(vovworld)- “ໄດມອນ ວິລານົນ ແມ່ນຄວາມເອກອ້າງທະນົງໃຈຂອງນັກສຶກສາລາວ ທີ່ພວມຮ່ຳຮຽນຢູ່ ຫວຽດນາມ” ນັ້ນແມ່ນການຕີລາຄາ ຂອງ ອ້າຍ ກົງແກ້ວ ລຸນມາລາ, ປະທານຄະນະນັກສຶກສາລາວ ປະຈຳ ສະຖາບັນການປົກຄອງແຫ່ງຊາດ. ອ້າຍ ກົງແກ້ວ ລຸນມາລາ ໃຫ້ຮູ້ວ່າ: ປະຈຸບັນ ມີນັກສຶກສາລາວ ກວ່າ 4000 ຄົນ ພວມຮຽນຢູ່ ຫວຽດນາມ, ໃນນັ້ນ ຈຳນວນນັກສຶກສາໄດ້ຮັບຄະແນນສູງສຸດ ຄືນາງໄດມອນ ວິລານົນ ມີບໍ່ຫລາຍ. ໃນລາຍການຊາຍຄາ ອາຊຽນ ພາກນີ້ ເຊີນທ່ານພົບກັບນາງສາວໄດມອນ ຜ່ານບົດຂຽນທີ່ມີຫົວຂໍ້ວ່າ: ນາງສາວລາວຍາດໄດ້ຄະແນນສູງສຸດທີ່ພິທີປ້ອງກັນບົດ ນິພົນປະລິຍາຕີ.
ໄດມອນ ວິລານົນ ຮັບໃບປະກາດສະນິຍະບັດປະລິຍາຕີ
|
ພາຍຫລັງຮຽນຈົບ ວິທະຍາໄລສ້າງຄູ ຫລວງພະບາງ ຂະແຫນງພາສາອັງກິດ, ໄດມອນ ໄດ້ຮັບເຂົ້າເຮັດວຽກຢູ່ ສະຫະພັນກຳມະບານແຂວງຫລວງພະບາງງ. ສຳລັບໄດມອນ ແລ້ວ, ສອງປະເທດ ລາວ ແລະ ຫວຽດນາມ ແມ່ນມີສາຍພົວພັນສະຫນິດແຫນ້ນມາແຕ່ດົນນານ. ຊາວຫວຽດນາມ ແລະ ຊາວລາວ ແມ່ນໃກ້ຊິດສະຫນິດສະຫນົມ. ສະນັ້ນ ນາງບໍ່ເລືອກເຟັ້ນປະເທດໃດນອກຈາກຫວຽດນາມ ເພື່ອຮຽນພາສາຫວຽດ ແລະ ຍົກສູງລະດັບຄວາມຮູ້ດ້ານວິຊາສະເພາະຂອງຕົນ. ເຖິງວ່າເມື່ອມາຮຽນ ຫວຽດນາມ, ນາງມີ ອາຍຸ 30 ປີແລ້ວກໍຕາມ ແຕ່ນາງບໍ່ຫວາດຫວັ່ນຕໍ່ຄວາມຫຍຸ້ງຍາກຕັດສິນໃຈຮ່ຳຮຽນ. ກ່ອນທີ່ເຂົ້າຮຽນຢູ່ສະຖາບັນການປົກຄອງແຫ່ງຊາດ, ໄດມອນ ຕ້ອງຮຽນພາສາຫວຽດ ຢູ່ ໂຮງຮຽນມິດຕະພາບ T78 ຢູ່ ເຊີນໄຕເປັນເວລາ 1 ປີ. ກ່ອນທີ່ມາຮຽນຫວຽດນາມ ນາງບໍ່ຮູ້ພາສາຈັກພາສາຫວຽດ ແຕ່ດ້ວຍຄວາມດຸຫມັ່ນໃນການຮ່ຳຮຽນຄົ້ນຄ້ວາ ພ້ອມກັບການຊ່ວຍເຫລືອຂອງຄູອາຈານ ແລະ ໝູ່ເພື່ອນນັກສຶກສາຫວຽດນາມ ແລະ ລາວ ຢູ່ ໂຮງຮຽນ T78 ສະນັ້ນ ໃນເວລາ 1 ປີ ໄດມອນ ເວົ້າພາສາຫວຽດນາມ ລ່ຽນໄຫລ ແລະ ອ່ານປື້ມອ່ານຫນັງສືພິມກໍເຂົ້າໃຈໄດ້ດີ.
ໃນໄລຍະ 4 ປີ ຮຽນຢູ່ສະຖາບັນການປົກຄອງແຫ່ງຊາດ ຫວຽດນາມ, ຍາມໃດ ໄດມອນ ກໍຍາດໄດ້ຄະແນນສູງກວ່າໝູ່.
ບົດນິພົນປະລິຍາຕີດ້ວຍພາສາຫວຽດໂດຍໄດມອນປ້ອງກັນ ມີຊື່ວ່າ: “ຊອກຮູ້ວຽກງານລົບລ້າງຄວາມອຶດຫິວຫລຸດຜ່ອນຄວາມທຸກຍາກຢູ່ ແຂວງ ຫລວງພະບາງ ປະເທດ ສປປ ລາວ”. ດ້ວຍຄວາມຮູ້ຈາກການຮ່ຳຮຽນໃນໄລຍະ 4 ປີ ພ້ອມດ້ວຍໄດ້ຮັບການຊ່ວຍເຫລືອຈາກຄູອາຈານ- ນັກຮຽນນັກສຶກສາດ້ວຍກັນ ຢູ່ ສະຖາບັນ ແລະ ຄວາມມານະພະຍາຍາມຄົ້ນຄ້ວາເອກະສານ, ຖອດຖອດບົດຮຽນຈາກພຶດຕິກຳຕົວຈິງ ສະນັ້ນ ບົດນິພົນປະລິຍາຕີຂອງນາງໄດ້ຮັບຄະແນນສູງສຸດ. ນາງໄດມອນ ມີຄວາມພາກພູມໃຈທີ່ສຸດເມື່ອໄດ້ຮັບສຽງຕົບມືຊົມເຊີຍຈາກຄູອາຈານ ແລະ ເພື່ອນມິດທັງຫວຽດນາມ ແລະລາວ.
ສຽງໄດມອນ
ອາຈານ ບູ່ຍຮູຍຄຽນ ຮອງຫົວຫນ້າພະແນກບໍລິຫານ, ສະຖາບັນການປົກຄອງແຫ່ງຊາດ, ທັງເປັນປະທານສະພາປ້ອງກັນ ບົດນິພົນປະລິຍາຕີ
ຕີລາຄາວ່າ: ຜ່ານ ບົດນິພົນປະລິຍາຕີ ຂອງໄດມອນ ບັນດາຄູອາຈານຢູ່ສະຖາບັນ ຈຶ່ງມີໂອກາດເຂົ້າໃຈກ່ຽວກັບແຂວງ ຫລວງພະບາງກວ່າ.
“ໄດມອນແຕ່ງບົດໄດ້ດີທີ່ສຸດ, ຂຽນຄົບຖ້ວນຕາມເນື້ອໃນຂອງ ບົດນິພົນປະລິຍາຕີ ຂະແຫນງບໍລິຫານລັດຢູ່ສະຖາບັນການປົກຄອງແຫ່ງຊາດ. ບົດນິພົນປະລິຍາຕີມີທັງໝົດ 90 ຫນ້າ ແມ່ນເວົ້າເຖິງໝາກຜົນແຫ່ງການລົບລ້າງຄວາມອຶດຫິວທຸກຍາກຢູ່ແຂວງ ຫລວງພະບາງ, ບັນດາສິ່ງຄົງຄ້າງ, ຂໍ້ຈຳກັດ. ນອກນັ້ນ ຍັງຍົກໃຫ້ເຫັນມາດຕະການແກ້ໄຂຄວາມຫຍຸ້ງຍາກ, ຂໍ້ຄົງຄ້າງນັ້ນ. ຂ້າພະເຈົ້າຕີລາຄາສູງ ບົດນິພົນປະລິຍາຕີຂອງໄດມອນ.”
ນາງໄດມອນ ພ້ອມກັບຄູອາຈານ ທີ່ພິທີປ້ອງກັນບົດນິພົນ
|
ໂດຍແມ່ນຜູ້ມັກມ່ວນ, ໃຈດີ ແລະ ເປັນຕາຮັກ ສະນັ້ນ ໄດມອນ ມີໝູ່ເພື່ອນທັງລາວ ແລະ ຕ່າງປະເທດຫລາຍຄົນ, ພິເສດ ແມ່ນໝູ່ຫວຽດນາມ. ຍາມໃດ ໄດມອນ ກໍຖືຫວຽດນາມ ແມ່ນບ້ານເກີດເມືອງນອນແຫ່ງທີ 2 ຂອງຕົນ. ສະນັ້ນ ເມື່ອມີເວລາຫວ່າງ, ໝູ່ຂອງນາງ ເຄີຍພານາງໄປຢ້ຽມຢາມຄອບຄົວຂອງເຂົາເຈົ້າຢູ່ບັນດາທ້ອງຖິ່ນທາງພາກເຫນືອຫວຽດນາມ. ຕາມໄດມອນແລ້ວ, ມີໂອກາດໄດ້ພົບກັບຊາວຫວຽດນາມ, ໄດ້ໂອ້ລົມກັບໝູ່ເພື່ອນຫວຽດນາມ ແມ່ນເຮັດໃຫ້ນາງເພີ່ມຄວາມຮູ້ດ້ານພາສາຫວຽດ ກໍຄືໄດ້ຮູ້ຈັກເຖິງຮີດຄອງປະເພນີ, ວັດທະນະທຳຂອງຫວຽດນາມ ຕື່ມອີກ. ກ່ອນນີ້ 2 ປີ, ເວລານາງພວມຮຽນຮຽນຢູ່ປີທີ 2 ນອກຈາກເວລາຂຶ້ນຫ້ອງຮຽນແລ້ວ ນາງເຄີຍຍາດເວລາຕິດຕາມຮັບຟັງພາກພາສາລາວ ວິທະຍຸກະຈາຍສຽງຫວຽດນາມ ເພື່ອອັບເດັດຂໍ້ມູນຂ່າວ ທັງເພີ່ມຄວາມຮູ້ດ້ານພາສາຫວຽດ. ຈາກນັ້ນ ນາງໄດ້ຕິດຕໍ່ກັບການນຳວິທະຍຸກະຈາຍສຽງຫວຽດນາມ ຂໍອະນຸຍາດໄດ້ມາຄົ້ນຄ້ວາພາສາຫວຽດຕື່ມອີກ ຜ່ານການກວດແກ້ຂ່າວ, ບົດ ແລະ ນາງຍັງໄດ້ເປັນໂຄສົກອ່ານຂ່າວ, ບົດຕື່ມອີກ. ໄດມອນແບ່ງປັນວ່າ:
ສຽງໄດມອນ
ອາຈານ ຫງວຽນຫາຍຢວຽນ, ຄູປະຈຳຫ້ອງ ໄດ້ຕີລາຄາວ່າ:
“ໄດມອນເວົ້າພາສາຫວຽດ ລ່ຽນໄຫລ, ຊັດເຈນ. ສະນັ້ນ ໄດມອນ ສາມາດຮັບຟັງ ແລະ ເຂົ້າໃຈບົດຮຽນໄດ້ດີ. ໄດມອນ ແມ່ນນັກສຶກສາລາວ ຍາດໄດ້ຄະແນນສູງສຸດໃນການປ້ອງກັນ ບົດນິພົນປະລິຍາຕີ.”
ດ້ວຍໝາກຜົນການຮ່ຳຮຽນຂອງຕົນ, ສະນັ້ນ ເດືອນ 9 ຜ່ານມາ ໄດມອນ ຖືກຄັດເລືອກເຂົ້າບັນຊີລາຍຊື່ ຜູ້ໄດ້ຮັບທຶນມາຮຽນຕໍ່ປະລິຍາໂທຢູ່ ຫວຽດນາມຕື່ມອີກ 3 ປີ. ໄດມອນ ໝັ້ນໝາຍ ຈະມານະພະຍາຍາມຮ່ຳຮຽນຄົ້ນຄ້ວາໃຫ້ໄດ້ໝາກຜົນດີ ເພື່ອກັບຄືນເມືອຮັບໃຊ້ບ້ານເກີດເມືອງນອນ, ປະເທດຊາດ.