(vovworld)- ຍັງມີເວລາບໍ່ທັນຮອດເດືອນຫນຶ່ງ, ປະຊາຄົມ ອາຊຽນ ຈະກາຍເປັນປະຊາຄົມຮ່ວມສຳພັນຢ່າງແຫນ້ນແຟ້ນໃນ 3 ເສົາຄ້ຳຄື: ການເມືອງ ຄວາມໝັ້ນຄົງ, ເສດຖະກິດ ແລະ ວັດທະນະທຳ ສັງຄົມ. ນີ້ເປັນຂີດໝາຍສຳຄັນໃນວິວັດການຮ່ວມສຳພັນ ແລະ ສ່ອງແສງໃຫ້ເຫັນການເຕີບໃຫຍ່ຂອງ ອາຊຽນ ພາຍຫລັງ 48 ປີແຫ່ງການສ້າງຕັ້ງ ແລະ ພັດທະນາ. ໃນສະພາບການ ທີ່ຕັ້ງບົດບາດຂອງ ອາຊຽນ ນັບມື້ນັບໄດ້ຮັບການຍົກສູງຂຶ້ນ ທັງຢູ່ໃນພາກພື້ນ ແລະ ໃນໂລກ, ຈຳເປັນຕ້ອງມີບົດບາດ, ຄວາມຮັບຜິດຊອບ ຂອງສື່ມວນຊົນໃນການເພີ່ມທະວີວຽກງານຖະແຫລງຂ່າວ, ໂຄສະນາ, ຮັກສາສັນຕິພາບ, ຄວາມສາມັກຄີ, ສະຖຽນລະພາບ ແລະ ການພັດທະນາຂອງພາກພື້ນ.
ກອງປະຊຸມໃຫຍ່ ຄັ້ງທີ 18 ຂອງ CAJ
ພາບ:internet
|
ໃນຕະຫລອດ 40 ປີຜ່ານມາ, ການສ້າງຕັ້ງ ແລະ ພັດທະນາຂອງ ອາຊຽນ ລ້ວນແຕ່ມີການປະກອບສ່ວນຂອງສະຫະພັນບັນດານັກຂ່າວ ອາຊຽນ (CAJ). ນີ້ແມ່ນອົງການອາຊີບ ຂອງບັນດານັກຂ່າວໃນພາກພື້ນ ໄດ້ມີ ການເຄື່ອນໄຫວຢ່າງຕັ້ງຫນ້າ ຕ່າງໆ ແລະ ປະກອບສ່ວນໃຫ້ການພັດທະນາລວມຂອງພາກພື້ນ. ພິທີສະເຫລີມສະຫລອງ 40 ປີແຫ່ງວັນສ້າງຕັ້ງ CAJ ແລະ ກອງປະຊຸມໃຫຍ່ ຄັ້ງທີ 18 ຂອງ CAJ ແມ່ນມີຄວາມໝາຍພິເສດ ຊື່ງດຳເນີນໄປກົງກັບໂອກາດກະກຽມໃຫ້ປະຊາຄົມ ອາຊຽນ ໄດ້ຮັບການສ້າງຕັ້ງຢ່າງເປັນທາງການໃນທ້າຍປີ 2015. ກ່າວຄຳເຫັນທີ່ພິທີ, ທ່ານຮອງນາຍົກລັດຖະມົນຕີ ຫວູດືກດາມ ຖືວ່າ: ບັນດາອົງການສື່ມວນຊົນ, ສື່ສານ ແລະ ບັນດານັກຂ່າວຢູ່ພາຍໃນປະເທດ ຕ້ອງເປັນຜູ້ນຳຫນ້າ ດ້ວຍຄວາມຮັບຜິດຊອບອັນສູງສົ່ງແມ່ນນຳຫາງສຽງມຸ້ງໄປສູ່ບັນດາຄຸນຄ່າດີງາມກວ່າ, ປະກອບສ່ວນເຂົ້າໃນວັດທະນາຖາວນຂອງປະຊາຄົມ ອາຊຽນ ແລະ ໂລກ.
“ໃນສະພາບການພາກພື້ນ ແລະ ສາກົນ ຍັງມີການຜັນແປໄປຢ່າງສັບສົນຫລາຍຢ່າງ, ວາງອອກບັນດາສິ່ງທ້າທາຍສຳລັບສັນຕິພາບ ແລະ ການພັດທະນາ, ເປັນຕົ້ນ ແມ່ນຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ. ເພື່ອຮັກສາສັນຕິພາບ, ສະຖຽນລະພາບ, ສ້າງສະພາບແວດລ້ອມຢ່າງສະດວກໃຫ້ການພັດທະນາ ຄວນມີບົດບາດ, ຄວາມຮັບຜິດຊອບ ຂອງສື່ມວນຊົນ ອາຊຽນ ໃນການເພີ່ມທະວີຄວາມເຂົ້າໃຈລະຫວ່າງບັນດາຊາດ, ຊຸກຍູ້ການຮ່ວມມືລະຫວ່າງບັນດາປະເທດ ກໍຄື ຖືຄວາມຍຸຕິທຳແມ່ນສິ່ງສຳຄັນໃນການແກ້ໄຂບັນດາການຂັດແຍ້ງ, ຄວາມບໍ່ລົງລອຍກັນ ໂດຍສັນຕິວິທີ, ເຄົາລົບກົດໝາຍສາກົນ. ຍາມໃດຫວຽດນາມ ກໍສະແດງໃຫ້ເຫັນບົດບາດເປັນສະມາຊິກຕັ້ງຫນ້າ, ມີຄວາມຮັບຜິດຊອບໃນທຸກການເຄື່ອນໄຫວຂອງ ອາຊຽນ, ເປັນຕົ້ນແມ່ນການປະຕິບັດບັນດາມາດຕະການສ້າງປະຊາຄົມເສດຖະກິດ ອາຊຽນ.”
ບໍ່ພຽງແຕ່ ຫວຽດນາມ ເທົ່ານັ້ນ ບັນດາປະເທດສະມາຊິກ ອື່ນ ຂອງ CAJ ລ້ວນແຕ່ພວມຕັ້ງຫນ້າກະກຽມໃຫ້ແກ່ການສ້າງຕັ້ງປະຊາຄົມ ອາຊຽນ ຜ່ານບົດບາດຂອງບັນດານັກຂ່າວເພື່ອກຳນົດທິດໂຄສະນາ, ເພີ່ມທະວີຄວາມເຂົ້າໃຈ ແລະ ຄວາມສາມັກຄີໃນພາກພື້ນ. ທ່ານ Teguh Susanto, ປະທານສະມາຄົມ ນັກຂ່າວ ອິນໂດເນເຊຍ ແບ່ງປັນວ່າ:
“ທຸກພາຫະນະສື່ມວນຊົນ ຢູ່ ອິນໂດເນເຊຍ ລ້ວນແຕ່ມີບັນດາລາຍການພິເສດກ່ຽວກັບ ອາຊຽນ, ເນື້ອໃນແມ່ນກ່ຽວຂ້ອງເຖິງດ້ານວັດທະນະທຳ, ຂ່າວສົດທີ່ເກີດຂຶ້ນໃນພາກພື້ນ ອາຊຽນ. ຄຽງຄູ່ກັນນັ້ນ ພວກຂ້າພະເຈົ້າກໍໄດ້ສ້າງຕັ້ງ ໂຮງຮຽນສື່ມວນຊົນ ອາຊຽນ ໃນປີ 2014. ທິດທາງໃຫມ່ ແມ່ນນັບແຕ່ນີ້ຮອດປີ 2017 ຈະຈັດຕັ້ງບັນດາລາຍການພົບປະແລກປ່ຽນນັກຂ່າວ, ເຊີນບັນດານັກຂ່າວໃນພາກພື້ນມາຮຽນຢູ່ໂຮງຮຽນ ບໍ່ພຽງແຕ່ຄວາມຊຳນານງານສື່ມວນຊົນ ເທົ່ານັ້ນ ຫາກຍັງມີຄວາມເຂົ້າໃຈກ່ຽວກັບວັດທະນະທຳ ແລະ ທີ່ຕັ້ງບົດບາດຂອງແຕ່ລະປະເທດໃນພາກພື້ນ ອາຊຽນອີກດ້ວຍ.”
ໂດຍແມ່ນຫນຶ່ງໃນ 5 ປະເທດ ສະມາຊິກນຳຫນ້າຂອງ ສະຫະພັນ CAJ, ສະມາພັນນັກຫນັງສືພິມໄທ ໃນຊຸມປີຜ່ານມາ ກໍເພີ່ມທະວີວຽກງານໂຄສະນາກ່ຽວກັບການສ້າງຕັ້ງປະຊາຄົມອາຊຽນ ຢູ່ ຫລາຍຂັ້ນຄື: ລາຍການບຳລຸງສ້າງບັນດານັກຂ່າວກ່ຽວກັບວັດທະນະທຳ ແລະ ພາສາຂອງບັນດາປະເທດ ອາຊຽນ ຄື: ພາສາຫວຽດ, ອິນໂດເນເຊຍ, ມາເລເຊຍ ແລະ ກຳປູເຈຍ, ຈັດຕັ້ງການແລກປ່ຽນນັກຂ່າວລະຫວ່າງບັນດາວິທະຍຸກະຈາຍສຽງໃນພາກພື້ນ, ຂຽນບົດໂຄສະນາກ່ຽວກັບ ອາຊຽນ. ທ່ານ ເທບໄຊ ສະຢອງ, ປະທານສະມາພັນນັກຫນັງສືພິມ ໄທ ໃຫ້ຮູ້ວ່າ:
ສຽງທ່ານ ເທບໄຊ
ປະຊາຄົມ ອາຊຽນ ໄດ້ກາຍເປັນສູນເສດຖະກິດທີ່ຂະຫຍັນຂັນເຄື່ອນ ດ້ວຍພົນລະເມືອງກວ່າ 600 ລ້ານຄົນ, ມີອິດທິພົນຊື່ສຽງໃນບັນດາເວທີປາໄສສາກົນ ແລະບົດບາດສຳຄັນ ເພື່ອສັນຕິພາບ ແລະພັດທະນາຢູ່ພາກພື້ນ ແລະ ໃນໂລກ. ການພັດທະນາຢ່າງວ່ອງໄວຂອງເຕັກໂນໂລຊີຂໍ້ມູນຂ່າວສານ ແລະ ສື່ສານ ໄດ້ເປີດກາລະໂອກາດໃຫຍ່, ແຕ່ກໍວາງອອກສິ່ງທ້າທາຍຫລາຍຢ່າງ, ຮຽກຮ້ອງຕ້ອງເປັນເຈົ້າການໃນການໝູນໃຊ້ເຕັກໂນໂລຊີ, ຕອບສະຫນອງຄວາມຕ້ອງການຂໍ້ມູນຂ່າວສານນັບມື້ນັບວ່ອງໄວ ແລະ ເປັນຫລາຍຮູບຫລາຍແບບຂອງໝູ່ມະຫາຊົນ.
ກອງປະຊຸມໃຫຍ່ ຄັ້ງທີ 18 ຂອງ CAJ ດຳເນີນໃນວັນທີ 27/11 ຜ່ານມາຢູ່ ຮ່າໂນ້ຍ, ກອງປະຊຸມໄດ້ຮັບຮອງເອົາຖະແຫລງການ ຮ່າໂນ້ຍ ແລະ ມອບໂອນຕຳແຫນ່ງປະທານ CAJ ອາຍຸການ 2015-2017 ໃຫ້ນັກຂ່າວ ຖ້ວນຫືວ, ປະທານສະມາຄົມນັກຂ່າວຫວຽດນາມ. ນີ້ແມ່ນຄວາມເປັນກຽດ ທັງແມ່ນຄວາມຮັບຜິດຊອບອັນໃຫຍ່ຫລວງຂອງສື່ມວນຊົນ ຫວຽດນາມ ພ້ອມທັງກໍເປັນການຢັ້ງຢືນສິ່ງທີ່ຫວຽດນາມ ອຸທິດສ່ວນໃຫ້ CAJ ໃນໄລຍະຜ່ານມາ ຊື່ງໄດ້ຮັບການຮັບຮູ້ ແລະ ຕີລາຄາສູງຈາກປະຊາຄົມສື່ມວນຊົນ ອາຊຽນ.