(vovworld) - ບັນດາລາຍການລະຄອນຕຸກກະຕາ ໂດຍນັກສິລະປິນບັນດາປະເທດ ອາຊຽນ ສະແດງໃນງານມະໂຫລານລະຄອນຕຸກກະຕາສາກົນຄັ້ງທີ 3 ປີ 2012 ຢູ່ ຮ່າໂນ້ຍ ແມ່ນມີຫລາຍຮູບຫລາຍແບບທາງດ້ານເນື້ອໃນ ແລະອຸດົມສົມບູນທາງດ້ານປະເພດ. ບັນດາລາຍການລະຄອນຕຸກກະຕາໄດ້ວາດພາບໃຫ້ເຫັນເລື່ອງລາວພື້ນເມືອງ ແລະ ສ່ອງແສງເຖິງບັນຫາຕ່າງໆໃນຊີວິດທີ່ທັນສະໄຫມ, ບັນດານັກສິລະປະກອນລະຄອນຕຸກກະຕາໄດ້ນຳມາໃຫ້ງານມະໂຫລານລະຄອນຕຸກກະຕາສາກົນລາຍການທີ່ມີສີສັນພິເສດສະເພາະ, ຊ່ວຍໃຫ້ຜູ້ຊົມເຂົ້າໃຈຕື່ມອີກກ່ຽວກັບວັດທະນະທຳຂອງແຕ່ລະປະເທດ.
ນັກສິລະປິນມາຈາກ 6 ປະເທດ ອາຊຽນ ລວມມີ: ອິນໂດເນເຊຍ, ຟິລີບປີນ, ລາວ, ກຳປູເຈຍ, ໄທ ແລະ ປະເທດເຈົ້າພາບຫວຽດນາມ ໄດ້ນຳເອົາບັນດາລາຍການລະຄອນຕຸກກະຕາທີ່ເຂັ້ມຂົ້ນໄປດ້ວຍສີສັນຂອງຊາດຕົນມາສະແດງໃນງານມະໂຫລານລະຄອນຕຸກກະຕາ ຊື່ງດຳເນີນໄປຢູ່ ຮ່າໂນ້ຍ ຫວ່າງແລ້ວນີ້.
ງານມະໂຫລານລະຄອນຕຸກກະຕາສາກົນຄັ້ງທີ 3
ພາບ:hanoimoi.com
|
ທ່ານກຳລັງຮັບຟັງສຽງດົນຕີໃນລະຄອນຕຸກກະຕາ “ການຕາຍຂອງ Rahwana - ຊຶ່ງແມ່ນບົດລະຄອນທີ່ເຂັ້ມຂົ້ນໄປດ້ວຍສີສັນວັດທະນະທຳພື້ນເມືອງຂອງ ອິນໂດເນເຊຍ ຜ່ານການສະແດງບົດລະຄອນຢ່າງຟົດຟື້ນ ແລະ ມີຊີວິດຊີວາ ຂອງນັກສິລະປິນ ອິນໂດເນເຊຍອັນໄດ້ສ້າງຄວາມປະທັບໃຈໃຫ້ແກ່ຜູ້ຊົມ. ພິເສດໃນລາຍການສະແດງຂອງຕົນ, ບັນດານັກສິລະປິນ ອິນໂດເນເຊຍ ຍັງຍາດເວລາເພື່ອແລກປ່ຽນໂອ້ລົມກັບຜູ້ຊົມ ຫວຽດນາມ ຍິ່ງເຮັດໃຫ້ບັນຍາກາດມີຄວາມໃກ້ຊິດສະຫນິດສະຫນົມກວ່າ.
“ສະບາຍດີ, ຂາ້ພະເຈົ້າຊື່ວ່າ ຊູນບັກ,…. ຂ້າພະເຈົ້າຮັກແພງ ຫວຽດນາມ, ຫວຽດນາມ ແລະ ອິນໂດເນເຊຍ ແມ່ນປະເທດອ້າຍນ້ອງ. ຂອບໃຈ….
ຖ້າກອງສິລະປະກອນຕຸກກະຕາ Wayang Ajen ຂອງອິນໂດເນເຊຍ ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ຜູ້ຊົມ ດ້ວຍການຈັດລາຍການຢ່າງລະອຽດລະອໍແລະ ຈຳນວນນັກສິລະປິນເຂົ້າຮ່ວມເປັນຈຳນວນຫລາຍ, ລາຍການ ລະຄອນຕຸກກະຕາຂອງກອງສິລະປະກອນຕຸກກະຕາ Hunchangforn Pupet Group ມາຈາກໄທ ໂດຍນັກສິລະປິນ ສອງຄົນທີ່ມີຊ່ືວ່າ Jo ແລະ Na ສະແດງ ດ້ວຍຮູບການສະແດງແຕກຕ່າງກັນ, ປະສົມກັບສຽງດົນຕີພື້ນເມືອງ ໄດ້ເຮັດໃຫ້ຜູ້ຊົມຍິ່ງມີຄວາມຮູ້ສຶກປະທັບໃຈ. ເອື້ອຍ ສຸດທະວີ ຫລືເອີ້ນວ່າ Na ໃຫ້ຮູ້ວ່າ:
ສຽງນາງ ສຸທະວີ
ນອກຈາກສະແດງໃຫ້ເຫັນສີສັນວັດທະນະທຳຂອງປະເທດຕົນ, ຫນຶ່ງໃນບັນດາຫົວເລື່ອງພົ້ນເດັ່ນຊຶ່ງບັນດານັກສິລະປິນນຳມາສະແດງໃນງານໂຫລານລະຄອນຕຸກກະຕາສາກົນຄັ້ງນີ້ ແມ່ນບັນຫາປົກປັກຮັກສາສິ່ງແວດລ້ອມ. ໃນນັ້ນມີບົດລະຄອນທີ່ມີຊື່ວ່າ: “ ຍັກຂີ້ເຫຍື້ອ” ຂອງກອງສິລະປະກອນລະຄອນຕຸກກະຕາ ຟິລິບປີນ ເພື່ອ ສົ່ງສານປົກປັກຮັກສາສິ່ງແວດລ້ອມໃນໂລກຂອງພວກເຮົາຜ່ານການຍົກສູງສະຕິຄວາມຮັບຮູ້ຈາກວົງຄະນາຍາດ ແລະ ສຶກສາໃຫ້ພວກນ້ອງນ້ອຍພ້ອມກັນເຂົ້າຮ່ວມການປົກປັກຮັກສາສິ່ງແວດລ້ອມ. ສ່ວນລາຍການສະແດງຂອງກອງສິລະປະກອນຕຸກກະຕາ ສປປ ລາວ ແມ່ນສະແດງໃຫ້ເຫັນບັນຫາປົກປັກຮັກສາປ່າຂອງປະເທດລ້ານຊ້າງ. ນັກສິລະປິນ ເລີດມະນີ ອິນສີຊຽງໃຫມ່ ໃຫ້ຮູ້ວ່າ:
ສຽງ ນັກສິລະປິນ ເລີດມະນີ
ໃນງານມະໂຫລານລະຄອນຕຸກກະຕາສາກົນຄັ້ງນີ້, ກອງສິລະປະກອນ ປະເທດເຈົ້າພາບ ຫວຽດນາມ ໄດ້ ສະແດງຫລາຍລາຍການກວ່າໝູ່, ລວມມີ 8 ລາຍການ ນັບທັງຕຸກກະຕານ້ຳ ແລະ ຕຸກກະຕາ ເທິງບົກ ດ້ວຍຫລາຍຮູບການທີ່ອຸດົມສົມບູນ ແລະ ຫລາຍຮູບຫລາຍແບບ, ທັງມີລັກສະນະພື້ນເມືອງ ແລະ ທັນສະໄຫມ. ພິເສດ ບັນດາບົດລະຄອນຕຸກກະຕານ້ຳໄດ້ສ້າງຄວາມປະທັບໃຈທີ່ສຸດໃຫ້ແກ່ເພື່ອນມິດສາກົນ, ໃນນັ້ນ ພົ້ນເດັ່ນແມ່ນບົດລະຄອນ: ປະຊາຊົນຮ່ວມຊາດຄຳສັບທີ່ສັກກະລະບູຊາ ຂອງໂຮງລະຄອນຕຸກກະຕານ້ຳ ທັງລອງເຊິ່ງແມ່ນລາຍການໄດ້ຮັບລາງວັນສູງສຸດຢູ່ງານມະໂຫລານລະຄອນຕຸກະຕາສາກົນຄັ້ງນີ້ ຫລື ລາຍການສະແດງ ລະຄອນຕຸກກະຕາ “ສະພາບແວດລ້ອມທີ່ປອດໃສ” ຂອງໂຮງລະຄອນຕຸກກະຕາ ຫວຽດນາມ ທີ່ໄດ້ຮັບລາງວັນເງິນ. ນັກສິລະປິນ Dalang Wawan Gunawan Ajen ກອງສິລະປະກອນ ອິນໂດເນເຊຍ ໄດ້ແບ່ງປັນຄວາມຮູ້ສຶກຂອງຕົນກ່ຽວກັບບົດລະຄອນຕຸກກະຕານ້ຳຂອງ ຫວຽດນາມ ວ່າ:
“ບົດລະຄອນຕຸກກະຕານ້ຳ ຂອງ ຫວຽດນາມ ແມ່ນສ້າງຄວາມດຸູດດື່ມ ແລະ ເປັນເອກະລັກສະເພາະ. ຕຸກກະຕານ້ຳໄດ້ສະແດງເທິງນ້ຳ ດ້ວຍອຸປະກອນທີ່ເປັນເອກະລັກສະເພາະ. ຂ້າພະເຈົ້າບໍ່ຄິດໄດ້ວ່າ ຕຸກກະຕາພັດໄດ້ຮັບການສະແດງໃນນ້ຳຄືແນວນີ້. ລະຄອນຕຸກກະຕາຂອງພວກຂ້າພະເຈົ້າແມ່ນສະແດງເທິງບົກ…”
ລະຄອນຕຸກກະຕານ້ຳ
ພາບ: internet
|
ຜ່ານງານມະໂຫລານລະຄອນຕຸກກະຕາສາກົນຄັ້ງນີ້, ບັນດານັກສິລະປິນມາຈາກບັນດາປະເທດ ອາຊຽນ ມີກາລະໂອກາດພົບປະແລກປ່ຽນ, ຖອດຖອນບົດຮຽນເຊິ່ງກັນ ແລະ ກັນ ແລະ ເຂົາເຈົ້າປາດຖະຫນາຢາກມີກາລະໂອກາດເພື່ອຖອດຖອນເອົາບົດຮຽນຈາກສິລະປະລະຄອນຕຸກກະຕາທີ່ມາຈາກບັນດາປະເທດເພື່ອນມິດ ອາຊຽນ. ນັກສິລະປິນ Juancho Lunaria ມາຈາກ ຟິລິບປີນ ຍົກຂໍ້ລິເລີ່ມວ່າ:
“ໃນງານມະໂຫລານລະຄອນຕຸກກະຕາ ອາຊຽນ ຄັ້ງທີ 4 ຈະມາເຖິງ, ພວກຂ້າພະເຈົ້າສະເຫນີໃຫ້ເຫັນການແລກປ່ຽນສິລະປະລະຄອນຕຸກກະຕາລະຫວ່າງບັນດາປະເທດນຳກັນ, ຕົວຢ່າງ ກອງສິລະປະກອນ ຟິລີບປິນ ຈະສະແດງທົດລອງລະຄອນຕຸກກະຕາ Wayang Ajen ຂອງອິນໂດເນເຊຍ, ສ່ວນກອງສິລະປະກອນ ອິນໂດເນເຊຍ ສະແດງລະຄອນຕຸກກະຕານ້ຳຂອງ ຫວຽດນາມ. ເຮັດຄືແນວນັ້ນ ບັນດານັກສິລະປິນຈຶ່ງສາມາດຮຳ່ຮຽນເອົາບົດຮຽນກ່ຽວກັບປະເພດສິລະປະນີ້ໄດ້ ແລະ ຈະມີຄວາມເຂົ້າໃຈກ່ຽວກັບວັດທະນະທຳຂອງບັນດາປະເທດບ້ານໃກ້ເຮືອນຄຽງ.”
ງານມະໂຫລານລະຄອນຕຸກກະຕາສາກົນຄັ້ງທີ 3 ປີ 2012 ຢູ່ ຮ່າໂນ້ຍ ປະສົບຜົນສຳເລັດອັນດີງາມ. ຫວຽດນາມ ໄດ້ສຳເລັດບົດບາດເປັນຂົວເຊື່ອມຕໍ່ພົວພັນແລກປ່ຽນວັດທະນະທຳລະຫວ່າງປະເທດຕ່າງໆ, ໃນນັ້ນ ມີບັນດາປະເທດ ອາຊຽນ ພິເສດແມ່ນໃນສະພາບກ້າວໄປເຖິງການສ້າງປະຊາຄົມ ອາຊຽນ ໃນປີ 2015.