(vovworld) - ຢູ່ ຫວຽດນາມ ເຖິງວ່າ ແມ່ນຜູ້ຮັ່ງມີຫລືທຸກຍາກ, ແມ່ນລັດຖະກອນ ຫລືເຮັດອາຊີບແບບເສລີ ເມື່ອລະດູຮ້ອນວຽນມາ ທຸກຄົນກໍລ້ວນແຕ່ພະຍາຍາມຍາດເວລາພ້ອມກັບຄອບຄົວໄປທ່ອງທ່ຽວຢູ່ແຫ່ງໃດຫນຶ່ງ. ໂດຍກຳໄດ້ທ່າອ່ຽງນີ້ ບັນດາບໍລິສັດທ່ອງທ່ຽວໄດ້ສ້າງຫລາຍລາຍການທ່ອງທ່ຽວທີ່ດູດດື່ມເພື່ອດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ລາຍການທ່ອງທ່ຽວຄົ້ນຫາ 3 ພື້ນຖານວັດທະນະທຳ ປະຈຸບັນ ພວມແມ່ນຫນຶ່ງໃນບັນດາລາຍການທ່ອງທ່ຽວທີ່ດູດດື່ມໃນລະດູຮ້ອນປີນີ້ ແລະ ໄດ້ຮັບຄວາມສົນໃຈຈາກນັກທ່ອງທ່ຽວເປັນຈຳນວນຫລວງຫລາຍ.
ລາຍການທ່ອງທ່ຽວຄົ້ນຫາ 3 ພື້ນຖານວັດທະນະທຳ ແມ່ນລາຍການທ່ອງທ່ຽວສະເພາະຂອງບໍລິສັດທ່ອງທ່ຽວສາກົນ Anh Duong . ໃນເວລາ 4 ວັນ 3 ຄືນ, ນັກທ່ອງທ່ຽວຈະໄດ້ຊອກຮູ້ກ່ຽວກັບວັດທະນະທຳຂອງປະຊາຊົນຢູ່ທິດຕາເວັນຕົກພາກໃຕ້ຫວຽດນາມ, ຊາວເຜົ່າຈຳ ແລະ ຊາວຂະແມ. ເມື່ອແນະນຳກ່ຽວກັບລາຍການທ່ອງທ່ຽວດັ່ງກ່າວ, ທ່ານ Nguyen Tuan Anh ຜູ້ອຳນວຍການບໍລິສັດທ່ອງທ່ຽວ Anh Duong ໃຫ້ຮູ້ວ່າ:
“ຈຸດພົ້ນເດັ່ນທຳອິດນັ້ນແມ່ນນັກທ່ອງທ່ຽວຈະໄດ້ຢ້ຽມຢາມ ນະຄອນ ເກີນເທີ, ຢ້ຽມຊົມທັດສະນີຍະພາບຂອງເກີນເທີ, ຫລັງຈາກນັ້ນໄປ ເຈົາດົກ, ຢ້ຽມຊົມປ່າຈາຊື, ຊຶ່ງແມ່ນຫນຶ່ງໃນບັນດາປ່າຄາມທີ່ມີມາແຕ່ດົນນານ, ຕໍ່ມານັກທ່ອງທ່ຽວຍັງໄດ້ໄປຢ້ຽມຢາມຕະຫລາດນ້ຳ ເກີນເທີ. ຫລັງຈາກນັ້ນ ນັກທ່ອງທ່ຽວຈະໄດ້ຂີ່ເຮືອດ່ວນເຂົ້າ ກຳປູເຈຍ. ໄປໄຫວ້ອາໄລຢູ່ອະນຸສາວາລີນັກຮົບ ຫວຽດນາມ, ຢ້ຽມຢາມພະລາຊະວັງ, ວັດຄຳ, ວັດເງິນ, ພະລາຊະວັງຂອງຊາວຂະແມ ຊຶ່ງ ແມ່ນວັດທະນະທຳທີ່ພົ້ນເດັ່ນຂອງກຳປູເຈຍ.”
ຕະຫລາດນ້ຳ ເຈົາດົກ
ພາບ: internet
|
ຈາກນະຄອນຫລວງ ຮ່າໂນ້ຍ, ພາຍຫລັງຂີ່ຍົນເກືອບ 2 ຊົ່ວໂມງ, ນັກທ່ອງທ່ຽວຈະມາຮອດນະຄອນ ເກີນເທີ ຊຶ່ງແມ່ນຫນຶ່ງໃນບັນດາເຂດດິນແດນອຸດົມສົມບູນ ດ້ວຍທິວທັດທຳມະຊາດທີ່ສວຍງາມຫລາຍແຫ່ງ. ນະຄອນ ເກີນເທີຕັ້ງຢູ່ແຄມແມ່ນ້ຳຂອງ ດ້ວຍຄວາມຍາວ 65 ກິໂລແມດ ແລະ ໄດ້ຮັບຖືວ່າ: ແມ່ນເມືອງເອກຂອງເຂດຕາເວັນຕົກພາກໃຕ້, ຊຶ່ງແມ່ນແຫ່ງທີ່ພັດທະນາກວ່າໝູ່ຢູ່ເຂດທົ່ງພຽງແມ່ນ້ຳຂອງ. ດ້ວຍທີ່ຕັ້ງສະດວກ, ນະຄອນເກີນເທີ ແມ່ນສະຖານທີດຶງດູດນັກທ່ອງທ່ຽວທີ່ມາຈາກທົ່ວທຸກສາລະທິດຜ່ານການຢ້ຽມຢາມເຂດແມ່ນ້ຳລຳເຊ. ເກີນເທີ ມີລະບົບແມ່ນ້ຳລຳເຊຫນາແຫນ້ນ, ສວນຕົ້ນໄມ້ກິນໝາກອຸດົມສົມບຸນ, ທົ່ງນາທີ່ຂຽວອຸ່ມທຸ່ມແລະ ກວ້າງໃຫຍ່ໄພສານ ແລະ ປ່າຄາມຢູ່ແມ່ນ້ຳເຫົ້າ, ຊຶ່ງແມ່ນສາຂາຫນຶ່ງຂອງແມ່ນ້ຳຂອງ. ທ່ານ Truong Van Ngon ຜູ້ອຳນວຍການບໍລິສັດທ່ອງທ່ຽວ ເກີນເທີ ຖືວ່າ:
“ນະຄອນ ເກີນເທີ ແມ່ນເຂດທາງຜ່ານ, ຢູ່ທີ່ນີ້ ມີລາຍການທ່ອງທ່ຽວຫາດດອນ, ທ່ອງທ່ຽວລຳແມ່ນ້ຳສວນຕົ້ນໄມ້ກິນໝາກ. ນັ້ນແມ່ນບັນດາຈຸດໃຫມ່ອ່ຽມທີ່ດຶງດູດນັກທ່ອງທ່ຽວມາຢ້ຽມຢາມ ເກີນເທີ ນັບມື້ນັບຫລາຍ. ປະຈຸບັນ ໃນການທ່ອງທ່ຽວ ແມ່ນ້ຳ, ສວນຕົ້ນໄມ້ກິນໝາກ, ນອກຈາກການຂຸດຄົ້ນສວນໝາກໄມ້ແລ້ວ ຍັງມີບັນດາລາຍການທີ່ເປັນເອກະລັກສະເພາະຄື: ຫາປາ, ດຳລົງຊີວິດພ້ອມກັບຊາວທ້ອງຖິ່ນ... ເວົ້າລວມແລ້ວ ບັນດາການບໍລິການຢູ່ທີ່ນີ້ ລ້ວນແຕ່ຕິດພັນກັບແມ່ນ້ຳລຳເຊ.”
ພາຍຫລັງຢ້ຽມຢາມ ສາລາບ້ານບູຮານ Binh Thuy, ຫໍບູຊາພະແມ່ Xu, ສຸສານ Thoai Ngoc Hau, ປ່າຄາມ Tra Su, ເຂດທ່ອງທ່ຽວຊີວະພາບແລ້ວ, ນັກທ່ອງທ່ຽວຍັງໄດ້ໄປຢ້ຽມຢາມຕະຫລາດນ້ຳ ເຈົາດົກ, ຢ້ຽມຢາມໝູ່ບ້ານຊາວເຜົ່າຈຳ ເຈົາຢາງ ຫລືເອີ້ນວ່າ ໝູ່ບ້ານຈຳ ມຸດສະລິມ ເພາະວ່າ ຊາວຈຳຢູ່ທີ່ນີ້ຖືສາສະຫນາອິດສະລາມ ຊຶ່ງແມ່ນຫນຶ່ງໃນບັນດາຈຸດນັດພົບທີ່ດຶງດູດນັກທ່ອງທ່ຽວ.
ເຂົ້າຮ່ວມລາຍການທ່ອງທ່ຽວນີ້, ນອກຈາກໄດ້ໄປຢ້ຽມຊົມທັດສະນີຍະພາບແຫລາຍແຫ່ງແລ້ວ, ນັກທ່ອງທ່ຽວຍັງມີໂອກາດຄົ້ນຫາ, ຊອກຮູ້ກ່ຽວກັບ 3 ພື້ນຖານວັດທະນະທຳທີ່ເປັນເອກະລັກສະເພາະ. ຕາມທ່ານ Nguyen Tuan Anh ແລ້ວ, ນີ້ກໍແມ່ນຈຸດໝາຍຊຶ່ງ “ລາຍການທ່ອງທ່ຽວຄົ້ນຫາ 3 ພື້ນຖານວັດທະນະທຳ” ມຸ່ງໄປເຖິງ.
“ນອກຈາກພານັກທ່ອງທ່ຽວໄປຢ້ຽມຢາມທັດສະນີຍະພາບແລ້ວ, ພວກຂ້າພະເຈົ້າຍັງແນະນຳໃຫ້ນັກທ່ອງທ່ຽວມາຈາກພາກເຫນືອ ຫວຽດນາມ ບັນດາຈຸດວັດທະນະທຳຂອງເຂດແມ່ນ້ຳລຳເຊຢູ່ພາກຕາເວັນຕົກກໍ່ຄືພື້ນຖານວັດທະນະທຳ, ຊາວ ກຳປູເຈຍ ດ້ວຍບັນດາຮີດຄອງປະເພນີທີ່ແຕກຕ່າງກັບຊາວ ຫວຽດນາມ ຢູ່ພາກຕາເວັນຕົກຫລາຍ. ຊາວກຳປູເຈຍ ກໍແມ່ນຜູ້ຮັກແພງແຂກ, ເຈືອຈານກັບວົງຄະນາຍາດ, ວັດທະນະທຳຂອງຊາວ ກຳປູເຈຍ ຄ້າຍຄືກັນກັບຊາວ ກີ່ງ ຂອງຫວຽດນາມ.”
ວັດຄຳ ຢູ່ ກຳປູເຈຍ
ພາບ: internet
|
ໃນລາຍການທ່ອງທ່ຽວລະດູຮ້ອນ ປີ 2012 “ລາຍການທ່ອງທ່ຽວຄົ້ນຫາ 3 ພື້ນຖານວັດທະນະທຳ” ແມ່ນຫນຶ່ງໃນບັນດາລາຍການທີ່ມີການຮ່ວມສຳພັນຢ່າງແຫນ້ນແຟ້ນລະຫວ່າງສອງປະເທດ ຫວຽດນາມ ແລະ ກຳປູເຈຍ ໃນການພັດທະນາການທ່ອງທ່ຽວ. ທ່ານ Nguyen Tuan Anh ໃຫ້ຮູ້ຕື່ມອີກວ່າ:
“ເລື່ອງຮ່ວມສຳພັນການທ່ອງທ່ຽວນີ້, ທຳອິດແມ່ນພັດທະນາຕື່ມອີກລາຍການທ່ອງທ່ຽວຢູ່ພາກຕາເວັນຕົກ. ແຕ່ກ່ອນ ພວກຂ້າພະເຈົ້າເຄີຍຈັດລາຍການທ່ອງທ່ຽວໃຫ້ແກ່ນັກທ່ອງທ່ຽວສາກົນໄປຢ້ຽມຢາມ ກຳປູເຈຍ ແຕ່ສຳລັບນັກທ່ອງທ່ຽວພາຍໃນປະເທດ ເປັນຕົ້ນແມ່ນນັກທ່ອງທ່ຽວມາຈາກພາກເຫນືອແມ່ນບໍ່ທັນໄດ້ໄປເທື່ອ. ສ່ວນຫລາຍເຂົາເຈົ້າໄປຢ້ຽມຢາມ ກຳປຸູເຈຍ ດ້ວຍທາງບົກຜ່ານດ່ານຊາຍແດນ Tay Ninh. ຂ້າພະເຈົ້າຄິດວ່າ ການຮ່ວມສຳພັນລະຫວ່າງ ຫວຽດນາມ ແລະ ກຳປູເຈຍ ໃນການພັດທະນາການທ່ອງທ່ຽວ ແມ່ນການຮ່ວມມືທີ່ດີທີ່ສຸດເພື່ອໃຫ້ ກຳປູເຈຍ ແລະ ບັນດາບໍລິສັດທ່ອງທ່ຽວ ຫວຽດນາມ ພັດທະນາການທ່ອງທ່ຽວຢູ່ທິດຕາເວັນຕົກພາກໃຕ້.”
ລາຍການທ່ອງທ່ຽວລະດູຮ້ອນຄົ້ນຫາ 3 ພື້ນຖານວັດທະນະທຳ ໄດ້ເຊື່ອມຕໍ່ ບັນດາຈຸດນັດພົບຢ່າງກົມກຽວ, ສ້າງເງື່ອນໄຂເພື່ອໃຫ້ນັກທ່ອງທ່ຽວຄົ້ນຫາຈຸດໃຫມ່ອ່ຽມໃນແຕ່ລະແຫ່ງ. ລາຍການທ່ອງທ່ຽວນີ້ແມ່ນກາລະໂອກາດເພື່ອໃຫ້ບັນດານັກທ່ອງທ່ຽວ ຫວຽດນາມ ຊອກຮູ້ວັດທະນະທຳຂອງຊາວເຜົ່າ ຂະແມ, ເພີ່ມທະວີການເຊື່ອມໂຍງເພື່ອມຸ່ງໄປເຖິງຈຸດໝາຍສ້າງປະຊາຄົມ ອາຊຽນ ໃນປີ 2015.