(vovworld) - ເຊື່ອມຕົວໃນທຳນອງເພງພື້ນເມືອງຂອງໄທ, ຊົມ ແລະ ເຮັດລອຍກະທທົງດ້ວຍສີຫຼາກຫຼາຍ ແລ້ວພ້ອມກັນປ່ອຍລົງໜອງ ໂຮ່ໄຕເພື່ອພາວະນາຂໍໃຫ້ປະສົບແຕ່ຄວາມໂຊກດີ. ນັ້ນແມ່ນວັດທະນະທຳທີ່ເປັນເອກະລັກສະເພາະຂອງງານບຸນລອຍກະທົງ ໂດຍສະຖານທູດ ໄທປະຈຳຫວຽດນາມ ສົມທົບກັບກົມສົ່ງເສີມການທ່ອງທ່ຽວໄທ ແລະ ບໍລິສັດການບິນໄທ ຈັດຕັ້ງຢູ່ຮ່າໂນ້ຍ ຫວ່າງແລ້ວນີ້.
 |
18 ໂມງ 30 ນາທີ, ເມື່ອແສງພະຈັນເລີ່ມໂປໂລຂຶ້ນ, ຢູ່ເຂດເວທີກາງແຈ້ງແຄມໜອງ ໂຮ່ໄຕ, ກວ້າງເກືອບ 1000 ຕາແມັດ ໃນບໍລິເວນສະໂມສອນຮ່າໂນ້ຍ, ທີ່ຫ່າງຈາກຖະໜົນ ອຽນຟູ້ ປະມານ 500 ແມັດນັ້ນ ໄດ້ດຳເນີນງານບຸນລອຍກະທົງ. ນີ້ແມ່ນງານບຸນໃຫຍ່ອັນດັບສອງຂອງໄທ, ຖັດຈາກບຸນສົງການ. ໃນເວທີກວ້າງປະມານ 20 ຕາແມັດ, ມີຜ້າສີດ້ວຍຮູບພາບກະທົງຮູບດອກບົວສີບົວພວມສ່ອງແສງບົນໜ້ານ້ຳ, ໄກຈາກນັ້ນແມ່ນວັດວາອາຮາມຮູບທາດທີ່ເປັນສັນຍາລັກຂອງໄທ, ບັນດານາງສາວສິລະປິນໄທທີ່ສວຍງາມໃນຊຸດອາພອນປະຈຳຊາດເຫຼື້ອມແວວວາວ, ພວມສະແດງວາດຟ້ອນ 4 ພາກທີ່ເປັນມູນເຊື້ອຂອງໄທທ່າມກາງສຽງດົນຕີສະອອນໃຈ. ນີ້ແມ່ນບັນດາວາດຟ້ອນທີ່ເຄີຍສະແດງໃນໂອກາດງານບຸນລອຍກະທົງຂອງໄທ.
ຢູ່ອ້ອມເວທີຕັ້ງໂຕະ 30 ໜ່ວຍ, ຢູ່ເທິງວາງກະທົງນັບສິບອັນດ້ວຍທຸກຂະໜາດ, ຫຼາຍຮູບແບບທີ່ແຕກຕ່າງກັນ. ກະທົງທີ່ເປັນມູນເຊື້ອແມ່ນເຮັດດ້ວຍກາບກ້ວຍ ແລະ ໃບຕອງ. ເຂົາເຈົ້າເອົາມາພັບ ແລະ ຫຍິບເປັນຮູບດອກບົວ ແລະ ປະດັບປະດາດ້ວຍດອກໄມ້ສົດ, ຢູ່ໃຈກາງປັກທຽນ 1 ເຫຼັ້ມ ແລະ ທູບ 3 ດອກ. ແຕ່ພົ້ນເດັ່ນກວ່ານັ້ນແມ່ນບັນດາລອຍກະທົງຮູບວັດວາອາຮາມທີ່ມີຊື່ສຽງຂອງໄທ, ຫຼືກະທົງທີ່ເຮັດເປັນຫຼາຍຊັ້ນຄືຮູບເຂົ້າໜົມ “ເຄັກ“ ດ້ວຍສີຫຼາກຫຼາຍເຊັ່ນ: ສີບົວ, ສີຂຽວ, ສີຂາວ, ສີເຫຼືອງ. ຢູ່ທີ່ນີ້ຍັງມີໂຕະທີ່ວາງວັດຖຸຕ່າງໆຄື: ກີບດອກບົວ, ໃບຕອງ… ເພື່ອໃຫ້ແຂກສາມາດເຮັດກະທົງດ້ວຍຕົນເອງໄດ້… ພິເສດ, ໃນງານບຸນນີ້, ຄະນະຈັດຕັ້ງໄດ້ນຳເຂົ້າວັດຖຸເຮັດກະທົງບາງຢ່າງຈາກໄທເຊັ່ນ: ທຽນຫອມ, ດອກໄມ້ສົດ… ມິງຮັ່ງ ແລະ ແມ້ງຫ໋ຽວ, ນັກສຶກສາມະຫາວິທະຍາໄລພາສາຕ່າງປະເທດ ຮ່າໂນ້ຍ, ພ້ອມກັບແຂກນັບສິບຄົນພວມແອບເຮັດກະທົງຮູບດອກບົວ.
“ນ້ອງເຫັນວ່າການເຄື່ອນໄຫວນີ້ມີຄວາມໝາຍທີ່ສຸດ. ເມື່ອເຮັດເອງຈະມີຄວມໝາຍກວ່າເພື່ອພາວະນາຂໍໃຫ້ປະສົບແຕ່ຄວາມໂຊກດີ, ນອກນັ້ນກໍ່ມີຄວາມເຂົ້າໃຈຕື່ມກ່ຽວກັບປະເພນີຂອງຊາວໄທ. ນ້ອງຮຽນພາສາໄທດັ່ງນັ້ນຈຶ່ງຫວັງວ່າຈະມີໂອກາດເພື່ອເຮັດເອງຄືແນວນີ້. ເມື່ອປ່ອຍກະທົງລົງໜ້ານຳ້ນ້ອງຫວັງວ່າປີນີ້ຕົນເອງຮຽນພາສາໄທໄດ້ດີກວ່າ ແລະ ຈະມີໂອກາດໄປຢ້ຽມຢ້ຽມໄທ. ທັງຫວັງວ່າການພົວພັນລະຫວ່າງຫວຽດນາມ - ໄທນັບມື້ນັບແໜ້ນແຟ້ນກວ່າ“.
“ນີ້ເປັນຄັ້ງທຳອິດທີ່ນ້ອງໄດ້ເຂົ້າຮ່ວມງານບຸນຂອງໄທ. ນ້ອງຮູ້ສຶກມີຄວາມໃກ້ຊິດ, ອົບອຸ່ນ ແລະ ມີຫຼາຍຈຸດທີ່ຄ້າຍຄືກັນກັບວັດທະນະທຳທີ່ເປັນມູນເຊື້ອຂອງຫວຽດນາມ“.
ເວລາ 20 ໂມງ, ແຂກມາຮ່ວມງານບຸນກໍ່ຫຼາຍຂຶ້ນ. ໃນບໍລິເວນຈັດງານບຸນໄດ້ມີແຂກປະມານ 400 ຄົນ. ໃນນັ້ນມີຫຼາຍຄົນອາຍຸສູງແລ້ວ, ຊຳ້ບໍໜຳຍັງມີບາງຄົນໄດ້ພາລູກຫຼານມາຮ່ວມນຳ. ລຸງ ເລດ້າຍເຕິມ, ຜູ້ທີ່ເຄີຍປະຕິບັດງານຢູ່ໄທເປັນເວລາ 10 ປີແລ້ວ. ນັບແຕ່ກັບເມືອປະເທດເມື່ອປີ 2006 ມາຮອດປະຈຸບັນ, ປີໃດລຸງກໍ່ເຂົ້າຮ່ວມງານບຸນລອຍກະທົງຢູ່ຮ່າໂນ້ຍ. ນີ້ແມ່ນໂອກາດເພື່ອໃຫ້ລຸງຫວນຄືນອະນຸສອນແຫ່ງຊຸມປີເດືອນດຳລົງຊີວິດ ແລະ ເຮັດວຽກຢູ່ໄທ, ຫວນຄືນການເຄື່ອນໄຫວວັດທະນະທຳທີ່ເປັນມູນເຊື້ອຂອງປະເທດເພື່ອນມິດ
“ມື້ນີ້ເຂົ້າຮ່ວມງານບຸນລອຍກະທົງ, ຂ້າພະເຈົ້າຮູ້ສຶກພາກພູມໃຈຫຼາຍ. ແຕ່ລະປີສະຖານທູດໄທລ້ວນແຕ່ຈັດຕັ້ງການເຄື່ອນໄຫວນີ້. ເມື່ອເຂົ້າຮ່ວມແຕ່ລະເທື່ອ, ຂ້າພະເຈົ້າກໍ່ຮູ້ສຶກມີຄວາມຜາສຸກ ແລະ ເຫັນວ່າການພົວພັນລະຫວ່າງຫວຽດນາມ - ໄທມີຄວາມໃກ້ຊິດກວ່າ“.
ງານບຸນລອຍກະທົງມີມາແຕ່ປີ 1238 ເຖິງປີ 1438 ແລະ ເຄີຍຈັດຕັ້ງແຕ່ກາງເດືອນ 11 ເຖິງເດືອນ 12. ເວລານີ້ນ້ຳຢູ່ໃນແມ່ນ້ຳກໍ່ສູງຂຶ້ນ ແລະ ແສງພະຈັນກໍ່ໃສແຈ້ງທີ່ສຸດ. ເໝາະສົມກັບການປ່ອຍລອຍກະທົງ. ທ່ານເອກອັກຄະລັດຖະທູດໄທປະຈຳຫວຽດນາມ ປັນຢາຣັກ ພູນຊັບ ໃຫ້ຮູ້ວ່າ:
ເທບສຽງ ທ່ານເອກອັກຄະລັດຖະທູດໄທ
ຮອດເວລາ 22 ໂມງ, ເມື່ອແສງພະຈັນໃສແຈ້ງກວ່າ ກໍ່ແມ່ນເວລາທີ່ແຂກກະກຽມລອຍກະທົງຢ່າງຮຽບຮ້ອຍແລ້ວ. ເຂົາເຈົ້າເລີ່ມປ່ອຍລົງໜອງ ໂຮ່ໄຕທີ່ກວ້າງໃຫຍ່ໄພສານ. ແສງໄຟນາໆສີຈາກລອຍກະທົງນັບຮ້ອຍອັນໄດ້ເຮັດໃຫ້ໜ້ານ້ຳສ່ວນໜຶ່ງຢູ່ໜອງ ໂຮ່ໄຕແຈ້ງສະຫວ່າງ ແລະ ງາມແບບມະຫັດສະຈັນກວ່າ.