(vovworld) - ໃນຍຸດທະສາດດຳເນີນທຸລະກິດຂອງຕົນ, ກຸ່ມບໍລິສັດໂທລະຄົມ ກອງທັບ ຫວຽດນາມ (Viettel) ຍາມໃດກໍເອົາໃຈໃສ່ເປີດກວ້າງ ແລະ ພັດທະນາການດຳເນີນທຸລະກິດອອກສູ່ບັນດາປະເທດໃນພາກພື້ນ, ພິເສດແມ່ນປະເທດບ້ານໃກ້ເຮືອນ ຄືລາວ ແລະ ກຳປູເຈຍ. ພາຍຫລັງ 3 ປີແຫ່ງການຮ່ວມມືລົງທຶນຢູ່ ລາວ, Viettel ບໍ່ພຽງແຕ່ນຳມາເຊິ່ງລາຍຮັບໃຫ້ແກ່ວິສາຫະກິດຂອງຕົນເທົ່ານັ້ນ ຫາກຍັງປະກອບສ່ວນດີພໍສົມຄວນໃຫ້ແກ່ກິດຈະການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ເພີ່ມທະວີການຮັບປະກັນຊີວິດສັງຄົມຂອງ ລາວ ອີກດ້ວຍ.
ເມື່ອຄົ້ນຄ້ວາຕະຫລາດ ລາວ, Viettel ເຫັນວ່າ ລາວ ແມ່ນຕະຫລາດນ້ອຍ, ພົນລະເມືອງຫນ້ອຍ, ປະຊາຊົນດຳລົງຊີວິດກະແຈກກະຈາຍ, ພູມສັນຖານສ່ວນຫລາຍແມ່ນປ່າໄມ້ ນັ້ນແມ່ນສິ່ງທ້າທາຍສຳລັບບັນດາວິສາຫະກິດເມື່ອລົງທຶນເຂົ້າຂົງເຂດໂທລະຄົມ. ຄຽງຄູ່ກັນນັ້ນ, ການມີຫນ້າຂອງ 4 ບໍລິສັດໂທລະຄົມທີ່ພວມເຄື່ອນໄຫວມາໄດ້ຫຼາຍປີຢູ່ ລາວ ເຊັ່ນ: LaoTelecom, Tigo, Enterprice Telecomlao ແລະ AsiaTelecom ກໍແມ່ນສິ່ງກີດຂວາງສຳລັບ Viettel. ເຖິງຢ່າງໃດກໍຕາມ, ພາຍຫລັງໄຈ້ແຍກຕະຫລາດລາວຢ່າງລະອຽດ, Viettel ຖືວ່າ: ລາວ ຍັງຄົງແມ່ນກາລະໂອກາດເພື່ອໃຫ້ Viettel ຕັດສິນໃຈລົງທຶນເຂົ້າລາວ. ເພາະວ່າ ລາວ ແລະ ຫວຽດນາມ ມີຈຸດທີ່ຄ້າຍຄືກັນຫລາຍຢ່າງ; ພູມີປະເທດກໍໃກ້ກັນ; ນອກນັ້ນ 4 ບໍລິສັດດັ່ງກ່າວລ້ວນແຕ່ບໍ່ທັນລົງທຶນສາຍສົ່ງດ້ວຍສາຍໄຍແກ້ວ, ໃນຂະນະນັ້ນ ເລ່ືອງຜັນຂະຫຍາຍພື້ນຖານໂຄງລ່າງໂທລະຄົມດ້ວຍສາຍໄຍແກ້ວ ພັດແມ່ນທ່າແຮງຂອງ Viettel. ພົນຈັດຕະວາ ເຢືອງວັນຕີງ, ຮອງຜູ້ອຳນວຍການໃຫຍ່ Viettel ແບ່ງປັນວ່າ “ພາຍຫລັງຄົ້ນຄ້ວາ 4 ບໍລິສັດໂທລະຄົມດັ່ງກ່າວ, ພວກຂ້າພະເຈົ້າເຫັນວ່າ ເຂົາເຈົ້າສ່ວນຫລາຍນຳໃຊ້ລະບົບສົ່ງສັນຍານຜ່ານດາວທຽມ, ດ້ວຍ viba ພາໃຫ້ລາຄາແພງ, ຄຸນນະພາບບໍ່ສູງ. ນີ້ກໍແມ່ນຄວາມສະດວກເພື່ອໃຫ້ Viettel ລົງທຶນເຂົ້າລາວ. ນອກນັ້ນ ດ້ວຍປະສົບການຂອງຕົນໃນການຜັນຂະຫຍາຍສາຍໄຍແກ້ວ ພິເສດແມ່ນເຖິງບັນດາເຂດຫ່າງໄກສອກຫລີກ, ເຂດຊາຍແດນ, ໝູ່ເກາະ ຢູ່ ຫວຽດນາມ. ສະນັ້ນ ເມື່ອລົງທຶນຢູ່ລາວ ພວກຂ້າພະເຈົ້າໄດ້ໝູນໃຊ້ບັນດາບົດຮຽນຈາກຫວຽດນາມເພື່ອຜັນຂະຫຍາຍຢູ່ຕະຫລາດລາວ.”
ພົນຈັດຕະວາ ເຢືອງວັນຕີງ, ຮອງຜູ້ອຳນວຍການໃຫຍ່ Viettel
ພາບ:viettel.com.vn
|
ເມື່ອລົງທຶນເຂົ້າຕະຫລາດລາວ, ກຸ່ມບໍລິສັດໂທລະຄົມກອງທັບ ຫວຽດນາມ (Viettel) ໄດ້ຮ່ວມມືກັບບໍລິສັດໂທລະຄົມກອງທັບ ລາວ (LaoAsiaTelecom) ສ້າງຕັ້ງບໍລິສັດຮ່ວມທຸລະກິດໂທລະຄົມ Unitel. ພາຍຫລັງເຄື່ອນໄຫວມາເປັນເວລາ 3 ປີ, Unitel ໄດ້ລົງທຶນກໍ່ສ້າງລະບົບພື້ນຖານໂຄງລ່າງດ້ານເຕັກນິກ ດ້ວຍສະຖານີສົ່ງສັນຍານ 2G ແລະ 3G ປະມານ 2.500 ແຫ່ງ, ສັນຍານສາມາດປົກຄຸມໄປທົ່ວທຸກເມືອງ. ຈຳນວນປະຊາຊົນລາວ ນຳໃຊ້ເຄືອຄ່າຍ Unitel ບັນລຸ 2,8 ລ້ານຄົນ, ປະກອບສ່ວນຍົກຈຳນວນຜູ້ນຳໃຊ້ການບໍລິການເຄື່ອນທີ່ຢູ່ປະເທດລາວຈາກ 20% ຂຶ້ນເຖິງ 70%. ສະນັ້ນ Unitel ໄດ້ກາຍເປັນເຄື່ອຂ່າຍໂທລະຄົມໃຫຍ່ກວ່າໝູ່ຢູ່ ລາວ ນັບທັງຈຳນວນລູກຄ້າ, ຂອບເຂດຮັບສັນຍານ ແລະ ລາຍຮັບ.
ໂດຍບໍ່ພໍໃຈຕໍ່ສິ່ງດັ່ງກ່າວ, ໃນແຜນການພັດທະນາດຳເນີນທຸລະກິດສຳລັບໄລຍະຕໍ່ໄປ, Viettel ສືບຕໍ່ລົງທຶນເຂົ້າພື້ນຖານໂຄງລ່າງໂທລະຄົມຢູ່ ລາວ, ເປີດກວ້າງເຄືອຂ່າຍສາຍໄຍແກ້ວ, ສ້າງບໍລິການ… ຫລາຍຢ່າງເພື່ອຮັບໃຊ້ປະຊາຊົນລາວ. ພົນຈັດຕະວາ ເຢືອງວັນຕີງ, ຮອງຜູ້ອຳນວຍການໃຫຍ່ Viettel ໃຫ້ຮູ້ວ່າ:
“ແຜນການຂອງ Viettel ໃນໄລຍະຈະມາເຖິງ ແມ່ນເຮັດແນວໃດເພື່ອໃຫ້ສັນຍານປົກຄຸມໄປທົ່ວທຸກບ້ານ, ກ້າວໄປເຖິງການໝູນໃຊ້ຄວາມກ້າວຫນ້າດ້ານຂໍ້ມູນຂ່າວສານ ເພື່ອຊ່ວຍ ລາວ ສຳພັດກັບວິທະຍາສາດເຕັກນິກທີ່ທັນສະໄຫມ. ພ້ອມທັງ ຍູ້ແຮງການບໍລິການຕ່າງໆເພື່ອຮັບໃຊ້ຊີວິດທາງສັງຄົມທຸກດ້ານແນໃສ່ ຮັບໃຊ້ຄວາມຮຽກຮ້ອງຕ້ອງການຂອງປະຊາຊົນ ເຮັດໃຫ້ການເຄື່ອນໄຫວດຳເນີນທຸລະກິດນັບມື້ນັບພັດທະນາ ແລະ ປະກອບສ່ວນເຂົ້າໃນພາລະກິດພັດທະນາເສດຖະກິດສັງຄົມຂອງປະເທດລາວໃຫ້ຫລາຍກວ່າ.”
WCA ມອບລາງວັນໂທລະຄົມໂລກໃຫ້ແກ່ Unitel
ພາບ: internet
|
ດ້ວຍທິດນຳທີ່ວ່າ “ດຳເນີນທຸລະກິດຕິດພັນກັບຄວາມຮັບຜິດຊອບຕໍ່ສັງຄົມ”, ໃນຊຸມປີຜ່ານມາ, Unitel ໄດ້ຜັນຂະຫຍາຍວຽກງານສັງຄົມຫລາຍໂຄງການຢ່າງມີປະສິດທິຜົນຄື: ເຊື່ອມຕໍ່ບໍລິສັດອິນເຕີແນັດໂດຍບໍ່ເສຍຄ່າໃຫ້ແກ່ໂຮງຮຽນ ແລະ ຮາກຖານສຶກສາກວ່າ 600 ແຫ່ງ , ຜັນຂະຫຍາຍລະບົບຖ່າຍທອດສົດທາງໂທລະພາບຜ່ານດາວທຽມກັບ 24 ແຫ່ງໃນທົ່ວປະເທດ. ນອກນນັ້ນ Unitel ຍັງຊ່ວຍເຫຼືອກໍ່ສ້າງໂຮງໝໍ 2 ແຫ່ງໃຫ້ແກ່ແຂວງອັດຕະປື, ສະຫນັບສະຫນູນປະຊາຊົນຖືກໄພນ້ຳຖ້ວມ, ຊ່ວຍເຫລືອເຄື່ອງຄອມພິວເຕີ, ອຸປະກອນເຊື່ອມຕໍ່ອິນເຕີແນດໃຫ້ແກ່ບັນດາຫົວຫນ່ວຍທະຫານ … ດ້ວຍມູນຄ່າກວ່າ 2, 8 ລ້ານ USD. ການເຄື່ອນໄຫວຂອງ Unitel ຢູ່ຕະຫລາດລາວໄດ້ສ້າງຄວາມປະທັບໃຈຫລາຍຢ່າງ ແລະ ໄດ້ຮັບການຕີລາຄາສູງ. ພັນໂທ ອຸລະຫາ ທອງວັນທາ, ປະທານສະພາບໍລິຫານບໍລິສັດ Lao Asia Telecom ໄດ້ໃຫ້ຂໍ້ສັງເກດວ່າ:
ສຽງທ່ານ ອຸລະຫາ ທອງວັນທາ
ຍ້ອນບັນລຸໄດ້ບັນດາຜົນງານດັ່ງກ່າວຢູ່ຕະຫລາດ ລາວ, ວັນທີ 13/11/2012 ຜ່ານມາ, ເຄື່ອຂ່າຍໂທລະຄົມ Unitel ຈຶ່ງໄດ້ຮັບລາງວັນໂທລະຄົມໂລກ (World Communication Award WCA) ແມ່ນໜຶ່ງໃນຈຳນວນບໍລິສັດໂທລະຄົມດີກວ່າໝູ່ຢູ່ບັນດາຕະຫລາດພວມພັດທະນາ. ກ່ອນຫນ້ານັ້ນ, ປີ 2011, Metfone ເຊິ່ງແມ່ນ ເຄື່ອງໝາຍຂອງ Viettel ຢູ່ ກຳປູເຈຍ ກໍໄດ້ຮັບລາງວັນປະເພດດັ່ງກ່າວ. ຕາມພົນຈັດຕະວາ ເຢືອງວັນຕີງ, ຮອງຜູ້ອຳນວຍການບໍລິສັດ Viettel ແລ້ວ: ຜົນສຳເລັດຂອງ Viettel ຢູ່ ຕະຫລາດ ລາວ ແລະ ກຳປູເຈຍ ແມ່ນພື້ນຖານເພື່ອໃຫ້ Viettel ເປີດກວ້າງການລົງທຶນອອກສູ່ຕ່າງປະເທດ, ພິເສດ ແມ່ນບັນດາປະເທດໃນພາກພື້ນ, ເພື່ອນຳມາເຊິ່ງຜົນປະໂຫຍດ້ານເສດຖະກິດ ພ້ອມທັງປະກອບສ່ວນຮັດແຄບຊ່ອງຫວ່າງການພັດທະນາລະຫວ່າງບັນດາປະເທດ ອາຊຽນ./.