(vovworld)-ເມື່ອເວົ້າເຖິງລາຍການທ່ອງທ່ຽວ ກຳປູເຈຍ ນັກທ່ອງທ່ຽວເຄີຍຄິດເຖິງການຢ້ຽມຢາມບັນດາປູຊະນີຍະສະຖານວັດວາອາຮາມບູຮານຢູ່ທີ່ນີ້. ເພື່ອສ້າງບັນດາຜະລິດຕະພັນທ່ອງທ່ຽວໃຫມ່, ໄລຍະມໍ່ໆມານີ້ ປະຊາຊົນກຳປູເຈຍ ໄດ້ເພີ່ມທະວີການໂຄສະນາລາຍການທ່ອງທ່ຽວຄົ້ນຫາຢູ່ເຂດອະນຸລັກຮັກສານົກຫາຍາກຫລາຍຊະນິດຢູ່ທາງທິດຕາເວັນຕົກສ່ຽງເຫນືອ ຫນອງ Tonle Sap. ມາຢ້ຽມຢາມແຫ່ງນີ້ ນັກທ່ອງທ່ຽວມີໂອກາດໄດ້ຢ້ຽມຊົມນົກຫາຍາກຫລາຍຊະນິດມີຄວາມສ່ຽງຖືກດັບສູນ. ກຳປັ່ນຈະພານັກທ່ອງທ່ຽວຢ້ຽມຢາມບັນດາເຂດອະນຸລັກຮັກສາທຳມະຊາດ ເພື່ອຢ້ຽມຊົມ ນົກຫາຍາກ ແລະ ຊອກຫາຊີວິດການເປັນຢູ່ຂອງປະຊາຊົນຢູ່ທີ່ນີ້.
Tonle Sap ແມ່ນຫນອງນ້ຳຈືດໃຫຍ່ກວ່າໝູ່ ຢູ່ອາຊີຕາເວັນອອກສ່ຽງໃຕ້
ພາບ:internet
|
Tonle Sap ແມ່ນຫນອງນ້ຳຈືດໃຫຍ່ກວ່າໝູ່ ຢູ່ອາຊີຕາເວັນອອກສ່ຽງໃຕ້ ດ້ວຍເນື້ອທີ່ 12.000 ຕາລາງກິໂລແມັດ. ຫນອງ Tonle Sap ໄດ້ຮັບການຮັບຮອງຈາກ UNESCO ວ່າ ແມ່ນເຂດອະນຸລັກຮັກສາທຳມະຊາດຊີວະພາບ. ບໍລິສັດ Indochine Exploration ຄົ້ນຄ້ວາສະເພາະກ່ຽວກັບ ອິນດູຈີນ ໄດ້ຮ່ວມມືກັບໂຮງແຮມ Amun Sara ຢູ່ ຊຽມຣຽບ ສ້າງກາລະໂອກາດໃຫ້ແກ່ນັກທ່ອງທ່ຽວໄດ້ໄປຢ້ຽມຊົມນົກກິນປາ ຫລາຍຊະນິດດ້ວຍກຳປັ່ນທ່ອງທ່ຽວ. ພາຍຫລັງຢ້ຽມຢາມໃນເວລາກວ່າ 1 ຊົ່ວໂມງ, ນັກທ່ອງທ່ຽວ ຈະໄປເຖິງຕາແສງ Prey Toal ທາງຕາເວັນຕົກສ່ຽງເຫນືອ ຫນອງ Tonle Sap. ນະທີ່ນີ້ ມີມີເຮືອນຫລາຍຫລັງຕັ້ງບົນຫນ້ານ້ຳ, ປະຊາຊົນຢູ່ທີ່ນີ້ ດຳລົງຊີວິດດ້ວຍອາຊີບຫາປາ. ນີ້ແມ່ນທາງເຂົ້າເຂດອະນຸລັກຮັກສານົກກິນປາ ດ້ວຍເນື້ອທີ່ 213 ຕາລາງກິໂລແມັດ ດ້ວຍນົກກິນປາກວ່າ 100 ຊະນິດ. ປີ 2002, ອະດີດກະສັດ Norodom Sihanuc ອະນຸຍາດໃຫ້ສ້າງຕັ້ງເຂດອະນຸລັກຮັກສາທຳມະຊາດ ເພື່ອກາຍເປັນຊາຍຄາໃຫຍ່ກວ່າໝູ່ຢູ່ ອາຊີຕາເວັນອອກສ່ຽງໃຕ້ ສະຫງວນໃຫ້ແກ່ ນົກກິນປາຫລາຍຊະນິດ. ທ່ານ Nick Butler ຜູ້ຊ່ຽວຊານບໍລິສັດ Indochine Exploration ໃຫ້ຮູ້ວ່າ: ຫນອງ Tonle Sap ແມ່ນແຫ່ງທີ່ນຳມາເຊິ່ງແຫລ່ງອາຫານສຳຄັນໃຫ້ແກ່ຊາວທອ້ງຖິ່ນ ແລະ ກໍແມ່ນບ່ອນແຜ່ພັນຂອງ ນົກກິນປາຫລາຍຊະນິດ.
“ຫນອງ Tonle Sap ແມ່ນໝາກຫົວໃຈຂອງປະເທດ ກຳປູເຈຍ ແລະ ກໍແມ່ນຫນອງນ້ຳຈືດໃຫຍ່ກວ່າໝູ່ ຢູ່ ອາຊີຕາເວັນອອກສ່ຽງໃຕ້. ນັກທ່ອງທ່ຽວມາຢ້ຽມຢາມ ກຳປູເຈຍ ລ້ວນແຕ່ຮູ້ຈັກວ່າ ຫນອງແຫ່ງນີ້ແມ່ນສະຫນອງປະລິມານປາຫລາຍສົມຄວນໃຫ້ແກ່ຊາວທ້ອງຖິ່ນ ແຕ່ເຂົາເຈົ້າບໍ່ຮູ້ຈັກໄດ້ວ່າ ຢູ່ທີ່ນີ້ ເຕົ້າໂຮມນົກກິນປາຫລາຍຊະນິດກວ່າໝູ່ຢູ່ ອາຊີຕາເວັນອອກສຽງໃຕ້.”
ທ່ານ Chan Dara, ຜູ້ຄຸ້ມຄອງເຂດອະນຸລັກຮັກສາທຳມະຊາດໃຫ້ຮູ້ວ່າ: ແຕ່ລະປີ ແຕ່ເດືອນ 1 – 2, ມີນົກທຸກຊະນິດປະມານ 50000 ໂຕມາຫາກິນຢູ່ເຂດແມ່ນ້ຳລຳນີ້. ຄະນະຄຸ້ມຄອງມີຄວາມຮັບຜິດຊອບອະນຸລັກຮັກສາເຂດນີ້ ບໍ່ປະໃຫ້ປະຊາຊົນເຂົ້າເອົາໄຂ່ນົກ.
ອົງການ Wildlife Conservision Socility ໃຫ້ຮູ້ວ່າ: ແຕ່ປີ 2002 ມາຮອດປະຈຸບັນ, ຈຳນວນນົກຢູ່ທີ່ນີ້ໄດ້ເພີ່ມຂຶ້ນຈາກ 2000 ໂຕເຖິງ 50000 ໂຕ. ໃນນັ້ນ ມີນົກຫລາຍຊະນິດ ຊື່ງອົງການອະນຸລັກຮັກສາທຳມະຊາດສາກົນ ຈັດເຂົ້າໃນປື້ມແດງນົກຊະນິດຫາຍາກອາດຈະຖືກສູນພັນ. ທ່ານ Butler ໃຫ້ຮູ້ຕື່ມອີກວ່າ:
“ນົກທຸກຊະນິດມາເຕົ້າໂຮມຢູ່ທີ່ນີ້ ເພາະວ່າແຫ່ງນີ້ແມ່ນບ່ອນແຜ່ພັນຂອງປາຫລາຍຊະນິດ. ສະນັ້ນ ນົກຊອກໄດ້ອາຫານຫລາຍແນວ. ຢູ່ທີ່ນີ້ ມີຕົ້ນໄມ້ໃຫຍ່ຫລາຍຕົ້ນ ແມ່ນເງື່ອນໄຂເໝາະສົມເພື່ອໃຫ້ນົກມາສ້າງຮັງ ແລະ ຊອກອາຫານ.”
ນົກຫາຍາກຢູ່ ຫນອງTonle Sap
ພາບ:mytour.vn
|
ສຳລັບນັກທ່ອງທ່ຽວ, ພາຍຫລັງໄປຢ້ຽມຢາມເຂດອະນຸລັກຮັກສາມາເປັນເວລາມື້ຫນຶ່ງ, ເຂົາເຈົ້າຈະໄດ້ຮັບປະທານບັນດາເຍື່ອງອາຫານທີ່ແຊບນົວຂອງກຳປູເຈຍ ຢູ່ເທິງເຮືອ. ທ່ານນາງ Jelena Randjlovic ແລະ ທ່ານ Dusan Domazetovic, ນັກທ່ອງທ່ຽວມາຈາກ Montenegro ລ້ວນແຕ່ຮູ້ສຶກປະທັບໃຈຜ່ານລາຍການທ່ອງທ່ຽວນີ້.
“ນີ້ແມ່ນລາຍການທ່ອງທ່ຽວສ້າງຄວາມປະທັບໃຈທີ່ສຸດ, ເຖິງວ່າ ຂ້າພະເຈົ້າບໍ່ແມ່ນຜູ້ມັກຊົມນົກທຸກຊະນິດກໍຕາມ ແຕ່ເມື່ອມານີ້ ຂ້າພະເຈົ້າເຫັນວ່ານົກງາມຫລາຍ. ນອກນັ້ນ ຂ້າພະເຈົ້າ ມີຄວາມເຂົ້າໃຈຕື່ມອີກກ່ຽວກັບ ຫນອງ Tonle Sap. ຢ້ຽມຢາມໝູ່ບ້ານຕັ້ງບົນແມ່ນ້ຳ, ເຂົ້າໃຈໄດ້ການດຳລົງຊີວິດຂອງປະຊາຊົນຢູ່ທີ່ນີ້ ແລະ ເຫັນປະຈັກຕາຄວາມງາມຂອງປະເທດກຳປູເຈຍ.”
ລາຍການທ່ອງທ່ຽວຢ້ຽມຢາມເຂດອະນຸລັກຮັກສາທຳມະຊາດ ພຽງໃຊ້ເງິນ 140 ໂດລາສະຫະລັດ/ຄົນ. ໃນນັ້ນ ລວມມີ ຄາບອາຫານທ່ຽງ, ປີ້ເຂົ້າເຂດອະນຸລັກຮັກສາທຳມະຊາດ ແລະ ຄ່າເດີນເຮືອ. ປະຊາຊົນ ກຳປູເຈຍ ຫວັງວ່າ ນີ້ຈະແມ່ນບໍລິການທ່ອງທ່ຽວໃຫມ່ດຶງດູດນັກທ່ອງທ່ຽວມາຢ້ຽມຢາມແຫ່ງນີ້ນັບມື້ນັບຫລາຍ.