(vovworld) - ໃນຊຸມມື້ທ້າຍປີ 2011, ຄະນະປະຕິບັດວຽກງານການກຸສົນສັງຄົມ ໂດຍຫນັງສືພິມ Saigon giai phong (ໄຊງ່ອນປົດປ່ອຍ) ສົມທົບກັບໂຮງໝໍ Nhan dan (ປະຊາຊົນ) 115 ໄດ້ເດີນທາງຍາວໄກເກືອບ 1.000 ກິໂລແມດ ເພື່ອໄປຫາພໍ່ແມ່ພີ່ນ້ອງ ຊາວກຳປູເຈຍ ທີ່ທຸກຍາກ ຢູ່ແຂວງ Battambang ແລະ Xiem Riep ລາຊະອານາຈັກ ກຳປູເຈຍ. ມີປະຊາຊົນ ກຳປູເຈຍ ກວ່າ 1.100 ຄົນ ໄດ້ຮັບການກວດ, ປີ່ນປົວພະຍາດ ແລະ ຮັບເອົາຢຸກຢາໂດຍບໍ່ເສຍຄ່າ ກໍຄືໄດ້ຮັບຂອງຂວັນ. ພໍ່ແມ່ປະຊາຊົນກຳປູເຈຍລ້ວນແຕ່ສະແດງຄວາມເຄົາລົບນັບຖື ເມື່ອໄດ້ຮັບ ບັນດາຂອງຂວັນທີ່ເຕັມໄປດ້ວຍຄວາມຜູກພັນຮັກແພງ ນັ້ນ.
ບັນດາຜູ້ທີ່ເຂົ້າຮ່ວມການປະຕິບັດງານ ຢູ່ ກຳປູເຈຍ ໃນຊຸມມື້ທ້າຍປີ 2011 ລ້ວນແຕ່ມີຄວາມຕື້ນຕັນໃຈ ເມື່ອໄດ້ເຫັນປະຈັກຕາ ປະຊາຊົນທີ່ທຸກຍາກ ຢູ່ ແຂວງ Battambang ແລະ Xiem riep ລາຊະອານາຈັກ ກຳປູເຈຍ ມາກວດພະຍາດ ແລະ ຮັບເອົາຂອງຂວັນຈາກຄະນະປະຕິບັດງານຂອງຫວຽດນາມ. ເມື່ອໄດ້ຮັບຂ່າວວ່າ ມີຄະນະພະນັກງານຫວຽດນາມ ມາກວດ ປີ່ນປົວພະຍາດ ແລະ ແຈກຢາຍຢຸກຢາຟີ, ພໍ່ແມ່ປະຊາຊົນມີຄວາມປິຕິຊົມຊື່ນຫລາຍ ແລະ ຄອຍຖ້າໃນທຸກມື້. ບາງຄົນຜ່ານເສັ້ນທາງທີ່ມີຄວາມຍາວກວ່າ 30 ກິໂລແມດ ມາກວດ ແລະ ປິ່ນປົວພະຍາດ ຈາກທ່ານໝໍຫວຽດນາມ ໂດຍກົງ. ທ່ານ ເຈີນເທຕວຽນ ບັນນາທິການໃຫຍ່ ຫນັງສືພິມ ໄຊງ່ອນປົດປ່ອຍ ໃຫ້ຮູ້ວ່າ: ນີ້ແມ່ນຫນຶ່ງໃນບັນດາລາຍການຂອງກອງທຶນສາຍໃຈ ເຈື່ອງເຊີນ (ສາຍພູຫລວງ) ຂອງຫນັງສືພິມ ໄຊງ່ອນປົດປ່ອຍ ເພື່ອແນໃສ່ສະແດງຄວາມຮູ້ບຸນຄຸນຕໍ່ປະຊາຊົນກຳປູເຈຍທຸກຄົນ ທີ່ມີການປະກອບສ່ວນເຂົ້າໃນກິດຈະການປົດປ່ອຍປະເທດຫວຽດນາມ. ທ່ານ ເຈີນເທຕວຽນເວົ້າວ່າ:
“ຫນັງສືພິມ ໄຊງ່ອນປົດປ່ອຍ ໄດ້ຈັດຕັ້ງລາຍການ ສາຍໃຈ ເຈື່ອງເຊີນ ສຳເລັດຜົນ ດ້ວຍການກໍ່ສ້າງເຮືອນແຫ່ງສາຍຈິດມິດໃຈກວ່າ 1000 ຫລັງ ແລະ ວິຫານ, ຫໍບູຊາ, ບ້ານວັດທະນະທຳຢູ່ລຽບຕາມສາຍພູຫລວງ. ໃນໂອກາດບຸນປີໃຫມ່ປີມະໂຣງ ພວກຂ້າພະເຈົ້າໄດ້ສົ່ງບັນດາຂອງຂວັນທີ່ເຕັມໄປດ້ວຍຄວາມຮັກແພງຄວາມຮູ້ບຸນຄຸນຂອງປະຊາຊົນ ແລະ ນັກຮົບ ຫວຽດນາມ ເຖິງປະຊາຊົນ ກຳປູເຈຍ ແລະ ລາວ. Battambang ແລະ Xiem riep ແມ່ນສະຖານທີສອງແຫ່ງ ຊຶ່ງໃນໄລຍະຕໍ່ຕ້ານຕ້ານຈັກກະພັດອາເມລິກາກູ້ຊາດ ກໍຄື ໄລຍະຫລັງການປົດປ່ອຍນັ້ນ ໄດ້ອຸ້ມຊຸຊ່ວຍເຫລືອທະຫານອາສາສະໝັກ ຫວຽດນາມ . ສະນັ້ນ ພວກຂ້າພະເຈົ້າມີແຜນນະໂຍບາຍວ່າ ໃນຊຸມມື້ທ້າຍປີໃຫມ່ ຕ້ອງກັບຄືນເມືອຢ້ຽມຢາມເຂດດິນແດນນີ້ ເພື່ອສະແດງຄວາມຮູ້ບຸນຄຸນຂອງຕົນທີ່ມີຕໍ່ຜູ້ທີ່ໄດ້ຮ່ວມແຮງຮ່ວມໃຈໃນການຕໍ່ຕ້ານຕ້ານຈັກກະພັດ ອາເມລິກາ ຂອງຫວຽດນາມ.”
ເມື່ອເຫັນປະຈັກຕາຄວາມທຸກຍາກລຳບາກຂອງປະຊາຊົນຢູ່ທີ່ນີ້ໄດ້ເຮັດໃຫ້ສະມາຊິກທັງໝົດໃນຄະນະປະຕິບັດວຽກງານການກຸສົນບໍ່ຮູ້ສືກອິດເມື່ອຍຜ່ານການເດີນທາງນັບພັນກີໂລແມດ. ບັນດາສະຖານທີ່ຊຶ່ງຄະນະມາເຖິງລ້ວນແຕ່ແມ່ນເຂດທຸກຍາກ ພິເສດແມ່ນ ເຂດທະເລນ້ຳຈືດຢູ່ Xiem Riep. ປະຊາຊົນດຳລົງຊີວິດຢູ່ທີ່ນີ້ ສ່ວນຫລາຍແມ່ນເຮັດອາຊີບຫາປາເປັນຕົ້ນ. ຊີວິດການເປັນຢູ່ຂອງເຂົາເຈົ້າສ່ວນຫລາຍຢູ່ເທິງເຮືອ. ເມື່ອສິ້ນສຸດວັນກວດ, ປີ່ນປົວພະຍາດໃຫ້ແກ່ປະຊາຊົນແລ້ວ, ທ່ານ ເຈີນເທຕວຽນ, ບັນນາທິການໃຫຍ່ ຫນັງສືພິມ ໄຊງ່ອນປົດປ່ອຍ ແລະ ທ່ານ ຟານວັນເບົາ, ຮອງຜູ້ອຳນວຍການພະແນກສາທາລະນະສຸກ, ຜູ້ອຳນວຍການໂຮງໝໍປະຊາຊົນ 115 ໄດ້ຕົກລົງມອບຢຸກຢາທັງໝົດທ່ີຍັງເຫລືອໃຫ້ແກ່ໂຮງຮຽນຢູ່ທະເລນ້ຳ ຈືດ ແລະ ປຶກສາຫາລືກັນກ່ຽວກັບການກໍ່ສ້າງສຸກສາລາໃຫ້ແກ່ ຕາແສງ Chong Ka Nia.
ການນຳຫນັງສືພິມ ໄຊງ່ອນປົດປ່ອຍ ແລະ ໂຮງໝໍປະຊາຊົນ 115 ຍັງສະເຫນີໃຫ້ອຳນາດການປົກຄອງຕາແສງ Chong Ka Nia ສົ່ງພະນັກງານໄປຍັງ ໂຮງໝໍປະຊາຊົນ 115 ເພື່ອເຂົ້າຮ່ວມຊຸດຮຽນແນະນຳການນຳໃຊ້ຢາປິ່ນປົວພະຍາດເພື່ອປະຖົມພະຍາບານໃຫ້ຄົນເຈັບໃນກໍລະນີສຸກເສີນ. ລາຍຈ່າຍສຳລັບການບຳລຸງສ້າງ, ການກິນຢູ່, ຄ່າໄປມາຂອງພະນັກງານແພດໝໍ ກຳປູເຈຍ ໂດຍຫນັງສືພິມ ໄຊງ່ອນປົດປ່ອຍ ແລະ ໂຮງໝໍປະຊາຊົນ 115 ອຸປະຖຳ. ທ່ານນາງ ຫງວຽນຕວນແທນ, ສັງກັດໂຮງໝໍປະຊາຊົນ 115 ໃຫ້ຮູ້ວ່າ:
“ສະເພາະຢູ່ ທະເລນ້ຳຈືດ ບໍ່ທັນມີສຸກສາລາ ສະນັ້ນ ປະຊາຊົນຖືກເຈັບເປັນບໍ່ຮູ້ຈະໄປປີ່ນປົວຢູ່ບອ່ນໃດ. ຂ້າພະເຈົ້າເຫັນວ່າ ມີບາງຄອບຄົວ ລູກຫລານເຈັບເປັນ ເຂົາເຈົ້າກໍ່ບໍ່ມີເງື່ອນໄຂສົ່ງໄປປີ່ນປົວພະຍາດ ຍ້ອນເຂົາເຈົ້າທຸກຍາກຫລາຍ. ປະຈຸບັນ ມີພະນັກງານກຳປູເຈຍ ຜູ້ຫນື່ງໄດ້ຖືກສົ່ງມາແຫ່ງນີ້ ພວກຂ້າພະເຈົ້າຈະແນະນຳ ກ່ຽວກັບການປະຖົມພະຍາບານ ແລະ ວິທີປີນປົວບັນດາພະຍາດເບົາໃຫ້ເຂົາເຈົ້າໃນເວລາເດືອນຫນຶ່ງ.”
ຈຳນວນຂອງຂວັນ ຊຶ່ງຄະນະປະຕິບັດວຽກງານການກຸສົນຂອງຫນັງສືພິມ ໄຊງອ່ນປົດປ່ອຍ ແລະ ບັນດາທ່ານໝໍຢູ່ໂຮງໝໍປະຊາຊົນ 115 ນຳມາໃຫ້ປະຊາຊົນທຸກຍາກຢູ່ ສອງແຂວງ Battambang ແລະ Xiem Riep ບໍ່ຫລາຍ ແຕ່ນັ້ນແມ່ນອາລົມຈິດ, ແມ່ນຂອງຂວັນໃນຕົ້ນລະດູບານໃຫມ່ຊຶ່ງປະຊາຊົນນະຄອນໂຮ່ຈິມີນ ມອບໃຫ້ປະຊາຊົນກຳປູເຈຍ.
ລານແອນ