(vovworld)- ເຖິງວ່າຫາກໍຮັບດຳລົງຕຳແຫນ່ງເມື່ອຕົ້ນປີ 2016, ແຕ່ທ່ານ Ibnu Hadi, ເອກອັກຄະລັດຖະທູດ ຜູ້ມີອຳນາດເຕັມແຫ່ງສາທາລະນະລັດ ອິນໂດເນເຊຍ ປະຈຳຫວຽດນາມ ມີຄວາມສຸດຈິດສຸດໃຈໃນການພັດທະນາສາຍພົວພັນທາງການທູດ ລະຫວ່າງສອງປະເທດຫວຽດນາມ ແລະ ອິນໂດເນເຊຍ. ຕາມທ່ານ Ibnu Hadi ແລ້ວ, ສອງປະເທດ ມີຫລາຍຈຸດຄ້າຍຄືກັນ ແລະ ສາມາດຫນູນຊ່ວຍເຊິ່ງກັນ ແລະກັນໃນພາກພື້ນ ເພື່ອຮັບປະກັນຜົນປະໂຫຍດຍຸດທະສາດຂອງສອງປະເທດເວົ້າສະເພາະ ແລະ ຂອງພາກພື້ນ ເວົ້າລວມໄດ້. ເນື່ອງໃນໂອກາດສະເຫລີມສະຫລອງ 71 ປີແຫ່ງວັນເອກະລາດປະເທດສາທາລະນະລັດ ອິນໂດເນເຂຍ (17/8/1945-17/8/2016), ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ໄດ້ຍາດເວລາໂອ້ລົມກັບນັກຂ່າວເຮືອງຈາ ກ່ຽວກັບຫົວເລື່ອງ “ສືບທອດ ແລະ ເສີມຂະຫຍາຍສາຍພົວພັນລະຫວ່າງສອງປະເທດ.”
ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ
ພາບ:internet
|
“ຄວາມຈິງ, ຊັບສົມບັດອັນລຳ້ຄ່າຂອງສອງປະເທດ ແມ່ນສາຍພົວພັນທີ່ມີມາແຕ່ດົນນານ. ຫວຽດນາມ ແມ່ນຫນຶ່ງໃນບັນດາປະເທດ ອາຊຽນ ທຳອິດ ຊື່ງອິນໂດເນເຊຍໄດ້ສ້າງສາຍພົວພັນ, ແມ່ນປະເທດທຳອິດເປີດສະຖານທູດ ແລະ ກໍເປັນປະເທດທຳອິດສົ່ງທູດທະຫານມາເຮັດວຽກໃນສະຖານທູດ. ພວກເຮົາປາດຖະຫນາວ່າ ສາຍພົວພັນນັບມື້ນັບໄດ້ຮັບການຮັດແຫນ້ນກວ່າເພື່ອພ້ອມກັນພັດທະນາ ແລະ ປົກປັກຮັກສາຄວາມສະຫງົບປອດໄພໃນພາກພື້ນ.”
ນັ້ນແມ່ນ ການສັງເກດຂອງທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ກ່ຽວກັບສາຍພົວພັນລະຫວ່າງ ຫວຽດນາມ ແລະ ອິນໂດເນເຊຍ. ວັນທີ 30/12/1955, ປະທານາທິບໍດີ Sukartno ແລະ ປະທານໂຮ່ຈິມີນ ໄດ້ສ້າງພື້ນຖານໃຫ້ແກ່ສາຍພົວພັນທາງການທູດລະຫວ່າງ ຫວຽດນາມ ແລະ ອິນໂດເນເຊຍ. ສອງປະເທດໄດ້ຮຽງບ່າຮຽງໄຫລ່ໃນການຕໍ່ສູ້ຍາດເອົາເອກະລາດມາໃຫ້ປະເທດຊາດ. ອິນໂດເນເຊຍ ຍາດເອົາເອກະລາດເມື່ອວັນທີ 17/8/1945 ແລະ ຫວຽດນາມ ສະຖາປະນາປະເທດ ສາທາລະນະລັດປະຊາທິປະໄຕຫວຽດນາມ ຫລັງຈາກນັ້ນ 15 ວັນ (2/9/1945). ນັບແຕ່ເວລານັ້ນເປັນຕົ້ນໄປ, ການພົວພັນຮ່ວມມືລະຫວ່າງຫວຽດນາມ ແລະ ອິນໂດເນເຊຍ ນັບມື້ນັບພັດທະນາແລະຂຶ້ນສູ່ລະດັບສູງໃຫມ່.
ພິເສດ ໃນການຢ້ຽມຢາມທາງລັດຖະກິດເຖິງອິນໂດເນເຊຍຂອງທ່ານປະທານປະເທດ ເຈືອງເຕີນຊາງ ເມື່ອເດືອນ 6/2013, ສອງປະເທດໄດ້ຍົກການພົວພັນຄູ່ຮ່ວມມືຍຸດທະສາດຂຶ້ນສູ່ລະດັບສູງໃຫມ່. ເຫດການນີ້ໄດ້ປະກອບສ່ວນນຳມາເຊິ່ງກຳລັງຫນູນໃຫມ່ໃຫ້ການພົວພັນສອງຝ່າຍລະຫວ່າງສອງປະເທດໃນທຸກຂົງເຂດ, ພິເສດແມ່ນດ້ານເສດຖະກິດ. ປະຈຸບັນ ຄວາມສາມາດບົ່ມຊ້ອນການຮ່ວມມືດ້ານເສດຖະກິດ ລະຫວ່າງຫວຽດນາມ ແລະ ອິນໂດເນເຊຍ ຍັງໃຫຍ່ຫລວງຢູ່. ສອງປະເທດໄດ້ວາງຄາດໝາຍບັນລຸວົງເງິນການຄ້າສອງຝ່າຍຫວຽດນາມ - ອິນໂດເນເຊຍ ໃຫ້ໄດ້ 10 ຕື້ USD ໃນປີ 2018. ກ່ຽວກັບບັນຫານີ້, ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ໃຫ້ຮູ້ວ່າ:
“ກ່ຽວກັບດ້ານເສດຖະກິດ ຫວຽດນາມ ແລະ ອິນໂດເນເຊຍ ນັບມື້ນັບພັດທະນາເມື່ອທຽບໃສ່ກ່ອນນີ້. ປີ 2010 ມູນຄ່າດ້ານການຄ້າສອງຝ່າຍບັນລຸເກືອບ 2,5 ຕື້ USD, ປີ 2015 ບັນລຸ 5,4 ຕື້ USD ແມ່ນເພີ່ມຂຶ້ນທົບສອງເທົ່າ. ຖ້າທຽບໃສ່ກັບປະເທດອາຊີຕາເວັນອອກສ່ຽງໃຕ້ ຈຳນວນຫນຶ່ງ, ຂ້າພະເຈົ້າຖືວ່າ ການພົວພັນດ້ານເສດຖະກິດລະຫວ່າງສອງປະເທດ, ພິເສດ ການດຶງດູດການລົງທຶນຈະໄດ້ເພີ່ມຂຶ້ນກວ່າອີກ. ປະຈຸບັນ ຫວຽດນາມ ພັດທະນາຢ່າງວ່ອງໄວ, ກາລະໂອກາດການລົງທຶນຢູ່ຫວຽດນາມ ແມ່ນໃຫຍ່ຫລວງ. ຂ້າພະເຈົ້າມີຄວາມປະທັບໃຈຕໍ່ການສົ່ງອອກເຂົ້າສານ, ສິນໃນນ້ຳ, ເຄື່ອງຕຳແຜ່ນຕັດຫຍິບ ຂອງຫວຽດນາມ ແລະ ພື້ນຖານອຸດສາຫະກຳຫວຽດນາມ ພວມພັດທະນາ.”
ກ່ຽວກັບການຮ່ວມມືດ້ານປ້ອງກັນຊາດ ປ້ອງກັນຄວາມສະຫງົບ, ສອງປະເທດ ໄດ້ ແລະ ພວມສົມທົບກັນຢ່າງແຫນ້ນແຟ້ນທີ່ບັນດາເວທີປາໄສ ອາຊຽນ, ກອງປະຊຸມລັດຖະມົນຕີກະຊວງປ້ອງກັນປະເທດ ອາຊຽນ, ກອງປະຊຸມລັດຖະມົນຕີ ອາຊຽນ ເປີດກວ້າງ. ຫວ່າງແລ້ວນີ້ ຢູ່ ນອກກອງປະຊຸມສຸດຍອດ ອາຊີ - ອາຟີລີກາ ທີ່ອິນໂດເນເຊຍ (4/2015), ທ່ານປະທານ ເຈືອງເຕີນຊາງ ແລະ ປະທານາທິບໍດີ Joko Widodo ໄດ້ແລກປ່ຽນບັນດາມາດຕະການຊຸກຍູ້ການຮ່ວມມືປ້ອງກັນຊາດຄື: ການຊ້ອມຮົບຮ່ວມ, ຖ່າຍທອດເຕັກໂນໂລຊີປ້ອງກັນຊາດ ແລະ ລາດຕະເວນຮ່ວມບົນທະເລ. ກ່ຽວກັບບັນຫານີ້, ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ແບ່ງປັນວ່າ:
“ຂ້າພະເຈົ້າຖືວ່າ ການຮ່ວມມືປ້ອງກັນຄວາມສະຫງົບປອດໄພບົນທະເລລະຫວ່າງສອງປະເທດ ຄວນມີແຜນການລະອຽດກວ່າ, ພິເສດ ແມ່ນການຊ້ອມຮົບຮ່ວມ ແລະ ລາດຕະເວນຮ່ວມບົນທະເລລະຫວ່າງສອງປະເທດ. ໄລຍະມໍ່ໆມານີ້ ໄດ້ເກີດບາງກໍລະນີກ່ຽວຂ້ອງເຖິງການຫາປາຂອງຊາວປະມົງຫວຽດນາມ, ລະເມີດອະທິປະໄຕຜືນແຜ່ນດິນ. ແຕ່ວ່າສິ່ງນີ້ພວກເຮົາລ້ວນແຕ່ບໍ່ຢາກເກີດຂຶ້ນ. ໃນອາທິດກ່ອນ, ລັດຖະມົນຕີ ຜູ້ຮັບຜິດຊອບບັນຫາທະເລ ອິນໂດເນເຊຍ ໄດ້ພົບປະກັບຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຮັບຜິດຊອບຂະແຫນງສິນໃນນ້ຳ ແລະ ລົງນາມໃນບົດບັນທຶກຊ່ວຍຈຳລະຫວ່າງສອງປະເທດ.”
ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ຖືວ່າ ຫນ້າທີ່ຂອງທ່ານໃນອາຍຸການນີ້ ບໍ່ພຽງແຕ່ແມ່ນການສືບທອດສາຍພົວພັນທີ່ມີຢູ່ແລ້ວກັບຫວຽດາມ ເທົ່ານັ້ນ ຫາກຕ້ອງພັດທະນາກວ່າອີກເພື່ອໃຫ້ສົມກັບຄວາມສາມາດບົ່ມຊ້ອນຂອງສອງປະເທດ. ມີຫລາຍແຜນການທ່ານເອກອັກຄະລັດຖະທູດຈະປະຕິບັດໃນປີນີ້ຄື: ຈັດຕັ້ງງານຕະຫລາດນັດການຄ້າ ແລະ ການທ່ອງທ່ຽວ ຢູ່ ນະຄອນ ໂຮ່ຈິມີນ ແລະ ຈາກາຕາ, ຈັດຕັ້ງລາຍການສິລະປະສະເຫລີມສະຫລອງ ວັນເອກະລາດ ອິນໂດເນເຊຍ ແລະ ສະເຫລີມສະຫລອງ ວັນສ້າງຕັ້ງປະຊາຄົມ ອາຊຽນ.
“ພວກຂ້າພະເຈົ້າຈະເຊີນບັນດານັກຂ່າວຫວຽດນາມ ໄປຍັງອິນໂດເນເຊຍ ໃນທ້າຍເດືອນ 8/2016. ນີ້ແມ່ນຄັ້ງທີ 3 ພວກຂ້າພະເຈົ້າເຊີນນັກຂ່າວໄປຍັງອິນໂດເນເຊຍ ເພື່ອຊອກຮູ້ ແລະ ເພີ່ມທະວີການແນະນຳໃຫ້ປະຊາຊົນຫວຽດນາມ ກ່ຽວກັບປະເທດ ອິນໂດເນເຊຍ. ນອກນັ້ນ ລັດຖະບານ ອິນໂດເນເຊຍ ກໍສະຫງວນທຶນການສຶກສາຫລາຍທຶນໃຫ້ແກ່ນັກຮຽນ, ນັກສຶກສາ ແລະ ພະນັກງານຫວຽດນາມ ຢາກຊອກຮູ້ວັດທະນະທຳ, ສັງຄົມກໍຄືເຕັກນິກລະຫວ່າງບັນດາປະເທດພັດທະນາ. ພວກຂ້າພະເຈົ້າພວມສ້າງບັນດາລາຍການທຶນການສຶກສາຍາວນານກວ່າອີກ.”
ຍັງມີຂ່າວດີຂ່າວມ່ວນຫນຶ່ງອີກໃຫ້ແກ່ປະຊາຊົນສອງປະເທດ ນັ້ນແມ່ນ ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ພວມມານະພະຍາຍາມຊຸກຍູ້ແຜນການສ້າງສາຍການບິນໂດຍກົງຈາກ ຮ່າໂນ້ຍ ໄປເຖິງ ຈາກາຕາ, ນອກຈາກສາຍການບິນນະຄອນໂຮ່ຈິມີນໄປຍັງຈາກາຕາທີ່ມີຢູ່ແລ້ວ. ຫວັງວ່າ ດ້ວຍບັນດາຄວາມມານະພະຍາຍາມ ແລະ ຄວາມສຸດຈິດສຸດໃຈຂອງຕົນ, ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ຈະປະຕິບັດຫນ້າທີ່ການທູດຂອງຕົນຢູ່ຫວຽດນາມສຳເລັດຜົນ, ປະກອບສ່ວນຊຸກຍູ້ການພົວພັນລະຫວ່າງສອງປະເທດ ແລະ ໃນພາກພື້ນ.