(vovword)-ພະຍາດປະສາດກ້າມຊີ້ນ ເຮັດໃຫ້ວິວັດການຫາຍໃຈຂອງຄົນເຈັບຫຍຸ້ງຍາກກວ່າ. ຍ້ອນບໍ່ມີຢາປິ່ນປົວ, ຄົນເຈັບສ່ວນຫລາຍຕ້ອງນອນໂຮງໝໍ ແລະ ຕິດພັນກັບຈັກຫາຍໃຈທຽມ. ເຖິງຢ່າງໃດກໍຕາມ, ມີມາດຕະການຫນຶ່ງໃຫ້ແກ່ບັນຫານີ້ ຊື່ງໂຮງໝໍ Tan Tock Seng ແນະນຳ ເພື່ອຊ່ວຍຄົນເຈັບມີຊີວິດຂະຫຍັນຂັນເຄື່ອນ ແລະ ເບິກບານມ່ວນຊື່ນກວ່າຢູ່ນອກໂຮງໝໍ.
ພາບປະກອບ:internet
|
ໂຮງໝໍTan Tock Seng ຊື່ງແມ່ນໂຮງໝໍຫລາຍພະແນກແຫ່ງໃຫຍ່ທີສອງຂອງ ສິງກະໂປ ແລະ ປິ່ນປົວສະເພາະບັນດາພະຍາດຕິດແປດ ແລະ ຟື້ນຟູຊີບ ໄດ້ສະຫນອງບໍລິການໃຫ້ເຊົ່າຈັກຫາຍໃຈທຽມມືຖື. ດ້ວຍການອອກແບບທັງນ້ອຍ,ກະທັດລັດ. ຈັກຫາຍໃຈນີ້ ໄດ້ຊ່ວຍໃຫ້ບັນດາຜູ້ຖືກເປັນພະຍາດປະສາດກ້າມຊີ້ນ ບໍ່ຈຳເປັນຕ້ອງນອນໃນໂຮງໝໍອີກ, ຫາກສາມາດເຂົ້າຮ່ວມການເຄື່ອນໄຫວຕ່າງໆຢູ່ກາງແຈ້ງ. ອ້າຍ Syahrunizham Zainal, ອາຍຸ 22 ປີ, ຊື່ງແມ່ນຄົນເປັນພະຍາດ ປະສາດກ້າມຊີ້ນໃຫ້ຮູ້ວ່າ: ກ່ອນນີ້ ຂ້າພະເຈົ້າເຄີຍຫລິ້ນກິລາປະເພດ Boccia, ແຕ່ປະຈຸບັນສຸຂະພາບບໍ່ຮັບປະກັນ ພຽງຢືນເບີ່ງຊື່ໆເທົ່ານັ້ນ. ໂດຍມີຈັກຫາຍໃຈທຽມມືຖື ອ້າຍ Syahrunizham Zainal ສາມາດຫລິ້ນກິລາປະເພດ ທີ່ອ້າຍນິຍົມຄືນໃໝ່ໄດ້.
“ຈັກຫາຍໃຈທຽມຫນ່ວຍນີ້ ໄດ້ເຮັດໃຫ້ຂ້າພະເຈົ້າມີຊີວິດເປັນປົກກະຕິ. ຂ້າພະເຈົ້າຫາຍໃຈດີກວ່າ ແລະ ຄວາມອິດເມື່ອຍກໍ່ບັນເທົາສ່ວນໃດສ່ວນໜຶ່ງ. ມັນຍັງຊ່ວຍໃຫ້ຂ້າພະເຈົ້າສາມາດຫລິ້ນກິລາບາງປະເພດໄດ້. ຈັກຫາຍໃຈທຽມມືຖືໄດ້ຊ່ວຍໃຫ້ຂ້າພະເຈົ້າຫາຍໃຈກວ່າ ແລະ ສຸຂະພາບຂອງຂ້າພະເຈົ້າກໍນັບມື້ນັບດີຂຶ້ນ.”
ກ່ອນນີ້, ບັນດາຄົນເຈັບຄືອ້າຍ Syahrunizham Zainal ຕ້ອງນອນໂຮງໝໍເປັນປະຈຳ ເພືອ່ປິ່ນປົວ ແລະ ນຳໃຊ້ຈັກຫາຍໃຈທຽມເມື່ອຈຳເປັນ. ຍ້ອນບໍ່ທັນມີຢາປິ່ນປົວ, ເວລານອນໂຮງໝໍຂອງບັນດາຄົນເຈັບນີ້ອາດຈະຖືກແກ່ຍາວ. ສິ່ງດັ່ງກ່າວເຮັດໃຫ້ຄົນເຈັບຮູ້ສຶກອິດເມື່ອຍທີ່ສຸດ. ນອກນັ້ນ ເມື່ອນອນໂຮງໝໍເປັນປະຈຳ ອາດພາໃຫ້ຄົນເຈັບຖືກຕິດແປດໂລກລະບາດອີກ. ສະນັ້ນ ຈັກຫາຍໃຈທຽມມືຖື ຊ່ວຍໃຫ້ຄົນເຈັບສາມາດປິ່ນປົວຢູ່ເຮືອນໄດ້. ເພື່ອຮັບປະກັນໃຫ້ ຄົນເຈັບປິ່ນປົວຢູ່ເຮືອນ, ໂຮງໝໍ Tan Tock Seng ໄດ້ແນະນຳໃຫ້ຄອບຄົວຄົນເຈັບວິທີນຳໃຊ້ຈັກຫາຍໃຈທຽມ, ບັນດາຂັ້ນຕອນຕ້ອງປະຕິບັດໃນກໍລະນີຮີບດ່ວນ, ວິທີຫາຍໃຈທຽມ…. ແລະວາງແຜນປິ່ນປົວໃຫ້ເໝາະສົມ. ທ່ານໝໍ Chan Yeow, ພະແນກຟື້ນຟູຊີບ, ສັງກັດໂຮງໝໍ Tan Tock Seng ໃຫ້ຮູ້ວ່າ:
“ຖ້າຫາກພວກເຮົາບໍ່ຊ່ວຍຄົນເຈັບເຫຼົ່ານີ້, ຊີວິດຂອງເຂົາເຈົ້າຈະຕິດພັນກັບໂຮງໝໍຕະຫລອດ. ສະນັ້ນ ສິ່ງສຳຄັນແມ່ນ ພວກເຮົາຕ້ອງຊອກຫາບັນດາມາດຕະການເພື່ອຊ່ວຍເຂົາເຈົ້າເຈືອຈານເຂົ້າກັບວົງຄະນາຍາດ, ຊ່ວຍໃຫ້ເຂົາເຈົ້າເຂົ້າຮ່ວມການເຄື່ອນໄຫວທີ່ມີຄວາມໝາຍຫລາຍຢ່າງ.”
ເມື່ອໃຊ້ຈັກຫາຍໃຈທຽມມືຖືນີ້, ລາຍຈ່າຍໃຫ້ແກ່ການປິ່ນປົວໃນມື້ຫນຶ່ງແມ່ນ ປະມານ 70 SGD (ສະກຸນເງິນຂອງສິງກະໂປ), ໃນຂະນະ, ທີ່ນອນປິ່ນປົວໃນໂຮງໝໍຕ້ອງເສຍເງິນເຖິງ 1.000 SGD. ບໍ່ພຽງແຕ່ປະຢັດລາຍຈ່າຍເທົ່ານັ້ນ, ອັດຕາສ່ວນຜູ້ລອດຕາຍ ແລະ ຄຸນນະພາບຊີວິດຂອງຄົນເຈັບກໍເພີ່ມຂຶ້ນອີກ. ນອກນັ້ນ ຈັກຫາຍໃຈທຽມມືຖືນີ້ ກໍໄດ້ປະກອບສ່ວນຫລຸດຜ່ອນຈຳນວນຄົນເຈັບນອນໃນໂຮງໝໍຕ່າງໆ. ໂຮງໝໍ Tan Tock Seng ປາດຖະຫນາວ່າ ຈະມີຄົນເຈັບຫລາຍຄົນໄດ້ຊົມໃຊ້ຜົນປະໂຫຍດຈາກຈັກຫາຍໃຈທຽມມືຖືນີ້.