ຫໍພິພິທະພັນ ອາຊີຕາເວັນອອກສ່ຽງໃຕ້ ມີຊື່ວ່າ “ວ່າວ”

ຫໍພິພິທະພັນ ອາຊີຕາເວັນອອກສ່ຽງໃຕ້ ມີຊື່ວ່າ “ວ່າວ” ແມ່ນຕຶກອາຄານລວມມີ 4 ຊັ້ນ ດ້ວຍເນື້ອທີ່ເກືອບ 5 ເຮັກຕາ. ຫໍພິພິທະພັນດັ່ງກ່າວໄດ້ນຳເຂົ້າເຄື່ອນໄຫວຢ່າງເປັນທາງການໃນປີ 2013 ພາຍຫຼັງການກໍ່ສ້າງພາຍໃຕ້ການສົມທົບ ແລະ ຮ່ວມມືກັນກໍ່ສ້າງຂອງບັນດານັກຊ່ຽວຊານ ຫວຽດນາມ ແລະ ຝລັ່ງ ມາເປັນເວລາ 6 ປີ ແລະ ໄດ້ຮັບການຕີລາຄາຢ່າງຕັ້ງໜ້າຈາກວົງການນັກຄົ້ນຄວ້າ ກໍຄື ແຂກທີ່ມາຢ້ຽມຊົມ. ເມື່ອເວົ້າກ່ຽວກັບສະຖາປັດຕະຍາກຳທີ່ເປັນເອກະລັກສະເພາະຂອງຫໍພິພິທະພັນແຫ່ງນີ້, ທ່ານຮອງສາດສະດາຈານ, ປະລິນຍາເອກ ຫງວຽນຢຸຍທ້ຽວ, ອະດີດຮອງຜູ້ອຳນວຍການຫໍພິພິທະພັນຊົນເຜົ່າວິທະຍາ ຫວຽດນາມ ໃຫ້ຮູ້ວ່າ:

ທ່ານຮອງສາດສະດາຈານ, ປະລິນຍາເອກ ຫງວຽນຢຸຍທ້ຽວ

“ຕາມທິດສະດີແລ້ວ, ສ້າງຫໍພິພິທະພັນແມ່ນການສ້າງບ່ອນວາງສະແດງທີ່ໜ້າຈັບໃຈ. ເພື່ອສ້າງໄດ້ຮູບຊົງ, ສ້າງໄດ້ຄວາມປະທັບໃຈນັ້ນ ແມ່ນຕ້ອງອີງໃສ່ວັດນະທະນະທຳຂອງປະຊາຄົມ. ພວກເຮົາກຳລັງດຳລົງຊີວິດໃນພາກພື້ນ ອາຊີຕາເວັນອອກສ່ຽງໃຕ້, ແມ່ນພາກພື້ນທີ່ມີອະລິຍາທຳກ່ຽວກັບການເຮັດກະສິກຳ ຕິດພັນກັບພິທີຂໍຝົນ ເພື່ອປູກຕົ້ນໄມ້, ເມື່ອຝົນຕົກຫຼາຍຈົນຖ້ວມ ກໍຈະເຮັດພິທີຂໍໃຫ້ຝົນເອື້ອນ, ເວລານັ້ນ ເຂົາຈະປ່ອຍວ່າວຂຶ້ນທ້ອງຟ້າ ເຊິ່ງເປັນສັນຍະລັກໃຫ້ເຈົ້າຟ້າແລ້ງ, ເນື່ອງຈາກທັດສະນະຄະຕິຄືແນວນັ້ນ, ພວກຂ້າພະເຈົ້າໄດ້ອອກແບບ ແລະ ກໍ່ສ້າງຫໍພິພິທະພັນຕາມຮູບວ່າວ”.

ສາສະໜາພຸດນິກາຍມະຫາຍານ

 ເພື່ອມີປະລິມານວັດຖຸພັນຫາຍາກກວ່າ 2.200 ຢ່າງ ພ້ອມດ້ວຍເທບບັນທຶກສຽງ, ພາບ, ເອກະສານສຳຄັນຈຳນວນຫຼວງຫຼາຍ ເຊິ່ງສ່ອງແສງໃຫ້ເຫັນວິຖີການດຳລົງຊີວິດ ແລະ ວັດທະນະທຳທີ່ເປັນເອກະລັກສະເພາະຂອງບັນດາເຜົ່າ, ບັນດາປະເທດໃນພາກພື້ນນັ້ນ, ບັນດານັກຄົ້ນຄວ້າຂອງຫໍພິພິທະພັນໄດ້ໄປເກັບກຳສະສົມຢູ່ບັນດາປະເທດໃນພາກພື້ນ ອາຊີຕາເວັນອອກສ່ຽງໃຕ້ ເຖິງຈະປະສົບກັບຄວາມຫຍຸ້ງຍາກຫຼາຍຢ່າງ ແຕ່ກໍໄດ້ຮັບການຊ່ວຍເຫຼືອຈາກບັນດາຄູ່ຮ່ວມມື ກໍຄື ປະຊາຊົນປະຈຳຖິ່ນ. ນອກຈາກນັ້ນ, ຫໍພິພິທະພັນແຫ່ງນີ້ ຍັງໄດ້ຮັບຊຸດວັດຖຸພັນທີ່ຫາຍາກຈາກບັນດານັກສະສົມຕ່າງປະເທດມອບໃຫ້ອີກດ້ວຍ.

ພາບແກ້ວ ອິນໂດເນເຊຍ

   ຢູ່ຊັ້ນສອງຂອງຫໍພິພິທະພັນ ອາຊີຕາເວັນອອກສ່ຽງໃຕ້ ໄດ້ວາງສະແດງຊຸດວັດຖຸພັນພິເສດ 3 ຊຸດ ຂອງບັນດານັກວິທະຍາສາດ, ນັກຄົ້ນຄວ້າວັດທະນະທຳມອບໃຫ້. ນັ້ນແມ່ນຊຸດວັດຖຸພັນ “ຊົນເຜົ່າວິທະຍາ ອາຊີ” ຂອງສາດສະດາຈານ Kaneko Kazushige (ຍີ່ປຸ່ນ);  “ພາບແກ້ວ ອິນໂດເນເຊຍ„ ຂອງສອງຜົວເມຍ ອາຈານສອນມວຍ Pencaksilat O’ong Maryono ແລະ  Rosalia Sciortino (ອີຕາລີ); “ຊ່ວງໄລຍະເວລາໜຶ່ງຂອງວັດທະນະທຳໂລກ„ ຂອງສາດສະດາຈານ ເລແທັ່ງຄອຍ (ຊາວ ຫວຽດນາມ, ເຊື້ອຊາດ ຝລັ່ງ) ພ້ອມດ້ວຍວັດຖຸພັນກວ່າ  300 ຢ່າງ ເຊິ່ງມາຈາກຫຼາຍພື້ນຖານວັດທະນະທຳຢູ່ທະວີບອື່ນໆໃນໂລກ, ໃນຫຼາຍສະໄໝທີ່ແຕກຕ່າງກັນຂອງຫຼາຍພື້ນຖານອະລິຍາທຳ. ນອກຈາກນັ້ນ, ຫໍພິພິທະພັນແຫ່ງນີ້ ຍັງວາງສະແດງວັດຖຸພັນເກືອບ 400 ຢ່າງ ຕິດຂັດມາພ້ອມແມ່ນລະບົບຂໍ້ມູນ ລວມມີແຜນທີ່, ຄຳອະທິບາຍ, ໝາຍເຫດ, ບົດຂຽນ, ຟິມຮູບເງົາ, ຄຼິບວີດີໂອ ກ່ຽວກັບວັດທະນະທຳຂອງບັນດາເຜົ່າໃນພາກພື້ນ ອາຊີຕາເວັນອອກສ່ຽງໃຕ້ ເຊິ່ງໄດ້ຈັດວາງໃນຫ້ອງທີ່ມີເນື້ອທີ່ເກືອບ 500 ຕາແມັດ ຢູ່ຊັ້ນໜຶ່ງຂອງຫໍພິພິທະພັນ.

ເຄື່ອງດົນຕີພື້ນເມືອງຂອງ ກຳປູເຈຍ

   ການວາງສະແດງຖືກຈັດຕາມແບບທັນສະໄໝ, ມີລັກສະນະວິທະຍາສາດ ແລະ ວິຈິດສິນສູງ ໂດຍຜ່ານ 5 ຫົວຂໍ້ຕົ້ນຕໍຄື: ປະເພດເຄື່ອງແຜ່ນແພ, ຊີວິດປະຈຳວັນ, ຊີວິດສັງຄົມ, ສິລະປະການສະແດງ ແລະ ສາສະໜາ. ມີຫຼາຍປັດໄຈວັດທະນະທຳຂອງປະຊາຊົນພາກພື້ນ ອາຊີຕາເວັນອອກສ່ຽງໃຕ້ ໄດ້ສະແດງໃຫ້ເຫັນພາກພື້ນອາຊີຕາເວັນອອກສ່ຽງໃຕ້ທີ່ມີສີສັນຫຼາກຫຼາຍ ແລະ ມີຄວາມເປັນເອກະພາບໃນພື້ນຖານວັດທະນະທຳ ແລະ ວິຖີການດຳລົງຊີວິດ ອັນໄດ້ດຶງດູດຄວາມສົນໃຈຂອງຜູ້ມາຢ້ຽມຊົມ ບໍ່ພຽງແຕ່ແມ່ນແຂກທ່ອງທ່ຽວພາຍໃນປະເທດ ແລະ ສາກົນ ເທົ່ານັ້ນ ຫາກບັນດາຄະນະນັກການທູດ ແລະ ປະມຸກລັດຫຼາຍປະເທດ ເມື່ອມາຢ້ຽມຢາມ ຫໍພິພິທະພັນແຫ່ງນີ້ ເປັນຕົ້ນແມ່ນ ທ່ານນາງ  Hillary Clinton, ທ່ານອະດີດປະທານາທິບໍດີ ອາເມລິກາ Obama, ເຈົ້າຊາຍຍີ່ປຸ່ນ ພ້ອມດ້ວຍພັນລະຍາ....

        ນີ້ແມ່ນຄັ້ງທຳອິດທີ່ຂ້າພະເຈົ້າມາຢ້ຽມຢາມຫໍພິພິທະພັນອາຊີຕາເວັນອອກສ່ຽງໃຕ້. ຂ້າພະເຈົ້າມີຄວາມແປກປະຫຼາດໃຈ ແລະ ປະທັບໃຈຕໍ່ບັນດາພື້ນຖານວັດທະນະທຳຂອງບັນດາປະເທດໃນ ອາຊຽນ ທີ່ມີຫຼາຍຮູບຫຼາຍແບບໂດຍຜ່ານບັນດາວັດຖຸພັນທີ່ໄດ້ນຳມາວາງສະແດງຢູ່ທີ່ນີ້. ຂ້າພະເຈົ້າຫວັງວ່າ ຫໍພິພິທະພັນແຫ່ງນີ້ ຈະນັບມື້ນັບພັດທະນາ ຫຼາຍກວ່າອີກໃນອະນາຄົດ.

        ນ້ອງເຫັນວ່າ ການວາງສະແດງຢູ່ຫໍພິທີທະພັນນີ້ ມີຄວາມຈັບອົກຈັບໃຈພໍສົມຄວນ, ຊ່ວຍດຶງດູດຄວາມສົນໃຈຂອງຜູ້ຊົມ. ເມື່ອມາທີ່ນີ້, ນ້ອງມີຄວາມເຂົ້າໃຈຕື່ມອີກກ່ຽວກັບປະຫວັດສາດວັດທະນະທຳຂອງ ຫວຽດນາມ ກໍຄືຂອງບັນດາປະເທດ ອາຊຽນ. ນ້ອງເຫັນວ່າ ການມາຢ້ຽມຢາມຫໍພິພິທະພັນຄັ້ງນີ້ ນຳມາເຊິ່ງປະໂຫຍດຫຼາຍຢ່າງສຳລັບນ້ອງ.

ສິລະປະຟ້ອນຕຸກກະຕາ ຂອງ ມາເລເຊຍ

  ໃນວິວັດການເຄື່ອນໄຫວ, ຫໍພິພິທະພັນ ອາຊີຕາເວັນອອກສ່ຽງໃຕ້ ກໍໄດ້ສົມທົບກັບສະຖານທູດບັນດາປະເທດປະຈຳ ຫວຽດນາມ ຈັດກິດຈະກຳຕ່າງໆຕາມເຫດການ ແລະ ເຊື້ອເຊີນບັນດາປະເທດໃນພາກພື້ນເຂົ້າຮ່ວມການວາງສະແດງ, ການສະແດງສິລະປະ, ສົມທົບກັນແນະນຳກ່ຽວກັບວັດນະທະທຳ, ເປັນຕົ້ນແມ່ນ: ສະແດງລາຍການສິລະປະຈາກບັນດານັກສິລະປິນທີ່ມາຈາກ ໄທ, ລາວ; ການຄົ້ນຫາກ່ຽວກັບພາກພື້ນອາຊີຕາເວັນອອກສ່ຽງໃຕ້… ເຖິງຢ່າງໃດກໍຕາມ, ນັບແຕ່ຕົ້ນປີ 2020 ມານີ້, ຍ້ອນຖືກຜົນກະທົບຈາກໂລກລະບາດໂຄວິດ - 19 ສະນັ້ນ, ຈຳນວນແຂກທ່ອງທ່ຽວມາຢ້ຽມຊົມຫໍພິພິທະພັນກໍຖືກຫຼຸດລົງຫຼາຍ. ເພາະສະນັ້ນ, ທາງຫໍພິພິທະພັນກໍໄດ້ວາງອອກມາດຕະການຕ່າງໆໃຫ້ເໝາະສົມກັບສະພາບການ ເປັນຕົ້ນແມ່ນ ຈັດລາຍການເຄື່ອນໄຫວຢູ່ໂຮງຮຽນແຫ່ງຕ່າງໆ ເພື່ອຮັບໃຊ້ແກ່ການຄົ້ນຫາມໍລະດົກ, ວັດທະນະທຳ ໃນສະພາບການປົກກະຕິໃໝ່. ພ້ອມດຽວກັນນັ້ນ, ກໍເພີ່ມທະວີບັນດາມາຕະການໂຄສະນາເຜີຍແຜ່ຜ່ານສື່ສັງຄົມອອນລາຍ, ແນະນຳວັດຖຸພັນ ແລະ ເລື່ອງລາວ, ການເຄື່ອນໄຫວຕ່າງໆຂອງຫໍພິພິທະພັນ ແລະ ສະຖານທີ່ຄົ້ນຫາຂອງຫໍພິພິທະພັນຜ່ານບັນດາສື່ສັງຄົມອອນລາຍ ຄື ເຟັດບຸກ, ຢູທູບ… ເພື່ອໃຫ້ມວນຊົນມີເງື່ອນໄຂໄດ້ເຊື່ອມຕໍ່ວັດທະນະທຳ ຫວຽດນາມ ກັບວັດທະນະທຳຂອງບັນດາປະເທດບ້ານໃກ້ເຮືອນຄຽງໃນພາກພື້ນອາຊີຕາເວັນອອກສ່ຽງໃຕ້./.