(vovworld)- ໂດຍຕັ້ງຢູ່ເຂດປ່າດົງສະຫງົບງຽບທີ່ຫ່າງຈາກຈາກນະຄອນ Kota Kinabalu 35 ກມ. ໝູ່ບ້ານວັດທະນະທຳ Mari Mari ໄດ້ຮັບການສ້າງຕັ້ງຂຶ້ນແຕ່ເດືອນ 12/2008 ຢູ່ລັດ Sabah, ທາງທິດຕາເວັນອອກຂອງມາເລເຊຍ. ໝູ່ບ້ານວັດທະນະທຳແຫ່ງນີ້ປຽບເໝືອນຫໍພິພິດທະພັນ ທີ່ອະນຸລັກຮັກສາວັດທະນະທຳຂອງບັນດາເຜົ່າສ່ວນຫນ້ອຍຢູ່ເກາະ Borneo. ມາຢ້ຽມຢາມແຫ່ງນີ້, ນັກທ່ອງທ່ຽວຈະໄດ້ຮັບການແນະນຳກ່ຽວກັບວັດທະນະທຳທີ່ເປັນເອກະລັກສະເພາະຂອງກົກເຫຼົ່າຈຳນວນຫນຶ່ງ ກໍ່ຄືມີຄວາມຮູ້ຕື່ມອີກກ່ຽວກັບປະຫວັດຄວາມເປັນມາຂອງຊາວເຜົ່າຢູ່ທີ່ນີ້.
ກ່ອນທີ່ເຂົ້າໝູ່ບ້ານວັດທະນະທຳ Mari Mari, ນັກທ່ອງທ່ຽວຕ້ອງຍ່າງລຽບຕາມເສັ້ນທາງນ້ອຍໆພາໄປເຖິງເຮືອນຫຼັງໜຶ່ງ, ເພື່ອໄດ້ຮັບຟັງແນະນຳຂໍ້ມູນທີ່ຈຳເປັນກ່ຽວກັບໝູ່ບ້ານວັດທະນະທຳ. ບົນເສັ້ນທາງໄປນັກທ່ອງທ່ຽວຈະຕ້ອງຜ່ານຂົວແຂວນດ້ວຍໄມ້ທີ່ໂອນໄປໂອນມາເພື່ອຂ້າມຫ້ວຍນຳ້ ຄືດັ່ງສິ່ງທີ່ທົດສອບຜູ້ທີ່ຢາກໄປຄົ້ນຫາ.
ໃຕ້ຂົວໄມ້ແມ່ນນ້ຳຫ້ວຍທີ່ໄຫຼຜ່ານຫີນກ້ອນໃຫຍ່ສ້າງເປັນສຽງຜາດໆ. ຜ່ານຂົວລຳນີ້ແລ້ວ, ນັກທ່ອງທ່ຽວສືບຕໍ່ຍ່າງໄປໜ້ອຍໜຶ່ງ, ຈະເຫັນເຮືອນຮ້ານຂອງກົກເຫຼົ່າ Dusun - ເຊິ່ງແມ່ນໜຶ່ງໃນບັນດາກົກເຫຼົ່າໃຫຍ່ກວ່າໝູ່ຢູ່ Sabah. ໃນເຮືອນຫຼັງນີ້ໄດ້ວາງສະແດງເຄື່ອງໃຊ້ສອຍໃນການດຳລົງຊີວິດເຊັ່ນ: ກະພາ, ກອງ, ລຳໄຜ່… ອ້າຍ ຫງວຽນຕ໋ຽນເກື່ອງ, ນັກທ່ອງທ່ຽວນະຄອນໂຮ່ຈີມິນ, ໃຫ້ຮູ້ວ່າ:
“ນີ້ແມ່ນເທື່ອທຳອິດທີ່ຂ້າພະເຈົ້າໄດ້ໄປ Sabah, ເຊິ່ງແມ່ນເຂດທີ່ມີຫຼາຍຊົນເຜົ່າດຳລົງຊີວິດຢູ່ຮ່ວມກັນ. ຂ້າພະເຈົ້າຮູ້ສຶກພາກພູມໃຈເມື່ອໄດ້ເຫັນປະຈັກຕາຊີວິດ ກໍ່ຄືວັດທະນະທຳທີ່ເປັນເອກະລັກສະເພາະຂອງບັນດາເຜົ່າຢູ່ທີ່ນີ້.”
ເພື່ອຊ່ວຍໃຫ້ນັກທ່ອງທ່ຽວມີຄວາມເຂົ້າໃຈຕື່ມອີກກ່ຽວກັບວັດທະນະທຳຂອງກົກເຫຼົ່າ, ສາວ Dusan ຜູ້ໜຶ່ງໃນຊຸດອາພອນປະຈຳເຜົ່າ ໄດ້ເຊີນນັກທ່ອງທ່ຽວດື່ມເຫຼົ້າເຂົ້າໃນລຳໄຜ່, ນັກທ່ອງທ່ຽວຫຼາຍຄົນສະແດງຄວາມນິຍົມເມື່ອໄດ້ດື່ມເຫຼົ້າທີ່ມີລົດຫວານໆນີ້. ເມື່ອໄປຢາມຮ້ານວາງສະແດງ Rice Wine, ນັກທ່ອງທ່ຽວຈະໄດ້ຮັບປະທານອາຫານທີ່ຖືກຕົ້ມດ້ວຍລຳໄຜ່ ແລະ ເຫັນປະຈັກຕາວິທີກວດອາຫານສຸກຫຼືບໍ ດ້ວຍການ “ຟັງ” ຄວາມຮ້ອນຜ່ານລຳໄຜ່ຂອງກົກເຫຼົ່າ Bajau.
ໝູ່ບ້ານວັດທະນະທຳ Mari Mari
photo:internet
|
ໃນໝູ່ບ້ານວັດທະນະທຳ Mari Mari ຍັງມີກົກເຫຼົ່າອື່ນໆອີກຄື: ກົກເຫຼົ່າ Murutm, Rungus… ດ້ວຍສີສັນວັດທະນະທຳທີ່ແຕກຕ່າງກັນ. ຢູ່ທີ່ນີ້, ນັກທ່ອງທ່ຽວຈະໄດ້ຄົ້ນຫາວິທີດັງໄຟດ້ວຍໄມ້ໄຜ່, ການຝັ້ນເຊືອກລ່າມ, ເຮັດເສື້ອໜັງ… ເມື່ອໄປເຖິງບໍລິເວນຂອງກົກເຫຼົ່າ Dayak, ເຊິ່ງແມ່ນກົກເຫຼົ່າລ່າເນື້ອຄົນເປັນຕົ້ນ. ສະພາບແວດລ້ອມຢູ່ທີ່ນີ້ພາໃຫ້ນັກທ່ອງທ່ຽວຮູ້ສຶກວ່າຕົນເອງພວມຕົກຢູ່ໃນເຂດດັກສະກັດ, ດ້ວຍລູກທະນູ ແລະ ງ້າວໃນພຸ່ມໄມ້ພວມມຸ່ງໄສ່ເຂົາເຈົ້າ ພ້ອມກັບສຽງຮ້ອງໂຮໄລ່ຈັບນັກທ່ອງທ່ຽວທີ່ດັງກ້ອງກັງວານໄປທົ່ວເຂດຂອງຊາວເຜົ່າຢູ່ທີ່ນີ້ ຍິ່ງເຮັດໃຫ້ນັກທ່ອງທ່ຽວຕົກສະເງີ້, ຢ້ານກົວ. ແຕ່ສິ່ງດັ່ງກໍ່ຖືກລະລາຍໄປໃນທັນທີ. ເມື່ອຮູ້ວ່ານີ້ແມ່ນຂອງຕ້ອນເຊິ່ງຊາວເຜົ່າມອບໃຫ້ນັກທ່ອງທ່ຽວ. ອ້າຍ ຫງວຽນຕ໋ຽນເກື່ອງ ນັກທ່ອງທ່ຽວນະຄອນໂຮ່ຈີມິນ, ແບ່ງປັນວ່າ:
“ພວກຂ້າພະເຈົ້າໄດ້ມາຢາມເຮືອນຮ້ານຂອງຫຼາຍກົກເຫຼົ່າແລ້ວ, ຢູ່ເຮືອນຮ້ານແຕ່ລະແຫ່ງກໍ່ມີວິທີຕ້ອນຮັບແຂກທີ່ແຕກຕ່າງກັນ. ເມື່ອໄດ້ຮັບການຕ້ອນຮັບຈາກກົກເຫຼົ່າ Dayak, ຂ້າພະເຈົ້າກໍ່ຮູ້ສຶກຢ້ານກົວໜ້ອຍໜຶ່ງ, ແຕ່ພັດຈັບອົກຈັບໃຈຫຼາຍ”.
ໃນໝູ່ບ້ານ Mari Mari ກໍ່ໄດ້ແນະນຳຮູບແບບເຮືອນຂອງກົກເຫຼົ່າຕ່າງໆ ພ້ອມກັບແບບແຜນດຳລົງຊີວິດ, ຮີດຄອງປະເພນີຂອງແຕ່ລະກົກເຫຼົ່າອີກ. ການຢ້ຽມຢາມໝູ່ບ້ານວັດທະນະທຳ Mari Mari ເຮັດໃຫ້ນັກທ່ອງທ່ຽວມີຄວາມຮູ້ຕື່ມອີກກ່ຽວກັບການດຳລົງຊີວິດຂອງບັນດາກົກເຫຼົ່າໃນປະເທດມາເລເຊຍ. ແລະ ເຂົ້າໃຈກວ່າກ່ຽວກັບປະເພນີອັນດີງາມງາມຂອງບັນດາກົກເຫຼົ່າທີ່ຍັງຄົງຕົວ ແລະ ພັດທະນາໃນປະຈຸບັນ.