(vovworld)- ຍັງອີກສອງສາມອາທິດຈະກ້າວເຂົ້າສູ່ປີ 2016, ແມ່ນປີທີ 19 ສປປ ລາວ ເຂົ້າເປັນສະມາຊິກ ອາຊຽນ ຢ່າງເປັນທາງການ . ປີ 2016 ແມ່ນປີທຳອິດທີ່ປະຊາຄົມ ອາຊຽນໄດ້ຮັບການສ້າງຕັ້ງ. ໃນຖານະເປັນປະທານອາຊຽນ, ລາວ ຈະພ້ອມກັບບັນດາປະເທດສະມາຊິກ ອາຊຽນ ປະຕິບັດວິໄສທັດ ແລະ ແຜນການຂອງ ອາຊຽນ ຫລັງປີ 2015. ໃນລາຍການຊາຍຄາອາຊຽນພາກນີ້ ພວກເຮົາຂໍແນະນຳບົດທີ່ມີຫົວຂໍ້ວ່າ: ລາວ ກຽມພ້ອມ ຮັບຕຳແຫນ່ງປະທານ ອາຊຽນ 2016.
.jpg)
(ທ່ານ ອະລຸນແກ້ວ ກິດຕິຄຸນ,
ລັດຖະມົນຕີຊ່ວຍວ່າການກະຊວງການຕ່າງປະເທດ ລາວ)
ວັນທີ 23/7/1997, ທີ່ກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 28 ດຳເນີນໄປຢູ່ ມາເລເຊຍ, ສປປ ລາວ ໄດ້ກາຍເປັນສະມາຊິກ ອາຊຽນ ຢ່າງເປັນທາງການ. ສິ່ງດັ່ງກ່າວໄດ້ພິສູດໃຫ້ເຫັນນະໂຍບາຍການຕ່າງປະເທດຂອງລາວ ນັ້ນແມ່ນສັນຕິພາບ, ເປີດກວ້າງການຮ່ວມມື ແລະ ມິດຕະພາບ ກັບທຸກປະເທດໃນໂລກ, ພິເສດ ກັບບັນດາປະເທດບ້ານໃກ້ເຮືອນຄຽງໃນພາກພື້ນ. ທ່ານ ອະລຸນແກ້ວ ກິດຕິຄຸນ, ລັດຖະມົນຕີຊ່ວຍວ່າການກະຊວງການຕ່າງປະເທດ ລາວ ຖືວ່າ: 18 ປີເຂົ້າເປັນສະມາຊິກ ອາຊຽນ, ລາວ ໄດ້ມີການປະກອບສ່ວນຢ່າງຕັ້ງຫນ້າຫລາຍຢ່າງໃຫ້ແກ່ ອາຊຽນ, ທີ່ຕັ້ງບົດບາດຂອງລາວ ໃນພາກພື້ນ ແລະ ໃນເວທີສາກົນ ກໍໄດ້ຮັບການຍົກສູງຂຶ້ນ.
“ໃນໄລຍະໂລກາພິວັດຄືປະຈຸບັນ, ທຸກປະເທດ, ທຸກທະວີບຕ້ອງເຂົ້າຮ່ວມກຸ່ມຮ່ວມມືໃດຫນຶ່ງ. ສະນັ້ນ ປະເທດລາວ ກໍເຊັ່ນດຽວກັນ. ເລື່ອງເຂົ້າເປັນສະມາຊິກ ອາຊຽນ ກໍໄດ້ປະກອບສ່ວນຍົກສູງທີ່ຕັ້ງບົດບາດຂອງ ລາວ ບໍ່ພຽງແຕ່ໃນພາກພື້ນ ເທົ່ານັ້ນ ຫາກໃນເວທີສາກົນອີກດ້ວຍ. ພວກເຮົາໄດ້ຮູ້ນຳກັນແລ້ວວ່າ ອາຊຽນ ມີ 10 ປະເທດຄູ່ຮ່ວມມື ຄູ່ເຈລະຈາ. ຜ່ານເວທີປາໄສ ອາຊຽນ ເປີດກວ້າງ, ທີ່ຕັ້ງບົດບາດຂອງ ລາວ ໄດ້ຍົກສູງຂຶ້ນ. ພວກຂ້າພະເຈົ້າມີການຮ່ວມມືຫລາຍຝ່າຍກັບບັນດາປະເທດຕື່ມອີກ ບໍ່ພຽງແຕ່ໃນການຮ່ວມມືດ້ານການເມືອງເທົ່ານັ້ນ ຫາກນັບທັງດ້ານເສດຖະກິດ ແລະສັງຄົມອີກດ້ວຍ.”
ພາຍຫລັງ 18 ປີເຂົ້າເປັນສະມາຊິກ ອາຊຽນ, ປະຈຸບັນ ສປປ ລາວ ມີສະຖຽນລະພາບດ້ານການເມືອງ, ການປ້ອງກັນຊາດປ້ອງກັນຄວາມສະຫງົບ, ຮັບປະກັນຄວາມເປັນລະບຽບຮຽບຮ້ອຍທາງສັງຄົມ, ເສດຖະກິດເຕີບໂຕຢ່າງລຽນຕິດ, ຊີວິດທາງດ້ານວັດຖຸ ແລະ ຈິດໃຈ, ວັດທະນະທຳ ຂອງປະຊາຊົນ ນັບມື້ນັບໄດ້ຮັບການປັບປຸງ. ທ່ານ ອະລຸນແກ້ວ ກິດຕິຄຸນ, ລັດຖະມົນຕີຊ່ວຍວ່າການກະຊວງການຕ່າງປະເທດ ລາວແບ່ງປັນວ່າ:
“ນັບແຕ່ເດືອນ 1/2016, ລາວ ຈະຮັບຕຳແຫນ່ງເປັນປະທານໝູນວຽນ ອາຊຽນ ແລະ ພວກຂ້າພະເຈົ້າຈະຜັນຂະຫຍາຍວິໄສທັດ ອາຊຽນ ໃນທົດສະວັດຈະມາເຖິງ ແລະ ນັບທັງແຜນການປະຕິບັດວິໄສທັດ 3 ເສົາຄ້ຳ. ມີທ່າໄດ້ປຽບ ນັ້ນແມ່ນ ອາຊຽນ ມີຈຸດທີ່ເປັນເອກະລັກສະເພາະພິເສດ ແລະ ມີທິດທາງສະເພາະຂອງຕົນ. ອາຊຽນ ບໍ່ຄືກັນກັບ ພັນທະມິດ ເອີລົບ ກໍບໍ່ຄື ສປຊ. ຫາກອາຊຽນ ຄືດັ່ງຄອບຄົວດຽວ.”
.jpg)
(ທ່ານ ພົງສະຫວັນ ສີສຸລາດ, ຫົວຫນ້າກົມອາຊຽນ,
ກະຊວງການຕ່າງປະເທດລາວ)
ປີ 2016 ແມ່ນປີສຳຄັນສຳລັບ ອາຊຽນ, ເປັນຕົ້ນໃນສະພາບປະຊາຄົມອາຊຽນ ຈະໄດ້ຮັບການສ້າງຕັ້ງໃນທ້າຍປີນີ້, ນຳ ອາຊຽນ ກາຍເປັນ ເຂດສັນຕິພາບ ແລະ ສະຖຽນລະພາບ, ແມ່ນເຂດເສດຖະກິດໃຫຍ່ອັນດັບ 7 ຂອງໂລກ. ພ້ອມກັບບັນດາປະເທດໃນພາກພື້ນ, ລາວ ໄດ້ມີການກະກຽມຢ່າງລອບຄອບຖິ່ຖ້ວນ, ຕາມນັ້ນແລ້ວ ລາວໄດ້ສ້າງຕັ້ງ 13 ອະນຸກຳມະການ ພາຍໃຕ້ການຊີ້ນຳໂດຍກົງຂອງທ່ານ ທອງລຸນ ສີສຸລິດ, ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດ ລາວ ແລະ ພາຍໃຕ້ການຊີ້ນຳຂອງທ່ານນາຍົກລັດຖະມົນຕີ ລາວ ທອງສິງ ທຳມະວົງ. ແຕ່ລະອະນຸກຳມະການຖືກແບ່ງປັນຫລາຍພາກສ່ວນ ຮັບຜິດຊອບແຕ່ລະຂັ້ນຕອນ, ແຕ່ລະວຽກງານຢ່າງລະອຽດ. ວຽກງານບຳລຸງສ້າງບຸກຄະລາກອນ, ບົດຮຽນການເຈລະຈາ, ການແປພາສາ, ເອກະສານ, ພື້ນຖານໂຄງລ່າງ, ຮັບປະກັນຄວາມປອດໄພໃຫ້ແກ່ການຈັດຕັ້ງບັນດາເຫດການໃນປີ ລາວເປັນປະທານໝູນວຽນ ອາຊຽນ ກໍໄດ້ສຳເລັດແລ້ວ. ບັນດາການໃຫ້ບຸລິມະສິດຂອງລາວ ເມື່ອຮັບຕຳແຫນ່ງປະທານ ອາຊຽນ ໃນປີ 2016, ນັ້ນແມ່ນ ລາວ ຈະເອົາໃຈໃສ່ບັນດາຂົງເຂດຮ່ວມມືໃນ 3 ເສົາຄ້ຳຕົ້ນຕໍຂອງ ອາຊຽນ. ຕາມທ່ານ ພົງສະຫວັນ ສີສຸລາດ, ຫົວຫນ້າກົມອາຊຽນ, ກະຊວງການຕ່າງປະເທດລາວ ໃຫ້ຮູ້ວ່າ:
(ສຽງທ່ານ ພົງສະຫວັນ)
ໃນເສົາຄ້ຳ ວັດທະນະທຳ ສັງຄົມ ຂອງອາຊຽນ, ລາວ ກໍໃຫ້ບຸລິມະສິດ 2 ຢ່າງ ເພື່ອໃຫ້ ອາຊຽນ ປະຕິບັດໃນປີ 2016 ນັ້ນແມ່ນ: ທີຫນຶ່ງ ເອົາໃຈໃສ່ເຖິງເລື່ອງສ້າງວຽກເຮັດງານທຳໃຫ້ແກ່ແມ່ຍິງ. ທີສອງ ສຸມໃສ່ວຽກງານອະນຸລັກຮັກສາ ແລະ ເສີມຂະຫຍາຍມໍລະດົກຂອງ ອາຊຽນ.
ການສ້າງ ປະຊາຄົມ ອາຊຽນ “ຫລາຍຮູບຫລາຍແບບ ແຕ່ພັດເປັນເອກະພາບ” ແມ່ນຈຸດໝາຍລວມຂອງ ອາຊຽນ. ນີ້ກໍແມ່ນຈຸດໝາຍມຸ່ງໄປເຖິງຂອງລາວ ໃນປີ 2016 ໃນຖານະເປັນປະທານ ອາຊຽນ ແລະ ມີຄວາມເຊື່ອໝັ້ນດ້ວຍຕົນເອງຈະສຳເລັດບົດບາດດັ່ງກ່າວເປັນຢ່າງດີ.