(vovworld) - ສິ່ງແວດລ້ອມຂຽວ, ສະອາດ, ສວຍງາມຢູ່ເຂດຕົວເມືອງ ແລະ ລະບົບຄົມມະນາຄົມທັນສະໄຫມ ນັ້ນແມ່ນບັນຫາຊຶ່ງລັດຖະບານຫລາຍປະເທດມີຄວາມເອົາໃຈໃສ່ເປັນພິເສດ. ສິ່ງດັ່ງກ່າວບໍ່ພຽງແຕ່ນຳມາຊຶ່ງຄຸນນະພາບການດຳລົງຊີວິດຂອງປະຊາຊົນໃນເຂດຕົວເມືອງເທົ່ານັ້ນ ຫາກຍັງມີຜົນສະທ້ອນຢ່າງໃຫຍ່ຫລວງເຖິງພື້ນຖານເສດຖະກິດຂອງປະເທດນັ້ນອີກດ້ວຍ, ພິເສດໄດ້ນຳມາຊຶ່ງການເຕີບໂຕຢ່າງກະໂດດຂັ້ນໃຫ້ແກ່ຂະແຫນງການທ່ອງທ່ຽວ. ໃນລາຍການຊາຍຄາອາຊຽນພາກນີ້ ພວກເຮົາຂໍແນະນຳບົດທີ່ພາດຫົວເລື່ອງວ່າ: ສິງກະໂປ ປະເທດໄດ້ຮັບການຂະຫນານນາມວ່າ: ປະເທດໝູ່ເກາະທີ່ຂຽວ, ສະອາດ, ສວຍງາມທີ່ສຸດຢູ່ ອາຊີ ແລະ ຖືກຈັດ ໃນ topten ຂອງໂລກ.
ຮູບພາບຢູ່ໃຈກາງນະຄອນ ສິງກະໂປ
ພາບ:internet
|
ດ້ວຍເນື້ອທີ່ 647 ຕາລາງກິໂລແມດ, ພົນລະເມືອງກວ່າ 3 ລ້້ານຄົນ, ສິງກະໂປແມ່ນປະເທດທີ່ມີຫລາຍສັນຊາດ, ໃນນັ້ນຊາວຈີນກວມ 76,8%, ຊາວມາເລເຊຍ ກວມ 13,9 % ສ່ວນທີ່ຍັງເຫລືອແມ່ນຊາວ ອິນເດຍ, ປາກິສະຖານ, ສີລັງກາ ແລະ ປະເທດອື່ນ. ປະເທດໝູ່ເກາະແຫ່ງນ້ອຍທີ່ຂະຫຍັນຂັນເຄື່ອນຢູ່ເຂດອາຊີຕາເວັນອອກສຽງໃຕ້ນີ້ເປັນຕົວແທນໃຫ້ແກ່ສິ່ງຍອດຢ້ຽມຂອງທັງສອງພື້ນຖານວັດທະນະທຳຝ່າຍຕາເວັນອອກ ແລະ ຕາເວັນຕົກ. ເຖິງວ່າ ເນື້ອທີ່ດິນຄັບແຄບກໍຕາມ ແຕ່ສິງກະໂປໄດ້ວາງແຜນຜັງຢ່າງເໝາະສົມ, ນັບແຕ່ບັນດາເຂດໃຈກາງເປັນສູນຄ້າຂາຍທີ່ຄັບຄາຫນາແຫນ້ນ, ບັນດາເຂດສວນທີ່ສະຫງົບງຽບຕະຫລອດຮອດຕືກອາຄານສູງລ້ວນແຕ່ມີການປະສົມຢ່າງກົມກຽ່ວລະຫວ່າງວັດທະນະທຳຂອງຫລາຍປະເທດ, ສິລະປະ ແລະ ສະຖາປັດຕະຍະກຳຂອງຝ່າຍຕາເວັນຕົກ. ຢູ່ ສິງກະໂປ ມີເສັ້ນທາງບາງສາຍໄດ້ຮັບການກໍ່ສ້າງດ້ວຍດິນທີ່ຊື້ມາຈາກປະເທດບ້ານໃກ້ເຮືອນຄຽງ, ແຕ່ພັດມີເຂດຕົ້ນໄມ້ຂຽວຫລາຍແຫ່ງ. ບໍ່ວ່າແຫ່ງໃດຢູ່ປະເທດນີ້ ຈາກສະຫນາມບິນ, ສະພານລອຍ, ຕຶກອາຄານສູງ ນັບທັງສຸຂະອະນາໄມ ກໍລ້ວນແຕ່ມີຕົ້ນໄມ້ຂຽວ, ສວນດອກໄມ້ດ້ວຍສີສັນຫລາກຫລາຍທີ່ງາມຕາ ແລະ ຢູ່ດາດຟ້າຂອງຕືກອາຄານສູງທີ່ກໍ່ສ້າງດ້ວຍເບຕົງກໍໄດ້ປົກຄຸມໄປດ້ວຍຕົ້ນໄມ້ຂຽວ, ສ້າງທັດສະນີຍະພາບທີ່ສວຍງານຢູ່ເຂດຕົວເມືອງ. ເຮັດໄດ້ສິ່ງດັ່ງກ່າວກໍຍ້ອນຄວາມຕັດສິນໃຈສູງຂອງລັດຖະບານ ສິງກະໂປ ທີ່ສະແດງອອກຜ່ານບັນດານະໂຍບາຍການຄຸ້ມຄອງ, ການຕິດຕາມກວດກາສິ່ງແວດລ້ອມ, ຖືການປົກປັກຮັກສາສິ່ງແວດລ້ອມຊີວະພາບແມ່ນຫນ້າທີ່ຍຸດທະສາດໃນນະໂຍບາຍພັດທະນາເສດຖະກິດສັງຄົມຂອງປະເທດຊາດ. ລັດຖະບານປະເທດນີ້ ໄດ້ວາງຫລາຍມາດຕະການເພື່ອກວດກາ ແລະ ປົກປັກຮັກສາສິ່ງແວດລ້ອມ, ໃນນັ້ນ ກົດໝາຍວ່າດ້ວຍສິ່ງແວດລ້ອມແມ່ນເຄື່ອງມືທີ່ມີປະສິດທິຜົນທີ່ສຸດເພື່ອຮັບປະກັນຄວາມສະອາດ, ສວຍງາມໃຫ້ແກ່ສິ່ງແວດລ້ອມຂອງສິງກະໂປ. ຍ້ອນມີອາກາດປອດໂປ່ງ, ສະອາດ ສິງກະໂປ ໄດ້ດຶງດູດຈຳນວນແຂກທ່ອງທ່ຽວມາຢ້ຽມຢາມປະເທດນີ້ໃນແຕ່ລະປີແມ່ນລື່ນກາຍທົບຫລາຍເທົ່າເມື່ອທຽບໃສ່ຈຳນວນພົນລະເມືອງຂອງສິງກະໂປ. ເຖິງວ່າ ແຂກທ່ອງທ່ຽວມາຈາກໃສ, ແຕ່ຜູ້ໃດກໍ່ມີຄວາມປະທັບໃຈຕໍ່ສິ່ງແວດລ້ອມ ແລະ ສະຕິຄວາມຮັບຮູ້ໃນການປົກປັກຮັກສາສິ່ງແວດລ້ອມຂອງປະຊາຊົນປະເທດໝູ່ເກາະນີ້. ໃນການໄປຢ້ຽມຢາມສິງກະໂປຫວ່າງແລ້ວນີ້, ເພື່ອນ Pham Minh Anh, ນັກສຶກສາສະຖາບັນໂຄສະນາຂ່າວສານ ຮ່າໂນ້ຍ ມີຄວາມເຄົາລົບນັບຖືຕໍ່ບັນດາກົດໝາຍກ່ຽວກັບການປົກປັກຮັກສາສິ່ງແວດລ້ອມຂອງອຳນາດການປົກຄອງກໍຄືສະຕິຕຶ່ນຕົວໃນການປະຕິບັດຢ່າງເຂັ້ມງວດ ຂອງປະຊາຊົນ ປະເທດໝູ່ເກາະນີ້.
“ຢູ່ ສິງກະໂປ ບັນດາການກະທຳລະເມີດກົດໝາຍຄື: ສູບຢາຢູ່ບ່ອນບໍ່ໄດ້ຮັບອະນຸຍາດ, ຖີ້ມເຂົ້າໜົມສິງໂກມ, ຂີ້ເຫຍື້ອຢ່າງຊະຊາຍ, ລະເມີດກົດໝາຍທາງຄົມມະນາຄົມ ແລະ ອື່ນໆ ລ້ວນແຕ່ຖືກປັບໄໝຢ່າງຫນັກ. ປະຊາຊົນຢູ່ທີ່ນີ້ ຍາມໃດກໍປະຕິບັດບັນດາຂໍ້ກຳນົດກ່ຽວກັບການປົກປັກຮັກສາສິ່ງແວດລ້ອມຢ່າງເຂັ້ມງວດ. ຍາມໃດເຂົາເຈົ້າ ກໍມີສະຕິຕຶ່ນຕົວໃນການແບ່ງປະເພດຂີ້ເຫຍື້ອແລ້ວໃສ່ຖົງທີ່ໄດ້ກຳນົດເພື່ອສ້າງຄວາມສະດວກໃຫ້ການຜະລິດຄືນໃຫມ່. ໃນເວລາກວ່າ 1 ອາທິດ ຢູ່ ສິງກະໂປ, ຂ້າພະເຈົ້າໄດ້ໄປເລາະທ່ຽວຖະຫນົນຫລາຍສາຍ ແຕ່ບໍ່ເຫັນຕຳຫລວດຢືນຢູ່ແຄມທາງ, ແຕ່ປະຊາຊົນມີສະຕິຕື່ນຕົວທີ່ສຸດ ແລະ ມີຫລາຍເທື່ອ ຂ້າພະເຈົ້າໄດ້ເຫັນປະຈັກຕາຄົນຍ່າງຕາມຖະຫນົນເກັບເຈ້ຍເສດຊຶ່ງຜູ້ໃດຫນຶ່ງຖີ້ມລົງໂດຍບໍ່ຕັ້ງໃຈແລ້ວໃສ່ຖັງຂີ້ເຫຍື້ອ. ເຂົາເຈົ້າມີສະຕິຕື່ນຕົວຢ່າງແທ້ຈິງໃນການປົກປັກຮັກສາສິ່ງແວດລ້ອມ.”
ສິງກະໂປ ນະຄອນທີ່ສວຍງາມ, ສະອາດ
ພາບ: dulich.vn
|
ນອກຈາກປັດໄຈສິ່ງແວດລ້ອມຂຽວ, ສະອາດ ແລ້ວ, ລະບົບຄົມມະນາຄົມຢູ່ສິງກະໂປ ກໍໄດ້ຮັບການຕີລາຄາວ່າແມ່ນລະບົບຄົມມະນາຄົມທີ່ດີທີ່ສຸດຢູ່ໃນໂລກ ຍ້ອນຄວາມສະດວກ ແລະ ທັນສະໄຫມ. ຢູ່ ສິງກະໂປ ມີຍານພາຫະນະສັນຈອນໄປມາທົ່ວໄປ 2 ປະເພດ ນັ້ນແມ່ນ ລົດເມ ແລະ ລົດໄຟໃຕ້ດິນ. ຍ້ອນເນື້ອທີ່ດິນຄັບແຄບ ສະນັ້ນ ອຳນາດການປົກຄອງ ສິງກະໂປ ຈຶ່ງວາງບັນດາມາດຕະການພິເສດ ເພື່ອປ້ອງກັນ ແລະ ຕ້ານສະພາບລົດຕິດຄື: ສ້າງບັນດາເຂດຄົມມະນາຄົມທີ່ຈຳກັດລົດສັນຈອນ, ສືບຕໍ່ຫລຸດຜ່ອນອັດຕາສ່ວນຜູ້ຊື້ລົດໂອໂຕຄັນໃຫມ່ ດ້ວຍວິທີເສຍພາສີນຳເຂົ້າລົດໂອໂຕສູງ ແລະ ຜູ້ນຳໃຊ້ລົດໂອໂຕຕ້ອງເສຍຄ່າທຳນຽນທາງຕື່ມອີກ ເມື່ອແລ່ນຕາມທາງດ່ວນ ແລະ ເຂດໃຈກາງ. ນອກນັ້ນ ລັດຖະບານສິງກະໂປ ຍັງມີຂໍ້ກຳນົດຢ່າງແຫນ້ນແຟ້ນກ່ຽວກັບມາດຕະຖານຄວາມປອດໄພໃຫ້ແກ່ສິ່ງແວດລ້ອມສຳລັບບັນດາຍານພາຫະນະສັນຈອນຄື: ລະດັບການປ່ອຍຄວັນ, ສຽງເນືອງນັນ... ເພາະສະນັ້ນ ແຂກທ່ອງທ່ຽວມາຢ້ຽມຢາມນະຄອນນີ້ ຍາມໃດກໍ່ມີຄວາມຮູ້ສຶກອຸ່ນອ່ຽນໃຈ ແລະ ສະດວກເມື່ອໄປຄົ້ນຫາ, ຊື້ເຄື່ອງຂອງຢູ່ບັນດາສາຍທາງໂດຍບໍ່ຕ້ອງຄິດເຖິງບັນຫາມົນລະພິດຫລືຄວາມປອດໄພທາງຄົມມະນາຄົມ. ອ້າຍ Kevil ນັກທ່ອງທ່ຽວມາຈາກ ປະເທດ ບຣູໄນ ໄດ້ແບ່ງປັນວ່າ:
“ເຄື່ອຄ່າຍຄົມມະນາຄົມສາທາລະນະຢູ່ ສິງກະໂປ ແມ່ນດີທີ່ສຸດ, ຢູ່ບັນດາຄິວລົດ ແລະ ສາຍທາງຕ່າງໆບໍ່ມີເລື່ອງຈອດລົດກະແຈກກະຈາຍ, ປະຊາຊົນບໍ່ກັງວົນຕໍ່ມົນລະພິດສິ່ງແວດລ້ອມ, ແລະ ສະພາບລົດຕິດ. ບັນດາຍານພາຫະນະສັນຈອນຢູ່ຖະຫນົນສາຍຕ່າງໆລ້ວນແຕ່ແລ່ນໃນຄວາມໄວ 40 km/h, ພິເສດເຂົາເຈົ້າປະຕິບັດຂໍ້ກຳນົດກ່ຽວກັບຄວາມປອດໄພທາງຄົມມະນາຄົມຢ່າງເຂັ້ມງວດ, ບໍ່ກິນທາງ, ບໍ່ຈອດຜິດບ່ອນ, ບໍ່ຜ່າໄຟແດງ, ແລະ ບໍ່ມີການບີບແກເດັດຂາດ, ຂ້າພະເຈົ້າສະບາຍໃຈເມື່ອເດີນທາງໄປມາໃນນະຄອນນີ້”
ສິ່ງແວດລ້ອມຂຽວ, ສະອາດ ແລະ ລະບົບຄົມມະນາຄົມສະດວກ, ທັນສະໄຫມຄືຢູ່ ສິງກະໂປ ແມ່ນຈຸດໝາຍທີ່ນະຄອນຫລາຍແຫ່ງພວມມຸ່ງໄປເຖິງ, ພິເສດ ຢູ່ປະເທດຈຳນວນຫນຶ່ງໃນ ອາຊຽນ. ແຕ່ເພື່ອບັນລຸຈຸດໝາຍນັ້ນໃຫ້ໄດ້, ນອກຈາກມີບັນດານະໂຍບາຍກົດໝາຍຢ່າງຂ້ຽວຂາດຂອງລັດຖະບານແລ້ວ, ສະຕິຮູ້ສຶກຂອງປະຊາຊົນຈະແມ່ນປັດໄຈປະກອບສ່ວນບໍ່ຫນ້ອຍໃຫ້ແກ່ຜົນສຳເລັດນັ້ນ. ພວກເຮົາປາດຖະຫນາວ່າ, ດ້ວຍການແບ່ງປັນບົດຮຽນລະຫວ່າງບັນດາປະເທດສະມາຊິກ ອາຊຽນ, ໃນອະນາຄົດໃກ້ໆນີ້ ສິ່ງແວດລ້ອມໃນເຂດຕົວເມືອງຢູ່ບັນດາປະເທດ ອາຊຽນ ຈະໄດ້ຮັບການປ່ຽນແປງຕາມທິດຕັ້ງຫນ້າ, ນຳມາຊຶ່ງຄຸນນະພາບຊີວິດທີ່ດີກວ່າໃຫ້ແກ່ປະຊາຊົນ.
ແອງດ່າວ