(vovworld) - ຫວ່າງແລ້ວນີ້ ຢູ່ ຮ່າໂນ້ຍ, ກຸ່ມບໍລິສັດຖານຂໍ້ມູນສາກົນ IDG ໄດ້ຈັດຕັ້ງພິທີມອບລາງວັນການນຳເຕັກໂນໂລຊີຂໍ້ມູນຂ່າວສານດີເດັ່ນອາຊີຕາເວັນອອກສຽງໃຕ້ ປີ 2012. ຄຽງຄູ່ກັບການເຊີດຊູ ການນຳເຕັກໂນໂລຊີຂໍ້ມູນຂ່າວສານດີເດັ່ນ 16 ຄົນທີ່ມາຈາກບັນດາປະເທດ ອາຊຽນ, ເລື່ອງຈັດຕັ້ງພິທີມອບລາງວັນຍັງ ເປັນຂົວເຊື່ອມຕໍ່ເພື່ອໃຫ້ບັນດາການນຳ ເຕັກໂນໂລຊີຂໍ້ມູນຂ່າວສານໃນພາກພື້ນພ້ອມກັນແລກປ່ຽນບົດຮຽນໃນການໝູນໃຊ້ ເຕັກໂນໂລຊີຂໍ້ມູນຂ່າວສານຮັບໃຊ້ການພັດທະນາຂອງອົງການ, ອົງການຈັດຕັ້ງເວົ້າສະເພາະ ແລະ ປະເທດຊາດເວົ້າລວມເປັນຢ່າງດີທີ່ສຸດ.
ໂດຍເລີ່ມປະຕິບັດເມື່ອປີ 2004 ພາຍໃຕ້ຂໍ້ລິເລີ່ມຂອງກຸ່ມບໍລິສັດຖານຂໍ້ມູນສາກົນ IDG ຫວຽດນາມ, ລາງວັນການນຳ ເຕັກໂນໂລຊີຂໍ້ມູນຂ່າວສານດີເດ່ັນ ອາຊີຕາເວັນອອກສຽງໃຕ້ໄດ້ກາຍເປັນຫນຶ່ງໃນບັນດາລາງວັນທີ່ມີອິດທິພົນຊື່ສຽງທີ່ສຸດທີ່ສະຫງວນໃຫ້ແກ່ປະຊາຄົມການນຳ ເຕັກໂນໂລຊີຂໍ້ມູນຂ່າວສານໃນພາກພື້ນ. ຜ່ານໄລຍະ 8 ປີ ແຫ່ງການຈັດຕັ້ງ, ລາງວັນດັ່ງກ່າວໄດ້ເຊີດຊູການນຳ ເຕັກໂນໂລຊີຂໍ້ມູນຂ່າວສານດີເດັ່ນ 60 ຄົນ, ຊຶ່ງແມ່ນຜູ້ທີ່ມີການປະກອບສ່ວນເຂົ້າໃນການພັດທະນາຂະແຫນງເຕັກໂນໂລຊີຂໍ້ມູນຂ່າວສານ.
ພິທີມອບລາງວັນການນຳເຕັກໂນໂລຊີຂໍ້ມູນຂ່າວສານດີເດັ່ນ
ອາຊີຕາເວັນອອກສຽງໃຕ້ 2012
ພາບ:baomoi.com
|
ລາງວັນການນຳ ເຕັກໂນໂລຊີຂໍ້ມູນຂ່າວສານ ອາຊຽນ 2012 (CIO ASEAN Awards 2012) ຖືກແບ່ງເປັນ 2 ພາກຄື: ພາກລັດ ແລະ ພາກເອກະຊົນ, ໃນນັ້ນ ແຕ່ລະພາກໄດ້ແບ່ງເປັນບັນດາກຸ່ມທີ່ແຕກຕ່າງກັນ. ມາດຕະຖານຕີລາຄາ ໂດຍຄະນະຈັດຕັ້ງ ແລະ ສະພາຄັດເລືອກປັບປຸງໃຫ້ເໝາະສົມກັບລະດັບຄວາມຮູ້ຂອງບັນດາການນຳເຕັກໂນໂລຊີຂໍ້ມູນຂ່າວສານ ໃນປະຈຸບັນ, ນັ້ນແມ່ນເຊີດຊູວິໄສທັດຍຸດທະສາດ, ກຳລັງຄວາມສາມາດຈັດຕັ້ງ, ຊີ້ນຳນຳພາ, ປ່ຽນໃຫມ່, ມີຫົວຄິດປະດິດສ້າງ, ເນັ້ນຫນັກເຖິງລັກສະນະບຸກທະລຸ, ຫົວຄິດປະດິດສ້າງຂອງໂຄງການ ເຕັກໂນໂລຊີຂໍ້ມູນຂ່າວສານ ຊຶ່ງບັນດາການນຳເຕັກໂນໂລຊີຂໍ້ມູນຂ່າວສານໄດ້ຜັນຂະຫຍາຍສຳເລັດຜົນ. ພິເສດ ຈຸດເດັ່ນຂອງລາງວັນປີນີ້ ແມ່ນມຸ່ງໄປເຖິງການພັດທະນາສັງຄົມ ແລະ ຮັບໃຊ້ປະຊາຊົນ, ເພາະວ່າ ມາດຖານຕີລາຄາບໍ່ພຽງແຕ່ແມ່ນລະດັບຜົນສະທ້ອນຂອງການນຳໃນວິສາຫະກິດ, ຫົວຫນ່ວຍເທົ່ານັ້ນ ຫາກຍັງແມ່ນການປະກອບສ່ວນຂອງເຂົາເຈົ້າທ່ີມີຕໍ່ວົງຄະນາຍາດ, ສັງຄົມອີກດ້ວຍ. ທ່ານ Le Thanh Tam ຜູ້ອຳນວຍການໃຫຍ່ກຸ່ມບໍລິສັດຖານຂໍ້ມູນສາກົນ IDG ຊຶ່ງແມ່ນຫົວຫນ່ວຍຈັດຕັ້ງ, ທັງເປັນຮອງປະທານສະພາຄັດເລືອກໃຫ້ຮູ້ວ່າ:
“ຈຸດພິເສດຂອງການນຳເຕັກໂນໂລຊີຂໍ້ມູນຂ່າວສານ ກ່ອນນີ້ 10 ປີ ແມ່ນເອົາໃຈໃສ່ເຖິງດ້ານເຕັກນິກ. ທີສອງແມ່ນວາງແຜນຕີລາຄາລາຍການຊື້ອຸປະກອນຫລາຍກວ່າບົດບາດນຳພາ. ນັບແຕ່ປີ 2008 ເຖິງປີ 2015 ພວກເຮົາຖືວ່າ ການນຳເຕັກໂນໂລຊີຂໍ້ມູນຂ່າວສານ ຂອງ ຫວຽດນາມ ກໍທຽບເທົ່າກັບບັນດາປະເທດໃນປະຊາຄົມອາຊຽນ ກໍຄືບັນດາປະເທດພວມພັດທະນາ. ປະຈຸບັນ ການນຳເຕັກໂນໂລຊີຂໍ້ມູນຂ່າວສານສວມບົດບາດຫລາຍກວ່າໃນການກຳນົດທິດພັດທະນາວິສາຫະກິດເວົ້າລວມ.”
ຄະນະຈັດຕັ້ງໄດ້ຮັບ 88 ຄຳສະເຫນີຈາກບັນດາປະເທດໃນພາກພື້ນ. ບັນດາສຳເນົາເອກະສານໄດ້ຮັບການຕີລາຄາຢ່າງເຂັ້ມງວດ ເພາະວ່າ ສະພາຄັດເລືອກແມ່ນບັນດາຜູ້ຊ່ຽວຊານທີ່ມີປະສົບການໃນຂົງເຂດເຕັກໂນໂລຊີຂໍ້ມູນຂ່າວສານ. ການນຳເຕັກໂນໂລຊີຂໍ້ມູນຂ່າວສານດີເດັ່ນ 16 ຄົນ ໄດ້ຮັບການເລືອກເຟັ້ນຈາກສະພາຄັດເລືອກເພື່ອມອບນາມມະຍົດເປັນການນຳເຕັກໂນໂລຊີຂໍ້ມູນຂ່າວສານດີເດັ່ນ ອາຊຽນ ປີ 2012. ຄຽງຄູ່ຄວາມເປັນກຽດໄດ້ຮັບການເຊີດຊູເປັນການນຳເຕັກໂນໂລຊີຂໍ້ມູນຂ່າວສານ ດີເດັ່ນຂອງພາກພື້ນ, ບັນດາຜູ້ໄດ້ຮັບລາງວັນຍັງມີກາລະໂອກາດເພື່ອພົບປະ ແລະ ແລກປ່ຽນບົດຮຽນກ່ຽວກັບຄວາມຮູ້ດ້ານເຕັກໂນໂລຊີຂໍ້ມູນຂ່າວສານໃຫມ່ໃນໂລກ, ກ່ຽວກັບບັນດາບັນຫາສຳຄັນຊຶ່ງບັນດາການນຳເຕັກໂລໂລຊີຂໍ້ມູນຂ່າວສານຕ້ອງປະເຊີນຫນ້າອີກດ້ວຍ. ທ່ານ ຈິມ ທະນິຍະວັດດີກຸນ. ທີ່ປຶກສາພິເສດກ່ຽວກັບລະບົບຊຳລະ ແລະ ເຕັກໂນໂລຊີຂໍ້ມູນຂ່າວສານຂອງຜູ້ວ່າການທະນາຄານແຫ່ງລັດສູນກາງໄທ ຊຶ່ງແມ່ນຫນຶ່ງໃນຈຳນວນການນຳເຕັກໂນໂລຊີຂໍ້ມູນຂ່າວສານ 16 ຄົນທີ່ໄດ້ຮັບລາງວັນໃນຄັ້ງນີ້ໃຫ້ຮູ້ວ່າ:
“ປະຈຸບັນ ພວກເຮົາພວມມານະພະຍາຍາມຮ່ວມແຮງຮ່ວມໃຈເພື່ອສ້າງປະຊາຄົມເສດຖະກິດ ອາຊຽນ ໃນປີ 2015, ເມື່ອປະຊາຄົມເສດຖະກິດ ອາຊຽນ ໄດ້ຮັບການສ້າງຕັ້ງຂຶ້ນ, ພວກເຮົາຈະມີຂະແຫນງການເງິນທະນາຄານລວມໃນພາກພື້ນ, ດັ່ງນັ້ນຈຶ່ງຮຽກຮ້ອງໃຫ້ມີລະດັບໝູນໃຊ້ເຕັກໂນໂລຊີຂໍ້ມູນຂ່າວສານຢ່າງສະໝຳ່ສະເຫມີກັນລະຫວ່າງບັນດາປະເທດໃນພາກພື້ນ.”
ໄປຄຽງຄູ່ກັບພິທີມອບລາງວັນ, ກອງປະຊຸມບັນດາການນຳເຕັກໂນໂລຊີຂໍ້ມູນຂ່າວສານ ກໍຖືກຈັດຂຶ້ນພາຍໃຕ້ຫົວຂໍ້ວ່າ: ພັດທະນາເຕັກໂນໂລຊີຢູ່ພື້ນຖານໂຄງລ່າງໃນປະຈຸບັນ ຫລື ການລົງທຶນໃຫມ່ ເພື່ອປຶກສາຫາລືກ່ຽວກັບບັນດາມາດຕະການເຕັກໂນໂລຊີລວບລວມອັນດັບໜຶ່ງຂອງໂລກໃນສະພາບພື້ນຖານເສດຖະກິດພວມປະເຊີນຫນ້າກັບຄວາມຫຍຸ້ງຍາກຫລາຍປະການຄືໃນປະຈຸບັນ.
ປະຈຸບັນ ການພັດທະນາຢ່າງແຂງແຮງຂອງເຕັກໂນໂລຊີຂໍ້ມູນຂ່າວສານ ເຮັດໃຫ້ບົດບາດຂອງບັນດາການນຳເຕັກໂນໂລຊີຂໍ້ມູນຂ່າວສານໄດ້ຮັບການຍົກຂຶ້ນສູ່ລະດັບສູງໃຫມ່. ສະນັ້ນ ເລື່ອງຈັດຕັ້ງການມອບລາງວັນການນຳເຕັກໂນໂລຊີຂໍ້ມູນຂ່າວສານ ອາຊຽນ ປະຈຳປີ ບໍ່ພຽງແຕ່ເພື່ອຊອກຫາ ແລະ ເຊີດຊູບັນດາການນຳເຕັກໂນໂລຊີຂໍ້ມູນຂ່າວສານດີເດັ່ນເທົ່ານັ້ນ ຫາກຍັງປະກອບສ່ວນປ່ຽນແປງ, ຍົກສູງຄວາມຮັບຮູ້ຂອງສັງຄົມກ່ຽວກັບບົດບາດຂອງບັນດາການນຳເຕັກໂນໂລຊີຂໍ້ມູນຂ່າວສານ, ນຳມາເຊິ່ງກາລະໂອກາດພັດທະນາໃຫ້ແກ່ບັນດາການນຳເຕັກໂນໂລຊີຂໍ້ມູນຂ່າວສານກໍຄືໃຫ້ແກ່ວິສາຫະກິດແລະອົງການຈັດຕັ້ງນັ້ນເອງ./.