(Vovworld)- ຫວຽດນາມ ແມ່ນປະເທດຄູ່ຮ່ວມມືຍຸດທະສາດ ທຳອິດຂອງ ອິນໂດເນເຊຍ ໃນພາກພື້ນ ແລະ ກົງກັນຂ້າມ ອິນໂດເນເຊຍ ແມ່ນປະເທດທີ 3 ໃນອາຊຽນ (ຖັດຈາກມາເລເຊຍ ແລະ ໄທ) ຍົກການພົວພັນກັບຫວຽດນາມ ຂຶ້ນສູ່ລະດັບຍຸດທະສາດ ເມື່ອເດືອນ 6/2013. ນີ້ແມ່ນປະຖົມປັດໄຈເພື່ອຊຸກຍູ້ ແລະ ເພີ່ມທະວີການພົວພັນຮ່ວມມືສອງຝ່າຍໃນທຸກຂົງເຂດ, ໃນນັ້ນ ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບພວມກາຍເປັນແບບຢ່າງສຳລັບບັນດາປະເທດໃນພາກພື້ນ.
ພ້ອມກັບການພົວພັນຮ່ວມມືໃນບັນດາຂົງເຂດອື່ນ, ການຮ່ວມມືດ້ານປ້ອງກັນຊາດ ແມ່ນຫນຶ່ງໃນບັນດາຂົງເຂດຮ່ວມມືມີຄວາມສຳຄັນທີ່ສຸດຂອງການພົວພັນຄູ່ຮ່ວມມືຍຸດທະສາດ ແລະ ໂຄງການດຳເນີນງານ ລະຫວ່າງຫວຽດນາມ ແລະ ອິນໂດເນເຊຍ. ອິນໂດເນເຊຍ ແມ່ນປະເທດ ອາຊຽນ ທຳອິດສ້າງຕັ້ງ ອົງການທູດທະຫານ ປະຈຳ ຫວຽດນາມ ເມື່ອປີ 1964. ນັບແຕ່ນັ້ນເປັນຕົ້ນໄປ ການພົວພັນລະຫວ່າງກອງທັບສອງປະເທດໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ, ເປັນຕົ້ນພາຍຫລັງສອງຝ່າຍລົງນາມໃນບົດບັນທຶກຊ່ວຍຈຳກ່ຽວກັບການເພີ່ມທະວີການຮ່ວມມືລະຫວ່າງບັນດາເຈົ້າຫນ້າທີ່ປ້ອງກັນປະເທດ ແລະ ບັນດາການເຄື່ອນໄຫວກ່ຽວຂ້ອງ ເມື່ອເດືອນ 10/2010. ພົນເຮືອໂທ ຟ້າມງອກມີງ, ຮອງເສນາທິການໃຫຍ່ກອງທັບປະຊາຊົນ ຫວຽດນາມ ໃຫ້ຮູ້ວ່າ:
ການເຈລະຈາລະຫວ່າງພົນໂທ ໂດ໋ບາຕີ້ ແລະ ພົນເຮືອເອກ
ອິນໂດເນເຊຍ Agus Suhartono.
ພາບ:baodatviet
|
“ສອງຝ່າຍໄດ້ເຫັນດີສ້າງຕັ້ງກົນໄກເຈລະຈານະໂຍບາຍການທະຫານ ການປ້ອງກັນຊາດຂັ້ນສູງ ແລະ ເຫັນດີຊຸກຍູ້ການຮ່ວມມືລະຫວ່າງເຫຼົ່າທັບ-ເຫຼົ່າຮົບ, ເຮັດໃຫ້ການຮ່ວມມືເຂົ້າສູ່ລວງເລິກເທື່ອລະກ້າວ, ນຳມາເຊິ່ງປະສິດທິຜົນຢ່າງແທດຈິງ.”
ໂດຍແມ່ນສອງປະເທດຕັ້ງຫນ້າໃນກຸ່ມ ອາຊຽນ, ຫວຽດນາມ ແລະ ອິນໂດເນເຊຍ ໄດ້ຖືວ່າ ການຮ່ວມມືດ້ານປ້ອງກັນຄວາມສະຫງົບ ປ້ອງກັນຊາດສອງຝ່າຍ ແມ່ນຫນຶ່ງໃນບັນດາເງື່ອນໄຂທຳອິດໃຫ້ບັນດາການພົວພັນສອງຝ່າຍ, ປະກອບສ່ວນສ້າງປະຊາຄົມອາຊຽນ ສະຖຽນລະພາບ ແລະ ພັດທະນາແບບຍືນຍົງກວ່າ. ນັ້ນແມ່ນຈຸດໝາຍຂອງການຢ້ຽມຢາມຂັ້ນສູງຄັ້ງຕ່າງຂອງບັນດາເຈົ້າຫນ້າທີ່ການທະຫານສອງປະເທດໃນປີ 2015 ນີ້. ພົນເຮືອໂທ ຟ້າມງອກມີງ, ຮອງເສນາທິການໃຫຍ່ກອງທັບປະຊາຊົນ ຫວຽດນາມ ເວົ້າວ່າ:
“ໃນປີ 2015 ມີການເຄື່ອນໄຫວພົວພັນແລກປ່ຽນດ້ານປ້ອງກັນຊາດຫລາຍຢ່າງລະຫວ່າງສອງປະເທດໄດ້ຮັບການຜັນຂະຫຍາຍ, ພົ້ນເດັ່ນແມ່ນການຢ້ຽມຢາມ ຫວຽດນາມ ຂອງພົນເອກ Agus Supriatna, ເສນາທິການໃຫຍ່ ກອງທັບອາກາດ ອິນໂດເນເຊຍ ແຕ່ວັນທີ 11-13/10 ຜ່ານມາ. ພວກຂ້າພະເຈົ້າເຊື່ອໝັ້ນວ່າ ດ້ວຍຄວາມຕັດສິນໃຈດ້ານການເມືອງ, ເຈດຕະນາດີ ແລະ ຄວາມມານະພະຍາຍາມຂອງທັງສອງຝ່າຍ, ການພົວພັນດ້ານປ້ອງກັນຊາດ ລະຫວ່າງ ຫວຽດນາມ ແລະ ອິນໂດເນເຊຍ ຈະສືບຕໍ່ມີບາດກ້າວພັດທະນາຢ່າງແຮງກວ່າໃນໄລຍະຈະມາເຖິງ, ສົມກັບເສົາຄ້ຳຂອງການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ.”
ດ້ວຍຈຸດໝາຍລວມນັ້ນ, ຫວຽດນາມ ແລະ ອິນໂດເນເຊຍ ເປັນເອກະພາບສືບຕໍ່ປະຕິບັດຂໍ້ຕົກລົງຮ່ວມມືປ້ອງກັນ ແລະ ຕໍ່ສູ້ຕ້ານອາດຊະຍາກຳ (2005), ບົດບັນທຶກຊ່ວຍຈຳກ່ຽວກັບການເພີ່ມທະວີການຮ່ວມມືລະຫວ່າງບັນດາເຈົ້າຫນ້າທີ່ປ້ອງກັນຊາດ ແລະ ບັນດາການເຄື່ອນໄຫວກ່ຽວຂ້ອງ (2010) ແລະຫນັງສືທາບທາມຄວາມເຫັນກ່ຽວກັບການສ້າງຕັ້ງກົນໄກເຈລະຈາລະຫວ່າງ ກອງທັບເຮືອສອງປະເທດ (2012). ເພື່ອປະຕິບັດບັນດາເອກະສານນີ້ໃຫ້ປະກົດຜົນເປັນຈິງ, ຫວຽດນາມ ໄດ້ສົ່ງຄະນະຜູ້ແທນການທະຫານຂັ້ນສູງຫລາຍຄະນະໄປອິນໂດເນເຊຍ ເພື່ອພົບປະ ແລະ ປຶກສາຫາລືກັບບັນດາເຈົ້າຫນ້າທີ່ປ້ອງກັນປະເທດ ອິນໂດເນເຊຍ. ພັນເອກ Susilo Adi Purwantoto, ຫົວຫນ້າ ທູດທະຫານ ອິນໂດເນເຊຍ ປະຈຳຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າປາດຖະຫນາວ່າ ບັນດາການຢ້ຽມຢາມຂອງຄະນະຜູ້ແທນການທະຫານຂັ້ນສູງຫວຽດນາມ ຫວ່າງແລ້ວນີ້ ຈະເຮັດໃຫ້ບົດບັນທຶກຄວາມເຂົ້າໃຈ, ຂໍ້ຕົກລົງຮ່ວມມືສອງຝ່າຍປະກົດຜົນເປັນຈິງ. ບົນພື້ນຖານນັ້ນ, ການຮ່ວມມືປ້ອງກັນຊາດເວົ້າສະເພາະ, ການພົວພັນທີ່ເປັນມູນເຊື້ອ ມີຄຸນຄ່າຍຸດທະສາດລະຫວ່າງ ອິນໂດເນເຊຍ ແລະ ຫວຽດນາມ ເວົ້າລວມ ຈະພັດທະນາຢ່າງບໍ່ຢຸດຢັ້ງ ແລະ ເຕີບໃຫຍ່ເຂັ້ມແຂງໃນອະນາຄົດ.”
ບັນດາການເຄື່ອນໄຫວຮ່ວມມືປ້ອງກັນຊາດລຽນຕິດ, ແທດຈິງ ແລະ ມີປະສິດທິຜົນລະຫວ່າງ ຫວຽດນາມ ແລະ ອິນໂດເນເຊຍ ພວມຄ່ອຍໆກາຍເປັນແບບຢ່າງສຳລັບບັນດາປະເທດໃນພາກພື້ນ. ໂດຍແມ່ນສອງປະເທດບ້ານໃກ້ເຮືອນຄຽງ, ບັນດາບາດກ້າວເດີນໃນການພົວພັນຮ່ວມມືປ້ອງກັນຊາດປ້ອງກັນຄວາມສະຫງົບ ລະຫວ່າງ ອິນໂດເນເຊຍ ແລະ ຫວຽດນາມ ຈະປະກອບສ່ວນຊຸກຍູ້ສະຖຽນລະພາບໃນພາກພື້ນ, ມຸ້ງໄປເຖິງການສ້າງເສົາຄ້ຳຄວາມໝັ້ນຄົງ, ປ້ອງກັນຊາດ ອາຊຽນ ເປັນເອກະພາບ ແລະ ພັດທະນາແບບຍືນຍົງກວ່າ.