(vovworld)- ໂດຍມີຕົ້ນກຳເນີດແມ່ນຄະນະຄົ້ນຄ້ວາອາຊີຕາເວັນອອກສຽງໃຕ້ ຂຶ້ນກັບຄະນະກຳມະການວິທະຍາສາດສັງຄົມຫວຽດນາມ, ປະຈຸບັນ ແມ່ນສະພາບັນດີດວິທະຍາສາດສັງຄົມຫວຽດນາມ, ສະຖາບັນຄົ້ນຄ້ວາອາຊີຕາເວັນອອກສຽງໃຕ້ ໄດ້ພັດທະນາຢ່າງບໍ່ຢຸດຢັ້ງ, ກາຍເປັນສະຖາບັນຄົ້ນຄວ້າຕົ້ນຕໍກ່ຽວກັບອາຊີຕາເວັນອອກສຽງໃຕ້ຂອງຫວຽດນາມ. ໃນຕະຫລອດ 40 ປີແຫ່ງການພັດທະນາ, ສະຖາບັນຄົ້ນຄ້ວາອາຊີຕາເວັນອອກສຽງໃຕ້ ໄດ້ມີການ ຄົ້ນຄ້ວາຫລາຍຢ່າງ ປະກອບສ່ວນໃຫ້ແກ່ການພັດທະນາລວມຂອງຫວຽດນາມ ແລະ ພາກພື້ນ. ຍ້ອນເຫດນັ້ນ, ເດືອນ 11/2013 ຜ່ານມາ, ສະຖາບັນເປັນກຽດໄດ້ຮັບຫລຽນໄຊເອກະລາດຊັ້ນ 3 ໂດຍລັດມອບໃຫ້.
“ຄະນະຄົ້ນຄ້ວາອາຊີຕາເວັນອອກສຽງໃຕ້ ກ່ອນນີ້ມີພະນັກງານພຽງແຕ່ 18 ຄົນ, ມາຮອດປະຈຸບັນ ສະຖາບັນຄົ້ນຄ້ວາອາຊີຕາເວັນອອກສຽງໃຕ້ ປະກອບດ້ວຍ 8 ພະແນກ ແລະ ສູນຄົ້ນຄ້ວາ, ພະນັກງານມີ 52 ຄົນ, ໃນນັ້ນ 19 ຄົນແມ່ນສາດສະດາຈານ, ຮອງສາດສະດາຈານ, ດຣ ວິທະຍາສາດ ແລະ ດຣ, ພະນັກງານ 20 ຄົນ ແມ່ນປະລິຍາເອກ ມີຄວາມສາມາດຢ່າງພຽງພໍເພື່ອຮັບຜິດຊອບບັນດາຫນ້າທີຄົ້ນຄ້ວາວິທະຍາສາດ. ໃນ 40 ປີຜ່ານມາ, ສະຖາບັນໄດ້ມີບາດກ້າວເຕີບໂຕກະໂດດຂັ້ນ, ທັງໂຄງປະກອບການຈັດຕັ້ງ ແລະ ກຳລັງຄົ້ນຄ້ວາ.”
ສຳນັກງານຄະນະກຳມະການວິທະຍາສາດສັງຄົມຫວຽດນາມ
|
ຕາມຮອງສາດສະດາຈານ. ດຣ ຫງວຽນຢູຍຢູງ, ຫົວຫນ້າສະຖາບັນຄົ້ນຄ້ວາອາຊີຕາເວັນອອກສຽງໃຕ້ ແລ້ວ, ປີ 2013 ແມ່ນປີທີ່ເປັນຂີດໝາຍຂອງສະຖາບັນ. ໃນໄລຍະ 4 ທົດສະວັດແຫ່ງການສູ້ຊົນ ແລະ ພັດທະນາ, ສະຖາບັນ ໄດ້ເຕີບໃຫຍ່ໃນທຸກດ້ານ. ນັບແຕ່ຊຸມມື້ຫາກໍ່ສ້າງຕັ້ງຂຶ້ນມາຮອດປະຈຸບັນ, ສະຖາບັນ ໄດ້ມີຫລາຍກິດຈະການຄົ້ນຄ້ວາກ່ຽວກັບວິວັດທະນາການພັດທະນາວັດທະນະທຳອາຊີຕາເວັນອອກສຽງໃຕ້, ກ່ຽວກັບເສດຖະກິດ ສັງຄົມ ພາກພື້ນ, ບົນພື້ນຖານນັ້ນ ສະເຫນີຕໍ່ພັກ, ລັດວາງແຜນກຳນົດບັນດານະໂຍບາຍການຕ່າງປະເທດຂອງລັດສຳລັບພາກພື້ນ ແລະ ໂລກ.
ຕາມທ່ານນາງ ດຣ ເລທິແທງເຮືອງ, ຫົວຫນ້າພະແນກຄົ້ນຄ້ວາບັນດາທະເລໝູ່ເກາະ ແບ່ງປັນວ່າ, ບັນດາຜົນງານຂອງສະຖາບັນອາຊີຕາເວັນອອກສຽງໃຕ້, ແມ່ນມີການປະກອບສ່ວນຂອງບັນດາພະນັກງານຄືເອື້ອຍ :
“ພວກຂ້າພະເຈົ້າໄດ້ມີບາງກິດຈະການພົ້ນເດັ່ນຄື: ຄົ້ນຄວ້າກ່ຽວກັບປະຫວັດສາດ, ວັດທະນະທຳຂອງຟິລີບປີນ, ມາເລເຊຍ, ຄົ້ນຄ້ວາກ່ຽວກັບການປະທະກັນລະຫວ່າງເຊື້ອຊາດຜີວພັນສາດສະຫນາຢູ່ບັນດາປະເທດອາຊີຕາເວັນອອກສຽງໃຕ້, ກ່ຽວກັບສັງຄົມພົນລະເຮືອນ ຢູ່ ມາເລເຊຍ, ໄທ… ປະຈຸບັນ ພວກຂ້າພະເຈົ້າພວມຄົ້ນຄ້ວາ, ໄຈ້ແຍກບັນດາບັນຫາໃນປະຈຸບັນ, ທີ່ມີຄວາມຈຳເປັນຂອງພາກພື້ນຄື: ການພິພາດຢູ່ທະເລຕາເວັນອອກ, ສິ່ງທ້າທາຍ ແລະ ມາດຕະການແກ້ໄຂ.”
ປີ 1973, ໂດຍເລີ່ມມາຈາກຄວາມຈິງທີ່ວ່າ ບັນດາຄວາມເຂົ້າໃຈຂອງຫວຽດນາມ ກ່ຽວກັບອາຊີຕາເວັນອອກສຽງໃຕ້ຍັງຈຳກັດຢູ່ ໃນຂະນະທີ່ສະພາບການສາກົນ ແລະ ພາກພື້ນ ມີການຜັນແປຫລາຍຢ່າງ, ຄວນມີຄວາມເຂົ້າໃຈຢ່າງຈະແຈ້ງກ່ຽວກັບອາຊີຕາເວັນອອກສຽງໃຕ້ເພື່ອປະກອບສ່ວນເຂົ້າໃນການຕໍ່ສູ້ປົກປ່ອຍຊາດ, ລັດຖະບານ ຫວຽດນາມ ໄດ້ຕົກລົງສ້າງຕັ້ງອົງການຄົ້ນຄ້ວາແຫ່ງຫນຶ່ງ ເພື່ອຊອກຮູ້ກ່ຽວກັບອາຊີຕາເວັນອອກສຽງໃຕ້. ຮອງສາດສະດາຈານ, ດຣ ຫງວຽນຊີ້ຕວນ, ອະດີດຫົວຫນ້າສະຖາບັນຄົ້ນຄ້ວາອາຊີຕາເວັນອອກສຽງໃຕ້ໄລຍະ 2007-2011 ໃຫ້ຮູ້ວ່າ: ໂດຍໄດ້ຮັບການສ້າງຕັ້ງຈາກສະຖາບັນ ປະຫວັດສາດ. ໄລຍະທຳອິດ ສະຖາບັນ ມີຊື່ວ່າ ຄະນະຄົ້ນຄ້ວາອາຊີຕາເວັນອອກສຽງໃຕ້,
“ໄລຍະນັ້ນ ຄະນະ ຄົ້ນຄ້ວາອາຊີຕາເວັນອອກສຽງໃຕ້ ແມ່ນຂຶ້ນກັບຄະນະກຳມະການວິທະຍາສາດສັງຄົມ, ພື້ນຖານດ້ານວັດຖຸແມ່ນຫຍຸ້ງຍາກຂາດເຂີນຫລາຍ, ແຕ່ຜູ້ໃດກໍຕັ້ງໃຈຫ້າວຫັນໃນການຄົ້ນຄ້ວາ.”
ປະຈຸບັນ, ສະຖາບັນ ຄົ້ນຄ້ວາອາຊີຕາເວັນອອກສຽງໃຕ້ ຖືກຕັ້ງຢູ່ຊັ້ນ 8 ຂອງຕືກອາຄານໃຫຍ່ຂອງສະຖາບັນດີດ ວິທະຍາສາດສັງຄົມຫວຽດນາມ ຢູ່ ຖະຫນົນ ຫລຽວຢາຍ ບາດີງ ຮ່າໂນ້ຍ ດ້ວຍຫ້ອງເຮັດວຽກກວ້າງຂວາງ, ພະນັກງານແຕ່ລະຄົນລ້ວນແຕ່ໄດ້ປະກອບອຸປະກອນເຮັດວຽກທັນສະໄຫມ.
ໃນຕະຫລອດໄລຍະ 40 ປີແຫ່ງການສ້າງຕັ້ງ ແລະ ເຕີບໃຫຍ່, ສະຖາບັນ ຄົ້ນຄ້ວາອາຊີຕາເວັນອອກສຽງໃຕ້ ໄດ້ພິມຈຳຫນ່າຍປື້ມຄົ້ນຄ້ວາ 100 ຫົວ ແລະ 1000 ກິດຈະກຳຮັບໃຊ້ການຄົ້ນຄ້ວາວິທະຍາສາດ. ຮອງສາດສະດາຈານ, ດຣ ຟ້າມດືກແທ່ງ, ອະດີດສະຖາບັນ ຄົ້ນຄ້ວາອາຊີຕາເວັນອອກສຽງໃຕ້ ໄລຍະ 1991-2006 ຖືວ່າ: ໃນໄລຍະປະຈຸບັນ, ສະຖາບັນ ຄົ້ນຄ້ວາລົງເລິກບັນດາບັນຫາພົ້ນເດັ່ນ.
“ພວກເຮົາຄົ້ນຄ້ວາອາຊີຕາເວັນອອກສຽງໃຕ້, ເຮັດແນວໃດເພື່ອຖອດຖອນບົດຮຽນຕົວຈິງຂອງບັນດາປະເທດອາຊີຕາເວັນອອກສຽງໃຕ້ເພື່ອ ໝູນໃຊ້ບັນດາບົດຮຽນນັ້ນເຂົ້າໃນການພັດທະນາຂອງຫວຽດນາມ . ຜ່ານນັ້ນກຳນົດທິດໃຫ້ຫວຽດນາມ ເຂົ້າຮ່ວມປະຊາຄົມອາຊຽນໃນທ່າອ່ຽງເຊື່ອມໂຍງເຂົ້າກັບໂລກປະຈຸບັນ.”
ການກຳນົດທິດຂອງສະຖາບັນໃນຊຸມປີຕໍ່ໄປນັ້ນແມ່ນ: ສຸມໃສ່ຄົ້ນຄ້ວາບັນດາບັນຫາກ່ຽວກັບປະຫວັດສາດ, ວັດທະນະທຳ, ສັງຄົມຂອງບັນດາປະເທດອາຊີຕາເວັນອອກສຽງໃຕ້, ລົງເລິກຄົ້ນຄ້ວາມການເຊື່ອມໂຍງ, ການຮ່ວມມືພາຍໃນກຸ່ມ, ພິເສດແມ່ນປະຊາຄົມອາຊຽນ ດ້ວຍສາມເສົາຄ້ຳຄື: ປະຊາຄົມການເມືອງຄວາມໝັ້ນຄົງ, ປະຊາຄົມເສດຖະກິດ, ວັດທະນະທຳສັງຄົມ ແລະ ມີການເຂົ້າຮ່ວມຂອງຫວຽດນາມ. ພິເສດ ສອງກິດຈະການທີ່ສະຖາບັນໃກ້ສຳເລັດນັ້ນແມ່ນ “ການພົວພັນລະຫວ່າງ ຫວຽດນາມ ແລະ ກຳປູເຈຍ” ແລະ “ການພັດທະນາສັງຄົມຂອງບັນດາປະເທດ ອາຊຽນ”