(vovworld)- ວັນທີ 6/8/1976, ຫວຽດນາມ ແລະ ໄທ ເປັນຄັ້ງທຳອິດ ສ້າງຕັ້ງການພົວພັນທາງການທູດ, ສ້າງບາດລ້ຽວ, ເປີດເສັ້ນທາງພັດທະນາໃຫ້ແກ່ການພົວພັນສອງຝ່າຍ. ຂີດໝາຍນັ້ນໄດ້ນຳການພົວພັນຂອງສອງປະເທດຍິ່ງສະຫນິດຕິດພັນ, ໃກ້ຊິດສະຫນິດສະຫນົມ. ໃນໄລຍະກວ່າ 40 ປີຜ່ານມາ, ການພົວພັນສອງຝ່າຍ ພັດທະນາຢ່າງແຮງນັບທັງລວງກວ້າງ ແລະ ລວງເລິກ ໃນຫລາຍຂົງເຂດ, ຈາກການເມືອງ, ເສດຖະກິດ, ການຄ້າ, ການລົງທຶນ, ວັດທະນະທຳ ສັງຄົມ, ການປ້ອງກັນຊາດປ້ອງກັນຄວາມສະຫງົບ, ການສຶກສາບຳລຸງສ້າງ.
ງານຕະຫລາດນັດວາງສະແດງສິນຄ້າໄທຢູ່ຫວຽດນາມ
|
ຫວຽດນາມ ແລະ ໄທ ມີຫລາຍຈຸດທີ່ຄ້າຍຄືກັນກ່ຽວກັບດ້ານວັດທະນະທຳ ແລະ ໃກ້ຊິດກັນທາງພູມສາດ, ນີ້ແມ່ນບັນດາທ່າໄດ້ປຽບສ້າງທ່ວງທ່າໃຫ້ການພັດທະນາດ້ານການຄ້າສອງຝ່າຍ. ຖ້າຫາກ 20 ປີກ່ອນນີ້ ວົງເງິນການຄ້າສອງຝ່າຍບັນລຸພຽງປະມານ 1,5 ຕື້ໂດລາສະຫະລັດ/ປີ ມາຮອດປະຈຸບັນ ແມ່ນ 11 ຕື້ໂດລາສະຫະລັດ/ປີ ແລະ ສູ້ຊົນຮອດປີ 2020 ບັນລຸ 20 ຕື້ໂດລາສະຫະລັດ/ປີ. ຄວາມຈິງໃຫ້ເຫັນວ່າ ແຕ່ດົນນານມາແລ້ວ, ຊາວຫວຽດນາມ ມີຄວາມນິຍົມສິນຄ້າຂອງໄທຄື: ເກີບ, ໝາກໄມ້, ເຄື່ອງໃຊ້ໃນຄອບຄົວ ແລະ ກົງກັນຂ້າມ, ຊາວໄທ ກໍ່ນິຍົມບາງປະເພດສິນຄ້າຂອງຫວຽດນາມຄື: ກາເຟ, ຊາ.. ຕາມທ່ານ ຫວູຮົ່ງນາມ, ຮອງລັດຖະມົນຕີການຕ່າງປະເທດຫວຽດນາມ, ຫົວຫນ້າຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດແລ້ວ, ຫວຽດນາມ ພວມແມ່ນສະຖານທີ່ລົງທຶນອັນດູດດື່ມສຳລັບວິສາຫະກິດໄທຈຳນວນຫນຶ່ງ ດ້ວຍບັນດາໂຄງການໃຫຍ່. ປະຈຸບັນ ໄທ ແມ່ນນັກລົງທຶນຢືນອັນດັບ 10 ໃນຍອດຈຳນວນນັກລົງທຶນຢູ່ຫວຽດນາມ ດ້ວຍ ເກືອບ 500 ໂຄງການ, ຍອດເງິນລົງທຶນເກືອບ 10 ຕື້ໂດລາສະຫະລັດ.
“ປະຈຸບັນ ຫວຽດນາມ ແມ່ນຄູ່ຄ້າລາຍໃຫຍ່ທີສອງຂອງໄທ ໃນອາຊຽນ. ກົງກັນຂ້າມ ໄທແມ່ນຄູ່ຄ້າລາຍໃຫຍ່ສຸດຂອງຫວຽດນາມ ພາຍໃນກຸ່ມ. ສິ່ງດັ່ງກ່າວພິສູດໃຫ້ເຫັນ ການພົວພັນແລກປ່ຽນການຄ້າລະຫວ່າງສອງປະເທດແມ່ນຟົດຟື້ນທີ່ສຸດ. ນອກນັ້ນ ນະໂຍບາຍຂອງສອງປະເທດແມ່ນສະດວກທີ່ສຸດ. ໃນກອງປະຊຸມຄະນະລັດຖະບານຮ່ວມ 3 ຄັ້ງ, ລັດຖະບານສອງປະເທດ ລ້ວນແຕ່ປຶກສາຫາລືບັນດາມາດຕະການເພື່ອຫລຸດຜ່ອນຮົ້ວກີດຂວາງໃຫ້ແກ່ສິນຄ້າສອງປະເທດ.”
ທ່ານ ຫວູຮົ່ງນາມ, ຮອງລັດຖະມົນຕີການຕ່າງປະເທດຫວຽດນາມ
|
ຈຸດຄ້າຍຄືກັນກ່ຽວກັບວັດທະນະທຳ, ສັງຄົມ ແມ່ນພື້ນຖານສະດວກເພື່ອໃຫ້ສອງປະເທດເພີ່ມທະວີການສ້າງການພົວພັນແລກປ່ຽນລະຫວ່າງປະຊາຊົນ. ປະຈຸບັນ ຫວຽດນາມ ແມ່ນຫນຶ່ງໃນບັນດາປະເທດມີຈຳນວນນັກທ່ອງທ່ຽວໄປຢ້ຽມຢາມໄທຫລາຍສົມຄວນ. ເຖິງຢ່າງໃດກໍຕາມ, ໃນບັນຫາຄົນງານຫວຽດນາມ ເຮັດວຽກຢູ່ໄທ ກໍຄື ການຂຸດຄົ້ນເຂດທະເລຫາປາຍັງມີບາງບັນຫາຂາດຕົກບົກຜ່ອງ. ສະນັ້ນລັດຖະບານສອງປະເທດ ໄດ້ພ້ອມກັນປຶກສາຫາລືເພື່ອຊອກບັນດາມາດຕະການສົມທົບ, ບໍ່ສົ່ງຜົນສະທ້ອນເຖິງການພົວພັນຮ່ວມມືສອງຝ່າຍ. ທ່ານຮອງລັດຖະມົນຕີ ຫວູຮົ່ງນາມ ໃຫ້ຮູ້ວ່າ:
“ສອງປະເທດ ໄດ້ປຶກສາຫາລື ແລະ ລົງນາມໃນຂໍ້ຕົກລົງຮ່ວມມືສອງຝ່າຍ MOU ກ່ຽວກັບການຮ່ວມມືແຮງງານ. ພວກເຮົາໄດ້ມານະພະຍາຍາມເພື່ອໃຫ້ຄົນງານຫວຽດນາມ ທີ່ເຮັດວຽກຢ່າງຜິດກົດໝາຍຢູ່ໄທ ມີເງື່ອນໄຂຈົດທະບຽນເຮັດວຽກຖືກກັບກົດໝາຍ. ບັນຫາທີສອງ ແມ່ນບັນຫາຊາວປະມົງຂອງສອງປະເທດ ໄດ້ລ່ວງລ້ຳເຂດທະເລຂອງກັນ. ຝ່າຍຫວຽດນາມ ໄດ້ປຶກສາຫາລືກັບໄທຫລາຍຄັ້ງ ເພື່ອຊອກຫາກົນໄກສ້າງໂທລະສັບສາຍດ່ວນເພື່ອໃຫ້ຊາວປະມົງປະເທດນີ້ລ່ວງລ້ຳເຂດທະເລປະເທດນັ້ນ ສາມາດພົວພັນຕິດຕໍ່ນຳກັນເພື່ອຊອກຫາວິທີແກ້ໄຂ.”
ສຳລັບການພົວພັນໃນຂອບເຂດ ອາຊຽນ ແລະ ພາກພື້ນ, ໃນຫລາຍປີຜ່ານມາ, ຫວຽດນາມ ແລະໄທ ກໍ່ມີຫລາຍນະໂຍບາຍໃນການຮັກສາສັນຕິພາບຢູ່ທະເລຕາເວັນອອກ ກໍຄືໃນພາກພື້ນ ອາຊີຕາເວັນອອກສ່ຽງໃຕ້. ຕາມການຕີລາຄາຂອງທ່ານຮອງລັດຖະມົນຕີ ຫວູຮົ່ງນາມແລ້ວ, ເຖິງວ່າບໍ່ແມ່ນປະເທດມີສ່ວນກ່ຽວຂ້ອງໂດຍກົງເຖິງບັນຫາທະເລຕາເວັນອອກ ແຕ່ໄທ ຍາມໃດກໍຕັ້ງຫນ້າ ແລະ ສວມບົດບາດສຳຄັນໃນບັນດາເວທີປາໄສກ່ຽວກັບທະເລຕາເວັນອອກ.
“ໃນຊຸມປີ ແຕ່ປີ 2012-2015, ເມື່ອໄທ ແມ່ນປະເທດປະສານງານລະຫວ່າງການພົວພັນ ອາຊຽນ - ຈີນ, ໄທ ໄດ້ສ້າງບາດກ້າວເດີນ, ເຮັດໃຫ້ບັນດາປະເທດຫຍັບມໍ່ໃກ້ກັນກວ່າໃນການຊອກຫາຄວາມເຂົ້າໃຈລວມລະຫວ່າງ ອາຊຽນ ກັບຈີນ ໃນການສ້າງ COC. ອາດຈະເວົ້າໄດ້ວ່າ ພື້ນຖານການທູດຂະຫຍັນຂັນເຄື່ອນ, ມີຂໍ້ລິເລີ່ມຫລາຍຢ່າງ ແລະ ດ້ວຍຄວາມເປັນເຈົ້າການໃນການຊອກຫາບັນດາມາດຕະການພ້ອມກັບບັນດາປະເທດ ອາຊຽນ ຊອກຫາມາດຕະການໃຫ້ແກ່ທະເລຕາເວັນອອກ, ໄທ ສືບຕໍ່ສວມບົດບາດສຳຄັນໃນການຊອກຫາມາດຕະການແບບຍືນຍົງ ແລະ ຍາວນານໃຫ້ແກ່ບັນຫາທະເລຕາເວັນອອກ.”
ອາດຈະເວົ້າໄດ້ວ່າ, ດ້ວຍບັນດາຜົນງານບັນລຸໄດ້ໃນກວ່າ 40 ປີຜ່ານມາ ໄດ້ສ້າງພື້ນຖານອັນໝັ້ນຄົງເພື່ອໃຫ້ການພົວພັນລະຫວ່າງສອງປະເທດ ຫວຽດນາມ ແລະ ໄທ ນັບມື້ນັບພັດທະນາອັນດີງາມ. ດ້ວຍຄວາມເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ດ້ວຍຄວາມຕ້ອງການການຮ່ວມມືເພື່ອພັດທະນາຂອງສອງປະເທດກໍຄືຄວາມສາມາດບົ່ມຊ້ອນຂອງສອງປະເທດ, ການພົວພັນລະຫວ່າງຫວຽດນາມແລະໄທ ຈະມີກຳລັງຫນູນໃຫມ່ເພື່ອພັດທະນາຮອບດ້ານ ແລະ ໝັ້ນຄົງກວ່າໃນອະນາຄົດ, ເພື່ອຜົນປະໂຫຍດຂອງປະຊາຊົນສອງປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ວັດທະນາຖາວອນຢູ່ ອາຊີ ກໍຄືໃນໂລກ.