(vovworld)- ສະຫນາມບິນສາກົນ Hathawady, ສະຫນາມບິນສາກົນແຫ່ງທີ 4 ຂອງ ມຽນມາ ໄດ້ຮັບການລົງມືກໍ່ສ້າງໃນເດືອນ 9 ຜ່ານມາ ຢູ່ເຂດ Bago ທາງທິດເຫນືອນະຄອນຫລວງ Yangon, ການກໍ່ສ້າງສະຫນາມບິນ Hathawady ແມ່ນພາກສ່ວນຫນຶ່ງໃນແຜນການຊຸກຍູ້ຂະແຫນງທ່ອງທ່ຽວຂອງປະເທດມຽນມາ. ນັບແຕ່ເມື່ອດຳເນີນການປະຕິຮູບ, ມຽນມາ ພວມກາຍເປັນສະຖານທີ່ທ່ອງທ່ຽວທີ່ດູດດື່ມຂອງພາກພື້ນ ອາຊີຕາເວັນອອກສຽງໃຕ້.
ດ້ວຍລາຍຈ່າຍລົງທຶນຂຶ້ນເຖິງ 2 ຕື້ USD, ສະຫນາມບິນສາກົນ Hathawady ຄາດວ່າຈະເປີດປະຕູໃນປີ 2018. ຕາມການອອກແບບ, ໃນແຕ່ລະປີສະຫນາມບິນແຫ່ງນີ້ຈະຕ້ອນຮັບຜູ້ໂດຍສານປະມານ 12 ລ້ານເທື່ອຄົນ ແລະ ອາດຈະໄດ້ຮັບການຍົກລະດັບເພື່ອສາມາດຕ້ອນຮັບຜູ້ໂດຍສານ 35 ລ້ານເທື່ອຄົນໃນແຕ່ລະປີ. ພິເສດ, ສະຫນາມບິນ ອາດຈະຮັບໃຊ້ເຮືອບີນ AirBus A380, ຊື່ງແມ່ນເຮືອບິນຂົນສົ່ງຜູ້ໂດຍສານໃຫຍ່ກວ່າໝູ່ປະຈຸບັນ. ທ່ານ Win Swe Tun, ຮອງຜູ້ອຳນວຍການໃຫຍ່ກົມການບິນພົນລະເຮືອນ ມຽນມາ ໃຫ້ຮູ້ວ່າ: ຢູ່ອ້ອມຂ້າງສະຫນາມບິນແຫ່ງນີ້ຈະກໍ່ສ້າງນະຄອນທັນສະໄຫມແຫ່ງໃຫມ່ ແລະ ຈະເຮັດໃຫ້ນະຄອນນີ້ກາຍເປັນສູນການຄ້າໃຫຍ່.
“ຢູ່ບໍລິເວນນີ້ແມ່ນວາງແຜນຜັງກໍ່ສ້າງສະຫນາມບິນທີ່ມີເນື້ອທີ່ກວ້າງກວ່າ 9 ເທົ່າເມື່ອທຽບໃສ່ສະຫນາມບິນ ສາກົນ Yangon ປະຈຸບັນ. ສະຫນາມບິນ Hathawady ແມ່ນໃກ້ກັບນະຄອນ Bago ແລະ ໃກ້ກັບທາງບົກ ອາຊຽນ, ບັນດາເຂດອຸດສາຫະກຳຄື: ເຂດອຸດສາຫະກຳ Thilawa. ສະນັ້ນ ສະຫນາມບິນແຫ່ງນີ້ ຈະແມ່ນສະຖານທີ່ສະດວກທີ່ສຸດເພື່ອໃຫ້ເຮືອບິນບິນຂຶ້ນ, ລົງຈອດ. ໂຄງການ Hathawady ບໍ່ພຽງແຕ່ແມ່ນໂຄງການກໍ່ສ້າງສະຫນາມບິນສາກົນເທົ່ານັ້ນ ຫາກຍັງມຸ່ງໄປເຖິງການກໍ່ສ້າງນະຄອນອ້ອມຂ້າງສະຫນາມບິນເພື່ອຮັບໃຊ້ບັນດາການເຄື່ອນໄຫວຂອງສະຫນາມບິນດັ່ງກ່າວ ແລະ ການເຄື່ອນໄຫວດຳເນີນທຸລະກິດຄື: ການສ້ອມແປງເຮືອບິນ, ບັນດາສູນບຳລຸງສ້າງ, ເຂດບັນເທິງ, ສະຫນາມກອບສ ແລະ ໂຮງແຮມ.”
ສະຫນາມບິນ Yangon
photo:Reuters
|
ເລ່ື່ອງກໍ່ສ້າງນະຄອນໃຫມ່ໃກ້ກັບສະຫນາມບິນ Hathawady ແມ່ນສ່ວນຫນຶ່ງຂອງໂຄງການເປີດກວ້າງລະບົບສະຫນາມບິນຕົ້ນຕໍຂອງ ມຽນມາ. ປະຈຸບັນ, ມຽນມາ ມີສະຫນາມບິນສາກົນ 4 ແຫ່ງ, ໃນນັ້ນ ສະຫນາມບິນສາກົນ Yangon ພວມຮັບໃຊ້ 94% ຖ້ຽວບິນສາກົນ. ແຕ່ ສະຫນາມບິນ Yangon ບໍ່ສາມາດຮັບໃຊ້ເຮຶອບິນຂະຫນາດໃຫຍ່ໄດ້. ນີ້ກໍແມ່ນສາຍເຫດຊື່ງ ມຽນມາ ກໍໍ່ສ້າງສະຫນາມບິນສາກົນ Hathawady. ນອກນັ້ນ ລັດຖະບານ ມຽນມາ ກໍຄາດວ່າ ຈະກໍ່ສ້າງສູນການຄ້າແຫ່ງໃຫຍ່ທີສອງຂອງປະເທດນີ້ ຢູ່ອ້ອມຂ້າງສະຫນາມບິນ Hathawady ແລະ ເສັ້ນທາງລົດໄຟຟ້າເຊ່ືອມຕໍ່ສູນການຄ້າ Yangon ແລະ ສູນການຄ້າ Hathawady. ຄຽງຄູ່ກັນນັ້ນ, ສະຫນາມບິນ ສາກົນ Yangon ກໍໄດ້ຮັບການຍົກລະດັບ ແລະ ຄາດວ່າ ຈະສາມາດຕ້ອນຮັບຜູ້ໂດຍສານປະມານ 6 ລ້ານເທື່ອຄົນໃນປີ 2017. ທ່ານ Aung Gyi, ຜູ້ອຳນວຍການບໍລິສັດຂົນສົ່ງການບິນ Mianma Golden ໃຫ້ຮູ້ວ່າ:
“ສະຫນາມບິນສາກົນ Yangon ຄວນໄດ້ຮັບການຍົກລະດັບ. ຂ້າພະເຈົ້າຄິດວ່າພາຍຫລັງປະມານ 10 ປີອີກ, ພວກເຮົາອາດຈະກໍ່ສ້າງສະຫນາມບິນແຫ່ງໃຫມ່. ປະຈຸບັນ ຢູ່ Yangon ມີເນື້ອທີ່ດິນເປັນຈຳນວນຫລວງຫລາຍເພື່ອຍົກລະດັບສະຫນາມບິນ. ເຖິງຢ່າງໃດກໍຕາມ, ເລື່ອງຍົກລະດັບຖ້າບໍ່ປະຕິບັດຕາມວິທີເໝາະສົມ ມັນຈະສົ່ງຜົນກະທົບເຖິງການພັດທະນາຂອງປະເທດຊາດ, ຂອງລະບົບຄົມມະນາຄົມ ແລະ ເພີ່ມລາຍຈ່າຍ. ”
ມຽນມາ ກໍ່ສ້າງສະຫນາມບິນສາກົນ Hathawady ແຫ່ງໃຫມ່ ແລະ ຍົກລະດັບສະຫນາມບິນ Yangon ເພື່ອຮັບໃຊ້ຈຳນວນນັກທ່ອງທ່ຽວສາກົນມາຢ້ຽມຢາມປະເທດນີ້ນັບມື້ນັບສູງ. ຕາມທະນາຄານພັດທະນາອາຊີ, ຈຳນວນນັກທ່ອງທ່ຽວສາກົນມາຢ້ຽມຢາມ ມຽນມາ ຈະເພີ່ມຂຶ້ນ 7,5 ລ້ານເທື່ອຄົນໃນປີ 2020, ສູງຂຶ້ນທົບ 7 ເທົ່າເມື່ອທຽບໃສ່ຈຳນວນນັກທ່ອງທ່ຽວທີ່ມີໃນປະຈຸບັນ. ຂະແຫນງທ່ອງທ່ຽວມຽນມາ ຈະດຶງດູດປະມານ 10 ຕື້ USD ແລະ ສ້າງວຽກເຮັດງານທຳໃຫ້ແກ່ 1,4 ລ້ານຄົນ. ເປັນທີ່ຈະແຈ້ງແລ້ວວ່າ: ປະເທດມຽນມາ ພວມແມ່ນຈຸດນັດພົບອັນດູດດື່ມຢູ່ພາກພື້ນ ອາຊີຕາເວັນອອກສຽງໃຕ້. ສະນັ້ນ ເພີ່ມທະວີການພັດທະນາລະບົບພື້ນຖານໂຄງລ່າງ, ໂຮງແຮມ ໄດ້ຮັບຖືວ່າ ແມ່ນບາດກ້າວສຳຄັນເພື່ອຍາດແຍ່ງກາລະໂອກາດນີ້.