(vovworld) - ປີ 2013 ມີບໍລິສັດລົງທຶນຫລາຍແຫ່ງໄດ້ຖື ພາກພື້ນອາຊີ ຕາເວັນອອກສຽງໃຕ້ແມ່ນພາກພື້ນມີຄວາມສາມາດບົ່ມຊ້ອນຫລາຍຢ່າງ ດ້ວຍບັນດາພື້ນຖານເສດຖະກິດທີ່ພວມພົ້ນເດັ່ນຂຶ້ນຄື: ອິນໂດເນເຊຍ, ມາເລເຊຍ, ຟິລິບປີນ ແລະ ມ້ຽນມາ. ໃນຂະນະທີ່ເສດຖະກິດໂລກພວມປະສົບກັບຄວາມຫຍຸ້ງຍາກຫລາຍຢ່າງຍ້ອນວິກິດການນັ້ນ, ແຕ່ສາຍເຫດໃດເຮັດໃຫ້ພາກພື້ນອາຊີຕາເວັນອອກສຽງໃຕ້ສາມາດດຶງດູດນັກລົງທຶນເຊ່ັນນັ້ນ. ເຊີນທ່ານຮັບຊົມບົດທີ່ມີຫົວຂໍ້ວ່າ: “ອາຊຽນ-ພາກພື້ນມີຄວາມສາມາດບົ່ມຊ້ອນຫລາຍຢ່າງໃນປີ 2013”
ປະເທດ ມ້ຽນມາ
ພາບ:internet
|
ຕາມການຄາດຄະເນຂອງ ສປຊ ແລ້ວ, ລະດັບການເຕີບໂຕເສດຖະກິດຂອງ ອາຊຽນ ຈະບັນລຸ 5,7% ໃນປີ 2013 ແລະ 5,8% ໃນປີ 2014. ອາຊຽນ ພວມແກ້ງແຍ່ງກັບພື້ນຖານເສດຖະກິດໃຫຍ່ຈຳນວນຫນຶ່ງໃນພາກພື້ນ ອາຊີ ກ່ຽວກັບການດຶງດູດເງິນລົງທຶນຈາກຕ່າງປະເທດ. ບັນດາກຸ່ມບໍລິສັດຂ້າມຊາດໄດ້ເລີ່ມຕົ້ນມຸ່ງໄປເຖິງບັນດາປະເທດ ອາຊຽນ ເພື່ອນຳໃຊ້ແຫລ່ງຊັບພະຍາກອນມະນຸດດ້ວຍຄ່າຈ້າງຄົນງານຕຳ່, ທ່າແຮງກ່ຽວກັບປະຊາກອນ ແລະ ຄວາມສາມາດບົ່ມຊອ້ນດ້ານການເຕີບໂຕເສດຖະກິດ. ທ່ານ Mark Geary ສັງກັດສະຖາບັນຄົ້ນຄ້ວາ ສະຫະລັດ ອາເມລິກາ ໃຫ້ຮູ້ວ່າ:
“ບັນດາບໍລິສັດໃຫຍ່ພວມຊອກຫາການເຕີບໂຕຢູ່ພາກພື້ນ ອາຊີ ແລະ ເຂົາເຈົ້າກໍຫັນຄວາມສົນໃຈໄປຍັງຕະຫລາດນີ້. ສິ່ງດັ່ງກ່າວສາມາດເຫັນໄດ້ຜ່ານຍຸດທະສາດການເຕີບໂຕໃນໄລຍະມໍ່ໆມານີ້ຂອງທະນາຄານ HSBC. ເຂົາເຈົ້າຫລຸດຜ່ອນຈຳນວນຄົນງານຢູ່ ເອີລົບ ແຕ່ເພີ່ມພາລະກອນຕື່ມອີກ 5000 ຄົນຢູ່ ອາຊີ.”
ໃນຊຸມເດືອນຕົ້ນປີ 2013, ສະພາບການເສດຖະກິດໂລກ ແລະ ພາກພື້ນມີການຫັນປ່ຽນຫລາຍຢ່າງເມື່ອທຽບໃສ່ປີກ່ອນ. ແລະ ມີພື້ນຖານຫລາຍຢ່າງທີ່ຈະເຊື່ອໝັ້ນວ່າ ໃນປີນີ້ ບໍລິສັດລົງທຶນຫລາຍແຫ່ງຍັງຄົງສືບຕໍ່ຖື ອາຊີຕາເວັນອອກສຽງໃຕ້ແມ່ນພາກພື້ນມີບັນດາຄວາມສາມາດບົ່ມຊ້ອນເພື່ອເຂົ້າມາລົງທຶນ. ທ່ານ Bert Hofman ຜູ້ຊ່ຽວຊານດ້ານເສດຖະກິດ ອາຊີຕາເວັນອອກ ແລະ ປາຊີຟີກ, ສັງກັດທະນາຄານໂລກໄດ້ໃຫ້ຂໍ້ສັງເກດວ່າ:
“ປີ 2013, ສະພາບການເສດຖະກິດຢູ່ອາຊີຕາເວັນອອກສຽງໃຕ້ຈະບໍ່ປະສົບກັບຄວາມຫຍຸ້ງຍາກຄືກ່ອນນີ້. ໄພເງິນເຟີ້ໄດ້ຄ່ອຍໆຫລຸດລົງ. ປັດໄຈຕົ້ນຕໍທີ່ກໍ່ຜົນສະທ້ອນເຖິງໄພເງິນເຟີ້ແມ່ນລາຄາສະບຽງອາຫານພວມເພີ່ມຄື້ນໃນຂອບຂະຫນາດທົ່ວໂລກ. ແຕ່ປັດໄຈກ່ຽວຂ້ອງຫລາຍສຸດເຖິງອາຊີ ນັ້ນແມ່ນລາຄາເຂົ້າສານບໍ່ເພີ່ມຂຶ້ນ, ລາຄາສິນຄ້າເປັນປົກກະຕິ. ສະນັ້ນໄພເງິນເຟີ້ຈະບໍ່ຖືກກຳລັງດັນປານໃດ.”
ມີສັນຍານອື່ນທີ່ເປັນຫນ້າປະເອີບໃຈໃຫ້ແກ່ບັນດາພື້ນຖານເສດຖະກິດ ອາຊຽນໃນປີ 2013 ນັ້ນແມ່ນໝາກຜົນບົດລາຍງານຂອງທະນາຄານ HSBC ໄດ້ສະແດງໃຫ້ເຫັນວ່າ: ແຫລ່ງເງິນລົງທຶນໂດຍກົງຂອງຕ່າງປະເທດ (FDI) ບໍ່ສຸມໃສ່ເຂົ້າປະເທດຈີນ ແລະ ມີທ່າອ່ຽງຫັນທິດໄປຍັງອິນເດຍ ແລະ ບັນດາປະເທດໃນອາຊຽນຄື: ອິນໂດເນເຊຍ, ຟິລິບບີນ, ຫວຽດນາມ ແລະ ມາເລເຊຍ. ສາຍເຫດນັ້ນແມ່ນ ບັນດາປະເທດເຫລົ່ານີ້ມີເງື່ອນໄຂສະດວກກ່ຽວກັບປະຊາກອນ, ຕະຫລາດດູດດື່ມ ແລະ ມີການເຕີບໂຕຢ່າງວ່ອງໄວ. ທ່ານ ຫວໍຈີແທ່ງ, ຮອງຫົວຫນ້າສະຖາບັນຄົ້ນຄ້ວາຄຸ້ມຄອງເສດຖະກິດສູນກາງ ຫວຽດນາມ ໄດ້ໃຫ້ຂໍ້ສັງເກດວ່າ: ໄລຍະແຕ່ປີ 2013 - 2015 ແມ່ນຊ່ວງເວລາດຳເນີນບັນດາບາດລ້ຽວແຫ່ງການປະຕິຮູບເສດຖະກິດ ອາຊຽນກໍຄືໃນໂລກ. ທ່ານແທ່ງກ່າວວ່າ:
“ລັກສະນະສະເພາະໃນປີ 2013 ມີ 2 ຈຸດທີ່ເປັນພື້ນຖານ, ທີຫນຶ່ງແມ່ນບັນດາປະເທດ ອາຊຽນ ຍັງຄົງສືບຕໍ່ສ້າງເສດຖະກິດມະຫາພາກ ແລະ ໃນສະພາບບັນດາປະເທດພັດທະນາຢ່າງແຂງແຮງ ລ້ວນແຕ່ໂຍະຍານນະໂຍບາຍ ແຕ່ບັນດາປະເທດນີ້ ກໍເພີ່ມທະວີຄວາມສາມາດຄວບຄຸມກະແສທຶນ. ເປັນຕົ້ນແມ່ນກະແສທຶນດ່ວນ. ທີສອງ ຄຽງຄູ່ກັບການຄວບຄຸມກະແສທຶນ ເຂົາເຈົ້າພະຍາຍາມຮັກສານະໂຍບາຍແລກປ່ຽນເງິນຕາຕ່າງປະເທດເພື່ອຮັກສາພື້ນຖານເສດຖະກິດຂອງເຂົາເຈົ້າສາມາດແກ້ງແຍ່ງໄດ້ ເພາະວ່າ ບັນດາປະເທດ ອາຊຽນ ແມ່ນຕະຫລາດເປີດ.”
ນອກນັ້ນ, ຂໍ້ສັງເກດທີ່ເຕັມໄປດ້ວຍລັກສະນະຕັ້ງຫນ້າຂອງທະນາຄານໂລກໃນໄລຍະມໍ່ໆມານີ້ກ່ຽວກັບພື້ນຖານເສດຖະກິດທີ່ພົ້ນເດັ່ນຄື ມ້ຽນມາ ກໍໄດ້ຮັບການຄາດຄະເນວ່າຈະຊ່ວຍດຶງດູດຄວາມສົນໃຈບັນດາບໍລິສັດລົງທຶນຕ່າງປະເທດເຂົ້າປະເທດ ມ້ຽນມາ ເວົ້າສະເພາະ ແລະ ທົ່ວພາກພື້ນ ອາຊີຕາເວັນອອກເວົ້າລວມ. ຕາມບົດລາຍງານແຫ່ງການພັດທະນາເສດຖະກິດປີ 2013 ຂອງອົງການຮ່ວມມື ແລະ ພັດທະນາເສດຖະກິດ (OECD)ແລ້ວ, ການເຕີບໂຕເສດຖະກິດຂອງ ອາຊຽນ ຈະກັບຄືນສູ່ໄລຍະກ່ອນວິກິດການດ້ວຍລະດັບ 5,5%.
ອິນໂດເນເຊຍ ແມ່ນພື້ນຖານເສດຖະກິດພວມພົ້ນເດັ່ນຂຶ້ນໃນ ອາຊຽນ
ພາບ:internet
|
ປີ 2013 ແມ່ນປີປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫລາຍຢ່າງ ແຕ່ອາຊຽນ ພວມຢືນຕໍ່ຫນ້າກາລະໂອກາດຫລາຍຢ່າງເພື່ອສາມາດສະແດງໃຫ້ເຫັນກຳລັງດຶງດູດຂອງພາກພື້ນທີ່ມີລະດັບການເຕີບໂຕສູງຢູ່ໃນພື້ນຖານເສດຖະກິດໂລກ.