(vovworld)- ວັນສ້າງຕັ້ງປະຊາຄົມ ອາຊຽນ ໃກ້ຈະມາຮອດແລ້ວ. ໃນນັ້ນ ເສົາຄ້ຳວັດທະນະທຳສັງຄົມ ອາຊຽນ ດ້ວຍຈຸດໝາຍສ້າງປະຊາຄົມບັນດາປະເທດ ອາຊຽນ ໃຫ້ມີຄວາມກົມກຽວ, ສາມັກຄີ ແລະ ສ້າງເປັນສີສັນລວມຂອງພາກພື້ນ ມາຮອດປະຈຸບັນວິວັດການດັ່ງກ່າວໄດ້ສ້າງສຳເລັດແລ້ວກວ່າ 90%. ດ້ວຍພື້ນຖານການພົວພັນສອງຝ່າຍແບບຍືນຍົງ ຊື່ງໄດ້ຮັບການສ້າງຕັ້ງລະຫວ່າງຫວຽດນາມ ກັບບັນດາປະເທດໃນພາກພື້ນ. ພາຍຫລັງ 20 ປີແຫ່ງການເຂົ້າເປັນສະມາຊິກອາຊຽນ.ຫວຽດນາມຢືນຢັນໄດ້ທີ່ຕັ້ງ ແລະ ບົດບາດຂອງຕົນ, ປະກອບສ່ວນປັບປຸງ ແລະ ຊຸກຍູ້ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງບັນດາປະເທດໃນອາຊຽນ.
ງານລາຕີພົບປະແລກປ່ຽນວັດທະນະທຳສິລະປະລະຫວ່າງ ມະຫາວິທະຍາໄລ Tadulako ເຂດ Sulawesi ປະເທດ ອິນໂດເນເຊຍ ແລະ ມະຫາວິທະຍາໄລຟ້ອນ ຫວຽດນາມ ຊື່ງດຳເນີນໄປໃນຕອນຄ່ຳວັນທີ 11/6 ຜ່ານມາ. ຄວາມຈິງແລ້ວ ເພື່ອສ້າງພາບພົດປະຊາຄົມອາຊຽນ ທີ່ສະຫນິດຕິດພັນ ແລະ ເຂົ້າໃຈເຊິ່ງກັນ ແລະກັນ, ບັນດາການເຄື່ອນໄຫວພົວພັນແລກປ່ຽນວັດທະນະທຳ, ສິລະປະ ແມ່ນມີຄວາມຈຳເປັນທີ່ສຸດ. ນັ້ນກໍແມ່ນຄວາມຮູ້ສຶກຂອງນາງ Magdalena Pebriani Simatupang, ນັກສິລະປິນມາຈາກ ອິນໂດເນເຊຍ ໃນງານລາຕີພົວພັນແລກປ່ຽນດັ່ງກ່າວ. ນາງ Magdalena Pebriani Simatupang ເວົ້າວ່າ:
ພິທີເຊື່ອມຕໍ່ວັດທະນະທຳເຫ້ວກັບ ອາຊຽນ
ໃນໂອກາດນະຄອນເຫ້ວໄດ້ຮັບນາມມະຍົດນະຄອນວັດທະນະທຳ ອາຊຽນ
ພາບ:internet
|
“ນີ້ເປັນຄັ້ງທຳອິດທີ່ຂ້າພະເຈົ້າມາຢ້ຽມຢາມ ຫວຽດນາມ ແລະ ຂ້າພະເຈົ້າມີຄວາມປິຕິຊົມຊື່ນເມື່ອໄດ້ພົບປະກັບບັນດານັກສິລະປິນຟ້ອນຂອງຫວຽດນາມ. ຕາມຂ້າພະເຈົ້າແລ້ວ ງານພົບປະແລກປ່ຽນວັດທະນະທຳ ອິນໂດເນເຊຍ - ຫວຽດນາມ ໄດ້ປະກອບສ່ວນຮັດແຫນ້ນສາຍພົວພັນມິດຕະພາບ ລະຫວ່າງສອງປະເທດໃນຂົງເຂດວັດທະນະທຳ.”
ນີ້ພຽງແຕ່ແມ່ນຫນຶ່ງບັນດາການເຄື່ອນໄຫວພົວພັນແລກປ່ຽນ ລະຫວ່າງຫວຽດນາມ ກັບອິນໂດເນເຊຍ ເວົ້າສະເພາະ ແລະ ບັນດາປະເທດ ອາຊຽນ ເວົ້າລວມຊື່ງດຳເນີນໄປໃນຕະຫລອດໄລຍະຜ່ານມາເທົ່ານັ້ນ. ໃນນັ້ນ ມີລາຍການພົວພັນແລກປ່ຽນວັດທະນະທຳ ຫວຽດນາມ - ລາວ ດ້ວຍຫົວຂໍ້ “ ຮ່າໂນ້ຍ-ວຽງຈັນ ໄມຕິຈິດມິດຕະພາບ” ຊື່ງຖືກຈັດຂຶ້ນໃນວັນທີ 12/4/2015 ຢູ່ ຮ່າໂນ້ຍ ຫລື ລາຍການ “ພົບປະແລກປ່ຽນ ຊາວຫນຸ່ມ ຫວຽດນາມ -ໄທ” ຄັ້ງທີ 6 ຊື່ງດຳເນີນໄປໃນວັນທີ 18-27/8/2014 ຢູ່ ຮ່າໂນ້ຍ. ບັນດາການເຄື່ອນໄຫວດັ່ງກ່າວ ໄດ້ປະກອບສ່ວນຊຸກຍູ້ຄວາມສະຫນິດຕິດພັນລະຫວ່າງປະຊາຊົນ ຫວຽດນາມ ກັບປະຊາຊົນບັນດາປະເທດ ອາຊຽນ.
ຫນຶ່ງໃນບັນດາການເຄື່ອນໄຫວຮ່ວມມືພົ້ນເດັ່ນທີ່ໄດ້ຮັບການຍູ້ແຮງໃນໄລຍະຜ່ານມາ ລະຫວ່າງຫວຽດນາມ ກັບບັນດາປະເທດ ອາຊຽນ ນັ້ນແມ່ນຂົງເຂດການສຶກສາບຳລຸງສ້າງ. ມຸ່ງໄປເຖິງປະຊາຄົມ ອາຊຽນໃນທ້າຍປີນີ້ ແລະ ດ້ວຍວິໄສທັດ 2020, ການຮ່ວມມືບຳລຸງສ້າງຈະກາຍເປັນປັດໄຈສຳຄັນ ເພື່ອໃຫ້ບັນດາເພື່ອນຫນຸ່ມ, ບັນດາພົນລະເມືອງ ອາຊຽນ ໃນອະນາຄົດ, ສືບຕໍ່ເພີ່ມພູນຄູນສ້າງ ແລະ ເສີມຂະຫຍາຍຄວາມສາມັກຄີໃນປະຊາຄົມອາຊຽນ. ແລະກໍໃນລາຍການສິລະປະເມື່ອຕອນຄ່ຳວັນທີ 11/6, ທ່ານ Sadikin, ອັກຄະລັດຖະທູດ ອິນໂດເນເຊຍ ປະຈຳຫວຽດນາມ ໃຫ້ຮູ້ວ່າ: ເພື່ອຊຸກຍູ້ການຮ່ວມມືນີ້, ໃນໄລຍະຜ່ານມາ ອິນໂດເນເຊຍ ແລະ ຫວຽດນາມ ຍາມໃດກໍມານະພະຍາຍາມສ້າງພື້ນຖານດ້ານກົດໝາຍເພື່ອໃຫ້ຊາວຫນຸ່ມສອງປະເທດຫຍັບເຂົ້າໃກ້ກັນກວ່າ. ສິ່ງດັ່ງກ່າວໄດ້ຮັບການພິສູດໃຫ້ເຫັນຜ່ານບັນດາສັນຍາຮ່ວມມືໃນຂົງເຂດສຶກສາ ບຳລຸງສ້າງຫລາຍສະບັບທີ່ໄດ້ຮັບການລົງນາມໃນມື້ດຽວກັນ. ທ່ານ Sadikin ໃຫ້ຮູ້ວ່າ:
“ມື້ນີ້ ໄດ້ດຳເນີນພິທີລົງນາມໃນຂໍ້ຕົກລົງຮ່ວມມື 3 ສະບັບ, ໃນນັ້ນ ມີຂໍ້ຕົກລົງຮ່ວມມືລະຫວ່າງ ທ່ານເອກອັກຄະລັດຖະທູດ ອິນໂດເນເຊຍ Mayerfar ກັບ ອະທິການບໍດີ ມະຫາວິທະຍາໄລ ຮ່າໂນ້ຍ ກ່ຽວກັບການສ້າງຕັ້ງສູນຄົ້ນຄ້ວາ ອິນໂດເນເຊຍ ຢູ່ ຮ່າໂນ້ຍ. ນອກນັ້ນ ອະທິການບໍດີ ມະຫາວິທະຍາໄລ Tadulako ແລະ ອະທິການບໍດີ ມະຫາວິທະຍາໄລ ຮ່າໂນ້ຍ ກໍໄດ້ລົງນາມໃນຂໍ້ຕົກລົງກ່ຽວກັບການສ້າງຫລັກສູດ ພາສາ ອິນໂດເນເຊຍ ໃຫ້ມະຫາວິທະຍາໄລ ຮ່າໂນ້ຍ ແລະ ສຸດທ້າຍແມ່ນຂໍ້ຕົກລົງຮ່ວມມືລະຫວ່າງ ສະຖານທູດ ອິນໂດເນເຊຍ ແລະ ມະຫາວິທະຍາໄລຟ້ອນ ຫວຽດນາມ ໃນການສິດສອນບັນດາວາດຟ້ອນຂອງອິນໂດເນເຊຍ.”
ບໍ່ພຽງແຕ່ຮ່ວມມືກັບ ອິນໂດເນເຊຍເທົ່ານັ້ນ, ຫວຽດນາມ ໄດ້ຕັ້ງຫນ້າສົ່ງເສີມການຮ່ວມມືໃນຂົງເຂດສຶກສາບຳລຸງສ້າງກັບຫລາຍປະເທດອື່ນໃນພາກພື້ນຄື: ໄທ, ລາວ, ມາເລເຊຍ. ນອກນັ້ນ ຫວຽດນາມ ຍັງສ້າງເງື່ອນໄຂ ແລະ ຫນູນຊ່ວຍບັນດາປະເທດໃນພາກພື້ນ ເພື່ອຮັດແຄບຊ່ອງຫວ່າງດ້ານພູມປັນຍາ, ເຮັດໃຫ້ປະຊາຄົມ ອາຊຽນ ມີລະດັບຄວາມຮູ້ເທົ່າທຽບກັນ. Im Sethy, ອະດີດລັດຖະມົນຕີວ່າການກະຊວງສຶກສາ, ຊາວຫນຸ່ມ ແລະ ກິລາ ກຳປູເຈຍ ໃຫ້ຮູ້ວ່າ: ແຕ່ລະປີ ຫວຽດນາມ ລ້ວນແຕ່ສະຫນອງທຶນສຶກສາໃຫ້ນັກຮຽນ, ນັກສຶກສາກຳປູເຈຍ ມາຮ່ຳຮຽນ ແລະ ຄົ້ນຄ້ວາຢູ່ຫວຽດນາມ. ສິ່ງດັ່ງກ່າວຊ່ວຍໃຫ້ການພົວພັນມິດຕະພາບລະຫວ່າງສອງປະເທດສະມາຊິກ ອາຊຽນໃຫ້ນັບມື້ນັບສະຫນິດຕິດພັນກວ່າ.
“ການພົວພັນແບບພິເສດລະຫວ່າງສອງກະຊວງສຶກສາຫວຽດນາມ ແລະ ກຳປູເຈຍ ໄດ້ມີມາແຕ່ດົນນານ ແລະ ນັບມື້ນັບພັດທະນາ. ພວກຂ້າພະເຈົ້າຍາມໃດກໍຈົດຈ່ຳການຊ່ວຍເຫລືອອັນໃຫຍ່ຫລວງຂອງກະຊວງສຶກສາ ແລະ ບຳລຸງສ້າງຫວຽດນາມ, ນັບແຕ່ເມື່ອ ກຳປູເຈຍ ຫລຸດພົ້ນອອກຈາກໄພດັບສູນເຊື້ອຊາດ Ponpot ໃນວັນທີ 7/1/1979 ມາຮອດປະຈຸບັນ, ພິເສດໃນຂົງເຂດສຶກສາຊັ້ນມັດທະຍົມ, ມະຫາວິທະຍາໄລ ແລະ ປະລິຍາໂທ, ປະລິຍາເອກ.”
ຄຽງຄູ່ກັບການສຶກສາ, ບັນດາການເຄື່ອນໄຫວຈຸດສຸມຂອງ ອາຊຽນ ໃນໄລຍະຜ່ານມາ ກໍມຸ່ງໄປເຖິງຈຸດໝາຍເພີ່ມທະວີຄວາມຄືບຫນ້າ ແລະ ບຸລິມະສິດບັນດາຂົງເຂດຄື: ລົງທຶນພັດທະນາແຫລ່ງຊັບພະຍາກອນມະນຸດ ແລະ ຊຸກຍູ້ວຽກເຮັດງານທຳແບບຍືນຍົງ ເພື່ອເພີ່ມທະວີທັກສະໃຫ້ຄົນງານ. ຈຸດເດັ່ນຂອງການເຄື່ອນໄຫວນີ້ ແມ່ນງານແຂ່ງຂັນສີມືແຮງງານ ອາຊຽນ ຊື່ງດຳເນີນໄປເມື່ອວັນທີ 19-29/10/2014 ຢູ່ ຮ່າໂນ້ຍ ໂດຍມີການເຂົ້າຮ່ວມຂອງຄົນງານ 300 ຄົນທີ່ມາຈາກ 10 ປະເທດ ອາຊຽນ. ທ່ານນາງ ຫງວຽນທິຫາຍຈ່ວຽນ ໃຫ້ຮູ້ວ່າ: ງານແຂ່ງຂັນສີມືແຮງງານ ອາຊຽນ ເພື່ອຊ່ວຍໃຫ້ພົນລະເມືອງບັນດາປະເທດ ອາຊຽນ ເຂົ້າໃຈກ່ຽວກັບລະດັບຄວາມຮູ້, ທັກສະຂອງກັນ ພ້ອມທັງຊ່ວຍບັນດາຄົນງານໃນພາກພື້ນເປັນເຈົ້າການໃນວິຊາສະເພາະ ແລະ ກຽມພ້ອມໃຫ້ການເຊື່ອມໂຍງຂອງພາກພື້ນໃນທ້າຍປີນີ້.
“ຕະຫລາດ ອາຊຽນ ເປີດກວ້າງ ດ້ວຍຄວາມຮັບຜິດຊອບກະກຽມແຫລ່ງຊັບພະຍາກອນມະນຸດເພື່ອເຊື່ອມໂຍງ. ສະນັ້ນ ຫວຽດນາມ ພວມມານະພະຍາຍາມກະກຽມຖັນແຖວຄົນງານຫນຸ່ມທີ່ມີຄວາມຊຳນານງານເພື່ອເຊື່ອມໂຍງເຂົ້າກັບປະຊາຄົມອາຊຽນ, ໃນນັ້ນ ມີວຽກງານແນະນຳອາຊີບ, ສອນວິຊາຊີບ, ສຳພັດກັບຕະຫລາດແຮງງານ ເພື່ອສ້າງວຽກເຮັດງານທຳໃຫ້ບັນດາຄົນງານຫວຽດນາມ ແລະ ບັນດາປະເທດ ອາຊຽນ.”
ບັນດາຄວາມມານະພະຍາຍາມຢ່າງແຮງຈາກຝ່າຍຫວຽດນາມໄດ້ຮັບການຕີລາຄາສູງຈາກບັນດາປະເທດ ສະມາຊິກ ອາຊຽນ. ຫວຽດນາມ ຢືນຢັນ ຄວາມຕັດສິນໃຈສືບຕໍ່ພ້ອມກັບບັນດາປະເທດເພື່ອນມິດຮ່ວມແຮງຮ່ວມໃຈເພື່ອປະຕິບັດຄາດໝາຍສ້າງປະຊາຄົມວັດທະນະທຳ ສັງຄົມ ອາຊຽນ ໃຫ້ສຳເລັດໃນທ້າຍປີນີ້.