(vovworld)- ພາຍຫລັງ 1 ປີແຫ່ງວັນລົງນາມໃນສັນຍາຄູ່ຮ່ວມມືຍຸດທະສາດສອງຝ່າຍ ຫວຽດນາມ - ອິນໂດເນເຊຍ (28/6/2013), ການພົວພັນລະຫວ່າງສອງປະເທດ ຢູ່ທຸກຂັ້ນ ນັບມື້ນັບໄດ້ຮັບການຍູ້ແຮງ ແລະ ຫັນບັນດາຂົງເຂດໃຫ້ປະກົດຜົນເປັນຈິງ. ເນື່ອງໃນໂອກາດສະເຫລີມສະຫລອງ 69 ປີ ແຫ່ງວັນຊາດ ອິນໂດເນເຊຍ (17/8) ໂດຍສະຖານທູດ ອິນໂດເນເຊຍ ປະຈຳຮ່າໂນ້ຍ ຈັດຕັ້ງຂຶ້ນ, ນັກຂ່າວວິທະຍຸກະຈາຍສຽງຫວຽດນາມ ພ້ອມກັບທ່ານ Mayerfas, ເອກອັກຄະລັດຖະທູດ ອິນໂດເນເຊຍ ຫວນຄືນການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ ແລະ ອິນໂດເນເຊຍ.
ທ່ານ Mayerfas, ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ
|
ຫວຽດນາມ ແລະ ອິນໂດເນເຊຍ ແມ່ນສອງປະເທດ ມີສາຍພົວພັນມາແຕ່ດົນນານ ແລະ ໝັ້ນຄົງ, ໂດຍທ່ານອະດີດປະທານາທິບໍດີ ອິນໂດເນເຊຍ Sukarno ແລະ ປະທານ ໂຮ່ຈິມີນ ກໍ່ຕັ້ງ ເມື່ອປີ 1954. ໃນ 60 ປີຜ່ານມາ, ສາຍພົວພັນມິດຕະພາບທີ່ເປັນມູນເຊື້ອນັ້ນ ສືບຕໍ່ໄດ້ຮັບການຮັກສາ ແລະ ຊຸກຍູ້ໃນທຸກຂົງເຂດຈາກການນຳ ແລະ ປະຊາຊົນສອງປະເທດ. ບໍ່ພຽງແຕ່ເທົ່ານັ້ນ ສອງປະເທດມີປະຫວັດສາດຄ້າຍຄືກັນ, ຍາມໃດກໍສະຫນັບສະຫນູນເຊິ່ງກັນ ແລະ ກັນໃນການຕໍ່ຕ້ານຍາດເອົາເອກະລາດ.
ວັນທີ 28/6/2013, ເປັນຂີດໝາຍແຫ່ງບາດລ້ຽວປະຫວັດສາດໃນການພົວພັນສອງຝ່າຍ ລະຫວ່າງສອງປະເທດ ເມື່ອການນຳ ຫວຽດນາມ, ທ່ານປະທານປະເທດ ເຈືອງເຕີນຊາງ ພ້ອມກັບປະທານາທິບໍດີ ອິນໂດເນເຊຍ Susilo Bambang Yudhoyono ໄດ້ເປັນເອກະພາບລົງນາມໃນສັນຍາຄູ່ຮ່ວມມືຍຸດທະສາດສອງຝ່າຍ, ນຳການພົວພັນສອງປະເທດຂຶ້ນສູ່ລະດັບສູງໃຫມ່. ສິ່ງດັ່ງກ່າວສະແດງໃຫ້ເຫັນຄວາມສຳຄັນ ແລະ ທີ່ຕັ້ງບົດບາດຂອງ ອິນໂດເນເຊຍ, ຊື່ງແມ່ນປະເທດໃຫຍ່ກວ່າໝູ່ທາງທິດໃຕ້ຂອງພາກພື້ນ ແລະ ຫວຽດນາມ ປະເທດ ພວມພັດທະນາຢູ່ທາງທິດເຫນືອຂອງພາກພື້ນ. ສິ່ງດັ່ງກ່າວກໍພິສູດໃຫ້ເຫັນ ນ້ຳໃຈມິດຕະພາບຂອງປະຊາຊົນສອງປະເທດ, ຍາມໃດກໍແບ່ງປັນຄວາມຫຍຸ້ງຍາກ ແລະ ຊ່ວຍເຫລືອເຊິ່ງກັນ ແລະ ກັນ. ທ່ານ Mayerfas, ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ໃຫ້ຮູ້ວ່າ:
“ບໍ່ແມ່ນປະເທດໃດ ພວກຂ້າພະເຈົ້າກໍເຊັນສັນຍາຄູ່ຮ່ວມມືຍຸດທະສາດ ເພາະວ່າ ກ່ອນທີ່ບັນລຸໄດ້ສິ່ງດັ່ງກ່າວ ແຕ່ລະສາຍພົວພັນສອງຝ່າຍ ຕ້ອງບັນລຸມາດຖານແນ່ນອນ. ປະຈຸບັນ ອິນໂດເນເຊຍ ມີການພົວພັນຄູ່ຮ່ວມມືຍຸດທະສາດກັບ 14 ປະເທດໃນໂລກ, ໃນນັ້ນ ຢູ່ ພາກພື້ນ ອາຊີຕາເວັນອອກສ່ຽງໃຕ້ ພຽງແຕ່ຫວຽດນາມແມ່ນຄູ່ຮ່ວມມືຍຸດທະສາດຂອງອິນໂດເນເຊຍ. ຂ້າພະເຈົ້າຄິດວ່າ ນັ້ນແມ່ນໝາກຜົນເປັນຫນ້າຊ່ືນຊົມ.”
ທ່ານເອກອັກຄະລັດຖະທູດ Mayerfas ເນັ້ນຫນັກວ່າ: ສັນຍາຄູ່ຮ່ວມມືຍຸດທະສາດນີ້ ແມ່ນພື້ນຖານໃຫ້ແກ່ບັນດາຂໍ້ຕົກລົງອື່ນໃນອະນາຄົດ, ປະກອບສ່ວນປັບປຸງ ແລະ ຊຸກຍູ້ນຳ້ໃຈມິດຕະພາບລະຫວ່າງ ສອງຊາດໃນທຸກຂົງເຂດ:
“ສັນຍາຄູ່ຮ່ວມມືຍຸດທະສາດນີ້ ແມ່ນປະຖົມປັດໄຈ ແລະ ແມ່ນເສັ້ນທາງໃຫ້ແກ່ການຮ່ວມມື, ໂດຍສືບຕໍ່ຈາກເລື່ອງລົງນາມໃນໂຄງການດຳເນີນງານຮ່ວມ. ສິ່ງດັ່ງກ່າວແມ່ນຊຸກຍູ້ການພົວພັນລະຫວ່າງສອງຝ່າຍ, ໃນນັ້ນ ສອງຝ່າຍສືບຕໍ່ຊຸກຍູ້ການພົວພັນແລກປ່ຽນທຸກຂັ້ນ, ລະຫວ່າງສະພາແຫ່ງຊາດ, ລັດຖະບານສອງປະເທດ ຫລື ຢູ່ຂັ້ນວິສາຫະກິດ ກໍຄືລະຫວ່າງ ປະຊາຊົນສອງປະເທດ. ດ້ວຍການພົວພັນນັ້ນ, ຄຽງຄູ່ກັບຄວາມມານະພະຍາຍາມນຳມາເຊິ່ງຜົນປະໂຫຍດລວມ, ພວກເຮົາສາມາດເພີ່ມເຕີມໃຫ້ກັນ.”
ອາດຈະເວົ້າໄດ້ວ່າ, ສັນຍານີ້ ສະແດງໃຫ້ເຫັນຄວາມເອົາໃຈໃສ່ເປັນພິເສດຂອງການນຳສອງປະເທດ, ຊ່ວຍໃຫ້ການນຳ ແລະ ປະຊາຊົນສອງປະເທດ ເຂົ້າໃຈເຊິ່ງກັນ ແລະ ກັນກວ່າ, ພ້ອມກັນແກ້ໄຂບັນຫາສອງຝ່າຍ. ສິ່ງດັ່ງກ່າວຈະສ້າງເງື່ອນໄຂສະດວກໃຫ້ແກ່ບັນດາສັນຍາອື່ນໄດ້ຮັບການລົງນາມຢ່າງວ່ອງໄວຄື: ສັນຍາກ່ຽວກັບການສົ່ງອາດຊະຍາກອນ ແລະ ສັນຍາຫນູນຊ່ວຍຕຸລາການສອງຝ່າຍ(MLA). ສຳລັບສັນຍານີ້, ລັດຖະບານສອງປະເທດ ຈະມີກອບກົດໝາຍເພື່ອແກ້ໄຂບັນດາບັນຫາຄວາມສະຫງົບປອດໄພຢູ່ປະເທດເພື່ອນມິດ. ນອກນັ້ນ, ຫວຽດນາມ ແລະ ອິນໂດເນເຊຍ ພວມຕັ້ງຫນ້າປຶກສາຫາລື ແລະ ມຸ່ງໄປເຖິງຂໍ້ຕົກລົງຮ່ວມມືອື່ນຫລາຍສະບັບ, ໃນນັ້ນ ມີຂໍ້ຕົກລົງກ່ຽວກັບອະທິປະໄຕເຂດນ່ານນຳ້ລະຫວ່າງສອງປະເທດ.
“ມີສັນຍາສະບັບຫນຶ່ງອີກ ຊື່ງພວກຂ້າພະເຈົ້າພວມພະຍາຍາມບັນລຸໄດ້ນັ້ນແມ່ນ ສັນຍາກ່ຽວກັບເຂດເສດຖະກິດຈຳເພາະ, ເພາະວ່າ ປະຈຸບັນ ຍັງມີບາງບັນຫາກ່ຽວກັບດ້ານເຕັກນິກຄວນໄດ້ຮັບການປຶກສາຫາລືຢ່າງລະອຽດກວ່າ. ພວກຂ້າພະເຈົ້າປາດຖະຫນາວ່າ ທ້າຍປີນີ້ ຫລື ຕົ້ນປີຫນ້າ ຂໍ້ຕົກລົງນີ້ຈະໄດ້ຮັບການລົງນາມ. ເຖິງຢ່າງໃດກໍຕາມ, ນີ້ແມ່ນຂໍ້ຕົກລົງກັບຫວຽດນາມ ສະນັ້ນ ຫລັກການຂອງພວກຂ້າພະເຈົ້າ ເວລາໃດຫວຽດນາມ ເຫັນດີ ພວກເຮົາພ້ອມແລ້ວລົງນາມໃນຂໍ້ຕົກລົງນີ້.”
ກ່ຽວກັບການພົວພັນຫລາຍຝ່າຍ, ຍາມໃດສອງປະເທດ ກໍສົມທົບ, ຮ່ວມມືນຳກັນໃນທຸກເວທີປາໄສພາກພື້ນ ແລະ ສາກົນເປັນຢ່າງດີ. ສິ່ງດັ່ງກ່າວສະແດງໃຫ້ເຫັນການສະຫນັບສະຫນູນຂອງ ອິນໂດເນເຊຍ ດ້ວຍບັນດາຖະແຫລງການ, ຂໍ້ສະເຫນີຂອງຫວຽດນາມ ແລະ ກົງກັນຂ້າມ. ທ່ານເອກອັກຄະລັດຖະທູດ Mayerfas ເນັ້ນຫນັກວ່າ: ການສະຫນັບສະຫນູນຮອບດ້ານນີ້ ແມ່ນອີງໃສ່ພື້ນຖານຂອງການພົວພັນອັນຍາວນານ ແລະ ໝັ້ນຄົງ, ການພົວພັນມິດຕະພາບທີ່ເປັນມູນເຊື້ອລະຫວ່າງລັດຖະບານ ແລະ ປະຊາຊົນສອງປະເທດ, ເພາະວ່າ ຫວຽດນາມ ແມ່ນຄູ່ຮ່ວມມືຍຸດທະສາດຫນຶ່ງດຽວຂອງ ອິນໂດເນເຊຍ ຢູ່ ພາກພື້ນ.