(vovworld) - “ພວກຂ້າພະເຈົ້າອາດຈະເວົ້າໄດ້ວ່າ ຫວຽດນາມ ໄດ້ພ້ອມແລ້ວເພື່ອປະຊາຄົມ ອາຊຽນ - ນັ້ນແມ່ນຄຳຢືນຢັນຂອງທ່ານ Nguyen Tien Minh, ຫົວຫນ້າກົມອາຊຽນ ສັງກັດກະຊວງການຕ່າງປະເທດ ຫວຽດນາມ ໃນການພົບປະກັບບັນດານັກຂ່າວໄທ ຫວ່າງແລ້ວນີ້ ຢູ່ ຮ່າໂນ້ຍ. ໃນລາຍການຊາຍຄາອາຊຽນພາກນີ້, ພວກເຮົາຂໍຂັດສະເຫນີເນື້ອໃນການຕອບສຳພາດຕໍ່ນັກຂ່າວໄທຂອງທ່ານ Nguyen Tien Minh ກ່ຽວກັບການກຽມພ້ອມຂອງ ຫວຽດນາມ ເພື່ອມຸ່ງໄປເຖິງຈຸດໝາຍປະຊາຄົມອາຊຽນ.
ຫວຽດນາມ ຈັດພິທີສະເຫລີມສະຫລອງ 45 ປີ ແຫ່ງວັນສ້າງຕັ້ງ ອາຊຽນ
ພາບ: internet
|
ຫວຽດນາມ ຖືບົດບາດຂອງອາຊຽນ ເປັນສຳຄັນ ແລະ ຍາມໃດກໍພະຍາຍາມເພື່ອກາຍເປັນສະມາຊິກຕັ້ງຫນ້າຂອງ ອາຊຽນ. ດ້ວຍຄວາມປາດຖະຫນາຢາກກຳລັງເລັກນ້ອຍຂອງຕົນຮ່ວມກັບຄວາມມານະພະຍາຍາມລວມຂອງ ບັນດາປະເທດໃນວິວັດການສ້າງປະຊາຄົມລວມ, ພາຍຫລັງກົດບັດຂອງອາຊຽນໄດ້ຮັບການສ້າງຂຶ້ນ, ຫວຽດນາມ ແມ່ນຫນຶ່ງໃນບັນດາປະເທດທຳອິດທີ່ປະຕິບັດການໃຫ້ສັດຕະຍາບັນກົດບັດ ອາຊຽນ ແລະ ບັນດາກະຊວງ, ຂະແຫນງການຂອງ ຫວຽດນາມ ໄດ້ຮີບເຮັ່ງປະຕິບັດບັນດາຂໍ້ກຳນົດຂອງກົດບັດອາຊຽນນັ້ນ. ຫວຽດນາມ ກໍສ້າງກົງຈັກການເຄື່ອນໄຫວຜັນຂະຫຍາຍ 3 ເສົາຄ້ຳຂອງປະຊາຄົມ ອາຊຽນ ໂດຍໄວເພື່ອປະຕິບັດຫນ້າທີ່ຕ່າງໆ. ທ່ານ Nguyen Tien Minh ໃຫ້ຮູ້ວ່າ:
“ໂດຍລະອຽດແມ່ນ ທ່ານນາຍົກລັດຖະມົນຕີໄດ້ອອກຂໍ້ຕົກລົງ, ໃນນັ້ນ ໄດ້ກຳນົດວ່າ: ກະຊວງການຕ່າງປະເທດຮັບຜິດຊອບເສົາຄ້ຳປະຊາຄົມການເມືອງຄວາມໝັ້ນຄົງ; ກະຊວງອຸດສາຫະກຳ ແລະ ການຄ້າ ແມ່ນຮັບຜິດຊອບເສົາຄ້ຳເສດຖະກິດ ແລະ ກະຊວງແຮງງານທະຫານເສຍອົງຄະ ແລະ ສັງຄົມ ຮັບຜິດຊອບ ເສົາຄ້ຳວັດທະນະທຳສັງຄົມຂອງ ອາຊຽນ. ບັນດາກະຊວງຕ້ອງແຈ້ງຂໍ້ມູນຂ່າວສານໃຫ້ກັນເປັນປະຈຳ ເພື່ອຮັບປະກັນຂໍ້ມູນຂ່າວກ່ຽວກັບອາຊຽນ ລະຫວ່າງບັນດາກະຊວງຂອງຫວຽດນາມ.”
ກຳນົດເວລາການສ້າງໝູ່ປະຊາຄົມ ອາຊຽນ ໃນປີ 2015 ໃກ້ຈະຮອດແລ້ວ, ນອກຈາກການຜັນຂະຫຍາຍບັນດາບັນຫາດັ່ງກ່າວ, ຫວຽດນາມ ກໍເອົາໃຈໃສ່ເຖິງການຍົກສູງຄວາມຮັບຮູ້ຂອງປະຊາຊົນກ່ຽວກັບອາຊຽນ. ປະຈຸບັນ ຫວຽດນາມ ຕັ້ງຫນ້າຍູ້ແຮງການໂຄສະນາທາງພາຫະນະສື່ມວນຊົນ ແລະ ໂຄສະນາໂດຍກົງຜ່ານບັນດາການເຄື່ອນໄຫວລະອຽດ. ແລະ ການໂຄສະນາກ່ຽວກັບອາຊຽນ ເວົ້າລວມແມ່ນມີຄວາມສະດວກ. ບັນດາພາຫະນະສື່ມວນຊົນແມ່ນສ່ວນຫນຶ່ງໃນຊີວິດຂອງປະຊາຊົນ ແລະ ພວກຂ້າພະເຈົ້າຕີລາຄາສູງການສະຫນັບສະຫນູນຂອງຫນັງສືພິມໃນການໂຄສະນາກ່ຽວກັບ ອາຊຽນ, ປະກອບສ່ວນຍົກສູງຄວາມຮັບຮູ້ກ່ຽວກັບອາຊຽນໃນໝູ່ປະຊາຊົນ.
“ເລື່ອງໂຄສະນາໃນປະຊາຊົນແມ່ນວິວັດການໄດ້ຮັບການປະຕິບັດໃນໄລຍະຍາວ ສະນັ້ນ ທຸກຄົນລ້ວນແຕ່ຮັບຮູ້ໄດ້ບົດບາດສຳຄັນຂອງ ອາຊຽນ ທີ່ມີຕໍ່ປະເທດຊາດ ແລະ ຮັບເອົາຂໍ້ມູນຂ່າວສານຢ່າງຕັ້ງຫນ້າ. ມາຮອດປະຈຸບັນ ບັນດາລາຍການສະຫງວນໃຫ້ແກ່ໝູ່ມະຫາຊົນເຊິ່ງພວກຂ້າພະເຈົ້າປຸກລະດົມລ້ວນແຕ່ໄດ້ຮັບການຕອບສະຫນອງຢ່າງຕັ້ງຫນ້າ, ຕົວຢ່າງຄື: ລາຍການຍ່າງເພື່ອສັນຕິພາບຂອງ ອາຊຽນ, ລາຍການແຂ່ງຂັນແຕ້ມຮູບກ່ຽວກັບ ອາຊຽນ, ລາຍການເສັງຊອກຮູ້ກ່ຽວກັບອາຊຽນ…”
ທ່ານ Nguyen Tien Minh ຕອບສຳພາດຕໍ່ນັກຂ່າວໄທ
|
ທ່ານ Nguyen Tien Minh ເນັ້ນຫນັກວ່າ: ດ້ວຍການເຂົ້າຮ່ວມຂອງປະຊາຊົນ ໃນບັນດາການເຄື່ອນໄຫວທີ່ກ່ຽວຂ້ອງເຖິງ ອາຊຽນ, ຫວຽດນາມ ຢາກຢືນຢັນວ່າ ການຕ່າງປະເທດປະຊາຊົນຍາມໃດກໍແມ່ນຊ່ອງສຳຄັນໃນຈຸດໝາຍສ້າງປະຊາຄົມອາຊຽນເປັນອົງການຫນຶ່ງດຽວ.
“ພວກຂ້າພະເຈົ້າຈະຍູ້ແຮງວຽກງານໂຄສະນາກ່ຽວກັບອາຊຽນ ມາສູ່ປະຊາຊົນທຸກຊັ້ນວັນນະ, ເປັນຕົ້ນໃນບັນດາໄລຍະສຳຄັນ, ປີນີ້ແມ່ນປີສະເຫລີມສະຫລອງ 45 ປີແຫ່ງວັນສ້າງຕັ້ງ ອາຊຽນ. ຂ້າພະເຈົ້າຄິດວ່າ ເລື່ອງໂຄສະນາກ່ຽວກັບ ອາຊຽນ ໃນປີ 2014 ແມ່ນສຳຄັນທີ່ສຸດ ເພາະວ່າ ແມ່ນປີບານພັບກ່ອນທີ່ປະຊາຄົມອາຊຽນໄດ້ຮັບການສ້າງຕັ້ງ.”
ເມື່ອເວົ້າເຖິງການກະກຽມຂອງ ຫວຽດນາມ ໃນການເຮັດໃຫ້ບັນດາບັນຫາທີ່ແຕກຕ່າງກັນລະຫວ່າງປະເທດຕ່າງໆມີຄວາມກົມກຽວກັນ, ຕົວຢ່າງຄື: ບັນຫາພວງມາໄລເບື້ອງຂວາ ແລະ ເບື້ອງຊ້າຍ ເມື່ອອາຊຽນ ໄດ້ກາຍເປັນປະຊາຄົມຫນຶ່ງ, ທ່ານ Minh ໃຫ້ຮູ້ວ່າ: ກ່ຽວກັບດ້ານຈິດໃຈລວມ, ຫວຽດນາມ ໄດ້ກຽມພ້ອມ ໃຫ້ແກ່ການເຊື່ອມໂຍງແລ້ວ. ເມື່ອກາຍເປັນປະຊາຄົມ, ຈະຕ້ອງປັບປຸງຫລາຍບັນຫາ, ບໍ່ພຽງແຕ່ບັນຫາ ພວງມາໄລເບື້ອງຂວາ ແລະ ເບື້ອງຊ້າຍເທົ່ານັ້ນ ຫວຽດນາມ ຈະພະຍາຍາມປັບປຸງບັນດາບັນຫາທີ່ສາມາດປັບປຸງໄດ້ ແລະ ພ້ອມແລ້ວທີ່ຈະຮ່ວມມືກັບບັນດາປະເທດເພື່ອສ້າງຄວາມກົມກຽວໃນອາຊຽນ.
ລັດຖະບານ ຫວຽດນາມ ຖືບົດບາດອາຊຽນ ເປັນສຳຄັນ ແລະ ອາຊຽນ ກໍແມ່ນບັນຫາສຳຄັນໃນແນວທາງການຕ່າງປະເທດ ຂອງ ຫວຽດນາມ. ເພາະສະນັ້ນ ຫວຽດນາມ ຕັດສິນໃຈພ້ອມກັບບັນດາປະເທດ ອາຊຽນ ສູ້ຊົນສ້າງປະຊາຄົມ ອາຊຽນໃນປີ 2015 ແລະ ຫວຽດນາມ ພວມຕັ້ງຫນ້າເຄື່ອນໄຫວເພື່ອຈຸດໝາຍນີ້./.