(vovworld)- ມະຫາວິທະຍາໄລ FPT ຫວຽດນາມ ແມ່ນສະຖານທີ່ບຳລຸງສ້າງ ແລະ ສະຫນອງແຫລ່ງຊັບພະຍາກອນມະນຸດຂະແຫນງເຕັກໂນໂລຊີຂໍ້ມູນຂ່າວສານທີ່ມີຄຸນນະພາບສູງ, ການບໍລິຫານທຸລະກິດ ແລະ ໝວດຂະແຫນງອື່ນໃຫ້ແກ່ບັນດາກຸ່ມບໍລິສັດ ເຕັກໂນໂລຊີຂໍ້ມູນຂ່າວສານ ຫວຽດນາມ ແລະ ໂລກ. ເລື່ອງເປີດສາຂາຢູ່ຕ່າງປະເທດ ແມ່ນນອນໃນຍຸດທະສາດຫັນເປັນໂຮງຮຽນສາກົນຂອງ ມະຫາວິທະຍາໄລ FPT ຫວຽດນາມ. ນະຄອນຫລວງວຽງຈັນ ແມ່ນສະຖານທີ່ທຳອິດຂອງໂຄງການເປີດສາຂາຢູ່ຕ່າງປະເທດຂອງ ມະຫາວິທະຍາໄລ FPT ຫວຽດນາມ. ໂຄງການດັ່ງກ່າວສຳເລັດຜົນຈະເປີດທິດທາງໃຫມ່ໃຫ້ແກ່ການສຶກສາຫວຽດນາມ ກໍຄືປະກອບສ່ວນປັບປຸງສາຍພົວພັນມິດຕະພາບອັນສະຫນິດແຫນ້ນລະຫວ່າງຫວຽດນາມ ແລະລາວ.
ມະຫາວິທະຍາໄລ FPT ຫວຽດນາມຢູ່ເຂດອຸດສາຫະກຳສູງ
ລາງ ຮ່ວາລາກ
ພາບ:dantri.com
|
ແນວຄວາມຄິດເປີດມະຫາວິທະຍາໄລ FPT ຫວຽດນາມສາຂາຢູ່ ລາວ ໄດ້ຮັບການສະຫນັບສະຫນູນຂອງລັດຖະບານລາວ. ໃນການຢ້ຽມຢາມ ມະຫາວິທະຍາໄລ FPT ຫວຽດນາມ ຫວ່າງແລ້ວນີ້, ທ່ານຮອງນາຍົກລັດຖະມົນຕີ ລາວ ສົມສະຫວາດ ເລັ່ງສະຫວັດ ໄດ້ເຫັນດີສະຫນອງເນື້ອທີ່ດິນ 30 ເຮັກຕາ ເພື່ອຜັນຂະຫຍາຍໂຄງການເປີດມະຫາວິທະຍາໄລ FPT ຫວຽດນາມ ສາຂາຢູ່ລາວ. ພາຍຫລັງການຢ້ຽມຢາມຂອງທ່ານຮອງນາຍົກລັດຖະມົນຕີ ລາວ, ມະຫາວິທະຍາໄລ FPT ຫວຽດນາມ ໄດ້ສ້າງຕັ້ງກຸ່ມສະເພາະກິດ ຮັບຜິດຊອບການກໍ່ສ້າງ ແລະ ພັດທະນາພື້ນຖານໂຄງລ່າງຂອງ ມະຫາວິທະຍາໄລ FPT ຫວຽດນາມ ສາຂາຢູ່ ລາວ. ທ່ານ ຮ່ວາງວັນເຈືອງ, ສັງກັດພະແນກສາກົນ- ມະຫາວິທະຍາໄລ FPT ຫວຽດນາມ ໃຫ້ຮູ້ວ່າ: ໂຄງການເປີດມະຫາວິທະຍາໄລ FPT ຫວຽດນາມສາຂາຢູ່ລາວ ໄດ້ຮັບການຊ່ວຍເຫລືອຂອງລັດຖະບານ ລາວ ກໍຄືບັນດາອົງການກ່ຽວຂ້ອງຂອງລາວຢ່າງສຸດຈິດສຸດໃຈ.
“ປະຈຸບັນ ໃນໄລຍະລໍຖ້າຫນັງສືອະນຸຍາດເປີດສາຂາຢູ່ລາວ, ພວກຂ້າພະເຈົ້າຈະດຳເນີນການບຳລຸງສ້າງບັນດາຊຸດຮຽນພາສາອັງກິດ, ຄອມພິວເຕີ ແລະ ການຄຸ້ມຄອງໃຫ້ແກ່ພະນັກງານຊັ້ນກາງ ແລະ ຊັ້ນສູງໄລຍະສັ້ນ ຢູ່ ລາວໃນເດືອນ 11 ຈະມາເຖິງ. ນັບແຕ່ສົກຮຽນ 2013 ນີ້, ມະຫາວິທະຍາໄລ FPT ຫວຽດນາມ ສະຫນອງ ທຶນສຶກສາໃຫ້ແກ່ນັກຮຽນດີເດັ່ນລາວ 10 ຄົນມາຮ່ຳຮຽນຢູ່ ຫວຽດນາມ ແລະ ປະຈຸບັນ ມີນັກສຶກສາ 4 ຄົນພວມຮ່ຳຮຽນຢູ່ທີ່ນີ້, ໃນນັ້ນ ມີນັກສຶກສາຍິງຜູ້ຫນຶ່ງ.”
ທ່ານນາງ ເຈືອງທິມີງຈາງ, ຫົວຫນ້າຫ້ອງການຜູ້ຕາງຫນ້າ ມະຫາວິທະຍາໄລ FPT ຫວຽດນາມ ສາຂາຢູ່ ລາວ ໃຫ້ຮູ້ວ່າ: ມະຫາວິທະຍາໄລ FPT ສາຂາຢູ່ລາວໄດ້ຮັບການອອກແບບຄືກັນກັບ ມະຫາວິທະຍາໄລ FPT ຫວຽດນາມ ແລະ ນັກສຶກສາລາວກໍຄືນັກສຶກສາຫວຽດນາມ ຈະໄດ້ສຳພັດກັບບັນດາອຸປະກອນບຳລຸງສ້າງທັນສະໄຫມທີ່ສຸດ, ມີເງື່ອນໄຂເພື່ອຮຽນພາສາຕ່າງປະເທດໃນສະພາບແວດລ້ອມສາກົນ, ເຝິກຫັດດ້ວຍຄອມພິວເຕີ ແລະ ບັນດາອຸປະກອນເຕັກໂນໂລຊີທັນສະໄຫມທີ່ສຸດ, ຫ້ອງຮຽນມີແອເຢັນ, ເຄືອຂ່າຍອິນເຕີແນດບໍ່ມີສາຍໃຊ້ຕະຫລອດ 24 ຊົ່ວໂມງ, ຫໍສະມຸດທັນສະໄຫມ ບັນລຸມາດຕະຖານສາກົນ.
“ພວກຂ້າພະເຈົ້າປາດຖະຫນາຢາກນຳມາເຊິ່ງຄຸນນະພາບການສຶກສາດີສຸດໃຫ້ແກ່ນັກສຶກສາລາວ ເພື່ອສະຫນອງແຫລ່ງຊັບພະຍາກອນມະນຸດໃຫ້ແກ່ ລາວ ບົນເສັ້ນທາງ ຫວຽດນາມ ແລະ ລາວເຊື່ອມໂຍງເຂົ້າກັບອາຊຽນ. ພິເສດ ມະຫາວິທະຍາໄລ FPT ຫວຽດນາມ ສຸມໃສ່ເຖິງຂົງເຂດເຕັກໂນໂລຊີ ຖ້າຫາກມີຄວາມສາມາດຈະຫນູນຊ່ວຍໃຫ້ແກ່ນັກຮຽນນັກສຶກສາລາວ ກໍຄືບັນດາກະຊວງ, ພະແນກ, ຂະແຫນງການຂອງລາວຫລາຍກວ່າ ເພື່ອໃຫ້ເຂົາເຈົ້າປັບປຸງທັກສະເຕັກໂນໂລຊີຂໍ້ມູນຂ່າວສານ ນັ້ນແມ່ນຄວາມປາດຖະຫນາຂອງມະຫາວິທະຍາໄລ FPT ຫວຽດນາມ. “
ທ່ານ ບົວໄລ ບູນເຕີມ, ພະນັກງານຫ້ອງວ່າການສູນກາງພັກປະຊາຊົນປະຕິວັດລາວ ມີຄວາມປິຕິຊົມຊື່ນເມື່ອໄດ້ຮູ້ວ່າ ມະຫາວິທະຍາໄລ FPT ຫວຽດນາມ ຈະເປີດສາຂາຢູ່ລາວ. ຕາມທ່ານແລ້ວ, ນີ້ແມ່ນກາລະໂອກາດເພື່ອໃຫ້ເພື່ອນຫນຸ່ມລາວທີ່ນິຍົມເຕັກໂນໂລຊີຂໍ້ມູນຂ່າວສານສາມາດສຳພັດກັບເຕັກໂນໂລຊີທັນສະໄຫມຢ່າງມີປະສິດທິຜົນ ແລະ ມີຄຸນນະພາບສູງ.
ສຽງທ່ານບຸນເຕີມ
ໂຄງການເປີດ ມະຫາວິທະຍາໄລ FPT ຫວຽດນາມ ສາຂາຢູ່ລາວພາຍຫລັງໄດ້ຮັບການກໍ່ສ້າງສຳເລັດ ແລະ ນຳເຂົ້າໃຊ້ການ, ແຕ່ລະປີຈະຮັບນັກສຶກສາປະມານ 500 ຄົນມາຮ່ຳຮຽນ. ບັນດານັກສຶກສາຮຽນຢູ່ທີ່ນີ້ ຈະໄດ້ຮັບການບຳລຸງສ້າງປະລິຍາຕີ ແລະ ໄດ້ຮັບໃບປະກາດສະນີຍະບັດປະລິຍາຕີສາກົນ. ເມື່ອຢັ້ງຢືນໄດ້ຄຸນນະພາບການສຶກສາ, ມະຫາວິທະຍາໄລ FPT ສາຂາຢູ່ລາວ ຈະເປີດກວ້າງກວ່າອີກເພື່ອຕອບສະຫນອງຄວາມຕ້ອງການບຳລຸງສ້າງຊັບພະຍາກອນມະນຸດສະເພາະຂະແຫນງເຕັກໂນໂລຊີຂໍ້ມູນຂ່າວສານຂອງລາວ.