(vovworld)-“ພວກຂ້າພະເຈົ້າຢາກນຳເອົາວັດທະນະທຳທີ່ເຂັ້ມຂົ້ນໄປດ້ວຍສີສັນລາວມາໃຫ້ປະຊາຊົນນະຄອນຫລວງ ຮ່າໂນ້ຍ. ນີ້ກໍແມ່ນໂອກາດເພື່ອໃຫ້ບັນດານັກຮຽນ, ນັກສຶກສາ ລາວ ບໍ່ມີເງື່ອນໄຂກັບຄືນຕ້ອນຮັບບຸນປີໃຫມ່ພ້ອມກັບຄອບຄົວ ກໍຄືເພື່ອນມິດ ຫວຽດນາມ ຜູ້ທີ່ຮັກແພງປະເທດລາວ ມີໂອກາດໄດ້ພົບປະແລກປ່ຽນ ແລະ ເຊື່ອມຕົວໃນບັນຍາກາດຕ້ອນຮັບບຸນປີໃຫມ່ຢ່າງເບິກບ້ານມ່ວນຊື່ນ.” ນັ້ນແມ່ນຄຳແບ່ງປັນຂອງ ອ້າຍ ຜ້າດອນ ອິນສະແຫວງ, ເຈົ້າຂອງຮ້ານອາຫານລາວ ຢູ່ ຮ່າໂນ້ຍ.
ລາຍການສະແດງສິລະປະຕ້ອນຮັບບຸນປີໃຫມ່ລາວ
ພາບ:vov.vn
|
ເວລາ 9 ໂມງ 30 ນາທີຂອງຕອນເຊົ້າວັນທີ 12/4, ບັນຍາກາດຢູ່ຮ້ານອາຫານລາວ ເລກທີ 110 ເກົາໄຢ - ຮ່າໂນ້ຍໄດ້ມີຄວາມຟົດຟື້ນມ່ວນຊື່ນກວ່າທຸກມື້ ເພາະວ່າ ມື້ນີ້ ຮ້ານອາຫານລາວ ໄດ້ຈັດຕັ້ງການເຄື່ອນໄຫວຕ່າງໆເພື່ອຕ້ອນຮັບບຸນປີໃຫມ່ ພສ 2558. ໃນເນື້ອທີ່ 1.000 ຕາລາງແມັດ, ທັງຢູ່ໃນຮ້ານ ແລະ ບໍລິເວນອອ້ມຂ້າງລ້ວນແຕ່ໄດ້ຮັບການປະດັບປະດາດ້ວຍດອກໄມ້ ແລະ ປ້າຍໂຄສະນາຢ່າງສວຍງາມ ເຖິງວ່າໂຕະຕັ່ງໄດ້ຈັດວາງຕື່ມອີກຫລາຍຊຸດກໍຕາມ ແຕ່ໄດ້ມີແຂກມານັ່ງເກືອບເຕັມໝົດ ດ້ວຍ 150 ຄົນ.
ພິທີບາສີສູ່ຂວັນ
ພາບ:vov.vn
|
ເລື່ອງຈັດຕັ້ງພິທີຕ້ອນຮັບບຸນປີໃຫມ່ລາວຢູ່ ຮ່າໂນ້ຍ ເວົ້າສະເພາະ ແລະ ຢູ່ຫວຽດນາມ ເວົ້າລວມ ບໍ່ແມ່ນເລື່ອງແປກປະຫລາດອີກ. ແຕ່ລະປີ, ເມື່ອບຸນປີໃຫມ່ລາວວຽນມາ, ບັນດາໂຮງຮຽນທີ່ມີນັກຮຽນ, ນັກສຶກສາລາວມາຮຽນ ລ້ວນແຕ່ຈັດຕັ້ງພິທີຕ້ອນຮັບບຸນປີໃຫມ່ໃຫ້ແກ່ເຂົາເຈົ້າ ດ້ວຍຫລາຍຮູບການທີ່ແຕກຕ່າງກັນ. ອ້າຍ ຜາດອນ ອີນສະແຫວງ, ເຈົ້າຂອງຮ້ານອາຫານລາວ ແບ່ງປັນວ່າ: ຈຸດປະສົງຈັດຕັ້ງພິທີຕ້ອນຮັບບຸນປີໃຫມ່ລາວໃນມື້ນີ້ດ້ວຍຄວາມຫວັງຢາກສ້າງບັນຍາກາດເພື່ອໃຫ້ເພື່ອນມິດຮັກແພງປະເທດລາວ ແລະ ບັນດານັກສຶກສາລາວຢູ່ ນະຄອນຫລວງ ຮ່າໂນ້ຍ ມີໂອກາດໄດ້ພົບປະ, ຮັບປະທານບັນດາເຍື່ອງອາຫານພື້ນເມືອງລາວ. ນັບແຕ່ເມື່ອໄດ້ເປີດຮ້ານ, ຍາມໃດອ້າຍກໍຢາກມີແນວຄິດຢາກເຮັດໃຫ້ຮ້ານອາຫານນີ້ກາຍເປັນສະຖານທີ່ວັດທະນະທຳລາວ ຢູ່ ຮ່າໂນ້ຍ.
ສຽງ ຜາດອນ
ພິທີບາສີສູ່ຂວັນເພື່ອຕ້ອນຮັບບຸນປີໃຫມ່ໄດ້ເລີ່ມຂຶ້ນໃນເວລາ 11 ໂມງ 30 ນາທີ. ເຈົ້າຂອງຮ້ານອາຫານພ້ອມດ້ວຍແຂກຖືກເຊີນແມ່ນພາກັນນັ່ງນົບອ້ອມພາຂວັນເພື່ອຂໍພອນ ແລະບາສີສູ່ຂວັນຕາມຮີດຄອງປະເພນີຂອງລາວ.ເຂົາເຈົ້າຜູ້ໃດກໍບ່ຽງແພ, ສະເພາະໝໍພອນແມ່ນນຸ່ງຊຸດໂສ້ງເສື້ອສຸພາບ, ບໍ່ໃສ່ເກີບ, ບຽງຜ້າສີແດງດ້ວຍລວດລາຍທີ່ມີສີຫລາກຫລາຍ, ນັ່ງຢູ່ຕໍ່ຫນ້າພາບາສີສູ່ຂວັນດ້ວຍໃບຫນ້າເຄັ່ງຂືມ, ມືຈັບໄມ້ເລີ່ມທຳພິທີຂໍພອນ.
ພາຍຫລັງພິທີບາສີສູ່ຂວັນ ແມ່ນລາຍການສະແດງສິລະປະ ໂດຍບັນດານັກສຶກສາລາວ ສະແດງ. ສາວລາວ 8,9 ຄົນ ຊື່ງແມ່ນນັກສຶກສາລາວພວມຮ່ຳຮຽນຢູ່ ຫວຽດນາມ ໃນຊຸດອາພອນພື້ນເມືອງລາວ ດ້ວຍສີຫລາກຫລາຍງາມຕາຮ້ອຍຍີ້ມທີ່ນີ່ມນວນອ່ອນຫວານ ສະແດງບັນດາວາດຟ້ອນພື້ນເມືອງຢ່າງອ່ອນຊ້ອຍ ອັນໄດ້ສ້າງຄວາມປະທັບໃຈໃຫ້ແກ່ແຂກເຂົ້າຮ່ວມ. ພາຍຫລັງລາຍການສະແດງສິລະປະແມ່ນລາຍການຟ້ອນລຳວົງ ໂດຍມີການເຂົ້າຮ່ວມຂອງບັນດານັກສຶກສາລາວ ແລະ ອະດີດນັກສາຫວຽດນາມ ທີ່ຮ່ຳຮຽນຢູ່ລາວ.
ລາຍການຟ້ອນລຳວົງອວຍພອນປີໃຫມ່
ພາບ:vov.vn
|
ນີ້ບໍ່ແມ່ນເປັນຄັ້ງທຳອິດທີ່ເຂົ້າຮ່ວມລາຍການຟ້ອນລຳວົງ, ແຕ່ ອ້າຍ ດວ່ານມີງ, ອະດີດນັກສຶກສາຫວຽດນາມຮຽນ ຢູ່ ລາວ ຮູ້ສຶກອາຍຫນ້ອຍຫນຶ່ງ ເພາະວ່າ ດົນແລ້ວ ອ້າຍບໍ່ໄດ້ຟ້ອນລຳວົງກັບໝູ່ເພື່ອນ. ອ້າຍມີງ ໃຫ້ຮູ້ວ່າ: ນີ້ແມ່ນໂອກາດເພື່ອໃຫ້ພວກຂ້າພະເຈົ້າຄິດເຖິງປະເທດລ້ານຊ້າງທີ່ສວຍງາມ ຊື່ງແມ່ນບ່ອນອ້າຍໄດ້ຮ່ຳຮຽນ ແລະ ອາໄສມາເປັນເວລາ ເກືອບ 10 ປີ.
“ບັນດາສະມາຊິກໃນສະມາຄົມອະດີດນັກສຶກສາຫວຽດນາມ ຮ່ຳຮຽນຢູ່ລາວ ເຄີຍເຕົ້າໂຮມກັນເພື່ອທົບທວນຄືນຊຸມເດືອນປີທີ່ຮ່ຳຮຽນຢູ່ລາວ. ແຕ່ມື້ນີ້ ຮ້ານອານຫານລາວ ໄດ້ຈັດຕັ້ງພິທີຕ້ອນຮັບບຸນປີໃຫມ່ລາວຢ່າງເບິກບ້ານມ່ວນຊື່ນ ແລະ ເຂັ້ມຂົ້ນໄປດ້ວຍສີສັນລາວ ໄດ້ສ້າງຄວາມປະທັບໃຈໃຫ້ແກ່ພວກຂ້າພະເຈົ້າທີ່ສຸດ ກໍຄືເຮັດໃຫ້ພວກຂ້າພະເຈົ້າຄິດຮອດຄິດເຖິງບັນດາອະນຸສອນໃນໄລຍະທີ່ໄດ້ຮ່ຳຮຽນຢູ່ລາວ. ປີຫນ້າ ຖ້າຮ້ານອາຫານລາວ ຈັດຕັ້ງງານບຸນຄືມື້ນີ້ ແນ່ນອນວ່າ ຂ້າພະເຈົ້າຈະພາໝູ່ເພື່ອນມາຮ່ວມຫລາຍກວ່າອີກ.”
ທີ່ທ່ານຫາກໍຮັບຟັງແລ້ວນັ້ນແມ່ນຄຳອວຍພອນປີໃຫມ່ຂອງບັນດານັກສຶກສາລາວໃນພິທີຫົດນ້ຳ. ເຖິງວ່າ ໂສ້ງເສື້ອຖືກປຽກໝົດກໍຕາມ ແຕ່ເພື່ອນໄຂ້ຄຳ ອິນປະສົມບາດ, ນັກສຶກສາປີທີ 2 ມະຫາວິທະຍາໄລບໍ່ແຮ່ ແລະ ທໍລະນີສາດ ຮູ້ສຶກເບິກບ້ານມ່ວນຊື່ນທີ່ສຸດ.
ສຽງ ໄຂ້ຄຳ
ທຸກຄົນໄດ້ພ້ອມກັນຫົດນ້ຳ, ມັດແຂນອວຍພອນໃຫ້ກັນ, ຮ້ອງເພງຟ້ອນລຳວົງ ແລະ ຮັບປະທານອາຫານພື້ນເມືອງລາວ. ພິທີຕ້ອນຮັບບຸນປີໃຫມ່ລາວແກ່ຍາວຮອດ23 ໂມງກາງຄືນຈຶ່ງອັດລົງ. ເຖິງວ່າກ່ອນນີ້ ແຂກຫລາຍຄົນບໍ່ລື້ງເຄີຍກັນ ແຕ່ມາຮ່ວມ ບຸນປີໃຫມ່ມື້ນີ້ ທຸກຄົນຮູ້ສຶກຄືວ່າມີຄວາມໃກ້ຊິດສະຫນິດສະຫນົມກັນກວ່າ. ບຸນປີໃຫມ່ລາວ ໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ປະຊາຊົນນະຄອນຫລວງ ຮ່າໂນ້ຍ ເມື່ອເຂົ້າຮ່ວມງານບຸນ.