(vovworld)- ໂຄງການຫນຶ່ງມີຄວາມເປັນໄປໄດ້, ນັ້ນແມ່ນໂຄງການກໍ່ສ້າງສາຍທາງລົດໄຟຄວາມໄວສູງເຊື່ອມຕໍ່ ມາເລເຊຍ ແລະ ສິງກະໂປ ພວມໄດ້ຮັບການກະກຽມຈາກລັດຖະບານສອງປະເທດເພື່ອເລີ່ມລົງມືກໍ່ສ້າງໃນປີ 2017. ຄາດວ່າ ພາຍຫລັງໄດ້ຮັບການກໍ່ສ້າງສຳເລັດເມື່ອປີ 2022, ນີ້ຈະແມ່ນສາຍທາງລົດໄຟຄວາມໄວສູງຍາວກ່ວາໝູ່ຢູ່ພາກພື້ນ ອາຊີຕາເວັນອອກສ່ຽງໃຕ້ ແລະ ຈະຊຸກຍູ້ພື້ນຖານເສດຖະກິດສອງປະເທດພັດທະນາ.
ສະພາບລົດຕິດຢູ່ຂົວ Second Link ໃກ້ກັບຊາຍແດນ
ມາເລເຊຍ ແລະ ສິງກະໂປ
ພາບ:baogiaothong
|
ສາຍທາງລົດໄຟຄວາມໄວສູງເຊື່ອມຕໍ່ ມາເລເຊຍ ແລະ ສິງກະໂປ ມີຄວາມຍາວ 350 ກິໂລແມັດ ດ້ວຍສະຖານີລົດໄຟ 7 ແຫ່ງ, ໃນນັ້ນ ຢູ່ ມາເລເຊຍ ແມ່ນ ສະຖານີລົດໄຟ Bandar Malaysia, Seremban, Ayer Keroh, Muar, Batu Pahat Nusajaya, ສ່ວນຢູ່ ສິງກະໂປ ມີສະຖານີລົດໄຟ Jurong East. ຄາດວ່າ ຖ້າໄປຈາກສະຖານີລົດໄຟທຳອິດຮອດສະຖານີລົດໄຟສຸດທ້າຍ ເສຍເວລາພຽງ 90 ນາທີ. ຊາວມາເລເຊຍ ຜູ້ຫນຶ່ງໄດ້ແບ່ງປັນຄວາມຄິດຂອງຕົນກ່ຽວກັບສາຍທາງລົດໄຟຄວາມໄວສູງກວ່າໝູ່ຢູ່ ພາກພື້ນ ອາຊີຕາເວັນອອກສ່ຽງໃຕ້ວ່າ.
“ຈະມີຄວາມສະດວກກວ່າ. ພວກຂ້າພະເຈົ້າ ບໍ່ຕ້ອງເສຍເວລາ 1 ຫລື 2 ຊົ່ວໂມງເພື່ອໄປມາລະຫວ່າງສອງປະເທດອີກ. ຂ້າພະເຈົ້າເສຍເວລາພຽງ 30 ນາທີ. ລົດໄຟຍາມໃດກໍມາທັນກັບເວລາກຳນົດ. ສິ່ງດັ່ງກ່າວໄດ້ຊ່ວຍໃຫ້ພວກຂ້າພະເຈົ້າຮູ້ສຶກວ່າພວມຢູ່ໃກ້ກັບນະຄອນ, ຄ້າຍຄືວ່າໄດ້ຂີ່ຍົນແທ້.”
ໂຄງການສາຍທາງລົດໄຟເຊື່ອມຕໍ່ ມາເລເຊຍ ແລະ ສິງກະໂປ ໂດຍລັດຖະບານສອງປະເທດປຶກສາຫາລືເມື່ອເດືອນ 2/2013. ກ່ອນຫນ້ານັ້ນ, ເດືອນ 10/2015, ການສຳຫລວດຮ່ວມໄດ້ຮັບການຈັດຕັ້ງຂຶ້ນເພື່ອຕີລາຄາຄືນອັດຕາກຳໄລກໍຄືບັນດາບັນຫາກ່ຽວຂ້ອງເຖິງປັດໄຈການຄ້າ ແລະ ເຕັກນິກຂອງໂຄງການສາຍທາງລົດໄຟຄວາມໄວສູງ ສິງກະໂປ - ມາເລເຊຍ. ວັນທີ 19/7/2016, ທ່ານນາຍົກລັດຖະມົນຕີ ສິງກະໂປ ຫລີຊຽນຫລົງ ແລະ ຄູ່ຕຳແຫນ່ງ ມາເລຊຍ Najib Razak ໄດ້ພ້ອມກັນເປັນສັກຂິພິຍານພິທີລົງນາມໃນບົດບັນທຶກຊ່ວຍຈຳກ່ຽວກັບໂຄງການສາຍທາງລົດໄຟຄວາມໄວສູງສາກົນເຊື່ອມຕໍ່ລະຫວ່າງສອງປະເທດ. ຄາດວ່າ ໂຄງການນີ້ເລີ່ມລົງມືກໍ່ສ້າງໃນປີ 2017 ແລະ ຈະກໍ່ສ້າງສຳເລັດໃນປີ 2022. ດ້ວຍບ້ວງລາຍຈ່າຍລົງທຶນ ຄາດວ່າຂຶ້ນເຖິງກວ່າ 10 ຕື້ USD, ສາຍທາງລົດໄຟຄວາມໄວສູງນີ້ຈະເຊື່ອມຕໍ່ ສອງເຂດເສດຖະກິດ ພ້ອມທັງສ້າງຄວາມສະດວກໃຫ້ການເຄື່ອນໄຫວທ່ອງທ່ຽວລະຫວ່າງສອງປະເທດ. ທ່ານນາງ Fui Soong, ຜູ້ອຳນວຍການບໍລິຫານສູນເຂົ້າຮ່ວມຍຸດທະສາດຂອງ ມາເລເຊຍ ໃຫ້ຂໍ້ສັງເກດວ່າ: ສາຍທາງລົດໄຟຄວາມໄວສູງເຊື່ອມຕໍ່ ມາເລເຊຍ ແລະ ສິງກະໂປ ຈະປະກອບສ່ວນສຳຄັນ ຄືດັ່ງສາຍທາງລົດໄຟເຫນືອລົງໃຕ້ ຂອງ ມາເລເຊຍ ໃນປີ 1980,1990, ຊ່ວຍໃຫ້ໂສມຫນ້າເສດຖະກິດຂອງ ມາເລເຊຍ ມີການປ່ຽນແປງ.
“ໃນທົດສະວັດກ່ອນ, ມາເລເຊຍ ບໍ່ມີໂຄງການໃດມີຂອບຂະຫນາດໃຫຍ່ ເພື່ອສາມາດຊຸກຍູ້ພື້ນຖານເສດຖະກິດ. ໃນ 8 ປີຜ່ານມາ, ດ້ານການເມືອງໄດ້ເກີດການຜັນແປຫລາຍຢ່າງ ແຕ່ກໍ ມີຄວາມມານະພະຍາຍາມຫລາຍຢ່າງເພື່ອສ້າງຄວາມໄວ້ເນື້ອເຊື່ອໃຈຕໍ່ປະຊາຊົນ. ແລະ ໂຄງການສາຍທາງລົດໄຟຄວາມໄວສູງເຊື່ອມຕໍ່ ມາເລເຊຍ ແລະ ສິງກະໂປ ຈະສ້າງຄວາມໄວ້ເນື້ອເຊື່ອໃຈໃຫ້ປະຊາຊົນ. ພ້ອມກັບການຫນູນຊ່ວຍຈາກລັດຖະບານ, ໂຄງການນີ້ ຈະສ້າງກຳລັງຫນູນໃຫ້ພື້ນຖານເສດຖະກິດ.”
ທາງລົດໄຟຄວາມໄວສູງ
ພາບປະກອບ
|
ບໍ່ພຽງແຕ່ໄດ້ຮັບຄວາມເອົາໃຈໃສ່ຈາກປະຊາຊົນ ແລະ ລັດຖະບານສອງປະເທດ, ສາຍທາງລົດໄຟຄວາມໄວສູງເຊື່ອມຕໍ່ ມາເລເຊຍ ແລະ ສິງກະໂປ ພວມດຶງດູດບັນດາບໍລິສັດກໍ່ສ້າງ ແລະ ຕໍ່ກຳປັ່ນສາກົນເຂົ້າຮ່ວມ. ມີ 3 ບໍລິສັດຂອງ ຍີ່ປຸ່ນ, ຈີນ ແລະ ສເກົາຫລີ ຈົດທະບຽນເຂົ້າຮ່ວມການປະມູນລົງທຶນກໍ່ສ້າງໂຄງການນີ້. ກ່ອນນັ້ນ, ໃນເດືອນ 5 ຜ່ານມາ, ຍີ່ປຸ່ນ ໄດ້ຈັດຕັ້ງງານວາງສະແດງກ່ຽວກັບຂະແຫນງສາຍທາງລົດໄຟຍີ່ປຸ່ນ, ເພື່ອແນໃສ່ແນະນຳ ໃຫ້ ມາເລເຊຍ ບັນດາເຕັກໂນໂລຊີສາຍທາງລົດໄຟຄວາມໄວສູງທັນສະໄຫມຂອງ ຍີ່ປຸ່ນ. ດຣ Makio Miyagawa, ເອກອັກຄະລັດຖະທູດ ຍີ່ປຸ່ນ ປະຈຳ ມາເລເຊຍ ຢືນຢັນວ່າ:
“ການເລືອກເຟັ້ນແມ່ນຂຶ້ນກັບ ມາເລເຊຍ ແລະ ສິງກະໂປ. ພວກຂ້າພະເຈົ້າປາດຖະຫນາວ່າ ສອງປະເທດ ຈະເລືອກເຟັ້ນລະບົບດີສຸດ, ປອດໄພທີ່ສຸດ. ເພື່ອໃຫ້ສາຍທາງລົດໄຟນີ້ຈະກາຍເປັນຮູບແບບດີເດັ່ນໃຫ້ບັນດາປະເທດ ອາຊີຕາເວັນອອກສ່ຽງໃຕ້ ອື່ນ ກໍຄືໃຫ້ທົ່ວໂລກ.”
ໃນສະພາບປະຊາຄົມ ອາຊຽນ ຫາກໍ່ໄດ້ຮັບການສ້າງຕັ້ງຂຶ້ນ, ການເຊື່ອມຕໍ່ລະຫວ່າງບັນດາປະເທດສະມາຊິກ ແມ່ນສວມບົດບາດສຳຄັນ. ສະນັ້ນ ໂຄງການສາຍທາງລົດໄຟຄວາມໄວສູງເຊື່ອມຕໍ່ ມາເລເຊຍ ແລະ ສິງກະໂປ ຈະກາຍເປັນຮູບແບບດີເດັ່ນເພື່ອໃຫ້ຫລາຍປະເທດ ອາຊຽນ ທາບທາມ.