄົມເສດຖະກິດ ອາຊຽນ” ດຳເນີນໄປແຕ່ວັນທີ 15-18/4/2015 ຢູ່ ນະຄອນຫລວງ ຮ່າໂນ້ຍ ໄດ້ດຶງດູດການເຂົ້າຮ່ວມຂອງວິສາຫະກິດພາຍໃນ ແລະ ຕ່າງປະເທດຫລາຍແຫ່ງ.
ພິທີໄຂງານຕະຫລາດນັດ
ພາບ:vov
|
ງານຕະຫລາດນັດ ມີຮ້ານວາງສະແດງສິນຄ້າຂອງ 600 ກວ່າວິສາຫະກິດທີ່ມາຈາກ 28 ປະເທດ ແລະ ເຂດແຄ້ວນ ຄື: ລາວ, ໄທ, ຈີນ, ກູບາ, ໄຕ້ຫວັນ(ປະເທດຈີນ), ສິງກະໂປ, ຫວຽດນາມ… ບັນດາປະເພດສິນຄ້າທີ່ງານຕະຫລາດນັດ ແມ່ນມີຫລາຍຮູບຫລາຍແບບ, ຈາກກົນຈັກ, ອຸປະກອນໄຟຟ້າ, ເຄື່ອງອາໄຫຼ່ຕະຫລອດຮອດເຄື່ອງໃຊ້ສອຍໃນຄອບຄົວ ແລະ ບັນດາຜະລິດຕະພັນສົ່ງເສີມສຸຂະພາບ, ບໍລິການ…
ງານຕະຫລາດນັດຄັ້ງນີ້ ແບ່ງເປັນ 3 ເຂດຄື: ເຂດວາງສະແດງຜະລິດຕະພັນໝູນໃຊ້ເຕັກໂນໂລຊີຂໍ້ມູນຂ່າວສານ, ສົ່ງເສີມການຄ້າ, ຫນູນຊ່ວຍການອອກແບບ, ເຂດວາງສະແດງຜະລິດຕະພັນຂອງຫວຽດນາມ ແລະ ສເກົາຫລີ ແລະ ພິເສດ ແມ່ນເຂດວາງສະແດງສິນຄ້າຂອງບັນດາປະເທດມີການພົວພັນແບບພິເສດກັບຫວຽດນາມຄື: ລາວ, ໄທ, ກຳປຸເຈຍ, ກູບາ, ມຽນມາ… ທ່ານນາງ ຕັງສີຣີໄພບອນ, ຜູ້ອຳນວຍການບໍລິສັດ fashions Kingkaew ປະເທດໄທ ແບ່ງປັນວ່າ:
ສຽງທ່ານນາງ
ຮ້ານວາງສະແດງເຄື່ອງເອ້ປະດັບເຮັດດ້ວຍເງິນ, ຄຳຂອງລາວ ແມ່ນຮ້ານທີ່ດຶງດູດແຂກເຂົ້າຊົມຫລາຍສຸດ. ບໍລິສັດຂາເຂົ້າຂາອອກເງິນຄຳ Lao Gem&Jewwelry ໄດ້ເອົາໃຈໃສ່ເຖິງການຫນູນຊ່ວຍອອກແບບ ແລະ ຊອກຫາຄູ່ຄ້າໃນຂະແຫນງຜະລິດເຄື່ອງເອ້ປະດັບແກ້ວມານີ. ດ້ວຍຜະລິດຕະພັນນັບຮ້ອຍໆຢ່າງ ທີ່ມີລາຄາ ຈາກ 10 -200 USD, ບັນດາຜະລິດຕະພັນນີ້ ມີຄຸນນະພາບດີ ແລະ ງາມ, ເໝາະສົມກັບຄວາມສາມາດຂອງຜູ້ໃຊ້ສອຍ. ທ່ານ ບຸນປະສົງ ມຸດທະພາ, ຜູ້ອຳນວຍການບໍລິຫານບໍລິສັດ ແບ່ງປັນວ່າ:
ສຽງທ່ານບຸນປະສົງ
ບັນດາວິສາຫະກິດ ຫວຽດນາມ ເຂົ້າຮ່ວມ Vietnam Expo 2015 ລ້ວນແຕ່ປາດຖະຫນາວ່າ ນອກຈາກແນະນຳບັນດາຜະລິດຕະພັນໂດຍກົງເຖິງລູກຄ້າ, ໂຄສະນາເຄື່ອງໝາຍການຄ້າແລ້ວ, ຈະລົງນາມໃນສັນຍາການຄ້າຫລາຍສະບັບກັບຄູ່ຄ້າ, ເປີດກວ້າງຕະຫລາດສົ່ງອອກ, ໄດ້ພົບປະ, ຖອດຖອນບົດຮຽນກັບບັນດາວິສາຫະກິດມາຈາກຫລາຍປະເທດ. ທ່ານນາງ ຟ້າມທິບີກງອກ, ຜູ້ອຳນວຍການບໍລິສັດ Kona ຈຳກັດ ໃຫ້ຮູ້ວ່າ:
“ນີ້ແມ່ນໂອກາດເພື່ອພົວພັນແລກປ່ຽນກັບຄູ່ຄ້າສາກົນ ສະນັ້ນ ພວກຂ້າພະເຈົ້າຢາດໄດ້ພົບປະ ແລະ ຊອກຮູ້ຄູ່ຮ່ວມມືຕ່າງປະເທດ. ນີ້ກໍແມ່ນງານຕະຫລາດນັດຂະຫນາດໃຫຍ່ ທີ່ໄດ້ຮັບຄວາມສົນໃຈຈາກວິສາຫະກິດພາຍໃນປະເທດຫລາຍແຫ່ງ. ເຂົ້າຮ່ວມງານຕະຫລາດນັດຄັ້ງນີ້ ພວກຂ້າພະເຈົ້າກໍຢາກໂຄສະນາບັນດາຜະລິດຕະພັນໃຫມ່ເຖິງຜູ້ໃຊ້ສອຍ.”
ໃນຂອບເຂດ Vietnam Expo 2015 ຍັງມີການເຄື່ອນໄຫວຫລາຍຢ່າງຄື: ເວທີປາໄສສົ່ງເສີມການສົ່ງອອກ, ກອງປະຊຸມສຳມະນາຫົວເລື່ອງສະເພາະ, ການພົບປະສົນທະນາສົ່ງເສີມການຄ້າ ລະຫວ່າງວິສາຫະກິດຫວຽດນາມ ແລະ ສາກົນ, ພິທີລົງນາມບັນດາສັນຍາພົ້ນເດັ່ນ, ລາຍການຢ້ຽມຢາມເຂດອຸດສາຫະກຳ.. ດ້ວຍຈຸດປະສົງພົວພັນແລກປ່ຽນການຄ້າ, ເພີ່ມທະວີການຮ່ວມມືດ້ານເສດຖະກິດ ລະຫວ່າງຫວຽດນາມກັບປະເທດຕ່າງໆ ຕາມຫລັກການແລກປ່ຽນຮ້ານວາງສະແດງສິນຄ້າຢູ່ງານຕະຫລາດນັດຂອງບັນດາປະເທດ, ງານຕະຫລາດນັດຄັ້ງນີ້ ເອົາໃຈໃສ່ເຖິງບັນດາປະເທດສະມາຊິກ ອາຊຽນ ເພື່ອເພີ່ມທະວີການພົວພັນແລກປ່ຽນ, ເຊື່ອມຕໍ່ເສດຖະກິດ, ສ້າງເງື່ອນໄຂສະດວກໃຫ້ແກ່ຫວຽດນາມໃນການສ້າງປະຊາຄົມເສດຖະກິດ ອາຊຽນໃນທ້າຍປີ 2015.