(vovworld)- ປະຊາຄົມ ອາຊຽນ ໄດ້ຮັບການສ້າງຕັ້ງຢ່າງເປັນທາງການໃນທ້າຍປີ 2015. ວິສາຫະກິດບັນດາປະເທດ ອາຊຽນ ພວມມີກາລະໂອກາດຫລາຍຢ່າງ ແຕ່ສິ່ງທ້າທາຍບໍ່ແມ່ນຫນ້ອຍ ໃນວິວັດແຫ່ງການເຊື່ອມໂຍງ. ໃນຊຸມປີຜ່ານມາ, ເພື່ອຫນູນຊ່ວຍບັນດາວິສາຫະກິດພາຍໃນປະເທດ ເພີ່ມທະວີກຳລັງແກ້ງແຍ້ງ ແລະ ເຊື່ອມໂຍງເຂົ້າກັບເສດຖະກິດພາກພື້ນ, ລັດຖະບານ ບັນດາປະເທດ ອາຊຽນ ໄດ້ຜັນຂະຫຍາຍຫລາຍໂຄງການ, ນະໂຍບາຍ ແລະ ບັນດາການເຄື່ອນໄຫວຫນູນຊ່ວຍໃຫ້ວິສາຫະກິດຂອງຕົນ, ໃນນັ້ນ ມີອິນໂດເນເຊຍ.
ໃນພາກພື້ນ ອາຊຽນ, ອິນໂດເນເຊຍ ແມ່ນປະເທດໃຫຍ່. ນອກຈາກ ແມ່ນປະເທດມີພົນລະເມືອງ ຫລາຍກວ່າໝູ່ໃນກຸ່ມອາຊຽນ(ກວ່າ 250 ລ້ານຄົນ) ເທົ່ານັ້ນ, ອິນໂດເນເຊຍ ຍັງແມ່ນປະເທດມີຈຳນວນວິສາຫະກິດຫລາຍກວ່າໝູ່ 400.000 ແຫ່ງ ດ້ວຍຜະລິດຕະພັນທີ່ມີທ່າແຮງຫລາຍຢ່າງຄື: ສິນທະເລ, ໄມ້, ວັດຖຸດິບເກີບຫນັງ, ນ້ຳມັນພືດ, ເຄມີ, ການຢາ… ເລື່ອງສ້າງຕັ້ງປະຊາຄົມ ອາຊຽນ ໃນທ້າຍປີ 2015 ແມ່ນພື້ນຖານ ແລະ ແມ່ນປະຖົມປັດໄຈ ເພື່ອໃຫ້ບັນດາວິສາຫະກິດ ອິນໂດເນເຊຍ ແນະນຳບັນດາຜະລິດຕະພັນຂອງຕົນອອກສູ່ບັນດາປະເທດໃນພາກພື້ນ. ທ່ານນາງ Santi, ຜູ້ຕາງຫນ້າບໍລິສັດ Lugas Farmaceutical ບໍລິສັດຜະລິດ ແລະ ສົ່ງອອກບັນດາຜະລິດຕະພັນການຢາ ອິນໂດເນເຊຍ ໃຫ້ຂໍ້ສັງເກດວ່າ:
100ວິສາຫະກິດອິນໂດເນເຊຍເຂົ້າຮ່ວມງານຕະຫລາດນັດຢູ່ຮ່າໂນ້ຍ
ພາບ:thanglong.vn
|
“ການພົວພັນແລກປ່ຽນບັນດາປະເພດສິນຄ້າຈະສະດວກ ແລະ ວ່ອງໄວກວ່າ. ນອກນັ້ນ ຄວາມຕ້ອງການສິນຄ້າຂອງບັນດາພົນລະເມືອງໃນປະຊາຄົມ ອາຊຽນ ຈະ ຫລາຍຮູບຫລາຍແບບກວ່າ ແລະ ແຮງກວ່າ. ພວກຂ້າພະເຈົ້າເຊື່ອໝັ້ນວ່າ ພາຍຫລັງ ປະຊາຄົມ ອາຊຽນ ໄດ້ຮັບການສ້າງຕັ້ງ, ກຸ່ມວິສາຫະກິດ ຈະມີເງື່ອນໄຂສະດວກກວ່າໃນການແກ້ໄຂລະບຽບການບໍລິຫານ. ໃນນັ້ນ ແຕ່ລະປະເທດ ຈະຍົກອອກບັນດາຂໍ້ກຳນົດຕ່າງກັນ ແຕ່ພວກຂ້າພະເຈົ້າຍາມໃດກໍມີຄວາມປະເອີບໃຈວ່າ ປະຊາຄົມ ອາຊຽນ ໄດ້ຮັບການສ້າງຕັ້ງຈະນຳມາເຊິ່ງຜົນປະໂຫຍດຫລາຍຢ່າງໃຫ້ບັນດາວິສາຫະກິດອິນໂດເນເຊຍ.”
ເພື່ອສ້າງເງື່ອນໄຂໃຫ້ບັນດາວິສາຫະກິດສົ່ງອອກ, ໃນປີ2015 ລັດຖະບານອິນໂດເນເຊຍ ໄດ້ປະກາດ 5 ໝວດນະໂຍບາຍເສດຖະກິດ. ໃນນັ້ນ ໝວດນະໂຍບາຍທີ 4 ໄດ້ຮັບການຜັນຂະຫຍາຍແຕ່ເດືອນ 10/2015 ແມ່ນສຸມໃສ່ເພີ່ມທະວີການສະຫນອງບັນດາບ້ວງເງິນກູ້ຢືມ ດ້ວຍອັດຕາດອກເບ້ຍຕ່ຳ ພຽງ 12%/ປີ ແລະ ສ້າງເງື່ອນໄຂສະດວກໃຫ້ບັນດາວິສາຫະກິດກ່ຽວກັບລະບຽບການບໍລິຫານ. ຄຽງຄູ່ກັນນັ້ນ, ຜ່ານບັນດາອົງການຜູ້ຕາງຫນ້າ ບັນດາປະເທດ ອາຊຽນ, ລັດຖະບານ ອິນໂດເນເຊຍ ຢາກເພີ່ມທະວີການຊຸກຍູ້ບັນດາວິສາຫະກິດພົບປະແລກປ່ຽນ, ຄົ້ນຄ້ວາ ແລະ ຊອກຮູ້ກ່ຽວກັບຕະຫລາດພາຍໃນພາກພື້ນ. ພ້ອມກັນນັ້ນ, ລັດຖະບານ ອິນໂດເນເຊຍ ກໍໄດ້ກຳນົດທິດ ແລະ ສະຫນອງຂໍ້ມູນຂ່າວໃຫ້ບັນດາວິສາຫະກິດ ອິນໂດເນເຊຍ ກ່ຽວກັບບັນດາຕະຫລາດທີ່ມີຄວາມສາມາດບົ່ມຊ້ອນຫລາຍຢ່າງໃນພາກພື້ນ, ໃນນັ້ນ ມີຫວຽດນາມ. ທ່ານ Sadikin, ອັກຄະລັດຖະທູດ ຮັບຜິດຊອບບັນຫາເສດຖະກິດ - ສະຖານທູດອິນໂດເນເຊຍ ປະຈຳຫວຽດນາມ ໄດ້ແບ່ງປັນວ່າ:
“ພວກຂ້າພະເຈົ້າ ຍົກອອກຂໍ້ເຈາະຈີ້ມ ແລະ ຊອກຫາມາດຕະການ ເພື່ອໃຫ້ບັນດາວິສາຫະກິດ ສາມາດສ້າງການພົວພັນດ້ານການຄ້າ ແລະ ການລົງທຶນ. ເຂົາເຈົ້າຈະພົບປະ ແລະ ຊອກຮູ້ເຊິ່ງກັນ ແລະກັນ. ພວກຂ້າພະເຈົ້າຊອກຫາບັນດາວິສາຫະກິດຫວຽດນາມ ມີຄວາມສາມາດບົ່ມຊ້ອນການຮ່ວມມືກັບບັນດາວິສາຫະກິດ ອິນໂດເນເຊຍ. ຫລັງຈາກນັ້ນ ພວກຂ້າພະເຈົ້າສືບຕໍ່ ເລືອກເຟັ້ນ ແລະ ຊອກຫາບັນດາວິສາຫະກິດເໝາະສົມທີ່ສຸດໃນບັນດາຂົງເຂດ ຊື່ງ ວິສາຫະກິດອິນໂດເນເຊຍ ມີຄວາມຕ້ອງການ.”
ເພື່ອສົ່ງບັນດາຜະລິດຕະພັນຂອງຕົນໄປຍັງຕະຫລາດອື່ນ, ເລື່ອງໄດ້ຮັບການຫນູນຊ່ວຍຈາກລັດຖະບານ ແລະ ບັນດາອົງການຜູ້ຕາງຫນ້າຢູ່ຕ່າງປະເທດແມ່ນສິ່ງທີ່ຈຳເປັນທີ່ສຸດ. ສິ່ງດັ່ງກ່າວ ຈະສ້າງຄວາມໄວ້ເນື້ອເຊື່ອໃຈ ແລະ ຊ່ວຍບັນດາວິສາຫະກິດ ສາມາດສຳຜັດຢ່າງງ່າຍດາຍກັບບັນດາວິສາຫະກິດຕ່າງປະເທດກວ່າ. ທ່ານນາງ Santi, ຜູ້ຕາງຫນ້າບໍລິສັດ Lugas Farmaceutical ໃຫ້ຮູ້ວ່າ:
“ວິສາຫະກິດພວກຂ້າພະເຈົ້າ ຍາມໃດກໍໄດ້ຮັບການສະຫນັບສະຫນູນ ແລະ ຫນູນຊ່ວຍຈາກລັດຖະບານ ໃນການສົ່ງອອກສິນຄ້າ. ລັດຖະບານ ອິນໂດເນເຊຍ ກໍສ້າງບັນດາກາລະໂອກາດຊອກຫາຄູ່ຮ່ວມມືໃຫ້ພວກຂ້າພະເຈົ້າ ກໍຄືຫນູນຊ່ວຍ ໃນການເຮັດລະບຽບການສົ່ງສິນຄ້າມາຫວຽດນາມ.”
ທ່ານ Mayerfas, ເອກອັກຄະລັດຖະທູດອິນໂດເນເຊຍປະຈຳຫວຽດນາມ
ພາບ:internet
|
ໃນພາກພື້ນ ອາຊຽນ, ຫວຽດນາມ ແມ່ນຕະຫລາດເຕັມໄປດ້ວຍຄວາມສາມາດບົ່ມຊ້ອນ ແລະ ດູດດື່ມ. ຫວຽດນາມ ມີຫລາຍເງື່ອນໄຂສະດວກ ແລະ ເໝາະສົມກັບການພັດທະນາການລົງທຶນດຳເນີນທຸລະກິດຄື: ຈຳນວນພົນລະເມືອງຫລາຍ, ກຳລັງຊື້ສິນຄ້າໃຫຍ່, ຄ່າຈ້າງຄົນງານຕ່ຳ, ຄົນງານມີສີມືແຮງງານ ແລະ ດຸໝັ່ນຂະຫຍັນພຽນ. ບັນດາປັດໄຈນັ້ນ ໄດ້ສ້າງກຳລັງດຶງດູດຢ່າງແຮງສຳລັບບັນດາວິສາຫະກິດ ອິນໂດເນເຊຍ. ທ່ານ Nico Marco, ຜູ້ຕາງຫນ້າ ບໍລິສັດ Karya Adishin Sukses ຂຶ້ນກັບຂົງເຂດອາຫານເຂົ້າຮ່ວມງານຕະຫລາດນັດການຄ້າ ອິນໂດເນເຊຍ ຊື່ງຫາກໍຈັດຂຶ້ນຢູ່ ຮ່າໂນ້ຍ ໃນທ້າຍປີ 2015 ໄດ້ແບ່ງປັນວ່າ:
“ຫວຽດນາມຍາມໃດ ແມ່ນຕະຫລາດບຸລິມະສິດຕົ້ນຕໍສຳລັບພວກຂ້າພະເຈົ້າ ເພາະວ່າ ຫວຽດນາມ ມີພົນລະເມືອງຫລາຍ ສະນັ້ນ ຄວາມຕ້ອງການນຳໃຊ້ສິນຄ້າກໍຫລວງຫລາຍ. ກ່ອນທີ່ມາຫວຽດນາມ ພວກຂ້າພະເຈົ້າໄດ້ຄົ້ນຄ້ວາຕະຫລາດຫວຽດນາມ. ຜະລິດຕະພັນຂອງພວກຂ້າພະເຈົ້າກໍໄດ້ຮັບການດັດປັບແນວໃດເພື່ອໃຫ້ເໝາະສົມກັບຄວາມຕ້ອງການຂອງຊາວ ຫວຽດນາມ.”
ບໍ່ພຽງແຕ່ບັນດາວິສາຫະກິດເທົ່ານັ້ນ ຫາກລັດຖະບານ ອິນໂດເນເຊຍ ເອງ ຍາມໃດກໍຮັບຮູ້ວ່າ ຫວຽດນາມ ແມ່ນຄູ່ຮ່ວມມືຍຸດທະສາດໃນການພົວພັນແລກປ່ຽນການຄ້າ ການຕ່າງປະເທດຂອງຕົນ. ສິ່ງດັ່ງກ່າວແມ່ນການຢືນຢັນຂອງທ່ານ Dede Ruswandi, ຜູ້ຕາງຫນ້າກະຊວງອຸດສາຫະກຳ ອິນໂດເນເຊຍ ເນື່ອງໃນໂອກາດມາປະຕິບັດງານຢູ່ ຫວຽດນາມ ຫວ່າງແລ້ວນີ້.
“ລັດຖະບານ ອິນໂດເນເຊຍ ຍາມໃດກໍຢາກສືບຕໍ່ຮ່ວມມືກັບຫວຽດນາມ ໃນກຸ່ມບັນດາວິສາຫະກິດຂະຫນາດກາງ ແລະ ນ້ອຍ ແລະ ກ້າວໄປເຖິງບັນດາວິສາຫະກິດຂະຫນາດໃຫຍ່. ພວກຂ້າພະເຈົ້າເຊື່ອໝັ້ນວ່າ ການພົວພັນຮ່ວມມືນັ້ນ ຈະນັບມື້ນັບພັດທະນາກວ່າໃນອະນາຄົດ. ປະຈຸບັນ ນັບມື້ນັບມີວິສາຫະກິດອິນໂດເນເຊຍ ຫລາຍແຫ່ງ ສົນໃຈເຖິງຕະຫລາດ ຫວຽດນາມ. ພວກຂ້າພະເຈົ້າເຊື່ອໝັ້ນວ່າ ເຂົາເຈົ້າຈະປະສົບຜົນສຳເລັດ.”
ອາດຈະເວົ້າໄດ້ວ່າ ການຫນູນຊ່ວຍຂອງລັດຖະບານ ອິນໂດເນເຊຍ ໄດ້ນຳມາເຊິ່ງຜົນປະໂຫຍດຫລາຍຢ່າງໃຫ້ບັນດາວິສາຫະກິດ ອິນໂດເນເຊຍ. ສຳລັບບັນດາຄູ່ຮ່ວມມືໃຫມ່, ບັນດາວິສາຫະກິດ ອິນໂດເນເຊຍ ຈະນັບມື້ນັບແຊກຊືມເຂົ້າບັນດາຕະຫລາດໃນພາກພື້ນຢ່າງແຮງກວ່າ, ປະກອບສ່ວນສ້າງຕະຫລາດຮ່ວມອາຊຽນຢ່າງຟົດຟື້ນ ແລະ ພັດທະນາແບບຍືນຍົງ.