(vovworld)- ຫວ່າງແລ້ວນີ້ ຫໍພິພິດທະພັນຊົນເຜົ່າວິທະຍາຫວຽດນາມ ໄດ້ສົມທົບກັບກົມສົ່ງເສີມການຄ້າ ມາເລເຊຍ ຈັດຕັ້ງລາຍການ “ພ້ອມກັນເຂົ້າຮ່ວມການລະຫລິ້ນພື້ນເມືອງຂອງບັນດາປະເທດ ອາຊີຕາເວັນອອກສ່ຽງໃຕ້” ດ້ວຍບັນດາການເຄື່ອນໄຫວອັນດູດດື່ມຄື: ສະແດງຊຸດອາພອນປະຈຳຊາດຂອງປະເທດອາຊີຕາເວັນອອກສ່ຽງໃຕ້ຈຳນວນຫນຶ່ງ ແລະ ການລະຫລິ້ນພື້ນເມືອງບັນດາປະເທດອາຊີຕາເວັນອອກສຽງໃຕ້. ເຂົ້າຮ່ວມການເຄື່ອນໄຫວນີ້ມີນ້ອງນ້ອຍ, ນັກສຶກສາ ແລະ ແຂກ ກວ່າ 2000 ເທື່ອຄົນ.
ເດັກນ້ອຍເຂົ້າຮ່ວມລາຍການລະຫລິ້ນພື້ນເມືອງບັນດາປະເທດອາຊຽນ
|
ໃນເວລາ 9 ໂມງເຊົ້າຂອງວັນເສົາ, ລາຍການ “ພ້ອມກັນເຂົ້າຮ່ວມການລະຫລິ້ນພື້ນເມືອງບັນດາປະເທດ ອາຊີຕາເວັນອອກສ່ຽງໃຕ້” ໄດ້ເລີ່ມຂຶ້ນ ດ້ວຍ ການເດີນແຟຊັນຊຸດອາພອນປະຈຳຊາດບັນດາປະເທດ ອາຊີຕາເວັນອອກສ່ຽງໃຕ້”. ທີ່ເວທີກາງແຈ້ງເຊິ່ງເຮັດດ້ວຍໄມ້ ຖືກຕັ້ງຢູ່ດ້ານຫນ້າ ອາຄານອາຊີຕາເວັນອອກສ່ຽງໃຕ້ ຊື່ງແມ່ນອາຄານທີ່ມີຫລັງຄາເປັນຮູບວ່າວ, ເດັກນ້ອຍ 4 ຄົນ ອາຍຸປະມານ 7- 8 ປີ ກຳລັງເດີນແຟຊັນ ຊຸດເສື້ອຍາວ (ຊື່ງແມ່ນຊຸດອາພອນປະຈຳຊາດ) ແລະ ເສື້ອ 4 ປ່ຽງຂອງຫວຽດນາມ. ຕໍ່ມາແມ່ນການເດີນແຟຊັນຊຸດອາພອນປະຈຳຊາດຂອງລາວ ໂດຍນາງ ມານີວັນ ອີນທະໄຊ ນັກສຶກສາລາວພວມຮ່ຳຮຽນຢູ່ ມະຫາວິທະຍາໄລອຸດສາຫະກຳ ພ້ອມກັບນັກເດີນແບບແຟເຊິນທີ່ເປັນເດັກນ້ອຍຜູ້ຫນຶ່ງສະແດງ. ເຂົ້າຮ່ວມລາຍການໃນມື້ນີ້ ນາງມານີວັນ ອິນທະໄຊ ນຸ່ງຊຸດອາພອນສີບົວເຮັດດ້ວຍແພໄຫມ ຕ່ຳດ້ວຍລວດລາຍລະອຽດລະອໍ. ນີ້ແມ່ນຄັ້ງທຳອິດ ນາງມານີວັນ ເດີນແຟຊັນບົນເວທີ ທີ່ມີຜູ້ຊົມຫລາຍຄົນຄືແນວນີ້. ເຖິງວ່າໄດ້ຮັບການແນະນຳ ຝືກແອບມາກ່ອນນີ້ເກືອບ 1 ເດືອນກໍຕາມ ແຕ່ນາງຍັງຄົງ ຮູ້ສຶກຕື່ນເຕັ້ນໃຈ.
ສຽງນາງ ມານີວັນ
ພາຍຫລັງໄດ້ຮັບຊົມ ການເດີນແຟຊັນຊຸດອາພອນປະຈຳຊາດຂອງບັນດາປະເທດອາຊຽນ ມາເປັນເວລາ 30 ນາທີ, ເດັກຍິງ ເລເວີນແອງ ໃຫ້ຮູ້ວ່າ:
“ນີ້ເປັນຄັ້ງທຳອິດນ້ອງໄດ້ຮັບຊົມລາຍການເດີນແຟຊັນຊຸດອາພອນປະຈຳຊາດຂອງບັນດາປະເທດອາຊີຕາເວັນອອກສ່ຽງໃຕ້. ບັນດາຊຸດອາພອນປະຈຳຊາດຂອງປະເທດເພື່ອນບ້ານມີສີສັນຫລາກຫລາຍ, ສະແດງໃຫ້ເຫັນຄວາມມີຫົວຄິດປະດິດສ້າງຂອງປະຊາຊົນປະເທດເຫລົ່ານັ້ນ. ນອກຈາກຊຸດເສື້ອຍາວຂອງຫວຽດນາມ ນ້ອງກໍມັກຊຸດອາພອນປະຈຳຊາດຂອງລາວ ແລະ ບຣູໄນອີກ.”
ການຫລິ້ນດຶງເຊືອກຂອງໄທ
|
ເພື່ອກະກຽມໃຫ້ການເດີນແຟຊັນມື້ນີ້, ໃນຕະຫລອດເກືອບ 1 ເດືອນ, ເດັກນ້ອຍ 15 ຄົນໃນເກນອາຍຸ 5-10 ປີ ແລະ ນັກສຶກສາລາວ, ກຳປູເຈຍ, ມາເລເຊຍ, ບຣູໄນ, ຟິລີບປີນ ແລະ ມຽນມາ 10 ຄົນ ໄດ້ຝືກແອບຢ່າງຫ້າວຫັນ. ທ່ານ ຫງວຽນຢູຍທ້ຽວ, ອະດີດຜູ້ອຳນວຍການຫໍພິພິທະພັນຊົນເຜົ່າວິທະຍາ, ສະມາຊິກຄະນະຈັດຕັ້ງໄດ້ແບ່ງປັນກ່ຽວກັບຈຸດປະສົງຂອງການເຄື່ອນໄຫວນີ້:
“ບັນດາເດັກນ້ອຍມາເຂົ້າຮ່ວມລາຍການຈະມີຄວາມເຂົ້າໃຈຕື່ມອີກກ່ຽວກັບບັນດາຊຸດອາພອນໃນເກນອາຍຸເຍົາວະຊົນບັນດາປະເທດອາຊີຕາເວັນອອກສ່ຽງໃຕ້. ພວກນ້ອງບໍ່ພຽງແຕ່ໄດ້ຮັບຊົມລາຍການສະແດງເທົ່ານັ້ນ ຫາກຍັງໄດ້ນຸ່ງທົດລອງບັນດາຊຸດອາພອນປະຈຳຊາດ ແລະ ຖ່າຍຮູບທີ່ລະນຶກອີກດ້ວຍ ເພື່ອໃຫ້ພວກນ້ອງເຂົ້າໃຈໄດ້ວ່າ ພວກເພື່ອນໃນເກນອາຍຸນັ້ນໄດ້ນຸ່ງຊຸດອາພອນຄືແນວໃດ. ບັນດາຊຸດອາພອນທີ່ສະແດງໃນລາຍການນີ້ ສ່ວນຫລາຍແມ່ນຊຸດອາພອນທີ່ພວມເກັບມາຮັກສາໄວ້ຢູ່ ຜ່ານການໄປຄົ້ນຄ້ວາຢູ່ປະເທດຕ່າງໆ ແລະ ຊຸດອາພອນປະຈຳຊາດໃດທີ່ຫໍພິພິທະພັນຍັງບໍທັນມີແມ່ນໄດ້ຂໍຄວາມຊ່ວຍເຫລືອຈາກບັນດາສະຖານທູດບັນດາປະເທດອາຊຽນ ປະຈຳຫວຽດນາມ”
ສ່ວນຢູ່ເຂດຈັດການລະຫລິ້ນພື້ນເມືອງບັນດາປະເທດອາຊີຕາເວັນອອກສ່ຽງໃຕ້ ຄະນະຈັດຕັ້ງໄດ້ຈັດບັນດາການລະຫລິ້ນພື້ນເມືອງປະເທດຕ່າງໆຄື: ການລະຫລິ້ນໝາກຂຸມ(ໂອອັນກວານ) ຂອງຫວຽດນາມ ແລະ KonKac ຂອງມາເລເຊຍ, ການລະຫລິ້ນດຶງເຊືອກຂອງໄທ ແລະ ຫວຽດນາມ ຫລືການລະຫລິ້ນໂຕແຫລວຈັບ ລູກໄກ່ຂອງ ກຳປູເຈຍ. ເພື່ອນ Mohd QaShairi, ນັກສຶກສາ ມາເລເຊຍ ພວມຮ່ຳຮຽນຢູ່ວິທະຍາຄານການທະຫານ ໄດ້ແບ່ງປັນວ່າ:
“ຂ້າພະເຈົ້າຮູ້ສຶກດີໃຈຫລາຍເມື່ອມີໂອກາດໄດ້ແນະນຳການລະຫລິ້ນ KonKac ຂອງປະເທດຕົນ ໃຫ້ແກ່ບັນດາເພື່ອນມິດຊາວຫວຽດນາມ.ແປ້ນຫລິ້ນຂອງພວກຂ້າພະເຈົ້າເຮັດດ້ວຍໄມ້, ສ່ວນແປ້ນຫລິ້ນຂອງຫວຽດນາມເຮັດດ້ວຍເຈ້ຍ. ຄົນຫວຽດນາມ ໃຊ້ກ້ອນຫີນແຮ່ເພື່ອຫລິ້ນໝາກຂຸມ, ສ່ວນຄົນມາເລເຊຍໃຊ້ໝາກບີເພື່ອຫລິ້ນ Konkac.”
ໃນການຫລິ້ນດຶງເຊືອກຂອງໄທ, ເພື່ອນ ຫງວຽນຢູຍມີງ, ນັກສຶກສາມະຫາວິທະຍາໄລເສດຖະກິດແຫ່ງຊາດ ພ້ອມກັບເພື່ອນຂອງລາວ 2 ຄົນພວມທົດລອງການ ຫລິ້ນດຶງເຊືອກຂອງໄທ. ຮູບການການລະຫລິ້ນດຶງເຊືອກຂອງໄທແມ່ນຕ່າງກັບການລະຫລິ້ນດຶງເຊືອກຂອງຫວຽດນາມ ນັ້ນແມ່ນ 3 ຄົນຕ້ອງຢືນຢູ່ 3 ແຈ ແລະ ດຶງເຊືອກ 3 ສາຍມັດໃສ່ຢາງລົດຢູ່ໃຈກາງ. ຜູ້ໃດກໍພະຍາຍາມດຶງຢາງລົດນັ້ນມາທາງຕົນເອງ. ສຸດທ້າຍ ຫງວຽນຢູຍມີງ ແມ່ນຜູ້ຊະນະ.
“ຂ້າພະເຈົ້າຮູ້ສຶກດີໃຈຫລາຍເມື່ອມີໂອກາດເຂົ້າຮ່ວມບັນດາການລະຫລິ້ນພື້ນເມືອງພ້ອມກັບໝູ່ເພື່ອນແມ່ນຊາວຕ່າງປະເທດ. ເຖິງວ່າ ພວກເພື່ອນເວົ້າພາສາຫວຽດບໍ່ທັນໄດ້ຫລ່ຽນໄຫລກໍຕາມ ແຕ່ພວກເພື່ອນກໍພະຍາຍາມແນະນຳໃຫ້ພວກຂ້າພະເຈົ້າວິທີການລະຫລິ້ນພື້ນເມືອງຂອງປະເທດພວກເພື່ອນ. ຂ້າພະເຈົ້າຈະນຳເອົາວິທີການລະຫລິ້ນພື້ນເມືອງນີ້ເພື່ອກັບຄືນສອນໃຫ້ພວກນ້ອງຂອງຕົນ.”
ຮອດເວລາ 16 ໂມງ 30 ນາທີ, ໂທລະໂຄ່ງຂອງຫໍພິພິທະພັນໄດ້ປະກາດໃກ້ຈະອັດປະຕູແລ້ວ, ເດັກນ້ອຍຜູ້ໃດກໍຮູ້ສຶກເສຍດາຍຍ້ອນບັນຍາກາດຢູ່ທີ່ນີ້ພວມຟົດຟື້ນມ່ວນຊື່ນ. ມື້ນີ້ ຜູ້ໃດກໍໄດ້ເຂົ້າຮ່ວມບັນດາການລະຫລິ້ນທີ່ຕົນເອງມັກ. ເມື່ອຖືກຖາມ ພວກເພື່ອນລ້ວນແຕ່ປາດຖະຫນາວ່າ ຖ້າມີໂອກາດຈະກັບຄືນມາເພື່ອເຂົ້າຮ່ວມບັນດາການລະຫລິ້ນພື້ນເມືອງນີ້.