(vovworld)- ຍາກທີ່ຈະຊອກໄດ້ຮ້ານອາຫານລາວ ຢູ່ ນະຄອນຫລວງ ຮ່າໂນ້ຍ ເວົ້າສະເພາະ ແລະ ຢູ່ຫວຽດນາມ ເວົ້າລວມ. ແຕ່ ນັກຮຽນ, ນັກສຶກສາລາວທີ່ພວມຮຳ່ຮຽນຢູ່ ຮ່າໂນ້ຍ ເຄີຍເວົ້າໃຫ້ກັນຟັງກ່ຽວກັບຮ້ານອາຫານແຫ່ງຫນຶ່ງທີ່ເຕັມໄປດ້ວຍສີສັນລາວ. ຢູ່ທີ່ນີ້ ທຸກຄົນສາມາດພົບປະແລກປ່ຽນ, ແຮກສ່ຽວ ແລະ ຮັບປະທານອາຫານຂອງປະເທດລ້ານຊ້າງທີ່ສວຍງາມໄດ້.
ຮ້ານອາຫານລາວ ຢູ່ ນະຄອນຮ່າໂນ້ຍ
photo: Dieu Hong
|
ຮ້ານອາຫານທີ່ມີຊ່ືວ່າ: ສະບາຍດີ ຕັ້ງຢູ່ຖະຫນົນ ຫວູຫືວ, ເມືອງແທງຊວນ, ເບື້ອງຫລັງຂອງສະຖາບັນການເມືອງການປົກຄອງເຂດ 1 ຊື່ງແມ່ນແຫ່ງທີ່ມີນັກສຶກສາລາວ ກວ່າ 100 ຄົນພວມຮຳ່ຮຽນຢູ່. ເຖິງວ່າ ຕັ້ງບົນຖະຫນົນສາຍນ້ອຍກໍຕາມ ແຕ່ທ້າຍອາທິດ ຍາມໃດຮ້ານອາຫານນີ້ກໍມີແຂກຄົນມາຮັບປະທານອາຫານລາວເປັນຈຳນວນຫລວງຫລາຍ. ປ້າຍໂຄສະນາຂອງຮ້ານມີຮູບສາວລາວ ພະນົມມືກົ້ມຫົວສະບາຍດີ. ປະຕູເຂົ້າຮ້ານກໍ່ນ້ອຍໆ, ຖ້າບໍ່ແມ່ນແຂກທີ່ເຄີຍມາຍາກທີ່ຈະຄິດໄດ້ວ່າ ນີ້ແມ່ນຮ້ານອາຫານ ແຕ່ໃນຮ້ານພັດມີແຂກຫລາຍຄົນຢູ່.
ດ້ວຍເນື້ອທີ່ພຽງ 80 ຕາລາງແມັດເທົ່ານັ້ນ ແຕ່ຮ້ານອາຫານແຫ່ງນີ້ໄດ້ຮັບການປະດັບປະດາຢ່າງງາມຕາ ແລະ ເໝາະສົມ. ຢູ່ເທິງຝາເຮືອນມີຮູບສາວລາວທີ່ສວຍງາມ ພ້ອມກັບບັນດາເຄື່ອງດົນຕີພື້ນເມືອງຂອງຫວຽດນາມ. ນອກນັ້ນຍັງມີຮູບເຈົ້າຂອງຮ້ານຖ່າຍກັບທ່ານນາງ ສູນທອນ ໄຊຍະຈັກ, ຮອງລັດຖະມົນຕີການຕ່າງປະເທດລາວ, ອະດີດເອກອັກຄະລັດຖະທູດ ລາວ ປະຈຳຫວຽດນາມ ແລະ ຮູບທີ່ຖ່າຍກັບໝູ່ເພື່ອນລາວ.. ນອກນັ້ນຍັງມີເຄື່ອງຂອງປະດັບທີ່ເປັນສັນຍາລັກຂອງລາວຄື: ໂຕຊ້າງ, ໂຖ ແລະ ຮູບພາບທາດຫຼວງທີ່ເຮັດດ້ວຍເງິນ. ແຕ່ສິ່ງພິເສດ ໃນຮ້ານອາຫານນີ້ ເຈົ້າຂອງຮ້ານໄດ້ຈັດເວທີນ້ອຍໆເພື່ອໃຫ້ແຂກສາມາດຂຶ້ນຟ້ອນລຳວົງ ແລະ ຮ້ອງລຳທຳເພງໄດ້. ນາງ ເຈີນແທງຖາວ, ເຈົ້າຂອງຮ້ານອາຫານສະບາຍດີ, ຮຽນຈົບມະຫາວິທະຍາໄລແຫ່ງຊາດລາວເມື່ອປີ 2000 ແບ່ງປັນວ່າ:
“ຂ້າພະເຈົ້າເປີດຮ້ານອາຫານນີ້ມາເປັນເວລາ 4,5 ປີແລ້ວ, ໄລຍະທຳອິດ ແຂກມາບໍ່ຫຼາຍ, ແຕ່ປະຈຸບັນ ແຂກມາຮ້ານນີ້ຫລາຍພໍສົມຄວນ. ຂ້າພະເຈົ້າຢາກລົງທຶນສ້ອມແປງຍົກລະດັບຕົບແຕ່ງຮ້ານຄືນໃຫມ່ ເພື່ອຕ້ອນຮັບແຂກໃນຊຸມມື້ທ້າຍອາທິດ.”
ໂດຍກຳໄດ້ຄວາມນິຍົມຂອງຄົນລາວ ທີ່ມັກຮ້ອງລຳທຳເພງ ສະນັ້ນ ນາງຖາວໄດ້ກໍ່ສ້າງຮ້ານອາຫານ ສົມທົບກັບການເຮັດບໍລິການ karaoke. ແຂກມາຮ້ານນີ້ສາມາດກິນ ດື່ມແລະ ຮ້ອງເພງຕາມຄວາມນິຍົມ. ແຂກສ່ວນຫລາຍມັກເລືອກເອົາເພງລາວ, ເພງໄທເພື່ອຮ້ອງເພງນຳກັນ. ຈຳນວນແຂກມາຮ້ານອາຫານຫລາຍສຸດແມ່ນໃນຊຸມມື້ທ້າຍອາທິດ.
ໃນຮ້ານມີບັນດາເຍື່ອງອາຫານລາວທີ່ມີຊື່ສຽງຄື: ລາບ, ຕຳ່ໝາກຮຸ່ງ, ປານື້ງໝາກນາວ, ແກງປາສົ້ມ… ເພື່ອນ ກີດ ມາຈາກແຂວງ ອຸດົມໄຊ, ຊື່ງແມ່ນນັກສຶກສາປີທີ 2 ຂອງສະຖາບັນການເມືອງ ການປົກຄອງເຂດ 1 ໃຫ້ຮູ້ວ່າ:
ສຽງເພື່ອນກີດ
ສ່ວນອ້າຍສົມບັດ ສີຫາລາດ, ພະນັກງານຢູ່ແຂວງ ບໍລິຄຳໄຊ ພວມຮຳ່ຮຽນຢູ່ ສະຖາບັນການເມືອງ ການປົກຄອງເຂດ 1 ມາຮ້ານນີ້ເປັນເທື່ອທຳອິດ,ໃຫ້ຮູ້ວ່າ:
ສຽງອ້າຍສົມບັດ
ບໍ່ພຽງແຕ່ແມ່ນຈຸດນັດພົບຂອງບັນດານັກສຶກສາລາວທີ່ພວມຮຳ່ຮຽນຢູ່ຫວຽດນາມເທ່ົານັ້ນ, ຮ້ານອາຫານສະບາຍດີຍັງແມ່ນສະຖານທີ່ພົບປະຂອງບັນດາອະດີດນັກສຶກສາຫວຽດນາມ ທີ່ເຄີຍຮຳ່ຮຽນຢູ່ລາວ. ອ້າຍ ດວານວັນມີງ, ຮຽນຈົບມະຫາວິທະຍາໄລແຫ່ງຊາດລາວປີ 2006 ໃຫ້ຮູ້ວ່າ:
“ເມື່ອມີເວລາຫວ່າງ ຂ້າພະເຈົ້າກໍມາຮ້ານອາຫານນີ້ ເພື່ອຫວນຄືນບັນດາອະນຸສອນຊຸມເດືອນ, ປີທີ່ຮຳ່ຮຽນຢູ່ລາວ. ຢູ່ທີ່ນີ້ ມີອາຫານ ລາວ ຫລາຍເຍື່ອງ, ມີເບຍລາວ ແລະ ກໍ່ແມ່ນໂອກາດເພື່ອພົບປະກັບເພື່ອນນັກສຶກສາລາວຫລາຍຄົນອີກ. ”
ບັນດາແຂກຄົນມາຮ້ານອາຫານນີ້ກໍຫວັງວ່າ ຄວາມໄຝ່ຝັນຂອງເຈົ້າຂອງຮ້ານຈະປະກົດຜົນເປັນຈິງ. ນັ້ນແມ່ນ ເປີດກວ້າງ, ພັດທະນາຮ້ານອາຫານກວ່າອີກເພື່ອຕ້ອນຮັບແຂກຄົນຜູ້ທີ່ນິຍົມວັດທະນະທຳ, ອາຫານລາວ. ບໍ່ພຽງແຕ່ນັກສຶກສາລາວພວມຮຳ່ຮຽນຢູ່ ຫວຽດນາມ, ອະດີດນັກສຶກສາຫວຽດນາມ ທີ່ເຄີຍຮຳ່ຮຽນຢູ່ລາວເທົ່ານັ້ນ ຫາກບັນດາຜູ້ທີ່ສົນໃຈເຖິງປະເທດລ້ານຊ້າງກໍຮູ້ຈັກຮ້ານອາຫານສະບາຍດີຄືດັ່ງຈຸດນັດພົບທີ່ມີຊີວິດຊີວາເພື່ອຊອກຫາວັດທະນະທຳລາວ ຢູ່ ຮ່າໂນ້ຍ.