(vovworld)- ເມື່ອທົບທວນຄືນສະພາບເສດຖະກິດໃນປີ 2012 ອາດຈະເຫັນໄດ້ ທ່າອ່ຽງລວມນັ້ນແມ່ນການຊຸດໂຊມຂອງຫລາຍພື້ນຖານເສດຖະກິດພັດທະນາຄື: ອາເມລິກາ, ເອີລົບ, ຈີນ , ສ ເກົາຫຼີ ແລະ ພື້ນຖານເສດຖະກິດຊັ້ນນຳຂອງ ອາຊຽນ ນັ້ນແມ່ນສິງກະໂປ. ແຕ່ປີ 2013 ນີ້ ໄດ້ຮັບການຄາດຄະເລວ່າ ຈະເຫັນປະຈັກຕາບັນດາບາດກ້າວປະຕິຮູບຢ່າງແຂງແຮງຂອງພື້ນຖານເສດຖະກິດ ສິງກະໂປ ເພື່ອຜ່ານຜ່າວິກິດການ.
ສິງກະໂປ ແມ່ນພື້ນຖານເສດຖະກິດນຳຫນ້າຂອງ ອາຊຽນ
ພາບ:internet
|
ໂດຍແມ່ນສູນເສດຖະກິດ ແລະ ທຸລະກຳ ດ້ານການເງິນຂອງ ພາກພື້ນ ແລະ ໂລກ ເພາະສະນັ້ນ ທຸກການຜັນແປຢູ່ໃນໂລກ ລ້ວນແຕ່ສົ່ງຜົນກະທົບຢ່າງແຂງແຮງເຖິງພື້ນຖານເສດຖະກິດ ສິງກະໂປ. ເພາະສະນັ້ນ ປີ 2012 ຜ່ານມາ ແມ່ນປີທີ່ເຕັມໄປດ້ວຍຄວາມຫຍຸ້ງຍາກສຳລັບ ສິງກະໂປ ໃນຂະນະທີ່ພື້ນຖານເສດຖະກິດທົ່ວໂລກ ຕົກເຂົ້າສູ່ສະພາບວິກິດການ. ຕົວເລກສະຖິຕິສຸດທ້າຍສະແດງໃຫ້ເຫັນວ່າ: ລະດັບຈະເລີນເຕີບໂຕເສດຖະກິດຂອງ ສິງກະໂປໃນປີ 2012 ແມ່ນ 1,2%, ຕຳ່ກວ່າຕົວເລກຄາດຄະເນຢ່າງເປັນທາງການກ່ອນນີ້ແມ່ນ 1,5% ແລະ ຕຳ່ກວ່າຫລາຍເມື່ອທຽບໃສ່ຕົວເລກເກືອບ 5% ຂອງປີ 2011. ການຫລຸດລົງຢ່າງແຮງນີ້ ຖືກຖືວ່າແມ່ນການກະທົບຈາກການຊຸດໂຊມຂອງບັນດາພື້ນຖານເສດຖະກິດ ອາເມລິກາ, ເອີລົບ, ຍີ່ປຸ່ນ. ດອກເຕີ ຫວູມີງເຄືອງ ສັງກັດໂຮງຮຽນນະໂຍບາຍຂອງລັດ ຫລີກວນຢູ ໃຫ້ຮູ້ວ່າ:
“ຂ້າພະເຈົ້າຄິດວ່າ ສິງກະໂປ ກໍຄືຫລາຍປະເທດອື່ນໆໃນພາກພື້ນ ແລະ ທົ່ວໂລກ ລ້ວນແຕ່ຕ້ອງປະເຊີນຫນ້າກັບສະພາບຂາດຄວາມເປັນປົກກະຕິຂອງພື້ນຖານເສດຖະກິດທົ່ວໂລກ. ນີ້ແມ່ນຄວາມຫຍຸ້ງຍາກທີ່ບໍ່ທັນມີມາກ່ອນ. ສິງກະໂປ ມີມູນເຊື້ອສ້າງການບຸກທະລຸຢ່າງແຮງພາຍຫລັງວິກິດການ. ສະນັ້ນ ເຂົາເຈົ້າພວມຮີບເຮັ່ງປັບປຸງບັນດານະໂຍບາຍເພື່ອສ້າງການຫັນປ່ຽນຢ່າງແຮງ, ແລະ ຍາມໃດກໍຫັນຄວາມຫຍຸ້ງຍາກເປັນສິ່ງສະດວກ. ພາໃຫ້ທັງພື້ນຖານເສດຖະກິດກໍຄືແຕ່ລະຄົນ ແລະ ວິສາຫະກິດຕ້ອງມານະພະຍາຍາມຢ່າງສຸດຂີດ.”
ເຖິງວ່າການຈະເລີນເຕີບໂຕຍັງຊັກຊ້າຢູ່ ແຕ່ດ້ວຍລະດັບ GDP ສະເລ່ຍໃສ່ຫົວຄົນ ໃນປະຈຸບັນໄດ້ຂຶ້ນເຖິງເກືອບ 60.000 USD, ສິງກະໂປ ຍັງຄົງແມ່ນພື້ນຖານເສດຖະກິດນຳຫນ້າຂອງ ອາຊຽນ. ສິງກະໂປ ພວມຕັ້ງຫນ້າຜັນຂະຫຍາຍແຜນການສ້າງປະຊາຄົມເສດຖະກິດອາຊຽນ ໃນປີ 2015 ແລະ ຫນູນຊ່ວຍບັນດາປະເທດສະມາຊິກອາຊຽນອື່ນໆໃນວິວັດການນີ້. ທ່ານ Shanmugam ລັດຖະມົນຕີການຕ່າງປະເທດ ສິງກະໂປ ໃຫ້ຮູ້ວ່າ:
“ສິງກະໂປ ຄ້າຍຄືກັນກັບຫລາຍປະເທດອື່ນໆ ໃນນັ້ນມີ ຫວຽດນາມ ພວມເປັນເຈົ້າການຕັ້ງຫນ້າໃນວິວັດການສ້າງປະຊາຄົມເສດຖະກິດ ອາຊຽນໃນປີ 2015. ສິງກະໂປກໍໄດ້ໝັ້ນໝາຍສະຫງວນຈຳນວນເງິນ 170 ລ້ານ USD ໃຫ້ແກ່ຂໍ້ລິເລິ່ມເຊື່ອມໂຍງຂອງອາຊຽນ. ຂໍ້ລິເລິ່ມນີ້ ແມ່ນວິທີເພື່ອໃຫ້ສິງກະໂປຊ່ວຍບັນດາປະເທດດ້ອຍພັດທະນາ ລົບລ້າງຄວາມຜິດໂຕນກັນເພື່ອໃຫ້ເຂົາເຈົ້າປະຕິບັດສຳເລັດພັນທະຂອງຕົນ. ນັ້ນແມ່ນວິທີຊື່ງພວກຂ້າພະເຈົ້າເຂົ້າຮ່ວມໃນວິວັດການສັງລວມ ແລະ ກໍແມ່ນວິທີເພື່ອພ້ອມກັບບັນດາປະເທດສະມາຊິກ ອາຊຽນ ອື່ນໆຜ່ານຜ່າວິກິດການ.”
ຄຽງຄູ່ກັນນັ້ນ, ນະໂຍບາຍຈຳກັດ ຊາວຕ່າງປະເທດເຂົ້າອາໄສ ຂອງລັດຖະບານ ສິງກະໂປ ໄດ້ກໍ່ຄວາມຫຍຸ້ງຍາກສຳລັບບາງຂະແຫນງອຸດສາຫະກຳ ທີ່ເຄີຍຮັບເອົາຄົນງານຕ່າງປະເທດມາເຮັດວຽກເພື່ອບັນລຸລະດັບເຕີບໂຕ. ສິງກະໂປ ໄດ້ປັບປຸງນະໂຍບາຍບົນພື້ນຖານອີງຕາມສະພາບຕົວຈິງ ແລະ ຮັບເອົາຄຳເຫັນຈາກປະຊາຊົນ. ຕາມນັ້ນແລ້ວ, ໃນໄລຍະຈະມາເຖິງ, ສິງກະໂປ ກ້າວເຂົ້າສູ່ໄລຍະເຕີບໂຕຢ່າງຊັກຊ້າກວ່າ ແລະ ເອົາໃຈໃສ່ເຖິງຄຸນນະພາບການເຕີບໂຕ. ບັນດາບໍລິສັດສິງກະໂປ ກໍ່ໄດ້ກຳນົດທິດທາງ ຕ້ອງເພີ່ມສະມັດຕະພາບການອອກແຮງງານ ເພື່ອແນໃສ່ຫລຸດຜ່ອນການນຳເຂົ້າຄົນງານດ້ວຍລາຄາຕຳ່, ຖືກກັບນະໂຍບາຍຫລຸດຜ່ອນຄົນງານຕ່າງປະເທດຂອງລັດຖະບານ.
GDP ສະເລ່ຍໃສ່ຫົວຄົນ ໃນປະຈຸບັນຂອງສິງກະໂປໄດ້ຂຶ້ນເຖິງ
ເກືອບ 60.000 USD
ພາບ:internet
|
ອາຊຽນ ແມ່ນພາກພື້ນເສດຖະກິດເປີດ, ພິເສດ ສຳລັບບັນດາຄູ່ຮ່ວມມືໃຫຍ່ຢູ່ໃນໂລກ. ສະນັ້ນ ບັນດາການຜັນແປເສດຖະກິດຢູ່ໃນໂລກ ຈະສົ່ງຜົນສະທ້ອນຢ່າງແຮງເຖິງ ອາຊຽນ. ເຖິງຢ່າງໃດກໍຕາມ, ອາຊຽນ ຍັງຄົງຢືນຢັນ ຈຳເປັນຕ້ອງສືບຕໍ່ເຊື່ອມໂຍງ, ສືບຕໍ່ເປີດປະຕູ. ກ້າວເຂົ້າສູ່ປີ 2013, ເຖິງວ່າ ຍັງປະສົບກັບສິ່ງທ້າທາຍຫລາຍຢ່າງໃນພາຍພາກຫນ້າກໍຕາມ ແຕ່ສິງກະໂປກໍຄືບັນດາປະເທດ ອາຊຽນອື່ນໆ ຍັງຄົງສືບຕໍ່ກ້າວຂຶ້ນບົນເສັ້ນທາງສ້າງຕັ້ງປະຊາຄົມເສດຖະກິດ ອາຊຽນ ໃນປີ 2015 ຢ່າງໝັ້ນຄົງ.