(vovworld)-ມີທະນາຄານ ແລະ ອົງການການເງິນຫລາຍແຫ່ງຢູ່ສິງກະໂປ ພວມເຊົ່າບັນດາຕຶກອາຄານປູຊະນີຍະສະຖານເພື່ອຮັບໃຊ້ການບຳລຸງສ້າງພະນັກງານລັດຖະກອນຂອງບັນດາສາຂາ ແລະ ຫ້ອງການຜູ້ຕາງຫນ້າຂອງຕົນໃນພາກພື້ນ ອາຊີປາຊີຟີກ. ບັນດາສັນຍາໃຫ້ເຊົ່ານີ້ ບໍ່ພຽງແຕ່ນຳມາເຊິ່ງລາຍຮັບໃຫຍ່ໃຫ້ແກ່ລັດຖະບານ ສິງກະໂປ ເທົ່ານັ້ນ ຫາກຍັງສ້າງຊີວິດໃຫມ່ໃຫ້ແກ່ຕຶກອາຄານ.
ນະໂຍບາຍໃຫ້ເຊົ່າບັນດາຕຶກອາຄານເກົ່າຂອງລັດຖະບານສິງກະໂປ ພວມໄດ້ຮັບການຕອບສະຫນອງຈາກກຸ່ມບໍລິສັດການເງິນນາໆຊາດ
photo:internet
|
ຕຶກອາຄານກອງບັນຊາການທະຫານ ຫລືເອີ້ນວ່າ ຕຶກອາຄານ Flagstaff, ກ່ອນນີ້ແມ່ນບ່ອນພັກອາໄສຂອງການນຳຈຳນວນຫນ່ຶງໃນໄລຍະທີ່ ສິງກະໂປເປັນຫົວເມືອງຂຶ້ນຂອງອັງກິດໃນຊຸມປີ 1930. ຕຶກອາຄານຫລັງນີ້ ກໍຮັບໃຊ້ບັນດາອົງການແຫ່ງລັດສິງກະໂປ ໃນທ້າຍປີ 1990 ກ່ອນທີ່ໄດ້ຮັບການຮັບຮອງແມ່ນປູຊະນີຍະສະຖານລະດັບຊາດໃນປີ 2009. ປະຈຸບັນ, Flagstaff ໄດ້ກາຍເປັນສູນບຳລຸງສ້າງການດຳເນີນທຸລະກິດຂອງ UBS, ຊື່ງແມ່ນກຸ່ມບໍລິສັດການເງິນຂອງ ສະວິດ. UBS ໄດ້ປະກອບບັນດາເຕັກໂນໂລຊີໃຫມ່ສຸດ, ເພື່ອຊຸກຍູ້ການຮຳ່ຮຽນ ແລະ ພັດທະນາຂອງລັດຖະກອນ. ທ່ານ Moria Roberts, ຜູ້ອຳນວຍການຮັບຜິດຊອບບັນຫາຊັບພະຍາກອນມະນຸດຂອງ UBS ໃຫ້ຮູ້ວ່າ: ນີ້ແມ່ນກາລະໂອກາດເພ່ືອໃຫ້ການດຳເນີນທຸລະກິດເຕີບໂຕ ແລະ ພວກຂ້າພະເຈົ້າປາດຖະຫນາຢາກພັດທະນາບັນດາຄວາມເກັ່ງກ້າສາມາດຂອງຕົນຢູ່ພາກພື້ນ ອາຊີ ປາຊີຟິກ.
“ພວກຂ້າພະເຈົ້າເລີ່ມຕົ້ນການບູລະນະ ແລະ ຕິດຕັ້ງອຸປະກອນທີ່ຈຳເປັນໃຫ້ແກ່ຕຶກອາຄານນີ້ເມື່ອປີ 2007. ພວກຂ້າພະເຈ້ົ້າຖືວ່າ ນີ້ແມ່ນການພິສູດໃຫ້ແກ່ການລົງທຶນເຂົ້າຖັນແຖວລັດຖະກອນຂອງພວກຂ້າພະເຈົ້າໃນພາກພື້ນ. ໃນຈຸດເວລານັ້ນ, ນີ້ແມ່ນບ້ວງລາຍຈ່າຍຫລາຍພໍສົມຄວນ. ພວກຂ້າພະເຈົ້າກໍໄດ້ເລືອກເຟັ້ນຫລາຍບ່ອນ, ແຕ່ ສຸດທ້າຍແມ່ນເລືອກເຟັ້ນຕຶກອາຄານນີ້.”
ເຂົ້າຮ່ວມທ່າອ່ຽງນີ້ ມີກຸ່ມບໍລິສັດຊັ້ນນຳໂລກຫລາຍແຫ່ງຄື: ກຸ່ມທະນາຄານ ຝລັ່ງ BNP Paribas, ກຸ່ມບໍລິສັດປະກັນໄພ ຝລ່ັງ AXA.. ກຸ່ມບໍລິສັດປະກັນໄພ ຝລ່ັງ AXA ໄດ້ເຊ່ົາຕຶກອາຄານ Kinloss,ກ່ອນນີ້ ແມ່ນໂຮງຮຽນກິນນອນໃຫ້ແກ່ລູກຫລານຂອງກຳລັງທະຫານ ອັງກິດ ໃນຊຸມປີ 1950-1970 ຢູ່ຖະຫນົນ Ladyhill ນຳໃຊ້ເປັນສູນບຳລຸງສ້າງ AXA ພາກພື້ນ ປາຊີຟີກ. ດ້ວຍຫ້ອງຮຽນ 10 ຫ້ອງ, ສູນນີ້ສາມາດຮັບໃຊ້ນັກຮຽນ 400 ຄົນທີ່ມາຈາກບັນດາສາຂາ ແລະ ຫ້ອງການ AXA ຢູ່ ອາຊີຕາເວັນອອກສ່ຽງໃຕ້, ສເກົາຫລີ, ຍີ່ປຸ່ນ. ທ່ານນາງ Caroline Buhagiar, ຜູ້ອຳນວນການສູນບຳລຸງສ້າງ ແລະ ພັດທະນາແຫລ່ງຊັບພະຍາກອນມະນຸດ AXA ພາກພື້ນ ອາຊີໃຫ້ຮູ້ວ່າ:
“ພວກຂ້າພະເຈົ້າມີແຜນການພັດທະນາການດຳເນີນທຸລະກິດຢູ່ ອາຊີ. ສະນັ້ນ ພວກຂ້າພະເຈົ້າໄດ້ລົງທຶນສູນບຳລຸງສ້າງນີ້. ແລະ ໂຊກດີຫລາຍທີ່ ພວກຂ້າພະເຈົ້າໄດ້ຮັບການອຸປະຖຳຈາກລັດຖະບານ ສິງກະໂປ ໃນການບູລະນະຕຶກອາຄານເກົ່າ ເພື່ອນຳເຂົ້າຮັບໃຊ້ການຮຳ່ຮຽນໃນປະຈຸບັນ.”
ເປັນທີ່ຈະແຈ້ງແລ້ວວ່າ: ນະໂຍບາຍໃຫ້ເຊົ່າບັນດາຕຶກອາຄານເກົ່າຂອງລັດຖະບານສິງກະໂປ ພວມໄດ້ຮັບການຕອບສະຫນອງຈາກກຸ່ມບໍລິສັດການເງິນນາໆຊາດ. ທ່າອ່ຽງນີ້ໄດ້ນຳມາເຊິ່ງຊີວິດໃຫມ່ໃຫ້ແກ່ຕຶກອາຄານ, ນຳມາເຊິ່ງລາຍຮັບໃຫ້ແກ່ລັດຖະບານ ສິງກະໂປ, ດ້ານອື່ນ ພວມເຮັດໃຫ້ສິງກະໂປ ກາຍເປັນສູນການເງິນຂອງພາກພື້ນ ອາຊີ ປາຊີຟີກ. ເພາະວ່າ ເມື່ອບັນດາກຸ່ມບໍລິສັດການເງິນນາໆຊາດລົງທຶນ, ກໍ່ສ້າງສູນບຳລຸງສ້າງຮັບໃຊ້ການຝືກອົບຮົມລັດຖະກອນຢູ່ພາກພື້ນ, ສິ່ງດັ່ງກ່າວກໍໝາຍຄວາມວ່າ ບັນດາກຸ່ມບໍລິສັດນີ້ຖືວ່າ ນີ້ແມ່ນສຳນັກງານມີລັກສະນະພາກພື້ນ. ບັນດາກອງປະຊຸມສຳມະນາໃນພາກພື້ນ ຈະຖືກຈັດຂຶ້ນຢູ່ທີ່ນີ້. ບັນດາເຫດການໃຫຍ່ຈະຖືກປືກສາຫາລືຢູ່ສິງກະໂປ. ສິ່ງດັ່ງກ່າວຢືນຢັນຄວາມໄວ້ເນື້ອເຊື່ອໃຈຂອງບັນດາກຸ່ມບໍລິສັດນາໆຊາດສຳລັບສິງກະໂປ ແລະ ສິ່ງສຳຄັນກວ່າ, ອິດທິພົນຊື່ສຽງຂອງສິງກະໂປຢູ່ຕະຫລາດການເງິນໂລກກໍຈະໄດ້ຮັບການຍົກສູງຂຶ້ນ.