(vovworld)- “ວັນບຸນວັດທະນະທຳເພື່ອສັນຕິພາບ” ດຳເນີນໄປຢູ່ນະຄອນຫລວງ ຮ່າໂນ້ຍ ຫວ່າງແລ້ວນີ້ ແມ່ນການເຄື່ອນໄຫວສຸດທ້າຍໃນບັນດາເຫດການສະເຫລີມສະຫລອງ 60 ປີແຫ່ງວັນປົດປ່ອຍນະຄອນຫລວງຮ່າໂນ້ຍ, 15 ປີແຫ່ງວັນນະຄອນຫລວງ ຮ່າໂນ້ຍ ໄດ້ຮັບການເຊີດຊູຈາກ UNESCO ວ່າ ແມ່ນນະຄອນເພື່ອສັນຕິພາບ. ສານຂອງວັນບຸນດັ່ງກ່າວແມ່ນ “ສາກົນຍາມໃດກໍ່ຮ່ວມກັບຫວຽດນາມ ສ້າງພື້ນຖານສັນຕິພາບໃນທົ່ວໂລກ, ໃນນັ້ນ ອາຊຽນ ແມ່ນພື້ນຖານອັນໝັ້ນຄົງເພື່ອສ້າງທ່ວງທ່າໃຫ້ຫວຽດນາມ ເປັນເພື່ອນມິດກັບທຸກປະເທດ. ມີການເຄື່ອນໄຫວຫລາຍຢ່າງດຳເນີນໄປໃນໂອກາດນີ້, ໃນນັ້ນ ມີຮ້ານວາງສະແດງຂອງສະຖານທູດຕ່າງປະເທດຈຳນວນຫນຶ່ງປະຈຳ ຮ່າໂນ້ຍ.
ຮ້ານວາງສະແດງຂອງສະຖານທູດລາວປະຈຳຮ່າໂນ້ຍ
ພາບ:vov
|
ສະຖານທູດ 12 ປະເທດ ປະຈຳຫວຽດນາມ, ໃນນັ້ນ ມີສະຖານທູດບາງປະເທດອາຊຽນຄື: ລາວ, ກຳປູເຈຍ, ໄທ, Timor Leste, ນອກນັ້ນຍັງມີສະຖານທູດລັດເຊຍ, ກູບາ, ປາແລດສະຕີນ… ພ້ອມກັນເຂົ້າຮ່ວມວັນບຸນດັ່ງກ່າວ ດ້ວຍບັນດາຮ້ານວາງສະແດງວັດທະນະທຳທີ່ເປັນເອກະລັກສະເພາະຂອງແຕ່ລະປະເທດ. ຕາມທ່ານນາງ ຫງວຽນກີມເຮືອງ, ພະນັກງານສະຫະພັນບັນດາອົງການຈັດຕັ້ງມິດຕະພາບນະຄອນ ຮ່າໂນ້ຍ ແລ້ວ, ງານວາງສະແດງແນະນຳໃຫ້ຊາວນະຄອນຫລວງຮ່າໂນ້ຍ ເຂົ້າໃຈກ່ຽວກັບວັດທະນະທຳ ແລະ ການພັດທະນາຂອງບັນດາປະເທດໃນໂລກ, ພິເສດ ແມ່ນບັນດາປະເທດ ອາຊຽນ. ວັດທະນະທຳຂອງບັນດາປະເທດອາຊຽນ ມີຫລາຍຈຸດທີ່ຄ້າຍຄືກັນ ອັນໄດ້ສ້າງຄວາມສະດວກໃນການພົວພັນແລກປ່ຽນວັດທະນະທຳກໍຄືເພີ່ມທະວີຄວາມສາມັກຄີມິດຕະພາບລະຫວ່າງບັນດາປະເທດ.
“ຮ້ານວາງສະແດງຂອງ ສະຖານທູດ 12 ປະເທດ ແມ່ນແນໃສ່ໂຄສະນາວັດທະນະທຳ, ບັນດາຜະລິດຕະພັນສິລະປະຫັດຖະກຳ, ອາພອນພື້ນເມືອງກໍຄືແນະນຳພາບພົດປະເທດຊາດ ແລະ ປະຊາຊົນບາງປະເທດອາຊຽນ, ເອີລົບ, ອາເມລິກາລາຕີນ.”
.jpg)
ຜູ້ຊົມຖ່າຍຮູບກັບຄູ່ບາວສາວນຸຸ່ງອາພອນພື້ນເມືອງ
ຂອງ Timor Leste
ພາບ:vov
|
ຮ້ານວາງສະແດງຂອງສະຖານທູດ Timor Leste ແມ່ນຮ້ານທຳອິດຊື່ງຜູ້ຊົມສາມາດແວ່ຢາມ. ບັນດາຜະລິດຕະພັນນຳມາວາງສະແດງໃນຮ້ານນີ້ ແມ່ນແຜ່ນແພພື້ນເມືອງດ້ວຍສີສັນຫລາກຫລາຍ ພ້ອມກັບບັນດາຮູບພາບ, ໃບໂຄສະນາແນະນຳຂະແຫນງທ່ອງທ່ຽວຂອງປະເທດນີ້. ຜູ້ຊົມຮູ້ສຶກປະທັບໃຈທີ່ສຸດ ແມ່ນຮູບພາບຂອງຄູບ່າວສາວ Timor Leste ນຸ່ງຊຸດອາພອນພື້ນເມືອງທີ່ເປັນເອກະລັກສະເພາະ. ທ່ານ Agusing Preter, ເລຂາທີ່ຫນຶ່ງສະຖານທູດ Timor Leste ປະຈຳຮ່າໂນ້ຍ ໃຫ້ຮູ້ວ່າ: ນີ້ແມ່ນໂອກາດດີທີ່ສຸດເພື່ອແນະນຳປະເທດຊາດ ແລະ ຊາວ Timor Leste ຢ່າງກວ້າງຂວາງເຖິງຜູ້ຊົມ, ພິເສດແມ່ນຊາວນະຄອນຫລວງ ຮ່າໂນ້ຍ.
“ປະເທດພວກຂ້າພະເຈົ້າແມ່ນປະເທດມີພື້ນຖານວັດທະນະທຳເປັນຫລາຍຮູບຫລາຍແບບ, ພວກຂ້າພະເຈົ້າຢາກແນະນຳໃຫ້ເພື່ອນມິດບັນດາຈຸດທີ່ເປັນເອກະລັກສະເພາະໃນພື້ນຖານວັດທະນະທຳຂອງ Timor Leste.”
ຕໍ່ຈາກຮ້ານວາງສະແດງຂອງສະຖານທູດ Timor Leste ແມ່ນຮ້ານວາງສະແດງຂອງສະຖານທູດລາວ. ມາຢ້ຽມຢາມຮ້ານວາງສະແດງນີ້ ຜູ້ຊົມບໍ່ພຽງແຕ່ໄດ້ຮັບຊົມບັນດາຜະລິດຕະພັນສິລະປະພື້ນເມືອງເຮັດດ້ວຍເງິນທີ່ລະອຽດລະອໍເທົ່ານັ້ນ ຫາກຍັງໄດ້ຮັບຊົມບັນດາຮູບພາບກ່ຽວກັບທິວທັດທຳມະຊາດທີ່ສວຍງາມຂອງປະເທດລາວ, ໄດ້ດື່ມຈອກກາເຟຫລືຈອກເບຍລາວ ໂດຍສາວລາວໃນຊຸດອາພອນພື້ນເມືອງເຊື້ອເຊີນອີກດ້ວຍ. ທ່ານນາງ ທອງມີ, ທີ່ປຶກສາດ້ານວັດທະນະທຳການສຶກສາ ສະຖານທູດລາວ ປະຈຳຫວຽດນາມ ແບ່ງປັນວ່າ:
ສຽງທ່ານນາງ ທອງມີ
ບັນດາຮ້ານວາງສະແດງຂອງສະຖານທູດປະເທດຕ່າງໆ ໄດ້ນຳມາໃຫ້ຜູ້ຊົມຄວາມຮູ້ສຶກແຕກຕ່າງກັນ, ເຂົາເຈົ້າມານີ້ ເພື່ອຊອກຮູ້ກ່ຽວກັບຊຸດອາພອນພື້ນເມືອງຂອງປະເທດຕ່າງໆໃນອາຊຽນ, ໄດ້ຮັບຊົມບັນດາຜະລິດຕະພັນສິລະປະຫັດຖະກຳ ແລະ ໄດ້ຮັບປະທານເຍື່ອງອາຫານທີ່ເປັນເອກະລັກສະເພາະຂອງປະເທດຕ່າງໆ.. ເພື່ອນ ຫວູດີງຮຽວ, ນັກສຶກສາປີທີ 1 ສະຖາບັນການເມືອງການປົກຄອງແຫ່ງຊາດໃຫ້ຮູ້ວ່າ:
“ງານວາງສະແດງໄດ້ຊ່ວຍໃຫ້ນ້ອງເຂົ້າໃຈຕື່ມອີກກ່ຽວກັບພື້ນຖານວັດທະນະທຳຂອງຫລາຍປະເທດ, ເປັນຕົ້ນແມ່ນວັດທະນະທຳບັນດາປະເທດ ອາຊຽນ. ນ້ອງເຫັນວ່າ ວັດທະນະທຳຂອງບັນດາປະເທດ ອາຊຽນ ມີຫລາຍຈຸດຄ້າຍຄືກັນກັບຫວຽດນາມ ແລະ ນອກນັ້ນ ກໍມີຈຸດແຕກຕ່າງກັນ ນ້ອງສາມາດເຂົ້າໃຈໄດ້ຜ່ານບັນດາຮູບພາບ, ບັນດາເຍື່ອງອາຫານຊື່ງເຂົາເຈົ້ານຳມາໃຫ້. ພິເສດບັນດາບົດເພງຂອງລາວ ແລະ ໄທໄດ້ສ້າງຄວາມປະທັບໃຈທີ່ສຸດ.”
ໃນຂອບເຂດວັນບຸນ, ຄະນະກຳມະການປະຊາຊົນນະຄອນ ຮ່າໂນ້ຍ ໄດ້ເຊີດຊູ ແລະ ມອບນາມມະຍົດ “ພົນລະເມືອງກິຕິມະສັກນະຄອນຫລວງ ຮ່າໂນ້ຍ” ໃຫ້ແກ່ແຂກຕ່າງປະເທດ 12 ທ່ານ ຍ້ອນມີການປະກອບສ່ວນໃຫ້ແກ່ກິດຈະການສ້າງສານະຄອນຫລວງ. ທ່ານພີມມະສອນ ເລືອງຄຳມາ, ກຳມະການຄະນະບໍລິຫານງານສູນກາງພັກປະຊາຊົນປະຕິວັດລາວ, ເລຂາຄະນະພັກແຂວງ ຫລວງນ້ຳທ່າ ເປັນກຽດໄດ້ຮັບນາມມະຍົດດັ່ງກ່າວ.