(vovworld)- ງານດົນຕີອາຊີຕາເວັນອອກສ່ຽງໃຕ້ (SEA Pride 2016) ແມ່ນງານດົນຕີປະຈຳປີ ແລະ ໄດ້ຈັດຂຶ້ນເປັນຄັ້ງທີ 3 ຢູ່ ຫວຽດນາມ. ລາຍການດົນຕີພິເສດນີ້ ດຳເນີນໄປໃນວັນທີ 25/6 ຢູ່ American Clup, ເລກທີ 21 ຖະຫນົນ ຮາຍບ່າຈຶງ ຮ່າໂນ້ຍ ດ້ວຍຫົວຂໍ້: “ເພີ່ມສີສັນໃຫ້ດົນຕີຂອງເພື່ອນ” (Color your music). ດ້ວຍການຫນູນຊ່ວຍຂອງສະຖານທູດອາເມລິກາ ປະຈຳ ຮ່າໂນ້ຍ, SEA Pride 2016 ແມ່ນມຸ່ງໄປເຖິງຄວາມເປີດອົກເປີດໃຈ, ຄວາມເຄົາລົບ ແລະ ຄວາມສະເຫມີພາບ ທີ່ສະຫງວນໃຫ້ແກ່ເພື່ອນຫນຸ່ມ.
 |
ງານດົນຕີ SEA Pride 2016 ຖືກຈັດຂຶ້ນດ້ວຍຈຸດປະສົງແມ່ນນຳ ລາຍການດົນຕີດ້ວຍສີສັນຫລາກຫລາຍ ມາໃຫ້ບັນດາເພື່ອນຫນຸ່ມ. SEA Pride 2016 ແມ່ນການສົມທົບຂອງຫລາຍປະເພດດົນຕີຄື: Indie, Pop, Rock ແລະ EDM. ພິເສດ SEA Pride 2016 ຍັງແມ່ນສະຖານທີ່ບັນເທິງໃຫ້ແກ່ຜູ້ກະເທີຍ, ຜູ້ສອງເພດ ແລະ ຜູ້ປ່ຽນເພດ ຢູ່ ຫວຽດນາມ ເວົ້າສະເພາະ ແລະ ໃນອາຊຽນ ເວົ້າລວມ ເມື່ອນຳເອົາສານກ່ຽວກັບຄວາມເປີດອົກເປີດໃຈ ແລະ ເຄົາລົບບັນດາຄວາມແຕກຕ່າງກັນ. ທ່ານ ຫງວຽນມີງຮ່ວາງ, ຜູ້ຮ່ວມງານໃນວຽກງານສື່ສານຂອງໂຄງການ SEA Pride 2016 ໃຫ້ຮູ້ວ່າ:
“SEA Pride 2016 ເປີດປະຕູນັບແຕ່ເວລາ 9h30 ນາທີ ຮອດ 23 ໂມງ ດ້ວຍການເຄື່ອນໄຫວຫລາຍຢ່າງຄື: ການພົບປະແລກປ່ຽນກັບບັນດາວົງດົນຕີ, ຕັ້ງຄ້າຍຊາວຫນຸ່ມລະດູແລ້ງ, workshop ກ່ຽວກັບວົງຄະນາຍາດຜູ້ກະເທີຍ, ຜູ້ສອງເພດແລະຜູ້ປ່ຽນເພດ. Show ສະແດງອາພອນສະໄຫມຂອງນັກອອກແບບ Carol Tran ທີ່ສະຫງວນໃຫ້ແກ່ຜູ້ກະເທີຍ, ຜູ້ສອງເພດ ແລະ ຜູ້ປ່ຽນເພດ ດຳເນີນຫລັງຈາກນັ້ນ. ນອກນັ້ນ ຍັງມີການເຕັ້ນ ຈໍ Flash mob ຂອງກຸ່ມຫົວຄິດປະດິດສ້າງຫົວຫນ້າຫນຸ່ມອາຊີຕາເວັນອອກສ່ຽງໃຕ້ YEASLI. ພາຍຫລັງ 18 ໂມງ ແມ່ນລາຍການດົນຕີຊື່ງຜູ້ໃດກໍຢາກຮັບຊົມ ທີ່ SEA Pride 2016 ຄັ້ງນີ້. ລາຄາປີ້ຊົມແຕ່ 10 ໂທງ - 17 ໂມງ ແມ່ນ 80.000 ດົງ, ສ່ວນລາຄາຊົມໝົດມື້ແມ່ນ 200.000 ດົງ. SEA Pride 2016 ດຶງດູດ ປະມານ 5000 ຄົນເຂົ້າຮ່ວມ.”
ເຫດການດົນຕີ SEA Pride 2016 ໄດ້ແຜ່ລາມອອກຢ່າງວ່ອງໄວ, ພິເສດ ສຳລັບວົງຄະນາຍາດຜູ້ກະເທີຍ, ຜູ້ສອງເພດ ແລະ ຜູ້ປ່ຽນເພດ. ເອື້ອຍ ຟານແທງຈາງ, ສະມາຊິກສະໂມສອນຜູ້ກະເທີຍ, ຜູ້ສອງເພດ ແລະ ຜູ້ປ່ຽນເພດ ຮ່າໂນ້ຍ ແບ່ງປັນວ່າ:
“ຂ້າພະເຈົ້າຮູ້ສຶກດີໃຈຫລາຍ ແລະ ມີຄວາມເອກອ້າງທະນົງໃຈ ເພາະວ່າ ນັບມື້ນັບມີການເຄື່ອນໄຫວຫລາຍຢ່າງທີ່ສະຫງວນໃຫ້ແກ່ປະຊາຄົມຜູ້ກະເທີຍ, ຜູ້ສອງເພດ ແລະ ຜູ້ປ່ຽນເພດ. ຜ່ານນັ້ນ ທຸກຄົນມີຄວາມເຂົ້າໃຈກ່ຽວກັບພວກຂ້າພະເຈົ້າກວ່າ, ມີການສັງເກດຢ່າງພາວະວິໄສກ່ຽວກັບບັນຫາຜູ້ກະເທີຍ ພ້ອມທັງຍົກສູງຄວາມເຂົ້າໃຈກ່ຽວກັບເພດສຳພັນທີ່ປອດໄພໃນເພດ.”
ພາບ: kenh14 |
ເຂົ້າຮ່ວມການກະກຽມງານດົນຕີນັບແຕ່ມື້ທຳອິດ, ທ່ານນາງ Marcia Anglarill, ທີ່ປຶກສາດ້ານວັດທະນະທຳ ສະຖານທູດ ອາເມລິກາ ປະຈຳ ຫວຽດນາມໃຫ້ຮູ້ວ່າ: ຫົວຂໍ້ຕົ້ນຕໍຂອງ SEA Pride 2016 ປີນີ້ ແມ່ນມຸ່ງໄປເຖິງສະພາບແວດລ້ອມແຫ່ງການເຮັດວຽກບໍ່ມີຮົ້ວກີດຂວາງໃຫ້ແກ່ບັນດາ ຜູ້ກະເທີຍ, ສອງເພດ ແລະ ຜູ້ປ່ຽນເພດ ແລະ ຍົກສູງຄວາມຮັບຮູ້ຂອງທຸກຄົນກ່ຽວກັບບັນຫານີ້. ຈຸດເດັ່ນຂອງ ງານ SEA Pride 2016 ປີນີ້ແມ່ນລາຍການດົນຕີຂະຫນາດໃຫຍ່ ໂດຍມີການເຂົ້າຮ່ວມຂອງບັນດາກອງດົນຕີທີ່ມາຈາກບັນດາປະເທດຄື: DJ Lina ມາຈາກ ອາເມລິກາ ແລະ Nibiru Band ມາຈາກອັງກິດ, ຟິລີບປີນ… ນັກດົນຕີ Sean Lam ສັງກັດກອງດົນຕີ Rock Indie “ Hang up the Moon” ມາຈາກ ສິງກະໂປ ໄດ້ແບ່ງປັນວ່າ:
“ເຂົ້າຮ່ວມເຫດການດົນຕີຄັ້ງນີ້ ພວກຂ້າພະເຈົ້າຢາກນຳມາໃຫ້ພວກເພື່ອນບັນດາບົດເພງກ່ຽວກັບຊີວິດ, ຄອບຄົວ, ວຽກງານ, ຊ້ຳບໍ່ໜຳ ນັບທັງສັດລ້ຽງອີກ. ພວກຂ້າພະເຈົ້າຮູ້ສຶກດີໃຈຫລາຍເມື່ອໄດ້ຮັບຄຳເຊີນມາສະແດງຢູ່ SEA Pride 2016.”
ນອກຈາກບັນດາວົງດົນຕີມາຈາກຕ່າງປະເທດແລ້ວ, ຍັງມີການເຂົ້າຮ່ວມຂອງບັນດານັກຮ້ອງ ແລະ ວົງດົນຕີທີ່ມີຊື່ສຽງຂອງຫວຽດນາມ ຄື: ນັກດົນຕີ Noo Phuoc Thinh, ວົງດົນຕີ Microwave, Oplus… ອ້າຍ ກວາງຮືງ, ສະມາຊິກ ກອງດົນຕີ rock The O –ring Chains ຫວຽດນາມ ໃຫ້ຮູ້ວ່າ
“ຂ້າພະເຈົ້າດີໃຈຫລາຍ ແລະ ມີຄວາມເອກອ້າງທະນົງໃຈ ເພາະວ່າ ຕົນເອງແມ່ນຜູ້ເຄື່ອນໄຫວທາງສັງຄົມ, ຂ້າພະເຈົ້າເຄົາລົບຄວາມເປັນຫລາຍຮູບຫລາຍແບບໃນສັງຄົມ. ທຸກສິ່ງທຸກຢ່າງລ້ວນແຕ່ໄດ້ຮັບການເຄົາລົບ ແລະ ເຂົ້າໃຈແຈ້ງ. ໃນຂົງເຂດດົນຕີກໍມີຄວາມເປັນຫລາຍຮູບຫລາຍແບບນັ້ນ. ພວກຂ້າພະເຈົ້ານິຍົມດົນຕີ Rock ເຖິງວ່າຍັງມີທັດສະນະແຕກຕ່າງກ່ຽວກັບປະເພດດົນຕີນີ້ ແຕ່ພວກຂ້າພະເຈົ້າຍາມໃດກໍປາດຖະຫນາດຢາກໄດ້ຮັບການສະຫນັບສະຫນູນຈາກວົງຄະນາຍາດ.”
ບໍ່ພຽງແຕ່ມຸ່ງໄປເຖິງງານດົນຕີມີຄຸນນະພາບສູງ, ຂະຫນາດໃຫຍ່ ແລະ ຟົດຟື້ນມ່ວນຊື່ນເທົ່ານັ້ນ, ຫາກ SEA Pride 2016 ຍັງແມ່ນສະຖານທີ່ເພື່ອໃຫ້ເພື່ອນຫນຸ່ມສະແດງຄວາມສາມາດຂອງຕົນ ຈາກນັ້ນຈະສ້າງຄວາມປະທັບໃຈໃຫ້ແກ່ເຂົາເຈົ້າກ່ຽວກັບລະດູຮ້ອນທີ່ຫນ້າຈົດຈ່ຳ ແລະ ເຕັມໄປດ້ວຍຄວາມໝາຍ.