ປະຈຸບັນ ແມ່ຍິງນັບມື້ນັບສວມບົດບາດສຳຄັນໃນການພັດທະນາເສດຖະກິດ ຢູ່ ຫວຽດນາມ. ປະຈຸບັນ ຢູ່ ຫວຽດນາມ, 30% ວິສາຫະກິດ ຂະຫນາດກາງ ແລະ ນ້ອຍ ໂດຍແມ່ຍິງເປັນຫົວຫນ້າ, 25% ຜູ້ນຳ ແລະ ຜູ້ອຳນວຍການບໍລິຫານຂອງບັນດາວິສາຫະກິດແມ່ນແມ່ຍິງ. ແຕ່ເຖິງຢ່າງໃດກໍຕາມ, ເຂົາເຈົ້າເອງ ພວມປະສົບກັບສິ່ງທ້າທາຍຫລາຍຢ່າງຄື: ຄວາມຮູ້ຖືກຈຳກັດ, ຂາດຄວາມສາມາດໃນການກໍ່ຮ່າງສ້າງຕົວ, ຂາດວິທິການບໍລິຫານ … ມີຫລາຍໂຄງການຫນູນຊ່ວຍແມ່ຍິງພັດທະນາການດຳເນີນທຸລະກິດໄດ້ຮັບການຜັນຂະຫຍາຍຢູ່ ຫວຽດນາມ, ໃນນັ້ນ ມີໂຄງການພັດທະນາຄວາມສາມາດໃນການກໍ່ຮ່າງສ້າງຕົວໃຫ້ແກ່ແມ່ຍິງຢູ່ບັນດາວິສາຫະກິດຂະຫນາດກາງ ແລະ ນ້ອຍ ຢູ່ບັນດາປະເທດ ອາຊຽນ.
ໂຄງການພັດທະນາຄວາມສາມາດກໍ່ຮ່າງສ້າງຕົວໃຫ້ແກ່ແມ່ຍິງຢູ່ບັນດາວິສາຫະກິດຂະຫນາດກາງ ແລະ ນ້ອຍຂອງບັນດາປະເທດອາຊີຕາເວັນອອກສຽງໃຕ້ ໄດ້ຮັບການ ປະຕິບັດເລີ່ມແຕ່ເດືອນ 7/2011 ແລະ ຄາດວ່າຈະສິ້ນສຸດໃນເດືອນ 6/2013 ຢູ່ ຫວຽດນາມ ແລະ ກຳປູເຈຍ. ນີ້ແມ່ນການເຄື່ອນໄຫວທີ່ນອນໃນໂຄງການຮ່ວມສຳພັນພາກລັດ ອາຊີ ໂດຍອົງການພັດທະນາສາກົນ ອົດສະຕາລີ ອຸປະຖຳ ດ້ວຍຍອດຈຳນວນເງິນ 230.820 AUD. ມະຫາວິທະຍາໄລເສດຖະກິດ ຮ່າໂນ້ຍ ຂື້ນກັບມະຫາວິທະຍາໄລແຫ່ງຊາດ ຮ່າໂນ້ຍ ໄດ້ປະຕິບັດໂຄງການ ໂດຍມີການເຂົ້າຮ່ວມຂອງບັນດາຄູ່ຮ່ວມມືນັ້ນແມ່ນ ສະຫະສະມາຄົມວິສາຫະກິດນະຄອນຮ່າໂນ້ຍ, ສະຫະພັນແມ່ຍິງແຂວງ ຫາຍເຢືອງ ແລະ ໂຮງຮຽນພະນັກງານຍິງສູນກາງ.
ຕາມຮອງສາດສະດາຈານ, ດອກເຕີ ຫງວຽນຮົ່ງເຊີນ ອະທິການບໍດີມະຫາ ວິທະຍາໄລເສດຖະກິດ ແລ້ວ, ນີ້ແມ່ນໂຄງການທຳອິດໃນການບຳລຸງສ້າງໃຫ້ແກ່ແມ່ຍິງກ່ຽວກັບຄວາມສາມາດໃນການກໍ່ຮ່າງສ້າງຕົວ ແລະ ບໍລິຫານວິສາຫະກິດ. ບັນດາເນື້ອໃນຂອງການບຳລຸງສ້າງຈະໄດ້ຮັບການປະຕິບັດຕິດພັນກັບສະພາບການດຳເນີນທຸລະກິດຕົວຈິງ ຂອງແມ່ຍິງ, ໃນນັ້ນສຸມໃສ່ບັນດາບັນຫາກ່ຽວກັບການກໍ່ຮ່າງສ້າງຕົວ ແລະ ການປ່ຽນໃຫມ່ຢ່າງມີຫົວຄິດປະດິດສ້າງ.
“ຈຸດໝາຍຂອງໂຄງການ ແມ່ນເພີ່ມກຳລັງຄວາມສາມາດໃຫ້ແກ່ແມ່ຍິງ ແລະ ເພີ່ມທະວີຄວາມສະເຫມີພາບລະຫວ່າງ ຍິງຊາຍ ຕາມທິດລວມຂອງໂລກ. ນະໂຍບາຍຂອງຫວຽດນາມ ກໍແມ່ນເພື່ອມຸ້ງໄປເຖິງການສ້າງຄວາມສະເຫມີພາບລະຫວ່າງ ຍິງຊາຍ, ສະນັ້ນ ນີ້ກໍແມ່ນຈຸດໝາຍສຸດທ້າຍ ເພື່ອໃຫ້ແມ່ຍິງມີຄວາມຮູ້ສຶກໄດ້ວ່າ ຕົນເອງກໍເທົ່າທຽມກັບເພດຊາຍ. ບັນດາແມ່ຍິງມີສິດພັດທະນາ, ມີສິດກໍ່ຮ່າງສ້າງຕົວ ແລະ ມີບັນດາສິດອື່ນໆຄືດ່ັງເພດຊາຍໃນສັງຄົມ.“
ນັບແຕ່ນີ້ເຖິງເດືອນ 6/2013, ໂຄງການຈະບຳລຸງສ້າງຜູ້ຊ່ຽວຊານຢ່າງຫນ້ອຍສຸດ 100 ຄົນ ກ່ຽວກັບຄວາມສາມາດເລີ່ມກໍ່ຮ່າງສ້າງຕົວໃຫ້ແກ່ແມ່ຍິງ. ເປົ້າໝາຍເຂົ້າຮ່ວມໂຄງການ ແມ່ນຄູສອນ ເຂົ້າຮ່ວມການບຳລຸງສ້າງໃຫ້ແກ່ແມ່ຍິງ, ນັກທຸລະກິດຍິງ ຫລື ແມ່ຍິງທີ່ມີຄວາມຕ້ອງການເລີ່ມກໍ່ຮ່າງສ້າງຕົວ.
ພາບ: vietbao.net
ສູນບໍລິການວຽກເຮັດງານທຳ 8/3 ຂອງນະຄອນ ຫາຍເຢືອງ ໄດ້ຮັບເລືອກເຂົ້າຮ່ວມໂຄງການ, ເພາະວ່າ ສູນດັ່ງກ່າວແມ່ນຫົວຫນ່ວຍທີ່ເຂົ້າຮ່ວມຫລາຍໂຄງການຂອງ ອົດສະຕາລີ ຢູ່ ຫວຽດນາມ ແລະ ໄດ້ສອນວິຊາຊີບໃຫ້ແກ່ແມ່ຍິງນັບພັນຄົນແລ້ວ. ທ່ານ ຟ້າມວັນຖູຍ, ຜູ້ອຳນວຍການສູນດັ່ງກ່າວແບ່ງປັນວ່າ: ນີ້ແມ່ນກາລະໂອກາດເພື່ອໃຫ້ແມ່ຍິງແຂວງ ຫາຍເຢືອງ ເວົ້າລວມ ແລະ ບັນດາແມ່ຍິງທີ່ເຂົ້າຮ່ວມການຮຽນວິຊາຊີບເວົ້າສະເພາະ ມີເງື່ອນໄຂກໍ່ຮ່າງສ້າງຕົວ ແລະ ບໍລິຫານວິສາຫະກິດຂອງຕົນຢ່າງມີປະສິດທິຜົນ ຕອບສະຫນອງຄວາມຮຽກຮ້ອງຕ້ອງການ ແລະ ຍົກສູງເງື່ອນໄຂດ້ານເສດຖະກິດໃຫ້ແກ່ບັນດາຄອບຄົວແມ່ຍິງຂອງແຂວງ ຫາຍເຢຶອງ.
“ມີບາງບ່ອນ, ແມ່ຍິງຕ້ອງບືນຕົວຂຶ້ນດ້ວຍສອງຝາມືຂອງຕົນ, ຊອກຫາວິທີເພື່ອກໍ່ຮ່າງສ້າງຕົວ, ສ້າງເປັນຫນ່ວຍຜະລິດດຳເນີນທຸລະກິດ, ແຕ່ກໍມີບາງຫົວຫນ່ວຍຖືກລົ້ມລະລາຍ. ສະນັ້ນ ພວກຂ້າພະເຈົ້າປາດຖະຫນາວ່າ ເອື້ອຍນ້ອງທັງໝົດ ຈະໄດ້ເຂົ້າຮ່ວມຊຸດຮຽນກໍຮ່າງສ້າງຕົວ ແລະ ບໍລິຫານວິສາຫະກິດ ເພື່ອບືນຕົວຂຶ້ນດ້ວຍຄວາມຮູ້ຂອງຕົນ. ພາຍຫລັງຮຽນຈົບແລ້ວ ເຂົາເຈົ້າຈະຈັດຕັ້ງການຜະລິດ ແລະ ບໍລິຫານວິສາຫະກິດຂອງຕົນຢ່າງມີປະສິດທິຜົນ. ພວກຂ້າພະເຈົ້າຫວັງວ່າ ເອື້ອຍນ້ອງທັງໝົດຈະໄດ້ຮ່ຳຮຽນ, ແລະແຕ່ລະປີສາມາດສ້າງຮາກຖານຜະລິດໃຫ້ໄດ້ 20 ຫົວຫນ່ວຍເທົ່ານັ້ນແມ່ນມີປະສິດທິຜົນແລ້ວ. ຈາກນັ້ນ ຈຶ່ງທະວີຄູນຮູບແບບນີ້ອອກສູ່ທ້ອງຖີ່ນຕ່າງໆ.“
ໂຄງການພັດທະນາຄວາມສາມາດໃນການກໍຮ່າງສ້າງຕົວໃຫ້ແກ່ແມ່ຍິງຢູ່ບັນດາວິສາຫະກິດຂະຫນາດກາງ ແລະ ນ້ອຍ ໃນບັນດາປະເທດອາຊຽນ ຈະເປັນການຊ່ວຍໃຫ້ແມ່ຍິງມີຈີນຕະນາການກ່ຽວກັບການດຳເນີນທຸລະກິດ, ມີຄວາມສາມາດຄົ້ນພົບ ແລະ ແກ້ໄຂບັນດາບັນຫາ ແລະ ຮັບມືກັບການປ່ຽນແປງຂອງສະພາບແວດລ້ອມແຫ່ງການດຳເນີນທຸລະກິດທີ່ພວມມີການຜັນແປຢ່າງວ່ອງໄວໃນປະຈຸບັນຢູ່ບັນດາປະເທດໄດ້. ໂຄງການດັ່ງກ່າວໄດ້ຊ່ວຍໃຫ້ແມ່ຍິງຫວຽດນາມ ມີຄວາມຄວາມຮູ້, ຄວາມສາມາດກວ່າໃນການດຳເນີນທຸລະກິດ, ສ້າງລາຍຮັບໃຫ້ແກ່ຕົນເອງ, ໃຫ້ແກ່ຄອບຄົວ ແລະ ສັງຄົມ./.
ແອງດ່າວ