(vovworld)- “ຜູ້ບ່າວທີ່ອົງອາດກູ້ຊີບລາຊະທິດາ”, “ການຕໍ່ສູ້ລະຫວ່າງຜູ້ໃຈດີ ແລະ ຜູ້ໃຈຮ້າຍ”, “ເລື່ອງລາວກ່ຽວກັບນາງ Stick”…. ແມ່ນບັນດາລາຍການຟ້ອນຕຸກກະຕາ ທີ່ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ເດັກນ້ອຍຫວຽດນາມ. ນີ້ແມ່ນລາຍການທີ່ດີເດັ່ນຂອງກອງສິລະປະກອນອິນໂດເນເຊຍ ແລະ ຟິລີບປີນ ໃນຈຳນວນກວ່າ 10 ລາຍການສິລະປະຖືກນຳມາສະແດງໃນງານມະໂຫລານຟ້ອນຕຸກກະຕາ ອາຊີຕາເວັນອອກສ່ຽງໃຕ້ ທີ່ຫາກໍດຳເນີນຢູ່ ຮ່າໂນ້ຍ.
ລາຍການສະແດງຕຸກກະຕານ້ຳຂອງຫວຽດນາມ
ພາບ:internet
|
ໃນໂຮງລະຄອນຕຸກກະຕາຫວຽດນາມ ມີກວ່າ 100 ຕັ່ງ ແມ່ນຜູ້ຊົມນັ່ງເຕັມໝົດ, ໃນນັ້ນ 2/3 ແມ່ນເດັກນ້ອຍ. ເມື່ອສຽງດົນຕີດັ່ງຂຶ້ນ ແລະ ຜ້າກັ້ງຄ່ອຍໆເປີດອອກ, ກໍ່ປະກົດມີຕົວລະຄອນ 5 ຄົນ, ໃນນັ້ນມີ 4 ຄົນແມ່ນນຸ່ງຊຸດອາພອນຊັ້ນເຈົ້າຂຸນມຸນນາຍໃນສະໄໝກ່ອນ ດ້ວຍສີເຫລືອງທີ່ເຫຼື້ອມແວວວາວ ນັ້ນແມ່ນເຈົ້າຊີວິດ, ພະລາຊີນີ, ລາຊະທິດາ ແລະ ຜູ້ບ່າວທີ່ອົງອາດ. ສ່ວນຕົວລະຄອນຍັກແມ່ນນຸ່ງຊຸດສີເຫລືອງປະສົມກັບສີແດງ ດ້ວຍໜວດເຄົາ ແລະ ຜົມດຳຍາວຮອດແອວ. ນີ້ແມ່ນເລື່ອງລາວກ່ຽວກັບຜູ້ບ່າວທີ່ອົງອາດກ້າຫານໄດ້ຕີຊະນະຍັກເພື່ອກູ້ເອົາລາຊະທິດາ ແລະ ໄດ້ຮັບຄວາມຮັກຈາກນາງ.
ລາຍການທີສອງຂອງກອງສິລະປະກອນ ອິນໂດເນເຊຍ ໂດຍນັກສິລະປິນສະແດງ. ດ້ວຍຊຸດສີແດງເປັນສັນຍາລັກໃຫ້ຜູ້ໃຈຮ້າຍ ແລະ ສີຂາວເປັນສັນຍາລັກໃຫ້ຜູ້ໃຈດີ, ຕົວລະຄອນສອງຄົນນີ້ໄດ້ຕີກັນຢ່າງດຸເດືອດ ແຕ່ສຸດທ້າຍໄຊຊະນະແມ່ນຂຶ້ນກັບຜູ້ໃຈດີ. 2 ລາຍການດັ່ງກ່າວລ້ວນແຕ່ອີງໃສ່ເລື່ອງນິທານ ແລະ ເຮັດໃຫ້ເດັກກນ້ອຍນິຍົມທີ່ສຸດ. ຫລານ ເຈີນທາຍລາມ, ຢູ່ໂຮງຮຽນປະຖົມ ດີ້ງກົງເວົ້າວ່າ:
“ຫລານນິຍົມບັນດາເລື່ອງລາວຄືແນວນີ້. ລາຊະທິດາງາມຫລາຍ ສ່ວນຜູ້ບ່າວທີ່ອົງອາດໄດ້ກູ້ຊີບລາຊະທິດາແມ່ນກ້າຫານທີ່ສຸດ. ສ່ວນຕົວລະຄອນຍັກເປັນຫນ້າຢ້ານກົວທີ່ສຸດ. ຜ່ານຕົວລະຄອນນີ້ ຫລານຖອດຖອນໄດ້ບົດຮຽນທີ່ວ່າ ຍາມໃດຕົນເອງຕ້ອງມີຄວາມອົງອາດກ້າຫານເພື່ອປົກປ້ອງຜູ້ອ່ອນກວ່າຕົນເອງ. ຜູ້ໃຈດີຍາມໃດກໍເອົາຊະນະຜູ້ໃຈຊົ່ວຮ້າຍ.”
ຕ່າງກັບບັນຍາກາດມິດງຽບຂອງບັນດາລາຍການສະແດງກ່ອນນັ້ນ, ລາຍການສະແດງຂອງກອງສິລະປະກອນ ຟິລີບປີນທີ່ມີຫົວຂໍ້ວ່າ:ນາງStick ພັດຟົດຟື້ນ ທີ່ສຸດ. ຕົວລະຄອນຖືກຕິດອຸປະກອນກະຈາຍແສງໃສ່ໂຕ ເປັນຮູບຄົນດ້ວຍຫົວ ແລະ ຕີນມື. ນາງ Stick ພຽງແຕ່ຢືນຢູ່ແບບມິດງຽບເທົ່ານັ້ນ ແຕ່ໃນມື້ຫນຶ່ງ ເທວະດາແມງກະເບື້ອໄດ້ດົນບັນດານໃຫ້ນາງສາມາດໄປມາຄືຄົນໄດ້. ແຕ່ນາງພັດຢາກໄດ້ຫຼາຍກວ່ານັ້ນ, ນາງຢາກບິນຄືແມງກະເບື້ອ. ອັນໄດ້ເຮັດໃຫ້ເທວະດາແມງກະເບື້ອງອຸກໃຈຕໍ່ຄວາມມັກໃຫຍ່ໄຝ່ສູງຂອງນາງ ຈຶ່ງຖອນເອົາເວດມົນຄືນ ແລະ ນາງຕ້ອງກັບຄືນຊາຕາເປັນໄມ້ເທົ້າຄືເກົ່າ.
ທ່ານນາງ ພັນນາລີ ເທບພະວົງສາ, ຫົວຫນ້າກອງສິລະປະກອນລາວ ໃຫ້ຮູ້ວ່າ:
ສຽງທ່ານນາງ ພັນນາລີ
ໂດຍນິຍົມກັບລາຍການສະແດງທີ່ເຕັມໄປດ້ວຍຄວາມໝາຍນັ້ນ, ເອື້ອຍຮ່ວາງທູຢາງ ຢູ່ເມືອງ ແທງຊວນ ຮ່າໂນ້ຍ ແມ່ນໜຶ່ງໃນຈຳນວນຜູ້ທີ່ໄດ້ລຸກຂຶ້ນຕົບມືຊົມເຊີຍຢ່າງສຸດຈິດສຸດໃຈ ເມື່ອລາຍການສິລະປະກ່ຽວກັບນາງ Stick ອັດລົງ. ເອື້ອຍຮວ່າງທູຢາງ ແບ່ງປັນວ່າ:
“ເຮັດວຽກອິດເມື່ອຍຕະຫຼອດມື້, ແຕ່ໄດ້ຮັບຊົມບັນດາລາຍການສິລະປະທັງມ່ວນ, ຟົດຟື້ນ, ທັງມີລັກສະນະສຶກສາຄືແນວນີ້ແມ່ນຮູ້ສຶກສະບາຍໃຈທີ່ສຸດ. ຜ່ານນີ້ ກໍຖອດຖອນໄດ້ບົດຮຽນເພື່ອສຶກສາໃຫ້ພວກລູກ. ”
ພາຍຫລັງໄດ້ຮັບຊົມລາຍການສະແດງເປັນເວລາ 2 ຊົ່ວໂມງ, ພວກຫລານນ້ອຍຫວຽດນາມ ຍັງມີໂອກາດໄດ້ຖ່າຍຮູບພ້ອມກັບບັນດານັກສິລະປິນທີ່ຕົນເອງນິຍົມອີກ. ພວກຫລານລ້ວນແຕ່ຮູ້ສຶກດີໃຈຫຼາຍ ແລະ ຫວັງວ່າ, ປີ 2016 ຫວຽດນາມ ຈະສືບຕໍ່ເປັນເຈົ້າພາບຈັດຕັ້ງງານມະໂຫລານຟ້ອນຕຸກກະຕາຄືແນວນີ້ ເພື່ອໃຫ້ພວກນ້ອງໄດ້ຮັບຊົມບັນດາລາຍການຟ້ອນຕຸກກະຕາໃຫມ່ ທີດູດດື່ມ ແລະມີຄວາມໝາຍເລິກເຊິ່ງອີກ.