(vovworld)-ຫນຶ່ງໃນບັນດາການເຄື່ອນໄຫວດຶງດູດການເຂົ້າຮ່ວມຂອງພວກນ້ອງເຍົາວະຊົນ ອະນຸຊົນ ແລະ ປະຊາຊົນນະຄອນຫລວງ ຮ່າໂນ້ຍ ໃນໂອກາດບຸນວັນເພງເດືອນ 8 ປີ 2013 ເປັນຈຳນວນຫລວງຫລາຍແມ່ນລາຍການ“ຕ້ອນຮັບບຸນວັນເພງເດືອນ 8 ພ້ອມກັນຄົ້ນຫາອາຊີຕາເວັນອອກສຽງໃຕ້”. ລາຍການລວມມີ ບັນດາການເຄື່ອນໄຫວສະແດງຊຸດອາພອນພື້ນເມືອງ, ແນະນຳການລະຫລິ້ນພື້ນເມືອງ ແລະ ອາຫານການກິນຂອງບັນດາປະເທດໃນພາກພື້ນໂດຍຫໍພິພິດທະພັນຊົນເຜ່ົາວິທະຍາຫວຽດນາມ ສົມທົບກັບສະຖານທູດບັນດາປະເທດອາຊຽນ ປະຈຳ ຮ່າໂນ້ຍ ແລະ ສະຫະພັນບັນດາອົງການຈັດຕັ້ງມິດຕະພາບນະຄອນຮ່າໂນ້ຍຈັດຕັ້ງຂຶ້ນ.
 |
ເລີ່ມຕົ້ນລາຍການ“ຕ້ອນຮັບບຸນວັນເພງເດືອນ 8 ພ້ອມກັນຄົ້ນຫາອາຊີຕາເວັນອອກສຽງໃຕ້” ແມ່ນການສະແດງຊຸດອາພອນພື້ນເມືອງຂອງຜູ້ຍິງ ແລະ ຜູ້ຊາຍບັນດາເຂດ,ພາກຂອງຫວຽດນາມ, ລາວ, ກຳປູເຈຍ, ຟິລິບປີນ, ບຣູໄນ, ມຽນມາ, ໄທ, ມາເລເຊຍ, ອິນໂດເນເຊຍ ແລະ ຕີມໍຕາເວັນອອກ. ສິ່ງພິເສດ, ບັນດາຊຸດອາພອນນີ້ໂດຍແມ່ນພວກນ້ອງເຍົາວະຊົນຫວຽດນາມ ແລະ ນັກສຶກສາບັນດາປະເທດອາຊຽນພວມຮຳ່ຮຽນຢູ່ ຫວຽດນາມ ສະແດງ. ອາພອນແຕ່ລະຊຸດນັ້ນ ບໍ່ພຽງແຕ່ສະແດງໃຫ້ເຫັນເຕັກນິກການຕັດຫຍິບ, ຖັກແສ່ວເທົ່ານັ້ນ ຫາກຍັງມີຄຸນຄ່າວັດທະນະທຳມີມາແຕ່ດົນນານຂອງບັນດາປະເທດດັ່ງກ່າວອີກດ້ວຍ. ຊຸດອາພອນພື້ນເມືອງຂອງຫວຽດນາມ ລວມມີ: ຊຸດອາພອນຂອງເຜົ່າກີງ, ເຜົ່າມົ້ງ, ເຜ່ົາໄທດຳ, ເຜົ່າຢາວແດງ. ສ່ວນຈຸດພົ້ນເດັ່ນຂອງຊຸດອາພອນພື້ນເມືອງຂອງຕີມໍຕາເວັນອອກ ແມ່ນເຄື່ອງສຳອາງຄືປອກແຂນ, ປອກຄໍ… ພິເສດ ແມ່ນມົງກຸດທີ່ປະດັບປະດາດ້ວຍຮູບເຮືອນຮ້ານທີ່ເປັນມູນເຊື້ອ. ສ່ວນຊຸດອາພອນຂອງຊາວເຜົ່າ ຢາວາ ຢູ່ ອິນໂດເນເຊຍ ມີລວດລາຍປະດັບປະດາຢ່າງລະອຽດລະອໍ ແລະ ສວຍງາມເປັນຈຳນວນຫລວງຫລາຍ ດ້ວຍເຕັກນິກຖັກແສ່ວ ແລະ ເຕັກນິກພິມດ້ວຍຂີ້ເຜິ້ງ. ສ່ວນຊຸດອາພອນພື້ນເມືອງຂອງລາວ, ແມ່ຍິງນຸ່ງສິ້ນ ແລະ ໃສ່ຜ້າບຽງ.
ການລະຫລິ້ນຍ່າງດ້ວຍກະໂປະໝາກພ້າວ
ພາບ:internet
|
ຄຽງຂ້າງເຂດສະແດງຊຸດອາພອນພື້ນເມືອງຂອງບັນດາເຜົ່າໃນບັນດາປະເທດອາຊີຕາເວັນອອກສຽງໃຕ້ແລ້ວ, ເຂດແນະນຳການລະຫລິ້ນພື້ນເມືອງຂອງບັນດາປະເທດກໍໄດ້ດຶງດູດຜູ້ເຂົ້າຮ່ວມເປັນຈຳນວນຫລວງຫລາຍ. ການລະຫລິ້ນພື້ນເມືອງຄື ດຶງເຊືອກບໍ່ພຽງແຕ່ແມ່ນການລະຫລິ້ນຂອງຫວຽດນາມເທົ່ານັ້ນ ຫາກຍັງແມ່ນການລະຫລິ້ນຂອງໄທອີກດ້ວຍ. ແຕ່ຈຸດທີ່ແຕກຕ່າງກັນນັ້ນແມ່ນ ການລະຫລິ້ນດຶງເຊືອກຂອງຫວຽດນາມພຽງແຕ່ມີເຊືອກສາຍຫນຶ່ງທີ່ແບ່ງເປັນສອງຝ່າຍເພື່ອແຂ່ງຂັນກັນ. ສ່ວນການລະຫລິ້ນດຶງເຊືອກຂອງໄທ ພັດມີເຊືອກສາມສາຍທີ່ມັດໃສ່ວົງມົນ ບາງເທື່ອແມ່ນລົດໃຊ້ ແລະ 3 ຄົນຜູ້ລະສາຍປີນຫລັງໃສ່ກັນເພື່ອດຶງ. ຝ່າຍໃດຖືດດຶງຜ່ານຈຸດໃຈກາງຂອງວົງມົນ ຝ່າຍນັ້ນຖືກເສຍໄຊ.
“ຫລານເຫັນວ່າ ການລະຫລິ້ນປະເພດນີ້ມ່ວນຫລາຍ. ຜູ້ຫລິ້ນຕ້ອງມີສຸຂະພາບແຂງແຮງ. ເຂົ້າຮ່ວມລາຍການຫລານຮູ້ຈັກເຖິງການລະຫລິ້ນພື້ນເມືອງຂອງໄທຕື່ມອີກ”
ການລະຫລິ້ນຍ່າງດ້ວຍກະໂປະໝາກພ້າວຂອງມາເລເຊຍບໍ່ພຽງແຕ່ດຶງດູດພວກນ້ອງເຍົາວະຊົນເທ່ົານັ້ນຫາກພໍ່ແມ່ຂອງພວກນ້ອງກໍຢາກເຂົ້າຮ່ວມອີກດ້ວຍ.
ການລະຫລິ້ນຍ່າງດ້ວຍກະໂປະໝາກພ້າວ ຊື່ງລວມມີກະໂປະໝາກພ້າວ 2 ເຄິ່ງ ຖືກມັດດ້ວຍເຊືອກສາຍຍາວ. ຜູ້ຫລິ້ນຕ້ອງຢືນເທິງກະໂປະໝາກພ້າວ 2 ເຄິ່ງແລ້ວ ດຶງເຊືອກເພື່ອຍ່າງ ຜູ້ໃດຍ່າງໄວກວ່າແມ່ນຈະຮັບຊະນະ.
ສ່ວນຢູ່ບໍລິເວນອື່ນ, ເຖິງວ່າບັນຍາກາດບໍ່ອຶກກະທຶກຄຶກໂຄມຄືການລະຫລິ້ນດຶງເຊືອກຫລືການຍ່າງດ້ວຍກະໂປະໝາກພ້າວກໍຕາມ ແຕ່ບັນດາການລະຫລິ້ນພູມປັນຍາຄື: ຊອກຮູ້ທຸງຊາດ, ເງິນຕາ, ມໍລະດົກວັດທະນະທຳບັນດາປະເທດອາຊີຕາເວັນອອກສຽງໃຕ້ຜ່ານແຜນທີ່, ທາສີທຸງຊາດບັນດາປະເທດ, ປະດິດພາບມໍລະດົກອາຊີຕາເວັນອອກສຽງໃຕ້ ດ້ວຍເຂົ້າຫລື ການລະຫລິ້ນຫ້ອຍເມັດ, ແກ້ເຊືອກຂອງ ບຣູໄນກໍດຶງດູດຜູ້ເຂົ້າຮ່ວມເປັນຈຳນວນຫລວງຫລາຍ. ເພື່ອນ ຢູຍຮືງ, ຜູ້ອາສາສະໝັກຂອງລາຍການແນະນຳ ໃຫ້ຮູ້ວ່າ:
“ ການລະຫລິ້ນຫ້ອຍເຊືອກມີສອງປະເພດ, ຫອ້ຍເຊືອກນ້ອຍ ແລະ ຫ້ອຍເຊືອກໃຫຍ່ກວ່າ. ການລະຫລິ້ນແບບນີ້ບໍ່ຍາກປານໃດ ຜູ້ຫລິ້ນພຽງແຕ່ສະແດງຄວາມຄ່ອງແຄ້ວຂອງຕົນ. ການລະຫລິ້ນນີ້ກໍດຶງດູດຜູ້ເຂົ້າຮ່ວມເປັນຈຳນວນຫລວງຫລາຍ.
ບໍລິເວນແນະນຳອາຫານການກິນອາຊີຕາເວັນອອກສຽງໃຕ້ ດ້ວຍພໍ່ຄົວແມ່ຄົວມາຈາກບັນດາປະເທດ ອາຊຽນ ແມ່ນບ່ອນທີ່ສ້າງຄວາມດຶງດູດໃຫ້ແກ່ຜູ້ຢ້ຽມຢາມຢູ່ທີ່ນີ້. ມີອາຫານຫລາຍເຍື່ອງທີ່ເປັນເອກະລັກສະເພາະ ແລະ ໝາກໄມ້ສົດທີ່ລືຊື່ຂອງປະເທດຈຳນວນຫນຶ່ງໃນພາກພື້ນໄດ້ຮັບການແນະນຳ ແລະ ວາງຂາຍຢູ່ທີ່ນີ້ເພື່ອຮັບໃຊ້ແຂກຄົນເຂົ້າຊົມ.
ເຖິງວ່າດຳເນີນໄປພຽງ 2 ມື້ເທົ່ານັ້ນ ແຕ່ລາຍການ ຕ້ອນຮັບບຸນວັນເພງເດືອນ 8 ແລະ ພ້ອມກັນຄົ້ນຫາອາຊີຕາເວັນອອກສຽງໃຕ້ ໄດ້ສ້າງຄວາມປະທັບໃຈໃຫ້ແກ່ຜູ້ເຂົ້າຮ່ວມ. ເຂົາເຈົ້າບໍ່ພຽງແຕ່ມີກາລະໂອກາດໄດ້ຮັບຟັງ, ຮັບຊົມເທົ່ານັ້ນ ຫາກຍັງໄດ້ເຂົ້າຮ່ວມໂດຍກົງເພື່ອຄົ້ນຫາສິ່ງທີ່ໃຫມ່ອ່ຽມກ່ຽວກັບວັດທະນະທຳຫລາຍຮູບຫລາຍແບບຂອງບັນດາປະເທດ ໃນອາຊຽນ. ລາຍການດັ່ງກ່າວບັນລຸໄດ້ຈຸດໝາຍທີ່ຄະນະຈັດຕັ້ງໄດ້ວາງອອກ ແລະ ກໍເປັນການປະກອບສ່ວນເພີ່ມທະວີຄວາມເຂົ້າອົກເຂົ້າໃຈລະຫວ່າງປະຊາຊົນບັນດາປະເທດອາຊຽນ ເພື່ອມຸ່ງໄປເຖິງການສ້າງປະຊາຄົມອາຊຽນໃນປີ 2015.