(vovworld)- ບາງຄວາມຄິດເຫັນຂອງນັກຂ່າວໄທ ກ່ຽວກັບການພັດທະນາຂອງສ່ືມວນຊົນຫວຽດນາມ.
ຄະນະຜູ້ແທນນັກຂ່າວໄທ ຢ້ຽມຢາມ ແລະ ເຮັດວຽກກັບ VOV |
ຂ້າພະເຈົ້າໄດ້ມາຢ້ຽມຢາມ ຫວຽດນາມ ຄັ້ງຫນຶ່ງກ່ອນນີ້ຫລາຍປີແລ້ວ ແຕ່ເວລານັ້ນບໍ່ທັນເຂົ້າໃຈກ່ຽວກັບສື່ມວນຊົນ ຫວຽດນາມ ປານໃດ. ສ່ວນ ມາຢ້ຽມຢາມ ຫວຽດນາມ ໃນຄັ້ງທີສອງ ຂ້າພະເຈົ້າເຫັນວ່າ ສື່ມວນຊົນ ຫວຽດນາມ ໄດ້ມີການປ່ຽນແປງຫລາຍແລ້ວ. ບັນດາປະເພດສື່ຄື: ວິທະຍຸກະຈາຍສຽງ, ໂທລະພາບລ້ວນແຕ່ມີບາດກ້າວພັດທະນາຢ່າງຮອບດ້ານ. ນັບທັງຫນັງສືພິມຂອງທ້ອງຖິ່ນກໍມີຄຸນນະພາບດີ, ເຖິງວ່າ ຂ້າພະເຈົ້າອ່ານບໍ່ໄດ້ກໍຕາມ ແຕ່ສາມາດເຫັນໄດ້ວ່າ ບັນດາຫນັງສືພິມນັ້ນໄດ້ຮັບການຈັດຫນ້າຢ່າງສວຍງາມ ດ້ວຍຫລາຍຄໍລຳທີ່ອຸດົມສົມບູນ.
ນັ້ນແມ່ນຄຳເຫັນຂອງທ່ານນາງ ວະຣີສະກາຣີ ແກ້ວປັງ ເລຂາທິການສະມາຄົມຫນັງສືພິມເຂດປະເທດໄທ ທີ່ໂອ້ລົມກັບນັກຂ່າວVOV ເນື່ອງໃນໂອກາດທ່ານນາງມາຢ້ຽມຢາມ ຫວຽດນາມ ໃນຫວ່າງແລ້ວນີ້. ສຳລັບບັນດານັກຂ່າວໄທແລ້ວ, ເລື່ອງເພີ່ມທະວີການຮ່ວມມື, ຮຳ່ຮຽນເອົາບົດຮຽນເຊິ່ງກັນ ແລະ ກັນ ໃນຂົງເຂດສື່ມວນຊົນແມ່ນມີທີ່ຕັ້ງບົດບາດສຳຄັນ, ເພາະວ່າຍັງມີເວລາບໍ່ຮອດ 3 ປີ ທີ່ອາຊຽນ ຕ້ອງສຳເລັດຈຸດໝາຍກາຍເປັນປະຊາຄົມຢ່າງໝັ້ນຄົງເຂັ້ມແຂງ. ພິເສດ ສຳລັບບັນນາທິການທີ່ຈັດລາຍການໂດຍກົງຄືທ່ານນາງ ນັນທະຣົນ ກັນຄຳ ຊຶ່ງແມ່ນຜູ້ຜະລິດລາຍການຂອງວິທະຍຸກະຈາຍສຽງແຫ່ງຊາດ ໄທ, ແຂວງ ຊົນບູຣີ ແລ້ວ, ການຢ້ຽມຢາມແລະ ເຮັດວຽກ ກັບວິທະຍຸກະຈາຍສຽງຫວຽດນາມ ຄັ້ງນີ້ ໄດ້ຊ່ວຍໃຫ້ທ່ານນາງ ມີຄວາມເຂົ້າໃຈກ່ຽວກັບວຽກງານຂອງຜູ້ຮ່ວມງານ ຫວຽດນາມ ກວ່າ. ທ່ານນາງ ນັນທະຣົນ ໃຫ້ຮູ້ວ່າ:
ສຽງທ່ານນາງ ນັນທະຣົນ
ໃນບົດທີ່ໄດ້ລົງພິມໃນຫນັງສືພິມໄທຣັດຊຶ່ງແມ່ນຫນັງສືພິມສຳຄັນຂອງໄທ, ທ່ານ ຊາວະຣົງ ລີມພັດທະປານີ ປະທານສະຫະພັນນັກຫນັງສືພິມແຫ່ງປະເທດໄທ ກໍໄດ້ໃຫ້ຂໍ້ສັງເກດຢ່າງຕັ້ງຫນ້າກ່ຽວກັບການພັດທະນາຂອງສື່ມວນຊົນ ຫວຽດນາມ ເວົ້າລວມ ກໍຄື ວິທະຍຸກະຈາຍສຽງ ຫວຽດນາມ ເວົ້າສະເພາະ ວ່າ: “ໃນທ່າອ່ຽງພັດທະນາຮູບການສື່ມວນຊົນໃຫມ່ ນັ້ນແມ່ນສື່ອອນລາຍ, ສາມາດເຫັນໄດ້ວ່າບັນດາອົງການສື່ມວນຊົນຂອງລັດຖະບານຄື: ວິທະຍຸກະຈາຍສຽງ ຫວຽດນາມ ກໍໄດ້ມີການພັດທະນາຢ່າງວ່ອງໄວ ທັນການ. ນອກຈາກ ຊ່ວຍໃຫ້ຜູ້ຟັງຮັບຟັງໂດຍກົງທາງອິນເຕີແນດແລ້ວ ຍັງສາມາດຮັບຟັງບັນດາລາຍການຢ້ອນຫລັງໄດ້, ຍິ່ງກວ່ານັ້ນ ວິທະຍຸກະຈາຍສຽງ ຫວຽດນາມ ຍັງມີຊ່ອງໂທລະພາບສະເພາະຂອງຕົນອີກດ້ວຍ.”
ໂດຍມີຄວາມເຫັນເຊັ່ນດຽວກັບທ່ານ ຊາວະຣົງ ລີມພັດທະປານີ, ທ່ານນາງອະມາຣະພອນ ຣັດທະວິນິດ ຜູ້ອຳນວຍການພາກພາສາຕ່າງປະເທດ, ສັງກັດວິທະຍຸກະຈາຍສຽງແຫ່ງຊາດໄທ ໄດ້ແບ່ງປັນວ່າ: ການແລກປ່ຽນບົດຮຽນ, ວິຊາສະເພາະ ກັບ ວິທະຍຸກະຈາຍສຽງ ຫວຽດນາມ ໄດ້ນຳມາຊຶ່ງຄວາມເຂົ້າໃຈໃຫມ່ກ່ຽວກັບປະເທດບ້ານໃກ້ເຮືອນຄຽງ ເປັນຕົ້ນໃນຂົງເຂດສື່ມວນຊົນ. ທ່ານນາງ ມາຣະພອນ ໃຫ້ຮູ້ວ່າ:
ສຽງທ່ານນາງມາຣະພອນ
ອາດຈະເວົ້າໄດ້ວ່າ, ການພັດທະນາຢ່າງວ່ອງໄວຂອງສື່ມວນຊົນ ຫວຽດນາມ ເປັນຕົ້ນໃນຂົງເຂດກະຈາຍສຽງ ແລະ ໂທລະພາບ ໄດ້ສ້າງຄວາມປະທັບໃຈທີ່ມີຕໍ່ນັກຂ່າວໄທ. ຕາມທັດສະນະຂອງເຂົາເຈົ້າແລ້ວ, ສື່ມວນຊົນ ແມ່ນເຄ່ືອງມືທີ່ສຳຄັນ ຊ່ວຍໃຫ້ປະຊາຊົນມີຄວາມເຂົ້າໃຈ ແລະ ສະຫນັບສະຫນູນແນວທາງພັດທະນາປະຊາຄົມອາຊຽນ. ສະນັ້ນ ການຮ່ວມມືຢ່າງແຫນ້ນແຟ້ນໃນຂົງເຂດສື່ມວນຊົນ ຈະປະກອບສ່ວນຊຸກຍູ້ການພົບປະແລກປ່ຽນ, ໂຄສະນາກ່ຽວກັບອາຊຽນອອກສູ່ປະຊາຊົນທຸກຊັ້ນວັນນະ. ແລະ ກໍ່ແມ່ນຄວາມມຸ່ງມາດປາດຖະຫນາຊຶ່ງທ່ານຊົງວຸດ ສຸວັນນະວົງ ນັກຂ່າວໂທລະພາບຊ່ອງ 11, ສັງກັດໂທລະພາບແຫ່ງຊາດ ໄທ ໄດ້ແບ່ງປັນກັບເພື່ອນຮ່ວມງານຫວຽດນາມ ວ່າ:
ສຽງທ່ານຊົງວຸດ ສຸວັນນະວົງ