(vovworld)- ປະຈຸບັນ, ບັນດາປະເທດ ອາຊຽນ ພວມແມ່ນຈຸດນັດພົບຂອງນັກທ່ອງທ່ຽວສາກົນເປັນຈຳນວນຫລວງຫລາຍ. ເພາະວ່າ ອາຊຽນບໍ່ພຽງແຕ່ມີສະຖານທີ່ທ່ອງທ່ຽວທີ່ສວຍງາມ, ມີທັດສະນີຍະພາບທີ່ລືຊື່, ແລະອາຫານພື້ນເມືອງຫຼາຍເຍື່ອງທີ່ແຊບນົວເທົ່ານັ້ນ ຫາກບັນດາຍານພາຫະນະໄປມາທີ່ເປັນເອກະລັກສະເພາະໄດ້ສ້າງຄວາມປະທັບໃຈທີ່ສຸດໃຫ້ແກ່ນັກທ່ອງທ່ຽວ. ໃນລາຍການຊາຍຄາອາຊຽນພາກນີ້, ພວກເຮົາຂໍແນະນຳຍານພາຫະນະທີ່ເປັນເອກະລັກສະເພາະຈຳນວນຫນຶ່ງຂອງນະຄອນຫລວງ ຮ່າໂນ້ຍ (ຫວຽດນາມ), ນະຄອນຫລວງ ບາງກອກ(ໄທ) ແລະ ນະຄອນຫລວງ ມານີລາຂອງ ຟີລີບປີນ.
“ຂ້າພະເຈົ້າຢາກຂີ່ລົດຖີບສາມລໍ້ (ຫລືເອີ້ນວ່າ ຊີກໂລ)ເທື່ອຫນຶ່ງ” ນັ້ນແມ່ນຄຳເວົ້າຂອງນັກທ່ອງທ່ຽວຕ່າງປະເທດທີ່ມາຢ້ຽມຢາມຫວຽດນາມສ່ວນຫລາຍເມື່ອເຫັນຂະບວນຊີກໂລແລ່ນຕາມຖະຫນົນນ້ອຍສາຍຕ່າງໆ. ຊີກໂລແມ່ນລົດປະເພດນ້ອຍນຳໃຊ້ແຮງຄົນ. ຊີກໂລ ມີສາມລໍ້, ສອງລໍ້ເບື້ອງຫນ້າ ແລະ ລໍ້ຫນຶ່ງເບື້ອງຫລັງ. ເບື້ອງຫນ້າແມ່ນຕູ້ລົດສາມາດໃຫ້ແຂກສອງຄົນນັ່ງໄດ້, ເບື້ອງຫລັງແມ່ນບ່ອນນັ່ງຂອງຜູ້ຂັບລົດ. ແຕ່ດົນນານມາແລ້ວ, ຊີກໂລໄດ້ກາຍເປັນຍານພາຫະນະໄປມາທ່ອງທ່ຽວທີ່ຂາດບໍ່ໄດ້ຢູ່ຮ່າໂນ້ຍ. ດ້ວຍບັນດາປັດໃຈທີ່ສະດວກສະບາຍ ແລະ ສະຫນິດສະຫນົມນັ້ນ. ປະຈຸບັນ ນັກທ່ອງທ່ຽວຕ່າງປະເທດເຄີຍເລືອກເຟັ້ນ ຊີກໂລແມ່ນຍານພາຫະນະໄປມາເມື່ອທ່ຽວຊົມນະຄອນຫລວງ ຮ່າໂນ້ຍ. ເມື່ອນັ່ງເທິງຊີກໂລເລາະຫລິ້ນຕາມຖະຫນົນຫົນທາງສາຍຕ່າງໆຢູ່ຄຸ້ມເມືອງເກົ່າ ແລະ ເຈືອຈານໃນບັນຍາກາດອຶກກະທຶກຄຶກໂຄມຂອງຊາວຮ່າໂນ້ຍ ດ້ວຍຖະຫນົນເກົ່າ 36 ສາຍ ແມ່ນຮູບການທ່ອງທ່ຽວທີ່ສ້າງຄວາມປະທັບໃຈທີ່ສຸດໃຫ້ແກ່ນັກທ່ອງທ່ຽວ. ໃນບັນຍາກາດອຶກກະທຶກຄຶກໂຄມຂອງນະຄອນທີ່ທັນສະໄຫມນັ້ນ, ຮູບພາບຊິກໂລໄປມາຊ້າໆເປັນຂະບວນໄດ້ສ້າງຄວາມດູດດື່ມ, ປະກອບສ່ວນຮັກສາວັດທະນະທຳທີ່ເປັນເອກະລັກສະເພາະຂອງຮ່າໂນ້ຍໃນເມື່ອກ່ອນໄວ້. ອ້າຍ ຫງວຽນວັນເກື່ອງ, ຜູ້ຂັບຊິກໂລສັງກັດບໍລິສັດຫຸ້ນສ່ວນການຄ້າ ແລະ ບໍລິການ ລານແອງ ແບ່ງປັນວ່າ:
ລົດຊີກໂລ ຢູ່ ຫວຽດນາມ
ພາບ:internet
|
“ປະຈຸບັນ, ຄະນະນັກທ່ອງທ່ຽວຕ່າງປະເທດມາຢ້ຽມຢາມນະຄອນຫລວງຮ່າໂນ້ຍ ສ່ວນຫລາຍມັກທ່ຽວຊົມຮ່າໂນ້ຍດ້ວຍຊິກໂລໃນຊົ່ວໂມງທີ່ມີຍານພາຫະນະໄປມາຫຼາຍທີ່ສຸດ ເພື່ອໄດ້ເຫັນປະຈັກຕາຊີວິດການເປັນຢູ່ຂອງຊາວຮ່າໂນ້ຍ. ສ່ວນສຳລັບຜູ້ທີ່ມັກຄວາມສະຫງົບງຽບຫລືຢາກຄົ້ນຫາຮ່າໂນ້ຍເກົ່າ, ເຂົາເຈົ້າມັກທ່ຽວຊົມຕົວເມືອງດ້ວຍຊີກໂລ ໃນເວລາ 4 ໂມງເຊົ້າ ຫລື 20 ໂມງ. ຖ້າໄປແຕ່ 4 ໂມງເຊົ້າ, ນັກທ່ອງທ່ຽວຈະແວ່ຢາມຕະຫລາດດອກໄມ້ຄຳ່ຄືນ ກວ໋າງບາ ແລະ ໄປຢ້ຽມຊົມຫນອງໂຮ່ໄຕເພື່ອສູບອາກາດປອດໂປ່ງໃນຍາມອາລຸນໃໝ່. ສ່ວນຢ້ຽມຊົມຕົວເມືອງໃນຍາມຄ່ຳຄືນ, ນັກທ່ອງທ່ຽວເຄີຍໄປສະຫນາມຫລວງ ບາດີ່ງ, ຮັບຊົມ ແລະ ເຂົ້າຮ່ວມພິທີຊັກທຸງຊາດລົງ, ໄປຖະຫນົນອາຫານການກິນໃນຍາມກາງຄືນ ແລະ ຮັບຊົມຮ່າໂນ້ຍທີ່ສວຍງາມໃນແສງໄຟດ້ວຍສີຫລາກຫລາຍ”
|
ສ່ວນຢູ່ ນະຄອນຫລວງ ບາງກອກປະເທດໄທ, ເຖິງວ່າຢູ່ທີ່ນີ້ເຕົ້າໂຮມຍານພາຫະນະທີ່ທັນສະໄຫມຫຼາຍປະເພດຄື: ລົດໄຟຟ້າ, ໄຟຟ້າໃຕ້ດິນ, ແທກຊີ… ແຕ່ຮູບພາບລົດຕຸກຕຸກຫຼາຍຄັນທີ່ໄປມາຕາມຖະຫນົນສາຍຕ່າງໆນັ້ນ ກໍ່ພາໃຫ້ນັກທ່ອງທ່ຽວຢາກໄດ້ໄປທ່ຽວບາງກອກດ້ວຍລົດປະເພດນີ້.
ຕຸກຕຸກແມ່ນຊື່ຂອງລົດທີ່ມາຈາກສຽງດັງ “ຕຸກຕຸກ” ຂອງກົນຈັກໃນລົດນີ້. ນີ້ແມ່ນຍານພາຫະນະຂະຫນາດນ້ອຍ, ໄປມາຢ່າງສະດວກສະບາຍຢູ່ຖະຫນົນທີ່ຄັບຄາຫນາແຫນ້ນ. ລົດຕຸກຕຸກໄດ້ປະກົດອອກກ່ອນນີ້ 50 ປີ. ໃນລົດຕຸກຕຸກຂົນສົ່ງນັກທ່ອງທ່ຽວ ຜູ້ຂັບລົດເຄີຍຕິດຕັ້ງເຄື່ອງດົນຕີ, ແລະປົກຫຸ້ມບ່ອນນັ່ງຂອງແຂກດ້ວຍໜັງທີ່ສວຍງາມ, ຢູ່ເບື້ອງຫລັງມີສາຍອັງແຕນທີ່ມັດດ້ວຍຜ້າໄຫມສີແດງເພື່ອປະດັບ. ລົດຕຸກຕຸກກາຍເປັນຜະລິດຕະພັນທ່ອງທ່ຽວທີ່ເປັນເອກະລັກສະເພາະຂອງໄທ. ທ່ານ Ery, ນັກທ່ອງທ່ຽວມາຈາກ ດານມາກ ໃຫ້ຮູ້ວ່າ:
“ຂ້າພະເຈົ້າຮູ້ສຶກປະທັບໃຈເມື່ອໄດ້ໄປດ້ວຍລົດຕຸກຕຸກ, ລົດນີ້ແລ່ນກໍ່ໄວ ແລະ ໄປມາສະດວກສະບາຍ ແລະ ສາມາດໄປຍັງທຸກບ່ອນໃນຕົວເມືອງໄດ້, ອັນໄດ້ຊ່ວຍໃຫ້ຂ້າພະເຈົ້າມີໂອກາດຮັບຊົມ ແລະ ຄົ້ນຫາຄວາມງາມຂອງນະຄອນຫຼວງ. ”
ໂດຍຕ່າງຫາກກັບຍານພາຫະນະສາມລໍ້ຄື: ຊີກໂລຂອງຫວຽດນາມ, ລົດຕຸກຕຸກຂອງໄທ, Jeepney ຂອງມານີລາ ແມ່ນລົດປະເພດຫນຶ່ງໂດຍຊາວ ຟິລິບປີນ ຜະລິດເອງ. ລົດ Jeepney ສາມາດຂົນສົ່ງຜູ້ໂດຍສານໄດ້ແຕ່ 8 -10 ຄົນ. ທາງໃນຂອງລົດ ສ່ວນຫລາຍແມ່ນຄ້າຍຄືກັນ, ແຕ່ທາງນອກຂອງລົດ ແມ່ນຖືກປະດັບປະດາດ້ວຍຮູບພາບ ແລະ ສີສັນທີ່ມີຊີວິດຊີວາຕາມຄວາມນິຍົມຂອງຜູ້ຂັບລົດ. ອ້າຍ ເລຈີຫຽນ, ນັກທ່ອງທ່ຽວ ໄດ້ແບ່ງປັນວ່າ: ການຢ້ຽມຊົມຕົວເມືອງມານີລາ ດ້ວຍລົດ Jeepney ໄດ້ສ້າງຄວາມປະທັບໃຈທີ່ສຸດໃຫ້ແກ່ອ້າຍ.
“ຂ້າພະເຈົ້າຮູ້ສຶກຈັບອົກຈັບໃຈຫຼາຍ ເມື່ອໄດ້ນັ່ງເທິງລົດ Jeepney ໄປທ່ຽວຊົມທັດສະນີຍະພາບທັງສອງຟາກທາງ. ພິເສດ ລົດປະເພດນີ້ໄດ້ຮັບການປະດັບປະດາດ້ວຍຫລາຍຮູບທີ່ແປກປະຫຼາດ ແລະ ງາມຕາ.”
ລົດ Jeepney
ພາບ:internet
|
ຢູ່ມານີລາ, Jeepney ຈະຂົນສົ່ງນັກທ່ອງທ່ຽວໄປຍັງທຸກບ່ອນດ້ວຍລາຄາຖືກ. ດັ່ງນັ້ນເຂົາເຈົ້າເຄີຍເວົ້າວ່າ ຖ້າຫາກ ບໍ່ທັນໄດ້ນັ່ງເທິງລົດ Jeepney ໄປທ່ຽວນະຄອນ ມານີລາ, ໝາຍຄວາມວ່າເພື່ອນບໍ່ທັນມາຢາມນະຄອນນີ້ເທື່ອ.
ເຖິງວ່າ ເພື່ອນຈະໄປທ່ອງທ່ຽວດ້ວຍຮູບການໃດກໍຕາມ, ແຕ່ການທ່ອງທ່ຽວນະຄອນດ້ວຍບັນດາຍານພາຫະນະດັ່ງກ່າວຈະຊ່ວຍໃຫ້ເພື່ອນຮັບຮູ້ໄດ້ຊີວິດການເປັນຢູ່ຂອງຊາວທ້ອງຖິ່ນຢ່າງຈະແຈ້ງ ແລະ ສ້າງຄວາມປະທັບໃຈທີ່ສຸດໃຫ້ແກ່ເພື່ອນອີກດ້ວຍ.