(vovworld)- ສູນການຄ້າ Robins ມີເນື້ອທີ່ກວ່າ 10.000 ຕາລາງແມັດ ຫາກໍເປີດສະຫລອງຢ່າງເປັນທາງການໃນທ້າຍເດືອນ 4/2014 ຢູ່ Vincom Royal City ຮ່າໂນ້ຍ- ຊື່ງແມ່ນຫນຶ່ງໃນບັນດາເຂດປະສົມໃຫຍ່ສຸດຢູ່ຫວຽດນາມ. ການປະກົດອອກຂອງ Robins Department Store Public Company ຂຶ້ນກັບບໍລິສັດລູກຂອງກຸ່ມບໍລິສັດ Central Group ຂອງໄທ ຢູ່ ຫວຽດນາມ ໃນຈຸດເວລານີ້ ໄດ້ຮັບຖືວ່າ: ແມ່ນການກະຕຸກຊຸກຍູ້ສຳຄັນໃຫ້ແກ່ຂະແຫນງຂາຍຍ່ອຍຢູ່ຫວຽດນາມ.
Vincom Royal City ຮ່າໂນ້ຍ
|
ເຖິງວ່າ ພື້ນຖານເສດຖະກິດຫວຽດນາມ ຍັງຖືກຜົນກະທົບຈາກວິກິດການເສດຖະກິດໂລກກໍຕາມ ແຕ່ກຸ່ມບໍລິສັດ Central Group ຊື່ງແມ່ນບໍລິສັດຂາຍຍ່ອຍຊັ້ນນຳຂອງໄທ ໄດ້ຕັດສິນໃຈເລືອກເຟັ້ນ ຫວຽດນາມ ເປັນແຫ່ງເປີດສູນການຄ້າ Robins ແຫ່ງທຳອີດຢູ່ຕ່າງປະເທດ. ຕາມທ່ານ ໂທຈີຣະທິວັດ, ປະທານສະພາບໍລິຫານ ທັງເປັນຜູ້ອຳນວຍການໃຫຍ່ Central Group ແລ້ວ, ກ່ອນທີ່ເປີດສູນ Robins ຢູ່ ຫວຽດນາມ, Central ໄດ້ປະສົບຜົນສຳເລັດໃນການເປີດບັນດາຮ້ານຄ້າທີ່ມີເຄື່ອງໝາຍ Super Sports, Crocs ແລະ New Balance ຜ່ານລະບົບຈຳຫນ່າຍສິນຄ້າຂອງບັນດາບໍລິສັດລູກ ຂຶ້ນກັບ Central Group ແລະ ມອດສິດໃຫ້ບັນດາຄູ່ຮ່ວມມືຢູ່ຫວຽດນາມ. ຫວຽດນາມ ໄດ້ ແລະ ພວມກາຍເປັນຕະຫລາດທີ່ມີຄວາມສາມາດບົ່ມຊ້ອນສຳລັບບັນດານັກລົງທຶນໃນຂົງເຂດຂາຍຍ່ອຍ. ພິເສດແມ່ນ ນະຄອນຫລວງ ຮ່າໂນ້ຍ ແລະ ບັນດາເຂດອ້ອມຂ້າງ. ຄຽງຄູ່ກັນນັ້ນ, ກະແສເງິນລົງທຶນຕ່າງປະເທດເຂົ້າຫວຽດນາມ ກໍ່ນັບມື້ນັບເພີ່ມຂຶ້ນ ໃນຄວາມມານະພະຍາຍາມເປີດກວ້າງການດຳເນີນທຸລະກິດຢູ່ພາກພື້ນ ອາຊີຕາເວັນອອກສຽງໃຕ້.
photo:internet
|
ຍ້ອນກຳໄດ້ຕະຫລາດທີ່ມີຄວາມສາມາດບົ່ມຊ້ອນຂອງຫວຽດນາມ ສະນັ້ນ Central Group ໄດ້ລົງທຶນຫຼາຍພໍສົມຄວນເຂົ້າສູນການຄ້າ Robins. ທ່ານ Alan Thomson, ປະທານ Robinson Departmen Store Public Company, ໃຫ້ຮູ້ວ່າ:
“ລະດັບເງິນລົງທຶນຂອງກຸ່ມບໍລິສັດ Central ໃຫ້ແກ່ Robins ແມ່ນ 6 ລ້ານ USD, ສ້າງວຽກເຮັດງານທຳໃຫ້ແກ່ຄົນງານກວ່າ 150 ຄົນ. ຄະນະການນຳ ປາດຖະຫນາຢາກພັດທະນາການດຳເນີນທຸລະກິດຢູ່ຕະຫລາດຫວຽດນາມໃນໄລຍະຍາວກວ່າ, ຖ່າຍທອດບັນດາບົດຮຽນທີ່ມີປະໂຫຍດໃຫ້ແກ່ຄົນງານທ້ອງຖິ່ນ ແລະ ປະກອບສ່ວນສ້າງມາດຖານກ່ຽວກັບການຊື້ເຄື່ອງຂອງໃນຂົງເຂດຂາຍຍ່ອຍໃຫ້ແກ່ຜູ້ອຸປະໂພກບໍລິໂພກ. ດ້ວຍພື້ນຖານໂຄງລ່າງດຳເນີນທຸລະກິດທີ່ທັນສະໄຫມຄືດັ່ງກ່າວ, ຂ້າພະເຈົ້າຄິດວ່າ ຈະສ້າງ ແລະ ປັບປຸງລະບົບຈຳຫນ່າຍບັນດາຜະລິດຕະພັນຕາມທິດໝັ້ນຄົງ, ທັນສະໄຫມ ແລະ ສີວິໄລໄດ້ ເພື່ອຕອບສະຫນອງຄວາມຕ້ອງການ ນັບມື້ນັບສູງຂອງຕະຫຼາດສິນຄ້າໃຊ້ສອຍຢູ່ຫວຽດນາມ.”
ເຂດຮ້ານຄ້າຂອງ Robins ຖືກແບ່ງເປັນ 9 ໝວດ
|
ເຂດຮ້ານຄ້າຂອງ Robins ຖືກແບ່ງເປັນ 9 ໝວດສິນຄ້າຕົ້ນຕໍ ຄືແຟຊັ່ນສຳລັບເດັກ, ແຟຊັ່ນສຳລັບຜູ້ຊາຍ, ຜູ້ຍິງ, ໂສ້ງເສື້ອຊ້ອນ, ເຄື່ອງກິລາ, ເຄື່ອງສຳອາງ, ເກີບ, ກະເປົາ ແລະ ເຄື່ອງໃຊ້ໃນຄອບຄົວ. ຈຸດພົ້ນເດັ່ນຂອງສູນການຄ້າ Robins ແມ່ນຮ້ານແຟຊັ່ນດ້ວຍກວ່າ 100 ເຄື່ອງໝາຍການຄ້າທີ່ມີຊື່ສຽງຂອງໂລກຄື: Levis, F&F, Pacific Union, Aerosoft, Cool Metropolis, Emilio Valentino… ເຖິງວ່າ ກຳມະສິດຮ້ານຄ້າຫລາຍແຫ່ງພ້ອມດ້ວຍຜະລິດຕະພັນເປັນ ຫລາຍຮູບຫລາຍແບບ ແຕ່ບັນດາເຂດຂາຍສິນຄ້າຂອງ Robins ລ້ວນແຕ່ຖືກສັບຊ້ອນແຕກຕ່າງກັບເຂດຂາຍສິນຄ້າອື່ນ. ບໍລິສັດ ອອກແບບ Zebra Group ມາຈາກ Dubai ໄດ້ຈັດວາງ ແລະ ປະດັບປະດາເຂດຂາຍສິນຄ້າຂອງຕົນດ້ວຍສີສົດໄສໃກ້ຊິດກັບທຳມະຊາດຄືສີຂຽວ, ສີສົ້ມ, ສີບົວອ່ອນ ໃຫ້ໂປ່ງໃສ, ກວ້າງຂວາງ ແລະ ງາມຕາ. ນອກນັ້ນ, Robins ຖືກຕັ້ງໃນເຂດການຄ້າທີ່ລືຊື່ຢູ່ນະຄອນຫລວງ ຮ່າໂນ້ຍ ແລະ ຊາວຫວຽດນາມ ນັບມື້ນັບນິຍົມບັນດາຜະລິດຕະພັນຂອງໄທທີ່ມີຄຸນນະພາບສູງ ແລະ ລາຄາແກ້ງແຍ້ງກວ່າ. ຈາກບັນດາເງື່ອນໄຂສະດວກດັ່ງກ່າວ ທ່ານ Alan Thomson ມີຄວາມເຊື່ອໝັ້ນຢ່າງແນວແນ່ວ່າ ການດຳເນີນທຸລະກິດຂອງ Robins ຢູ່ຫວຽດນາມ ຈະປະສົບຜົນສຳເລັດ ແລະ Robins ຈະເປີດກວ້າງຕະຫລາດຢູ່ຫວຽດນາມຕື່ມອີກ.
“ຈຸດໝາຍຂອງພວກຂ້າພະເຈົ້າໃນຊຸມປີຕໍ່ໄປ ແມ່ນຈະລົງທຶນເຂົ້າສູນການຄ້າແຫ່ງທີ 2 ຢູ່ ນະຄອນ ໂຮ່ຈິມີນ ແລະ ລົງທຶນເຂົ້າບັນດາຮ້ານຂາຍເຄື່ອງກິລາ, ແຟຊັ່ນໄປການ. ນັບແຕ່ນີ້ຮອດທ້າຍປີ 2014, Robins ຈະສ້າງວຽກເຮັດງານທຳໃຫ້ແກ່ຄົນງານຕື່ມອີກ 1000 ຄົນ.”
ຕາມບົດລາຍງານຂອງກະຊວງອຸດສາຫະກຳ ແລະ ການຄ້າຫວຽດນາມ ແລ້ວ, ປະຈຸບັນ ຫວຽດນາມ ແມ່ນຄູ່ຮ່ວມມືດ້ານການຄ້າໃຫຍ່ອັນດັບທີ 2 ຂອງໄທ ໃນພາກພື້ນ ອາຊຽນ ແລະ ແມ່ນຄູ່ຮ່ວມມືດ້ານການຄ້າໃຫຍ່ອັນດັບທີ 9 ຂອງໄທໃນໂລກ. ເລື່ອງກຸ່ມບໍລິສັດ Central Group ແຊກຊຶມເຂົ້າຕະຫລາດຫວຽດນາມ, ເປີດສູນການຄ້າທີ່ທັນສະໄຫມ ດ້ວຍຈຳນວນເງິນລົງທຶນຫຼາຍພໍສົມຄວນນັ້ນ ເປັນການພິສູດໃຫ້ເຫັນການພົວພັນດ້ານການຄ້າລະຫວ່າງສອງປະເທດນັບມື້ນັບພັດທະນາຢ່າງບໍ່ຢຸດຢັ້ງ.