(vovworld)- ຍາມໃດການຮ່ວມມືດ້ານເສດຖະກິດກໍ່ແມ່ນບັນຫາທີ່ການນຳ ຫວຽດນາມ ແລະ ອິນໂດເນເຊຍຖືເປັນສຳຄັນ. ລັດຖະບານສອງປະເທດໄດ້ຊີ້ນຳ ເຮັດໃຫ້ການພົວພັນລະຫວ່າງສອງປະເທດພັດທະນາຂຶ້ນສູ່ລະດັບສູງໃຫມ່, ມຸ່ງໄປເຖິງການພົວພັນຄູ່ຮ່ວມມືຍຸດທະສາດ. ໂດຍປະຕິບັດການຊີ້ນຳດັ່ງກ່າວ, ສອງປະເທດໄດ້ດຳເນີນການເຄື່ອນໄຫວສົ່ງເສີມການລົງທຶນ, ການຄ້າ, ສົ່ງເສີມການຮ່ວມມືຫລາຍຢ່າງລະຫວ່າງວິສາຫະກິດສອງປະເທດ.
ເວທີປາໄສການຄ້າ ການລົງທຶນ ອິນໂດເນເຊຍ-ຫວຽດນາມ
ພາບ:dddn.com.vn
|
ໃນຊຸມປີຜ່ານມາ, ຍາມໃດສາຍພົວພັນຮ່ວມມືດ້ານເສດຖະກິດລະຫວ່າງອິນໂດເນເຊຍ ແລະ ຫວຽດນາມ ກໍ່ໄດ້ຮັບການປັບປຸງ. ຫວຽດນາມ ແມ່ນຕະຫລາດອັນກວ້າງໃຫຍ່ ດ້ວຍພົນລະເມືອງກວ່າ 87 ລ້ານຄົນ, ຄວາມຕ້ອງການຊື້ເຄື່ອງຂອງຫລາຍ ແລະ ສອງປະເທດມີຄວາມໃກ້ຊິດກັນທາງດ້ານພູມສາດ. ໃນຂະນະນັ້ນ, ອິນໂດເນເຊຍ ມີຄວາມຕ້ອງການຢ່າງຫລວງຫລາຍກ່ຽວກັບບັນດາປະເພດສິນຄ້າຄື: ເຫລັກກ້າ, ເຄື່ອງຕຳ່ແຜ່ນຕັດຫຍິບຂອງຫວຽດນາມ. ລັດຖະບານຫວຽດນາມ ໄດ້ປະຕິບັດຫລາຍມາດຕະການເພື່ອສ້າງເງ່ືອນໄຂສະດວກເພື່ອໃຫ້ບັນດາວິສາຫະກິດຕ່າງປະເທດເຂົ້າມາລົງທຶນ. ນີ້ແມ່ນສາຍເຫດດຶງດູດບັນດາວິສາຫະກິດ ອິນໂດເນເຊຍ ເຂົ້າມາລົງທຶນຢູ່ຫວຽດນາມ. ສິ່ງດັ່ງກ່າວແມ່ນການຢືນຢັນຂອງທ່ານ ຟ້າມກວາງທີ້ງ, ຮອງຫົວຫນ້າພະແນກການພົວພັນສາກົນ ສັງກັດຫ້ອງການອຸດສາຫະກຳ ແລະ ການຄ້າ ຫວຽດນາມ (VCCI) ທີ່ເວທີປາໄສການຄ້າ ແລະ ການລົງທຶນອິນໂດເນເຊຍ - ຫວຽດນາມ ຊື່ງດຳເນີນເມື່ອຕົ້ນເດືອນ 4/2013 ຜ່ານມາຢູ່ຮ່າໂນ້ຍ.
ທ່ານ Mayerfas ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ໃຫ້ຮູ້ວ່າ: ໃນ 2 ປີຜ່ານມາ ມີວິສາຫະກິດອິນໂດເນເຊຍ ຫລາຍແຫ່ງ ໄດ້ຕັ້ງຫນ້າຊອກຫາແງ່ຫວັງ ແລະ ລົງນາມໃນສັນຍາຮ່ວມມືກັບບັນດາວິສາຫະກິດຫວຽດນາມ ຫລາຍສະບັບ.
“ໄລຍະມໍ່ໆມານີ້ ກຸ່ມບໍລິສັດຊີມັງ Gresik ໄດ້ລົງນາມໃນສັນຍາຮ່ວມມືກັບບໍລິສັດຊີມັງ ທັງລອງ ຂອງຫວຽດນາມ. ນີ້ແມ່ນກຸ່ມບໍລິສັດແຫ່ງລັດທຳອິດຂອງ ອິນໂດເນເຊຍ ມາດຳເນີນທຸລະກິດຢູ່ຫວຽດນາມ. ຂ້າພະເຈົ້າອາດຈະຢືນຢັນໄດ້ວ່າ ຫວຽດນາມ ແມ່ນສະຖານທີ່ທຳອິດຊື່ງບັນດາວິສາຫະກິດແຫ່ງລັດ ອິນໂດເນເຊຍ ມາລົງທຶນ.”
ທ່ານJohan Samudra ຜູ້ຕາງຫນ້າກຸ່ມບໍລິສັດຊີມັງ Gresik ປະຈຳຫວຽດນາມ, ທັງເປັນຜູ້ອຳນວຍການຝ່າຍບໍລິຫານບໍລິສັດຊີມັງທັງລອງ ໃຫ້ຮູ້ວ່າ: ທ້າຍປີ 2012, ກຸ່ມບໍລິສັດຊີມັງ Gresilk ໄດ້ລົງທຶນຊື້ 70% ຫຸ້ນສ່ວນຂອງບໍລິສັດຫຸ້ນສ່ວນທັງລອງ ແລະ ນີ້ແມ່ນຍຸດທະສາດພັດທະນາຈຸດສຸມຂອງກຸ່ມບໍລິສັດຊີມັງ Gresik.
“ຫວຽດນາມ ມີແຫລ່ງຊັບພະຍາກອນອຸດົມສົມບູນ, ຄຸນນະພາບດີ ແລະ ຕອບສະຫນອງມາດຕະຖານລະດັບຊາດ ແລະ ສາກົນຢ່າງພຽງພໍ. ຂ້າພະເຈົ້າເຫັນວ່າ, ປະຈຸບັນ ຂະແຫນງອຸດສາຫະກຳຊີມັງ ຫວຽດນາມ ໄດ້ກ້າວເຂົ້າສູ່ໄລຍະເຫຼືອເຟືອ. ປະລິມານການຜະລິດຊີມັງຢູ່ ຫວຽດນາມ ບັນລຸເຖິງ 70ລ້ານໂຕນ ແຕ່ຄວາມຕ້ອງການໃຊ້ສອຍພຽງ 45 ລ້ານໂຕນເທົ່ານັ້ນ. ໃນຂະນະນັ້ນ, ພ້ອມກັບການພັດທະນາເສດຖະກິດ, ຄວາມຕ້ອງການຊີມັງຢູ່ ອິນໂດເນເຊຍ ນັບມື້ນັບເພີ່ມຂຶ້ນ ແລະ ຂ້າພະເຈົ້າປາດຖະຫນາວ່າ ການຮ່ວມມືນີ້ຈະຊ່ວຍແກ້ໄຂຄວາມຕ້ອງການຊີມັງຢູ່ ອິນໂດເນເຊຍໄດ້.”
ທ່ານ Mayerfas, ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ
ພາບ:dddn.com.vn
|
ປະຈຸບັນ ມີວິສາຫະກິດອິນໂດເນເຊຍ ປະມານ 35 ແຫ່ງພວມທຳມາຫາກິນຢູ່ຫວຽດນາມ. ພົ້ນເດັ່ນໃນ 9 ເດືອນຜ່ານມາ(ແຕ່ເດືອນ 6/2012 ມາຮອດປະຈຸບັນ) ຈຳນວນວິສາຫະກິດອິນໂດເນເຊຍ ເຂົ້າມາລົງທຶນຢູ່ຫວຽດນາມໄດ້ເພີ່ມຂຶ້ນ 40%. ນີ້ແມ່ນຕົວເລກດີພໍສົມຄວນ ສະແດງໃຫ້ເຫັນຄວາມສາມາດບົ່ມຊ້ອນ ແລະ ກຳລັງດຶງດູດຢ່າງແຂງແຮງຂອງຕະຫລາດຫວຽດນາມສຳລັບບັນດາຄູ່ຮ່ວມມືອິນໂດເນເຊຍ. ໃນຂົງເຂດລົງທຶນ, ອິນໂດເນເຊຍຢືນອັນດັບທີ 27 ໃນຍອດຈຳນວນ 101 ປະເທດ ແລະ ເຂດແຄ້ວນເຂົ້າມາລົງທຶນຢູ່ຫວຽດນາມ ດ້ວຍ 34 ໂຄງການຍັງມີຜົນສັກສິດ, ລວມຍອດຈຳນວນທຶນຈົດທະບຽນກວ່າ 285 ລ້ານ USD, ໃນນັ້ນຂົງເຂດອຸດສາຫະກຳປຸງແຕ່ງ, ປະດິດສ້າງຢືນອັນດັບຫນຶ່ງດ້ວຍ 16 ໂຄງການ, ລວມຍອດຈຳນວນທຶນຈົດທະບຽນບັນລຸເກືອບ 112,2 ລ້ານ USD. ແລະ ຕາມການຕີລາຄາຂອງທ່ານເອກອັກຄະລັດຖະທູດ ອິນໂດເນເຊຍ Mayerfar ປະຈຳຫວຽດນາມ ແລ້ວ, ຫວຽດນາມ ແມ່ນສະຖານທີ່ຊຶ່ງອິນໂດເນເຊຍມາລົງທຶນຫລາຍກວ່າໝູ່ຢູ່ໃນໂລກ.
ສ່ວນຫວຽດນາມ ມີ 7 ໂຄງການລົງທຶນພວມຜັນຂະຫຍາຍຢູ່ອິນໂດເນເຊຍ ດ້ວຍຍອດຈຳນວນເງິນລົງທຶນ 106,7 ລ້ານ USD, ເຊິ່ງສຸມໃສ່ຕົ້ນຕໍເຂົ້າບັນດາໂຄງການຂຸດຄົ້ນແຮ່ທາດ, ນ້ຳມັນອາຍແກສ ແລະ ໂທລະຄົມ ຂອງກຸ່ມບໍລິສັດນ້ຳມັນອາຍແກດສແຫ່ງຊາດຫວຽດນາມ, ບໍລິສັດໂທລະຄົມ VTV.
ຍາມໃດລັດຖະບານ ອິນໂດເນເຊຍ ກໍສ້າງເງື່ອນໄຂໃຫ້ບັນດາວິສາຫະກິດຫວຽດນາມ ໄປລົງທຶນຢູ່ ອິນໂດເນເຊຍ. ນັ້ນແມ່ນຄຳຢືນຢັນຂອງທ່ານ Achmand Kurniadi, ຮອງປະທານຄະນະກຳມະການຮ່ວມມືລົງທຶນ ອິນໂດເນເຊຍ ຢູ່ ນອກເວທີປາໄສດ້ານການຄ້າ ແລະ ການລົງທຶນ ອິນໂດເນເຊຍ ແລະ ຫວຽດນາມ.
“ລັດຖະບານ ອິນໂດເນເຊຍ ຈະສະຫງວນຫລາຍນະໂຍບາຍບຸລິມະສິດໃຫ້ບັນດາວິສາຫະກິດຫວຽດນາມ ລົງທຶນເຂົ້າອິນໂດເນເຊຍ ດ້ວຍຈຳນວນຄົນງານ ແລະ ທຶນຮອນຫລາຍ. ຕົວຢ່າງຄື: ສຳລັບພື້ນຖານໂຄງລ່າງ ພວກຂ້າພະເຈົ້າຍົກເວັ້ນພາສີນຳເຂົ້າສຳລັບແຫລ່ງທຶນ, ກົນຈັກ ແລະ ວັດຖຸອຸປະກອນໃນໄລຍະ 2 ປີ. ຖ້າຫາກວິສາຫະກິດ ຫວຽດນາມ ລົງທຶນກໍ່ສ້າງໂຮງງານຢູ່ Papua ຫລື Makassar ດ້ວຍຈຳນວນຄົນງານຫລາຍ, ພວກຂ້າພະເຈົ້າຈະສະເຫນີຫລຸດຜ່ອນພາສີໃຫ້ແກ່ເຂົາເຈົ້າ.”
ແລະ ກໍຕາມທ່ານ Achmand Kurniadiv ແລ້ວ, ລັດຖະບານ ອິນໂດເນເຊຍຈະຫນູນຊ່ວຍເຊື່ອມຕໍ່ວິສາຫະກິດຫວຽດນາມ ກັບວິສາຫະກິດ ອິນໂດເນເຊຍ, ໂຄສະນາຂໍ້ມູນຂ່າວສານກ່ຽວກັບບັນດາຂົງເຂດທີ່ອິນໂດເນເຊຍມີຄວາມສາມາດບົ່ມຊ້ອນ, ທ່າໄດ້ປຽບ ແລະ ກາລະໂອກາດພັດທະນາ ພ້ອມທັງກວດກາບັນດາຂໍ້ມູນຂ່າວສານກ່ຽວກັບວິສາຫະກິດ, ຄຸນນະພາບຜະລິດຕະພັນເພື່ອໃຫ້ວິສາຫະກິດຫວຽດນາມສາມາດອຸ່ນອຽງໃຈເມື່ອທຳມາຫາກິນຢູ່ ອິນໂດເນເຊຍ.
ດ້ວຍການຫນູນຊ່ວຍ ແລະ ສ້າງເງື່ອນໄຂສະດວກຂອງລັດຖະບານສອງປະເທດ, ວິສາຫະກິດສອງປະເທດຈະມີກາລະໂອກາດເປີດກວ້າງການເຄື່ອນໄຫວພົວພັນແລກປ່ຽນການຄ້າຢູ່ຕະຫລາດຂອງກັນ. ຜ່ານນັ້ນ ປະກອບສ່ວນຍົກລະດັບການພົວພັນຮ່ວມມືເສດຖະກິດສອງຝ່າຍ ຫວຽດນາມ -ອິນໂດເນເຊຍ ໃຫ້ສົມກັບຄວາມສາມາດບົ່ມຊ້ອນຂອງແຕ່ລະປະເທດ.