(vovworld)- “ພວກຂ້າພະເຈົ້າຢາກຊຸກຍູ້ຄວາມເຂົ້າໃຈພາສາໄທໃຫ້ແກ່ບັນດານັກສຶກສາຮຽນພາສາໄທຢູ່ມະຫາວິທະຍາໄລຕ່າງໆຂອງຫວຽດນາມ”. ນັ້ນແມ່ນຄຳຢືນຢັນຂອງທ່ານນາງ ດອນລາດາ ທອງບົນ, ເລຂາທີຫນຶ່ງ ສະຖານທູດ ລາຊະອານາຈັກ ໄທ ປະຈຳຫວຽດນາມ, ຫົວຫນ້າຄະນະກວດສອບການເສັງບັນລະຍາຍດ້ວຍພາສາໄທ ຄັ້ງທີ 4 ປີ 2015 ເຊິ່ງຈັດຂຶ້ນຢູ່ ມະຫາວິທະຍາໄລ ຮ່າໂນ້ຍ ໃນກາງເດືອນ 5/2015. ການເສັງທີ່ມີຫົວຂໍ້ວ່າ: “ ຂ້າພະເຈົ້າຢາກເວົ້າກັບຄົນໄທວ່າ..”.
ສຽງເພື່ອນ ມີງເຍີດ
ນັກສຶກສາຫວຽດນາມ ເຂົ້າຮ່ວມການເສັງບັນລະຍາຍ
ດ້ວຍພາສາໄທ
ພາບ:vov
|
ບົດບັນລະຍາຍດ້ວຍພາສາໄທ ຂອງເພື່ອນ ມີງເຍີດ ໄດ້ຮັບຄວາມຊົມເຊີຍຈາກຜູ້ແທນກວ່າ 200 ຄົນ. ມີງເຍີດ ມີອາຍຸ 20 ປີ, ປະຈຸບັນ ພວມຮຽນປີທີ 2 ຢູ່ມະຫາວິທະຍາໄລວິທະຍາສາດ ສັງຄົມ ແລະ ວັດທະນະທຳມະນຸດ ນະຄອນ ໂຮ່ຈິມີນ. ເພື່ອນ ມີງເຍີດ ເລີ່ມຕົ້ນຮຽນພາສາ ໄທ ກ່ອນນີ້ 4 ປີ ເມື່ອຄາວຍັງແມ່ນນັກຮຽນ ມັດທະຍົມຕອນປາຍ ຕຽນຢາງ. ໄລຍະຕົ້ນ, ມີງເຍີດ ຮຽນພາສາໄທເອງ ຜ່ານຫນ້າເວັບ speakingthai.com ແລະ learnthai.com, ແຕ່ການຮຽນຜ່ານຫນ້າເວັບບໍ່ນຳມາເຊິ່ງໝາກຜົນປານໃດ. ເຖິງຢ່າງໃດກໍຕາມ, ໃນ 2 ປີຮ່ຳຮຽນຢູ່ ມະຫາວິທະຍາໄລ, ພາສາໄທຂອງ ມີງເຍີດ ມີຄວາມຄືບຫນ້າຫລາຍ. ແລະ ການເສັງບັນລະຍາຍໃນຄັ້ງນີ້ ແມ່ນກາລະໂອກາດເພື່ອໃຫ້ ມີງເຍີດ ສະແດງຄວາມນິຍົມພາສາໄທຂອງຕົນຕໍ່ຊາວໄທ.
ສຽງຂອງເພື່ອນມີງເຍີດ
ພາຍຫລັງຈັດຕັ້ງການເສັງບັນລະບາຍ 3 ຄັ້ງສຳເລັດຜັນ, ການເສັງໃນຄັ້ງນີ້ ໄດ້ດຶງດູດການເຂົ້າຮ່ວມຂອງນັກສຶກສາຫລາຍຄົນທີ່ມາຈາກ ມະຫາວິທະຍາໄລ 5 ແຫ່ງພາຍໃນປະເທດຄື: ມະຫາວິທະຍາໄລພາສາຕ່າງປະເທດ - ມະຫາວິທະຍາໄລຮ່າໂນ້ຍ, ມະຫາວິທະຍາໄລ ວິທະຍາສາດ ສັງຄົມ ແລະ ວັດທະນະທຳມະນຸດ ຮ່າໂນ້ຍ, ມະຫາວິທະຍາໄລວິທະຍາສາດສັງຄົມ ແລະ ວັດທະນະທຳມະນຸດ ນະຄອນ ໂຮ່ຈິມີນ ແລະ ມະຫາວິທະຍາໄລ ດາຫນັງ. ດ້ວຍຫົວຂໍ້: “ຂ້າພະເຈົ້າຢາກເວົ້າກັບຄົນໄທວ່າ..” ໃນ ຮອບທີ 1 ຂອງ ການເສັງ ແມ່ນການເສັງຂຽນບົດ, ຄະນະຈັດຕັ້ງໄດ້ຮັບບົດເສັງກວ່າ 60 ບົດ ແລະ ຄັດເລືອກນັກສຶກສາ 19 ຄົນ ຊຶ່ງແມ່ນຜູ້ທີ່ມີຜົນງານດີເດັ່ນເພື່ອເຂົ້າຮ່ວມການເສັງບັນລະຍາຍ. ສະນັ້ນ ນັກສຶກສາທີ່ໄດ້ເຂົ້າຮ່ວມການເສັງບັນລະຍາຍລ້ວນແຕ່ຮູ້ສຶກເອກອ້າງທະນົງໃຈ. ເພື່ອນ ທວາ ແລະ ຈາງ ມາຈາກ ມະຫາວິທະຍາໄລພາສາຕ່າງປະເທດ ໃຫ້ຮູ້ວ່າ:
“ນີ້ແມ່ນການເສັງຊື່ງພວກນ້ອງລໍຖ້າແຕ່ດົນແລ້ວ, ນັບແຕ່ເມື່ອພວກນ້ອງຮຽນພາສາໄທ. ນ້ອງເຫັນວ່າ ຕົນເອງ ໂຊກດີຫລາຍເມື່ອໄດ້ເຂົ້າຮ່ວມການເສັງຄັ້ງນີ້ ເພາະວ່າ ການເສັງບໍ່ຈັດຕັ້ງປະຈຳປີ ຫາກ 2,3 ປີ ຈຶ່ງຈັດຕັ້ງເທື່ອຫນຶ່ງ.”
“ເມື່ອໄດ້ຮັບຂ່າວວ່າຕົນເອງໄດ້ຮັບເລືອກເຂົ້າຮອບຊີງຊະນະເລີດຂອງການເສັງບັນລະຍາຍດ້ວຍພາສາໄທ. ນ້ອງດີໃຈຫລາຍ ແລະ ມີຄວາມເອກອ້າງທະນົງໃຈທີ່ສຸດ.”
ເພື່ອນ ມີງເຍີດ ຜູ້ໄດ້ຮັບລາງວັນທີ 1
ພາບ:vov
|
ເມື່ອຕີລາຄາກ່ຽວກັບການເສັງ ແລະ ນັກສຶກສາເຂົ້າຮ່ວມ, ອ້າຍຄູ ຫງວຽນເຕືອງລາຍ, ຄູສອນພາສາໄທຢູ່ ມະຫາວິທະຍາໄລ ວິທະຍາສາດສັງຄົມ ແລະ ວັດທະນະທຳມະນຸດ - ມະຫາວິທະຍາໄລ ຮ່າໂນ້ຍ ໃຫ້ຮູ້ວ່າ:
“ພວກນ້ອງນັກສຶກສາເຂົ້າຮ່ວມການເສັງໃນຄັ້ງນີ້ ສ່ວນຫລາຍແມ່ນຜູ້ນິຍົມພາສາໄທ, ຮັກແພງປະເທດໄທ ແລະ ຊາວໄທ. ພວກນ້ອງດຸໝັ່ນໃນການຊອກຮູ້ພາສາໄທ, ປະຫວັດສາດ ແລະ ວັດທະນະທຳໄທ. ນອກຈາກຮ່ຳຮຽນຢູ່ໂຮງຮຽນແລ້ວ ພວກນ້ອງຍັງຄົ້ນຄ້ວາພາສາໄທຜ່ານຫນ້າເວັບ ແລະ ປື້ມຕ່າງໆ. ແຕ່ກອ່ນພວກນ້ອງບໍ່ຮູ້ພາສາໄທ ແຕ່ມາຮອດປະຈຸບັນ ເຂົາເຈົ້າສາມາດບັນລະຍາຍໄດ້.”
ຜ່ານການຈັດຕັ້ງມາເປັນຫລາຍຄັ້ງ, ການເສັງບັນລະຍາຍດ້ວຍພາສາໄທ ໄດ້ປະກອບສ່ວນຊຸກຍູ້ ແລະ ພັດທະນາການສິດສອນພາສາໄທ ແລະ ຄົ້ນຄ້ວາກ່ຽວກັບປະເທດໄທ ຢູ່ ຫວຽດນາມ. ນັ້ນກໍແມ່ນຄວາມມຸ້ງຫວັງຂອງທ່ານນາງ ດອນລາດາ ທອງບົນ, ເລຂາທິຫນຶ່ງ ສະຖານທູດໄທ ປະຈຳຫວຽດນາມ, ຫົວຫນ້າຄະນະກວດສອບການເສັງ:
ສຽງທ່ານນາງ ດອນລາດາ
ການເສັງບັນລະຍາຍອັດລົງເວລາ 12 ໂມງເຄິ່ງ, ລາງວັນທີ 1 ແມ່ນໄດ້ແກ່ເພື່ອນ ຮີ່ງມີງເຍີດ ດ້ວຍມູນຄ່າ 10 ລ້ານດົງ. ນອກນັ້ນ ຄະນະກວດສອບ ຍັງມອບລາງວັນທີສອງ 1 ລາງວັນ, ທີສາມ 1 ລາງວັນ ແລະ ລາງວັນຊົມເຊີຍ 5 ລາງວັນ ໃຫ້ແກ່ບັນດານັກສຶກສາມາຈາກ ມະຫາວິທະຍາໄລ ຮ່າໂນ້ຍ, ມະຫາວິທະຍາໄລພາສາຕ່າງປະເທດ, ມະຫາວິທະຍາໄລ ດາຫນັງ ແລະ ມະຫາວິທະຍາໄລສັງຄົມ ແລະ ວັດທະນະທຳມະນຸດຮ່າໂນ້ຍ.