(vovworld)- ເອື້ອຍ ປານອມ, ປີນີ້ມີອາຍຸ 31 ປີ ຄົນເຈັບທີ່ມາຈາກລາວ ຫາກໍ່ຜ່ານ ການຜ່າຕັດກ້ອນເບົ້າມົດລູກ ມາເປັນເວລາກວ່າ ເດືອນຫນຶ່ງແລ້ວ. ສຸຂະພາບຂອງເອື້ອຍພວມຄ່ອຍໆກັບຄືນສູ່ປົກກະຕິ ແລະ ເອື້ອຍເລີ່ມກັບຄືນສູ່ວຽກງານດຳເນີນທຸລະກິດຂອງຕົນ. ເອື້ອຍມີຄວາມເພິ່ງພໍໃຈ ເມື່ອການຜ່າຕັດປະສົບສຳເລັດຜົນ ແລະ ເວລາປິ່ນປົວຢູ່ຫວຽດນາມ ຍາມໃດເອື້ອຍກໍໄດ້ຮັບຄວາມເອົາໃຈໃສ່ຢ່າງສຸດຈິດສຸດໃຈຈາກບັນດານາງພະຍາບານ, ທ່ານໝໍ. ຜ່ານນັ້ນ ເອື້ອຍຍິ່ງມີຄວາມເຊື່ອໝັ້ນວ່າ, ຄວາມຕັດສິນຂອງຕົນເມື່ອໄປປິ່ນປົວພະຍາດຢູ່ຫວຽດນາມ ແມ່ນຖືກຕ້ອງ.
ເອື້ອຍ ປານອມ
ເອື້ອຍ ປານອມ ຕິດພະຍາດມົດລູກກະດັນກ່ອນນີ້ເຄິ່ງປີ, ເວລານັ້ນ ກ້ອນເບົ້າຍັງນ້ອຍ ແລະ ໄດ້ສົ່ງສະທ້ອນຕໍ່ຊີວິດຂອງເອື້ອຍ. ເມື່ອໄປກວດພະຍາດຢູ່ລາວ ແລະ ໄທ, ເອື້ອຍຈຶ່ງຮູ້ໄດ້ວ່າ ພະຍາດຂອງຕົນແມ່ນຫນັກພໍສົມຄວນ ມີພຽງແຕ່ວິທີຫນຶ່ງດຽວ ນັ້ນແມ່ນຕ້ອງຜ່າຕັດເອົາມົດລູກອອກ. ເມື່ອໄປກວດພະຍາດຢູ່ໂຮງໝໍເອກະຊົນຢູ່ລາວ ເອື້ອຍໄດ້ຮັບການແນະນຳຈາກທ່ານໝໍວ່າ ຄວນໄປປິ່ນປົວຢູ່ໂຮງໝໍ Saint Paul ຫວຽດນາມ .
ສຽງເອື້ອຍປານອມ
ພາຍຫລັງມື້ຫນຶ່ງປະກອບເອກະສານເຂົ້ານອນໂຮງໝໍ, ບັນດາທ່ານໝໍໄດ້ດຳເນີນການຜ່າຕັດໃຫ້ເອື້ອຍ. ການຜ່າຕັດແມ່ນແກ່ຍາວເປັນເວລາ 4 ຊົ່ວໂມງ ໄດ້ປະສົບຜົນສຳເລັດຢ່າງດີງາມ. ໃນເວລານອນໂຮງໝໍ, ບັນດານາງພະຍາບານທ່ານໝໍຢູ່ໂຮງໝໍ Saint Paul ຍາມໃດກໍລະດົມກຳລັງໃຈ ແລະ ຢື້ຢາມຖາມຂ່າວ ເຮັດໃຫ້ເອື້ອຍພ້ອມກັບຄອບຄົວຮູ້ສຶກສະເທືອນໃຈທີ່ສຸດ.
ສຽງເອື້ອຍປານອມ
ຄ່າໃຊ້ຈ່າຍໃນການຜ່າຕັດ ແລະ ຄ່າບໍລິການຕ່າງໆເມື່ອເອື້ອຍນອນໂຮງໝໍໃນເວລາ 8 ມື້ ແມ່ນ 27 ລ້ານດົງ. ເຖິງວ່າ ຈຳນວນເງິນດັ່ງກ່າວແມ່ນສູງທົບສອງເທົ່າເມື່ອທຽບກັບຄ່າໃຊ້ຈ່າຍໃຫ້ແກ່ການຜ່າຕັດພະຍາດນີ້ຢູ່ລາວກໍຕາມ ແຕ່ເອື້ອຍເຫັນວ່າ ມັນເໝາະສົມ. ບໍ່ພຽງແຕ່ເອື້ອຍ ປານອມເທົ່ານັ້ນ ຫາກຍັງມີຊາວລາວຫລາຍຄົນກໍເລືອກເຟັ້ນຫວຽດນາມ ແມ່ນສະຖານທີ່ເພື່ອໄປກວດ ແລະ ປິ່ນພະຍາດ, ໃນນັ້ນ ມີອ້າຍ ທອງແກ້ວ. ເຖິງວ່າ ອາຍຸຫາກໍ 33 ປີ ກໍຕາມ ແຕ່ຍ້ອນຄວາມຊິນເຄີຍໃນການກິນດື່ມບໍ່ສະໝ່ຳສະເຫມີແລະ ບໍ່ ອອກກຳລັງກາຍ. ສະນັ້ນ ກ່ອນນີ້ ຫນຶ່ງປີ ອ້າຍທອງແກ້ວຖືກເປັນພະຍາດເສັ້ນເລືອດອຸດຕັນຢູ່ຂາ, ເຮັດໃຫ້ຂາເບື້ອງຊ້າຍຂອງອ້າຍນັບມື້ນັບເຈັບຫນັກ ແລະໄປມາບໍ່ໄດ້. ອ້າຍໄດ້ໄປກວດ ແລະ ປິ່ນປົວພະຍາດຢູ່ຫລາຍແຫ່ງ ແຕ່ບໍ່ໄດ້ຮັບຜົນ. ສະນັ້ນ ອ້າຍຕັດສິນໃຈໄປຫວຽດນາມ ເພື່ອກວດ ແລະ ປິ່ນປົວພະຍາດຢູ່ໂຮງໝໍກອງທັບ 108.
ສຽງທອງແກ້ວ
ອ້າຍ ລາທອງແກ້ວ ພ້ອມກັບຄອບຄົວ
ບັນດາຄົນເຈັບລາວ ມາຮ່າໂນ້ຍ ເຄີຍເລືອກເຟັ້ນບັນດາໂຮງໝໍໃຫຍ່, ມີອິດທິພົນຊື່ສຽງຄື: ໂຮງໝໍກອງທັບ 108, ໂຮງໝໍແບກມາຍ, ຫວຽດດືກ, ໂຮງໝໍປະສູດ. ທ່ານໝໍ ເກືອງ ຊື່ງແມ່ນທ່ານໝໍຫນຸ່ມທີ່ມີຄວາມເກັ່ງກ້າສາມາດ ແລະ ກໍແມ່ນທ່ານໝໍປະຕິບັດການຜ່າຕັດໃຫ້ເອື້ອຍ ປານອມ ໄດ້ອະທິບາຍສາຍເຫດທີ່ຄົນເຈັບລາວເລືອກເຟັ້ນບັນດາໂຮງໝໍຢູ່ຫວຽດນາມເພື່ອກວດ ແລະ ປິ່ນປົວພະຍາດ.
“ທຳອິດ ບັນດາທ່ານໝໍຫວຽດນາມມີປະສົບການທີ່ດີ ແລະ ແມ່ນນອນໃນ Top ທ່ານໝໍນຳຫນ້າໃນພາກພື້ນ. ລະດັບວິຊາຊີບຂອງບັນດາທ່ານໝໍ ຫວຽດນາມ ແມ່ນທັດທຽມກັບທ່ານໝໍ ສິງກະໂປ ແຕ່ລາຄາປິ່ນປົວຢູ່ ຫວຽດນາມ ແມ່ນຖືກກວ່າຢ່າງຫນ້ອຍສຸດ 5-6 ເທົ່າ. ຄົນເຈັບລາວ ມາຫວຽດນາມ ປິ່ນປົວພະຍາດສ່ວນຫລາຍແມ່ນເປັນພະຍາດ ກ້ອນເບົ້າ, ພະຍາດຍິງ…. ນອກຈາກມາປິ່ນປົວແລ້ວ ຍັງມີຊາວລາວຫລາຍຄົນມາຫວຽດນາມເພື່ອກວດພະຍາດທົ່ວໄປ.”
ລາຍຈ່າຍຕ່ຳ, ລະດັບວິຊາຊີບຂອງທ່ານໝໍດີ ແລະ ສຸດຈິດສຸດໃຈຕໍ່ຄົນເຈັບ ນັ້ນແມ່ນບັນດາສາຍເຫດເຮັດໃຫ້ນັບມື້ນັບມີຄົນເຈັບລາວ ຫລາຍຄົນ ເລືອກເຟັ້ນຫວຽດນາມ ແມ່ນສະຖານທີ່ໄປກວດ ແລະ ປິ່ນປົວພະຍາດ. ຕາມຕົວເລກພະແນກສາທາລະນະສຸກ ຮ່າໂນ້ຍແລ້ວ, ປີ 2015 ມີຄົນເຈັບລາວ ມາກວດ ແລະ ປິ່ນປົວພະຍາດຢູ່ບັນດາໂຮງໝໍໃຫຍ່ ທີ່ຮ່າໂນ້ຍ ກວ່າ 300 ຄົນ, ເພີ່ມຂຶ້ນ 20% ເມື່ອທຽບໃສ່ປີ 2014.