(vovworld)- ນັບແຕ່ເມື່ອກາຍເປັນສະມາຊິກ ອາຊຽນ ຢ່າງເປັນທາງການໃນປີ 1995, ຍາມໃດ ອາຊຽນ ກໍແມ່ນຫນຶ່ງໃນບັນດາຄູ່ຮ່ວມມືດ້ານການຄ້າສຳຄັນຕົ້ນຕໍ ແລະ ແມ່ນກຳລັງຫນູນຊ່ວຍໃຫ້ຫວຽດນາມ ຮັກສາລະດັບເຕີບໂຕເສດຖະກິດ. ຄວາມຈິງປະຈຸບັນໄດ້ພິສູດໃຫ້ເຫັນວ່າ ການຕັດສິນເຂົ້າເປັນສະມາຊິກ ອາຊຽນ ແມ່ນບາດກ້າວຫັນປ່ຽນສຳຄັນຊ່ວຍໃຫ້ຫວຽດນາມ ບັນລຸໄດ້ຜົນງານຫລາຍຢ່າງໃນກິດຈະການພັດທະນາເສດຖະກິດສັງຄົມ ແລະ ເຊື່ອມໂຍງເຂົ້າກັບພາກພື້ນ ແລະ ໂລກຢ່າງເລິກເຊິ່ງກວ້າງຂວາງກວ່າ.
 |
ຕາມຕົວເລກຂອງກະຊວງອຸດສາຫະກຳ ແລະ ການຄ້າຫວຽດນາມ ແລ້ວ, ໃນຊຸມປີມໍ່ໆມານີ້, ຍາມໃດອາຊຽນ ກໍແມ່ນຕະຫລາດສົ່ງອອກໃຫຍ່ອັນດັບ 3 ແລະ ພ້ອມທັງແມ່ນຄູ່ຮ່ວມມືສະຫນອງສິນຄ້າໃຫຍ່ອັນດັບ 2 ຂອງຫວຽດນາມ. ວົງເງິນການຄ້າສອງສົ້ນ ຫວຽດນາມ - ອາຊຽນ ໃນປີ 2013 ບັນລຸ 39,7 ຕື້ USD, ເພີ່ມຂຶ້ນທົບ 5 ເທົ່າ ເມື່ອທຽບໃສ່ປີ 2003, ແລະ ກວມປະມານ 15% ຍອດວົງເງິນຂາເຂົ້າຂາອອກຂອງຫວຽດນາມ. ຄຽງຄູ່ກັນນັ້ນ ບັນດາປະເທດ ອາຊຽນ ກໍກາຍເປັນສະຖານທີ່ດູດດື່ມບັນດານັກລົງທຶນຫວຽດນາມ, ພິເສດ ແມ່ນລາວ ແລະ ກຳປູເຈຍ, ດ້ວຍຈຳນວນເງິນລົງທຶນເຂົ້າ 2 ຕະຫລາດນີ້ ຮອດເດືອນ 4/2015 ແມ່ນປະມານກວ່າ 7 ຕື້ USD, ກວມກວ່າ 35,5% ຍອດຈຳນວນເງິນລົງທຶນຢູ່ຕ່າງປະເທດຂອງຫວຽດນາມ. ຍ້ອນການຮ່ວມມືທາງດ້ານເສດຖະກິດ, ການຄ້າ ລະຫວ່າງ ຫວຽດນາມ ແລະ ອາຊຽນ ນັບມື້ນັບໄດ້ຮັບການເປີດກວ້າງ ໄດ້ປະກອບສ່ວນບໍ່ຫນ້ອຍເຂົ້າໃນການ ນຳຫວຽດນາມ ຈາກປະເທດພັດທະນາຊັກຊ້າ ກາຍເປັນປະເທດມີລາຍຮັບປານກາງ ແລະ ມີແງ່ຫວັງ. ຖ້າຫາກປີ 1995, GDP ຂອງຫວຽດນາມ ບັນລຸພຽງ 21 ຕື້ USD, ມາຮອດປີ 2014 ໄດ້ເພີ່ມຂຶ້ນທົບ 9 ເທົ່າ. GDP ສະເລ່ຍໃສ່ຫົວຄົນຂອງຫວຽດນາມໃນປີ 1995 ບັນລຸ 289USD ຢືນອັນດັບ 10 ຂອງພາກພື້ນ, ມາຮອດປີ 2014 ບັນລຸກວ່າ 2000 USD, ຢືນອັນດັບ 7. ຕາມການຕີລາຄາຂອງທ່ານ ຫງວຽນເກີມຕູ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ຫວຽດນາມແລ້ວ, ປະຈຸບັນ ເຖິງວ່າ ເສດຖະກິດ ຫວຽດນາມ ຍັງບໍ່ສາມາດທັດທຽມກັບຫລາຍປະເທດໃນພາກພື້ນກໍຕາມ, ແຕ່ເຖິງຢ່າງໃດກໍຕາມ ຖ້າຫາກຕາມຈຸຸດເລີ່ມຕົ້ນຂອງບັນດາປະເທດ, ໝາກຜົນຊື່ງຫວຽດນາມ ບັນລຸໄດ້ນັ້ນເປັນຫນ້າຮັບຮູ້.
“ປະຈຸບັນ ພວກເຮົາສາມາດເຫັນໄດ້ວ່າ ຫວຽດນາມ ກໍມີເຄື່ອງໝາຍການຄ້າໃຫຍ່, ສາມາດແກ້ງແຍ້ງກັບບັນດາປະເທດໃນອາຊຽນ ຫລືຊ້ຳບໍ່ໜຳແມ່ນມີທ່າໄດ້ປຽບກວ່າບັນດາຜະລິດຕະພັນທີ່ຄ້າຍຄືກັນຂອງບັນດາປະເທດ ອາຊຽນ. ຕົວຢ່າງໃນຂົງເຂດບໍລິການ, ຫວຽດນາມ ມີ ບໍລິສັດ Viettel, ໃນຂົງເຂດທະນາຄານ ຫວຽດນາມ ມີ ທະນາຄານລົງທຶນ ແລະ ພັດທະນາ BIDV.”
ເຂົ້າເປັນສະມາຊິກ ອາຊຽນ ຍັງແມ່ນທ່າຊ່ວຍຫວຽດນາມ ດຳເນີນການເຊື່ອມໂຍງຢ່າງເລິກເຊິ່ງກວ່າເຂົ້າກັບບັນດາກົນໄກເສດຖະກິດພາກພື້ນ ແລະ ໂລກ ຄື WTO, APEC ຫລື ໃນຕໍ່ຫນ້າແມ່ນປະຊາຄົມເສດຖະກິດ ອາຊຽນ AEC ໃນທ້າຍປີນີ້. ເພື່ອປະຕິບັດຈຸດໝາຍດັ່ງກ່າວ, ຫວຽດນາມ ໄດ້ພ້ອມກັບບັນດາປະເທດ ອາຊຽນມານະພະຍາຍາມປະກອບສ່ວນໃຫ້ວິວັດການກະກຽມຍາວນານ, ສະແດງໃຫ້ເຫັນຜ່ານການກໍ່ສ້າງ ແລະ ປະຕິບັດບັນດາມາດຕະການໃນແຜນການສັງລວມ AEC ຮອດປີ 2015. ຮອງສາດສະດາຈານ ດຣ ຫງວຽນຮົ່ງເຊີນ, ອະທິການບໍດີ ມະຫາວິທະຍາໄລ ເສດຖະກິດ- ມະຫາວິທະຍາໄລແຫ່ງຊາດ ຮ່າໂນ້ຍ ໃຫ້ຮູ້ວ່າ: ໃນຊຸມປີຜ່ານມາ, ຍາມໃດຫວຽດນາມ ກໍແມ່ນຫນຶ່ງໃນບັນດາປະເທດມີສຳເລັດອັດຕາການບັນດາມາດຕະການມຸ່ງໄປເຖິງປະຊາຄົມ AEC ຢູ່ໃນລະດັບສູງສຸດຂອງພາກພື້ນ.
“ຫວຽດນາມ ພວມຕັ້ງຫນ້າປະຕິບັດບັນດາມາດຕະການມຸ້ງໄປເຖິງປະຊາຄົມເສດຖະກິດ ອາຊຽນ, ປະຈຸບັນ ຫວຽດນາມ ປະຕິບັດໄດ້ 84,5% ບັນດາມາດຕະການ, ໃນຂະນະນັ້ນ ລະດັບລວມຂອງ ອາຊຽນ ແມ່ນ 78,1%. ຫວຽດນາມ ພຽງຖັດຈາກ ສິງກະໂປ ແລະ ໄທ ໃນການປະຕິບັດບັນດາມາດຕະການນັ້ນ. ຫວຽດນາມ ກໍຕັ້ງຫນ້າປັບປຸງ, ດັດປັບບັນດາກອບກົດໝາຍ ແລະ ຜ່ານນັ້ນປັບປຸງສະພາບແວດລ້ອມແຫ່ງການດຳເນີນທຸລະກິດໃຫ້ແກ່ບັນດາວິສາຫະກິດ.”
ຄຽງຄູ່ກັນນັ້ນ, ການເປັນເຈົ້າການເຂົ້າຮ່ວມການສ້າງ AEC ຂອງຫວຽດນາມ ຍັງສະແດງໃຫ້ເຫັນຜ່ານຫລາຍຂໍ້ລິເລິ່ມ ກ່ຽວກັບຄວາມສະດວກຫັນການຄ້າເປັນເສລີ ແລະ ໄດ້ຮັບການຕີລາຄາສູງຈາກບັນດາປະເທດໃນພາກພື້ນ. ທ່ານ ເລຈຽວຫວູ, ຮອງຫົວຫນ້າກົມນະໂຍບາຍການຄ້າຫລາຍຝ່າຍ, ກະຊວງອຸດສາຫະກຳ ການຄ້າຫວຽດນາມ ໃຫ້ຮູ້ວ່າ:
“ການເຂົ້າຮ່ວມຢ່າງຕັ້ງຫນ້າເປັນເຈົ້າການຂອງຫວຽດນາມ ແມ່ນສະແດງໃຫ້ເຫັນຢູ່ຫລາຍຂໍ້ລິເລີ່ມ ກ່ຽວກັບຄວາມສະດວກໃນການຫັນການຄ້າເປັນເສລີ ຊື່ງໄດ້ປະຕິບັດກັບບັນດາປະເທດ ອາຊຽນ, ມີຄຸນປະໂຫຍດສຳຄັນ ແລະ ມີຜົນປະໂຫຍດໃຫ້ພື້ນຖານເສດຖະກິດ. ຕົວຢ່າງຄື ກົນໄກພາສີປະຕູດຽວ. ປະຈຸບັນ ຫວຽດນາມ ພວມຜັນຂະຫຍາຍກົນໄກພາສີປະຕູດຽວແຫ່ງຊາດ ກ້າວໄປເຖິງການຜັນຂະຫຍາຍກົນໄກປະຕູດຽວ ອາຊຽນ, ສ້າງຄວາມສະດວກໃຫ້ການເຄື່ອນໄຫວຂາອອກຂາເຂົ້າ ຫລືກົນໄກສ້າງຄວາມສະດວກໃຫ້ການເຄື່ອນໄຫວຂອງວິສາຫະກິດ.”
ຈຸດເວລາສ້າງຕັ້ງ AEC ໃກ້ຈະຮອດແລ້ວ. ນີ້ຈະແມ່ນກາລະໂອກາດສຳຄັນເພື່ອໃຫ້ຫວຽດນາມ ໄປທັດກັບທ່າອ່ຽງ ແລະ ລະດັບການພັດທະນາເສດຖະກິດຂອງພາກພື້ນ ແລະ ໂລກ. ຄຽງຄູ່ກັນນັ້ນເລື່ອງເພີ່ມທະວີຂໍ້ມູນຂ່າວສານໃຫ້ວິສາຫະກິດກ່ຽວກັບການເຊື່ອມໂຍງ, ລັດຖະບານຫວຽດນາມ ພວມຕັ້ງຫນ້າຊີ້ນຳການປະຕິບັດບັນດາມາດຕະການສ້າງໂຄງປະກອບພື້ນຖານເສດຖະກິດຄືນໃຫມ່, ປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ້ງແຍ້ງ ແລະ ຄຸນນະພາບແຫລ່ງຊັບພະຍາກອນມະນຸດ.. ເພື່ອຍາດແຍ່ງບັນດາກາລະໂອກາດດີ ກໍຄືຜ່ານຜ່າສິ່ງທ້າທາຍຊື່ງການເຊື່ອມໂຍງເຂົ້າກັບເສດຖະກິດພາກພື້ນນຳມາໃຫ້.