(vovworld) - “ຫວຽດນາມ ແລະ ອິນໂດເນເຊຍ ຮ່ວມມືເພື່ອຄວາມວັດທະນາຖາວອນ” ແມ່ນຫົວຂໍ້ຂອງເວທີປາໄສສົ່ງເສີມການຄ້າ, ທ່ອງທ່ຽວ ແລະ ລົງທຶນ ອິນໂດເນເຊຍ ແລະ ຫວຽດນາມ ຊຶ່ງດຳເນີນໄປຢູ່ ຮ່າໂນ້ຍ ແຕ່ວັນທີ 11 - 12/6. ນີ້ເປັນຄັ້ງທຳອິດເວທີປາໄສດັ່ງກ່າວຖືກຈັດຂຶ້ນຢູ່ ຫວຽດນາມ ດ້ວຍຈຸດໝາຍແນະນຳບັນດາກາລະໂອກາດດຳເນີນທຸລະກິດຢູ່ ອິນໂດເນເຊຍ ໃຫ້ແກ່ບັນດາຄູ່ຮ່ວມມືຫວຽດນາມ ພ້ອມທັງຊ່ວຍນັກທຸລະກິດສອງປະເທດເຂົ້າໃຈກ່ຽວກັບຄວາມສາມາດບົ່ມຊ້ອນທາງດ້ານເສດຖະກິດຂອງສອງປະເທດຢ່າງຈະແຈ້ງກວ່າ. ເວທີປາໄສນີ້ໄດ້ປະກອບສ່ວນຊຸກຍູ້ການແລກປ່ຽນດ້ານການຄ້າສອງຝ່າຍລະຫວ່າງສອງປະເທດ.
ເວທີປາໄສ“ ສົ່ງເສີມການຄ້າ, ທ່ອງທ່ຽວ ແລະ ລົງທຶນ ອິນໂດເນເຊຍ ແລະ ຫວຽດນາມ”
ພາບ:congan.com.vn
|
ທ່ານ Mayerfas ເອກອັກຄະລັດຖະທູດ ອິນໂດເນເຊຍ ປະຈຳ ຫວຽດນາມ ເປັນປະທານເວທີປາໄສ“ ສົ່ງເສີມການຄ້າ, ທ່ອງທ່ຽວ ແລະ ລົງທຶນ ອິນໂດເນເຊຍ ແລະ ຫວຽດນາມ” ໃຫ້ຮູ້ວ່າ: ອິນໂດເນເຊຍ ແລະ ຫວຽດນາມ ມີການພົວພັນມິດຕະພາບທີ່ເປັນມູນເຊື້ອມາແຕ່ດົນນານ ແລະ ສອງປະເທດພວມສືບຕໍ່ມານະພະຍາຍາມຊຸກຍູ້ການພົວພັນຮ່ວມມືຮອບດ້ານໃນທຸກຂົງເຂດຕາມທິດແທດຈິງ ແລະ ມີປະສິດທິຜົນກວ່າ, ພິເສດ ໃນຂົງເຂດເສດຖະກິດການຄ້າ, ການທ່ອງທ່ຽວ ແລະ ການລົງທຶນ. ຫວຽດນາມ ມີແຫລ່ງວັດຖຸດິບອຸດົມສົມບູນໃຫ້ແກ່ຫລາຍຂະແຫນງອຸດສາຫະກຳຜະລິດຢູ່ ອິນໂດເນເຊຍ. ກົງກັນຂ້າມ ອິນໂດເນເຊຍ ກໍແມ່ນຕະຫລາດກວ້າງໃຫຍ່ດ້ວຍຄວາມສາມາດບ່ົມຊ້ອນຫລາຍຢ່າງ ຊຶ່ງ ຫວຽດນາມສາມາດຂຸດຄົ້ນເພີ່ມເຕີມໃຫ້ແກ່ການພັດທະນາເສດຖະກິດຂອງຕົນ. ທ່ານ Mayerfas ເອກອັກຄະລັດຖະທູດ ອິນໂດເນເຊຍ ເວົ້າວ່າ:
“ພວກຂ້າພະເຈົ້າຮັບຮູ້ວ່າ ຫວຽດນາມ ແມ່ນປະເທດສຳຄັນສຳລັບອິນໂດເນເຊຍ ແລະ ພາກພື້ນອາຊຽນ ໃນການຮ່ວມມືໃນທຸກຂົງເຂດຄື: ການຄ້າ, ການລົງທຶນ, ການທ່ອງທ່ຽວ, ການປ່ຽນແປງຂອງດິນຟ້າອາກາດ, ອິນໂດເນເຊຍ ແລະ ຫວຽດນາມ ມີຫລາຍຈຸດທີ່ຄ້າຍຄືກັນ ເພື່ອສາມາດເພີ່ມທະວີການພົວພັນຮ່ວມມືທາງດ້ານເສດຖະກິດການຄ້າ ແລະ ຫລາຍຂົງເຂດອື່ນ. ເລ່ືອງຈັດຕັ້ງເຫດການນີ້ ຈະປະກອບສ່ວນເປີດປະຕູໃຫ້ແກ່ວິສາຫະກິດອິນໂດເນເຊຍສຳພັດກັບຕະຫລາດ ຫວຽດນາມ ແລະ ກົງກັນຂ້າມ.”
ກ່າວຄຳເຫັນທີ່ເວທີປາໄສຄັ້ງນີ້, ທ່ານ Nguyen Thanh Bien ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ: ວົງເງິນຄ້າຂາຍສອງສົ້ນໃນແຕ່ລະໄລຍະລ້ວນແຕ່ບັນລຸລະດັບການເຕີບໂຕດີພໍສົມຄວນ. ໄລ່ສະເພາະໃນປີ 2011, ຍອດວົງເງິນການຄ້າ ລະຫວ່າງ ຫວຽດນາມ - ອິນໂດເນເຊຍ ບັນລຸ 4,6 ຕື້ USD. ເຖິງຢ່າງໃດກໍຕາມ, ຕົວເລກດັ່ງກ່າວບໍ່ທັນສົມກັບຄວາມສາມາດບົ່ມຊ້ອນການຮ່ວມມືທາງດ້ານເສດຖະກິດ ການຄ້າ ລະຫວ່າງສອງປະເທດເທື່ອ. ເພື່ອບັນລຸໄດ້ຈຸດໝາຍນຳວົງເງິນການຄ້າສອງສົ້ນຂຶ້ນເຖິງ 5 ຕື້ USD ໃນປີ 2015, ສອງປະເທດ ຄວນມານະພະຍາຍາມສ້າງເງື່ອນໄຂສະດວກໃຫ້ແກ່ບັນດາວິສາຫະກິດກວ່າອີກ ເພື່ອໃຫ້ເຂົາເຈົ້າສາມາດຫຍັບມໍ່ເຂົ້າໃກ້ກັນກວ່າ. ທີ່ເວທີປາໄສ ສົ່ງເສີມການຄ້າ, ການທ່ອງທ່ຽວ ແລະ ການລົງທຶນ ອິນໂດເນເຊຍ ແລະ ຫວຽດນາມ, ທ່ານ Nguyen Thanh Bien ລັດຖະມົນຕີຊ່ວຍວ່າການກະຊສງອຸດສາຫະກຳ ການຄ້າ ຫວຽດນາມ ຢືນຢັນວ່າ:
“ໃນຊຸມປີຜ່ານມາ, ກະຊວງອຸດສາຫະກຳ ການຄ້າ ຫວຽດນາມ ໄດ້ຊີ້ນຳ, ບໍລິຫານພື້ນຖານການຄ້າຕ່າງປະເທດ ຫວຽດນາມ ເອົາໃຈໃສ່ ແລະ ຖື ຕະຫລາດ ອິນໂດເນເຊຍ ເປັນສຳຄັນ ດ້ວຍບັນດາກົນໄກນະໂຍບາຍ, ຜ່ານແຜນນະໂຍບາຍສົ່ງເສີມບັນດາວິສາຫະກິດ ຫວຽດນາມ ເສີມຂະຫຍາຍກຳລັງຄວາມສາມາດເພື່ອເຊື່ອມຕໍ່ການພົວພັນແລກປ່ຽນການຄ້າກັບບັນດາຄູ່ຮ່ວມມື ອິນໂດເນເຊຍ. ພວກຂ້າພະເຈົ້າຕີລາຄາສູງເລື່ອງຈັດຕັ້ງເວທີປາໄສຄັ້ງນີ້ ຈະປະກອບສ່ວນເຮັດໃຫ້ກາລະໂອກາດການຮ່ວມມືລະຫວ່າງວິສາຫະກິດສອງປະເທດປະກົດຜົນເປັນຈິງ.”
ບັນດາຜູ້ແທນເຂົ້າຮ່ວມເວທີປາໄສ ສົ່ງເສີມການຄ້າ, ການທ່ອງທ່ຽວ ແລະ ການລົງທຶນ ອິນໂດເນເຊຍ ແລະ ຫວຽດນາມ ໄດ້ຊີ້ໃຫ້ເຫັນບາງຂົງເຂດຮ່ວມມືທີ່ເຕັມໄປດ້ວຍຄວາມສາມາດບົ່ມຊ້ອນ ລະຫວ່າງວິສາຫະກິດສອງປະເທດ. ທ່ານ Nguyen Anh Dung ຜູ້ອຳນວຍການບໍລິສັດການຄ້າ ບໍລິການ ແລະ ທ່ອງທ່ຽວ ຮູ່ງເວືອງ ຈຳກັດ ໄດ້ຕີລາຄາວ່າ: ປະຈຸບັນ ອິນໂດເນເຊຍ ແມ່ນປະເທດມີພົນລະເມືອງຫລາຍກວ່າໝູ່ຢູ່ ພາກພື້ນອາຊີຕາເວັນອອກສຽງໃຕ້ ແລະ ຈຳນວນແຂກຄົນມີຄວາມຕ້ອງການໄປທ່ອງທ່ຽວນັບມື້ນັບເພີ່ມຂຶ້ນ, ສະນັ້ນ ການຮ່ວມມືກັບບັນດາບໍລິສັດທ່ອງທ່ຽວ ອິນໂດເນເຊຍເພື່ອດຶງດູດນັກທ່ອງທ່ຽວ ອິນໂດເນເຊຍ ມາຢ້ຽມຢາມ ຫວຽດນາມ ແມ່ນສິ່ງທີ່ຈຳເປັນ. ນອກນັ້ນ ອິນໂດເນເຊຍ ກໍແມ່ນຕະຫລາດທ່ອງທ່ຽວທີ່ໃຫມ່ອ່ຽມ ມີຄວາມສາມາດບົ່ມຊ້ອນຫລາຍຢ່າງສຳລັບບັນດາບໍລິສັດທ່ອງທ່ຽວ ຫວຽດນາມ ເພາະວ່າ ອິນໂດເນເຊຍ ມີສະຖານທີ່ທ່ອງທ່ຽວທີ່ລືຊື່ຫລາຍແຫ່ງ ດ້ວຍພື້ນຖານທາງດ້ານວັດທະນະທຳເປັນຫລາຍຮູບຫລາຍແບບ ຫລາຍສີສັນຊາດ. ທ່ານ Nguyen Anh Dung ເວົ້າວ່າ:
“ໄລຍະກ່ອນນີ້ 10 ປີ, ບັນດາລາຍການທ່ອງທ່ຽວ ໄປອິນໂດເນເຊຍ ຫລາຍພໍສົມຄວນ ແຕ່ຫລັງຈາກນັ້ນ ຍ້ອນເກີດວິກິດການການເມືອງຢູ່ ອິນໂດເນເຊຍ ສະນັ້ນ ບໍລິສັດທ່ອງທ່ຽວຫລາຍແຫ່ງໄດ້ຍົກເລີກລາຍການທ່ອງທ່ຽວເຖິງປະເທດນີ້. ຄວາມຈິງແລ້ວ, ບັນດາລາຍການທ່ອງທ່ຽວໄປອິນໂດເນເຊຍ ແມ່ນສ້າງຄວາມປະທັບໃຈຫລາຍ. ສະນັ້ນ ການຈັດຕັ້ງບັນດາເຫດການຄືເວທີປາໄສ ສົ່ງເສີມການຄ້າ, ການທ່ອງທ່ຽວ ແລະ ການລົງທຶນ ອິນໂດເນເຊຍ ແລະ ຫວຽດນາມແມ່ນຈຳເປັນທີ່ສຸດ ເພື່ອໃຫ້ອິນໂດເນເຊຍ ໂຄສະນາພາບພົດທ່ອງທ່ຽວຢູ່ ຫວຽດນາມ ແລະ ກົງກັນຂ້າມ.”
ທ່ານ Ông H.E. Mayerfas ເອກອັກຄະລັດຖະທູດ
ໂດເນເຊຍ ປະຈຳ ຫວຽດນາມ
ພາບ:diendandautu.com.vn
|
ພ້ອມກັບຄະນະນັກທຸລະກິດ ກວ່າ 40 ຄົນມາ ຫວຽດນາມ ເຂົ້າຮ່ວມເວທີປາໄສ ສົ່ງເສີມການຄ້າ, ການທ່ອງທ່ຽວ ແລະ ການລົງທຶນ ອິນໂດເນເຊຍ ແລະ ຫວຽດນາມ, ທ່ານນາງ Dwi Agustin ຜູ້ອຳນວຍການ Maketing ແລະ ດຳເນີນທຸລະກິດ ສັງກັດບໍລິສັດທ່ອງທ່ຽວ Taruna Wisata Tour& Travel ໃຫ້ຮູ້ວ່າ: ໃນເວທີປາໄສ ສົ່ງເສີມການຄ້າ, ການທ່ອງທ່ຽວ ແລະ ການລົງທຶນ ອິນໂດເນເຊຍ ແລະ ຫວຽດນາມ ຄັ້ງນີ້ ທ່ານນາງໄດ້ມີກາລະໂອກາດພົບປະ ແລະ ພົວພັນແລກປ່ຽນກັບບໍລິສັດທ່ອງທ່ຽວ ຫວຽດນາມ ຫລາຍແຫ່ງ ແລະ ນີ້ຈະກາຍເປັນກາລະໂອກາດໃຫຍ່ເພື່ອເປີດປະຕູຕະຫລາດດຳເນີນທຸລະກິດຂອງບໍລິສັດຕົນ. ທ່ານນາງ Dwi Agustin ກ່າວວ່າ:
“ກ່ອນນີ້ ກໍມີນັກທ່ອງທ່ຽວຫລາຍຄົນຢາກເຂົ້າຮ່ວມລາຍການທ່ອງທ່ຽວ ມາຢ້ຽມຢາມ ນະຄອນ ຮ່າໂນ້ຍ ແລະ ຫວຽດນາມ ໃນຂະນະທີ່ພວກຂ້າພະເຈົ້າບໍ່ທັນມີການພົວພັນຮ່ວມມືກັບບັນດາບໍລິສັດທ່ອງທ່ຽວພາຍໃນປະເທດ. ສະນັ້ນ ຂ້າພະເຈົ້າເຫັນວ່ານີ້ແມ່ນກາລະໂອກາດໃຫຍ່ ເພື່ອຄວາມລຶ້ງເຄີຍ ແລະ ຊອກຫາຄູ່ຮ່ວມມື ຢູ່ ຮ່າໂນ້ຍ. ຫລັງຈາກນັ້ນ ພວກຂ້າພະເຈົ້າຈະແນະນຳໂດຍກົງກ່ຽວກັບ ນະຄອນຫລວງ ຮ່າໂນ້ຍໃຫ້ແກ່ປະຊາຊົນອິນໂດເນເຊຍ. ”
ທີ່ເວທີປາໄສຄັ້ງນີ້, ບັນດາວິສາຫະກິດ ລ້ວນແຕ່ປາດຖະຫນາວ່າ ການນຳສອງປະເທດ ຫວຽດນາມ ແລະ ອິນໂດເນເຊຍ ຈະສືບຕໍ່ຈັດຕັ້ງກອງປະຊຸມ, ເວທີປາໄສ, ກອງປະຊຸມສຳມະນາຫົວເລື່ອງສະເພາະ ເພື່ອໃຫ້ນັກທຸລະກິດສອງປະເທດສາມາດພົບປະ ແລະ ເພີ່ມທະວີການຮ່ວມມືຫລາຍກວ່າ. ຈາກບັນດາການເຄື່ອນໄຫວນັ້ນ, ວິສາຫະກິດສອງປະເທດສາມາດຮ່ວມມືຢ່າງແຫນ້ນແຟ້ນກວ່າ, ປະກອບສ່ວນຊຸກຍູ້ມູນຄ່າດ້ານການຄ້າສອງຝ່າຍໃນໄລຍະຈະມາເຖິງ.