(vovworld)- ປະຊາຄົມເສດຖະກິດ ອາຊຽນ ໄດ້ຮັບການສ້າງຕັ້ງຢ່າງເປັນທາງການໃນທ້າຍປີ 2015. ເຂົ້າຮ່ວມຕະຫລາດລວມນຳມາເຊິ່ງກາລະໂອກາດຫລາຍຢ່າງ ແຕ່ສິ່ງທ້າທາຍບໍ່ແມ່ນຫນ້ອຍສຳລັບບັນດາວິສາຫະກິດໃນພາກພື້ນ, ໃນນັ້ນ ມີຫວຽດນາມ.
ຜົນປະໂຫຍດໃຫຍ່ສຸດສຳລັບບັນດາວິສາຫະກິດຂາອອກຂາເຂົ້າເມື່ອເຂົ້າຮ່ວມຕະຫລາດລວມ ອາຊຽນ ນັ້ນແມ່ນ ຄ່າທຳນຽມ, ພາສີຂອງຫລາຍປະເພດສິນຄ້າແມ່ນຢູ່ໃນລະດັບ 0%. ນີ້ແມ່ນກຳລັງຫນູນເພື່ອໃຫ້ບັນດາວິສາຫະກິດຫວຽດນາມ ຊອກຫາການຮ່ວມມືພາຍໃນກຸ່ມ. ຄຽງຄູ່ກັນນັ້ນ, ຂັ້ນຕອນແກ້ໄຂບັນດາລະບຽບການບໍລິຫານກໍມີຄວາມສະດວກກວ່າ ຍ້ອນໄດ້ຮັບການຫນູນຊ່ວຍຈາກລັດຖະບານ ດ້ວຍບັນດາກົນໄກລວມໄດ້ຮັບການຮັບຮູ້ຈາກທຸກປະເທດສະມາຊິກ ອາຊຽນ . ດຣ ຫງວຽນແອງທູ, ຮອງອະທິການບໍດີ ມະຫາວິທະຍາໄລເສດຖະກິດ, ມະຫາວິທະຍາໄລແຫ່ງຊາດ ຮ່າໂນ້ຍ ໃຫ້ຮູ້ວ່າ:
“ພວກເຮົາໄດ້ມີຂໍ້ຕົກລົງຮັບຮູ້ເຊິ່ງກັນ ແລະກັນ ລະຫວ່າງບັນດາປະເທດ ອາຊຽນ, ແຕ່ ບັນດາປະເທດ ຕ້ອງມີໃບຢັ້ງຢືນຄ້າຍຄືກັນອີກ. ຂ້າພະເຈົ້າຄິດວ່າ ນັ້ນແມ່ນວິວັດການບໍ່ແມ່ນໄລຍະສັ້ນ ອາດຈະແມ່ນສອງສາມປີ. ສິ່ງດັ່ງກ່າວຈະຊ່ວຍໃຫ້ບັນດາວິສາຫະກິດວາງອອກທິດທາງພັດທະນາໃນອະນາຄົດ.”
ເຂົ້າຮ່ວມປະຊາຄົມເສດຖະກິດ ອາຊຽນ ໝາຍຄວາມວ່າ ບັນດາວິສາຫະກິດຫວຽດນາມ ຕ້ອງມານະພະຍາຍາມແກ້ງແຍ້ງກັບບັນດາວິສາຫະກິດພາຍໃນພາກພື້ນ. ສິ່ງດັ່ງກ່າວໄດ້ວາງອອກສິ່ງທ້າທາຍບໍ່ແມ່ນຫນ້ອຍສຳລັບບັນດາວິສາຫະກິດຫວຽດນາມປະຈຸບັນຍັງຫນຸ່ມແຫນ້ນ, ບໍ່ທັນມີບົດຮຽນຫລາຍ. ຕາມທ່ານ ຫງວຽນເຊີນ, ຮອງຫົວຫນ້າຫ້ອງການຄະນະຊີ້ນຳລະຫວ່າງຂະແຫນງກ່ຽວກັບການເຊື່ອມໂຍງເຂົ້າກັບເສດຖະກິດໂລກ, ກະຊວງອຸດສາຫະກຳ ແລະ ການຄ້າຫວຽດນາມ ແລ້ວ, ເພື່ອຕອບສະຫນອງບັນດາຄວາມຮຽກຮ້ອງຕ້ອງການໃນຕະຫລາດເຊື່ອມໂຍງ, ກຳລັງແຮງຂອງວິສາຫະກິດເອງ ແມ່ນປັດໄຈຫລັກແຫລ່ງຕັດສິນຜົນສຳເລັດຫລືການປະລາໄຊໃນວິວັດການແຫ່ງການເຂົ້າຮ່ວມຕະຫລາດໃນພາກພື້ນ.
“ພວກເຮົາພວມເສຍທີ່ຕັ້ງທີ່ມີມູນຄ່າເພີ່ມສູງສຳລັບຄົນງານຕ່າງປະເທດ. ເພາະສະນັ້ນ ຂ້າພະເຈົ້າຖືວ່າ ພວກເຮົາຕ້ອງສັບຊ້ອນວຽກງານສຶກສາ ແລະ ບຳລຸງສ້າງ, ເພື່ອຍົກສູງຄຸນນະພາບແຮງງານຂອງຫວຽດນາມ, ໃນນັ້ນ ລວມທັງ ຄວາມຮູ້, ຄຸນສົມບັດ, ທັກສະໃນການດຳລົງຊີວິດ..ພວກເຮົາຕ້ອງສ້າງຖັນແຖວຄົນງານທີ່ມີຄຸນນະພາບສັງລວມເພື່ອຕອບສະຫນອງຄວາມຕ້ອງການຂອງຕະຫລາດລວມໄດ້.”
ຄົນງານຫວຽດນາມໄປເຮັດວຽກຢູ່ຕ່າງປະເທດ
ພາບ:cand.com
|
ຄຽງຄູ່ກັນນັ້ນ ຫນຶ່ງໃນບັນດາຮົ້ວກີດຂວາງສຳລັບບັນດາວິສາຫະກິດຫວຽດນາມ ເມື່ອເຂົ້າຮ່ວມຕະຫລາດທີ່ກວ້າງໃຫຍ່ລະດັບພາກພື້ນ ນັ້ນແມ່ນຮົ້ວກີດຂວາງດ້ານພາສາ. ເມື່ອຕີລາລວມ, ຄວາມສາມາດນຳໃຊ້ດ້ານພາສາຕ່າງປະເທດຂອງບັນດາການນຳວິສາຫະກິດຫວຽດນາມ ຍັງຈຳກັດຢູ່, ໃນຂະນະທີ່ນຳພາວິສາຫະກິດຕົນເຂົ້າຮ່ວມຕະຫລາດທີ່ຫຍຸ້ງຍາກບໍ່ແມ່ນສິ່ງງ່າຍດາຍ. ກ່ຽວກັບໄລຍະສັ້ນ, ບັນຫານີ້ຍັງບໍ່ທັນສະແດງໃຫ້ເຫັນຢ່າງຈະແຈ້ງບັນດາຈຸດອ່ອນຂອງວິສາຫະກິດ, ແຕ່ໃນອະນາຄົດ, ສິ່ງດັ່ງກ່າວຈະກີດຂວາງການພັດທະນາຂອງວິສາຫະກິດເມື່ອເຂົ້າຮ່ວມຕະຫລາດພາກພື້ນ ແລະ ສາກົນ. ນັ້ນແມ່ນສິ່ງທີ່ ເອື້ອຍ ຫງວຽນຮົ່ງກວຽນ, ຜູ້ອຳນວຍການບໍລິສັດຫຸ້ນສ່ວນ Onyx, ຊື່ງແມ່ນວິສາຫະກິດແຫ່ງຫນຶ່ງທີ່ເຄື່ອນໄຫວໃນຂົງເຂດສະຫນອງອຸປະກອນການແພດ ມີຄວາມເປັນຫ່ວງມາແຕ່ດົນແລ້ວ.
“ປະຈຸບັນ ມີພຽງການນຳ ແມ່ນນຳໃຊ້ພາສາອັງກິດໄດ້ດີເທົ່ານັ້ນ ສ່ວນພາລະກອນບໍ່ທັນຮູ້ຫລາຍ. ໃນອະນາຄົດ ເມື່ອພວກຂ້າພະເຈົ້າສົ່ງອອກຫລາຍ ສິ່ງນີ້ຈະເປັນຮົ້ວກີດຂວາງໃຫຍ່. ສະນັ້ນ ພວກຂ້າພະເຈົ້າໄດ້ຄິດໄລ່ເຖິງການເປີດຊຸດສອນພາສາອັງກິດໃຫ້ແກ່ຄົນງານ ເພື່ອສາມາດສຳຜັດກັບບັນດາຕະຫລາດອື່ນໄດ້.”
ອາດຈະເວົ້າໄດ້ວ່າ ຕະຫລາດ ອາຊຽນ ແມ່ນແຫ່ງທີ່ເຕັມໄປດ້ວຍກາລະໂອກາດ ແຕ່ຄວາມສ່ຽງບໍ່ແມ່ນຫນ້ອຍ. ເພື່ອສາມາດແກ້ໄຂບັນດາຄວາມຫຍຸ້ງຍາກ ແລະ ສິ່ງທ້າທາຍໃນວິວັດການແຊກຊືມເຂົ້າກັບຕະຫລາດລວມນັ້ນ ຕ້ອງມີການຫນູນຊ່ວຍ ແລະ ບໍລິຫານຈາກ ລັດຖະບານ. ແລະ ສິ່ງສຳຄັນກວ່າໝູ່ ແມ່ນຄວາມຮັບຮູ້ຂອງວິສາຫະກິດແຕ່ລະແຫ່ງ ເພື່ອວາງທິດທາງລະອຽດ, ຍຸດທະສາດຍາວນານເພື່ອສາມາດສືບຕໍ່ດຳເນີນທຸລະກິດຢ່າງໝັ້ນຄົງ, ພັດທະນາ ແລະ ເຊື່ອມໂຍງຢ່າງມີປະສິດທິຜົນ.