(vovworld)- ໃນຊຸມປີຜ່ານມາ, ອາຊຽນ ໄດ້ຮັບການຮັບຮູ້ວ່າແມ່ນຫນຶ່ງໃນບັນດາພາກພື້ນທີ່ເຊື່ອມໂຍງ ແລະ ຂະຫຍັນຂັນເຄື່ອນກວ່າໝູ່ຢູ່ໃນໂລກ. ນອກນັ້ນ ອາຊຽນ ກໍໄດ້ຮັບການຕີລາຄາວ່າ ແມ່ນຕະຫລາດເຕັມໄປດ້ວຍຄວາມສາມາດບ່ົ່ມຊ້ອນ ແລະ ດຶງດູດການລົງທຶນເປັນຈຳນວນຫຼວງຫຼາຍຢູ່ໃນໂລກ, ໃນນັ້ນ ມີບັນດາວິສາຫະກິດ ອີຢູ. ປະຈຸບັນ ອາຊຽນ ແລະ ອີຢູ ພວມດຳເນີນວາລະປຶກສາຫາລື, ການເຈລະຈາເພື່ອມຸ້ງໄປເຖິງການລົງນາມໃນສັນຍາການຄ້າເສລີ ອາຊຽນ ແລະ ອີຢູ.
ກອງປະຊຸມສຸດຍອດດຳເນີນທຸລະກິດ ອາຊຽນ - ອີຢູ ຄັ້ງທີ່ 3 ຖືກຈັດຂຶ້ນຢູ່ຮ່າໂນ້ຍຫວ່າງແລ້ວນີ້ ສືບຕໍ່ແມ່ນກາລະໂອກາດເພື່ອໃຫ້ປະຊາຄົມວິສາຫະກິດຂອງ ອາຊຽນ ແລະ ອີຢູ ສຳພັດ ແລະ ແບ່ງປັນທັດສະນະ, ສະແດງຄວາມສົນໃຈ ແລະ ຄວາມປາດຖະຫນາຕໍ່ບັນດາການນຳເສດຖະກິດຢູ່ທັງສອງພາກພື້ນ. ເມື່ອຕີລາຄາກ່ຽວກັບກອງປະຊຸມ, ດຣ ຫວູຕຽນໂລກ ຫົວຫນ້າຫ້ອງການການຄ້າ ແລະ ອຸດສາຫະກຳ ຫວຽດນາມ (VCCI) ເວົ້າວ່າ: ດ້ວຍພົນລະເມືອງປະມານ 1,1 ຕື້ຄົນ, ສອງພາກພື້ນ ອາຊຽນ ແລະ ອີຢູ ມີຄວາມສາມາດບົ່ມຊ້ອນອັນໃຫຍ່ຫລວງເພື່ອພັດທະນາໃນອະນາຄົດ. ສະນັ້ນ ການກຳນົດທິດຮ່ວມມືສອງຝ່າຍຈະສ້າງເງື່ອນໄຂ ແລະ ສະພາບແວດລ້ອມແຫ່ງການດຳເນີນທຸລະກິດ, ສ້າງກາລະໂອກາດເພື່ອໃຫ້ ຫວຽດນາມ ຍູ້ແຮງການສົ່ງອອກ ແລະ ນຳເຂົ້າ.
“ທີ່ກອງປະຊຸມສຸດຍອດຄັ້ງນີ້ ບັນດານັກວາງແຜນນະໂຍບາຍ, ເຈົ້າຫນ້າທີ່ ແລະ ວົງການດຳເນີນທຸລະກິດ ຈະແລກປ່ຽນກ່ຽວກັບບັນດາສິ່ງທ້າທາຍໃນການດຳເນີນທຸລະກິດ, ກາລະໂອກາດຮ່ວມມືລົງທຶນລະຫວ່າງສອງພາກພື້ນ, ບົນພື້ນຖານນັ້ນ ຍົກອອກຂໍ້ສະເຫນີຕໍ່ບັນດາລັດຖະບານ ແລະ ໂຄງການລະອຽດຂອງປະຊາຄົມວິສາຫະກິດ. ຄຽງຄູ່ກັນນັ້ນ ທີ່ກອງປະຊຸມສຸດຍອດຄັ້ງນີ້ ພວກຂ້າພະເຈົ້າກໍຈັດຕັ້ງເວທີປາໄສໂອ້ລົມສົນທະນາ ເພື່ອໃຫ້ວິສາຫະກິດສອງຝ່າຍຊອກຮູ້ ແລະ ແລກປ່ຽນກ່ຽວກັບບັນດາກາລະໂອກາດດຳເນີນທຸລະກິດຢ່າງລະອຽດ.”
ເວທີປາໄສປຶກສາຫາລືລະຫວ່າງປະຊາຄົມວິສາຫະກິດ ອາຊຽນ - ອີຢູ ຈະສຸມໃສ່ເຂົ້າໃນບັນດາຫົວເລື່ອງຕົ້ນຕໍຄື: ການລົງທຶນເຂົ້າ ອາຊຽນ- ບັນດາກາລະໂອກາດ ແລະ ສິ່ງທ້າທາຍ; ກາລະໂອກາດແລກປ່ຽນການຄ້າ ອາຊຽນ ກໍຄືຄວາມຮັບຜິດຊອບສັງຄົມຂອງວິສາຫະກິດ (CSR).
ກອງປະຊຸມສຸດຍອດດຳເນີນທຸລະກິດ ອາຊຽນ - ອີຢູ
ພາບ:chinhphu.vn
|
ປະຈຸບັນ ອາຊຽນ ພວມມຸ່ງໄປເຖິງຈຸດໝາຍສ້າງປະຊາຄົມລວມໃນປີ 2015 ດ້ວຍ 3 ເສົາຄ້ຳຕົ້ນຕໍ, ໃນນັ້ນ ປະຊາຄົມເສດຖະກິດລວມ ອາຊຽນ ຍາມໃດກໍໄດ້ຮັບການຊຸກຍູ້ຢ່າງແຂງແຮງ. ກອງປະຊຸມສຸດຍອດວິສາຫະກິດ ອາຊຽນ - ອີຢູ ຄັ້ງທີ 3 ກໍແມ່ນກາລະໂອກາດເພື່ອເປີດກວ້າງຄວາມສາມາດບົ່ມຊ້ອນ ກໍຄືທ່າແຮງໃນການດຶງດູດການລົງທຶນຂອງພາກພື້ນກວ່າອີກ. ທີ່ເຫດການນີ້, ສອງຝ່າຍຈະສືບຕໍ່ວາງອອກບັນດາມາດຖານ ແລະ ທິດທາງເພື່ອລົງນາມໃນສັນຍາການຄ້າເສລີ (FTA) ລະຫວ່າງແຕ່ລະປະເທດສະມາຊິກ ອາຊຽນ ແລະ ອີຢູ ໃນໄລຍະຈະມາເຖິງ. ທ່ານ ເລື່ອງຮ່ວາງທາຍ, ຫົວຫນ້າກົມນະໂຍບາຍ ແລະ ການຄ້າຫລາຍຝ່າຍ, ສັງກັດກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:
“ກ່ຽວກັບວິວັດທະນາການເຈລະຈາ ອີຢູ ແລະ ອາຊຽນ, ປະຈຸບັນ ປະເທດ ອາຊຽນ ຈຳນວນຫນຶ່ງໄດ້ດຳເນີນການເຈລະຈາສັນຍາ FTA ກັບ ອາຊຽນ. ບັນດາສັນຍາ FTA ສອງຝ່າຍລະຫວ່າງແຕ່ລະປະເທດ ອາຊຽນ ກັບ ອີຢູ ຈະແມ່ນພື້ນຖານເພື່ອສ້າງສັນຍາລວມ ອາຊຽນ - ອີຢູ.”
ເຖິງຢ່າງໃດກໍຕາມ, ຕາມການຕີລາຄາຂອງສາດສະດາຈານ Claudio Dordi ຫົວຫນ້າຫນ່ວຍໃຫ້ຄຳປຶກສາ, ໂຄງການຫນູນຊ່ວຍນະໂຍບາຍການຄ້າ ແລະ ການລົງທຶນ ເອີລົບ (EU - Mutrap) ແລ້ວ, ທັງສອງຝ່າຍຕ້ອງແກ້ໄຂບັນດາຮົ້ວກີດຂວາງໃນວິວັດການເຈລະຈາເພື່ອບັນລຸໃຫ້ໄດ້ສັນຍາ FTA ລວມ ອີຢູ - ອາຊຽນ.
“ມີ 3 ບັນຫາສຳຄັນໃຫຍ່ໃນວິວັດການເຈລະຈາສັນຍາ FTA ລະຫວ່າງ EU - ASEAN. ທີຫນຶ່ງ ແມ່ນມາດຕະຖານກ່ຽວກັບຄຸນນະພາບ, ໃນນັ້ນ ມີບັນດາມາດຕະຖານກ່ຽວກັບດ້ານເຕັກນິກ, ເຕັກໂນໂລຊີ … ທີສອງ ແມ່ນບັນຫາພື້ນຖານໂຄງລ່າງ. ລະດັບການພັດທະນາຢູ່ແຕ່ລະປະເທດ ອາຊຽນ ມີຄວາມຜິດໂຕນກັນ. ສະນັ້ນ ການຕອບສະຫນອງຄວາມຕ້ອງການ ແລະ ເງື່ອນໄຂການລົງທຶນຂອງບັນດາວິສາຫະກິດ ອີຢູ ຢູ່ ອາຊຽນ ຈະມີຄວາມແຕກຕ່າງກັນ. ທີສາມ ແມ່ນເຂດບໍລິການສຳຮອງຢູ່ບັນດາປະເທດ ອາຊຽນ ບໍ່ທັນຕອບສະຫນອງແຫລ່ງກຳລັງລົງທຶນໄດ້. ພວກຂ້າພະເຈົ້າອາດຈະເຫັນໄດ້ຈຸດແຕກຕ່າງກັນລະຫວ່າງບັນດາປະເທດ ອາຊຽນ ແລະ ຈຳເປັນຕ້ອງປັບປຸງບັນດານະໂຍບາຍຂອງຕົນໃຫ້ສອດຄ່ອງກັບແຕ່ລະປະເທດ.”
ເຖິງແນວໃດກໍຕາມ, ຜູ້ຕາງຫນ້າວິສາຫະກິດ ອີຢູ ຫລາຍແຫ່ງຢູ່ ຫວຽດນາມ ມີຄວາມປະເອີບໃຈກ່ຽວກັບຈຸດໝາຍເຊັນສັນຍາ FTA ລະຫວ່າງ EU - ASEAN. ທ່ານ Jean Jacque Bouflet ເປັນທີ່ປຶກສາ, ຫົວຫນ້າພະແນກເສດຖະກິດ ແລະ ການຄ້າ ຂອງຄະນະຜູ້ຕາງຫນ້າ ອີຢູ ປະຈຳ ຫວຽດນາມ ມີຄວາມເຊື່ອໝັ້ນວ່າ ດ້ວຍຄວາມສາມາດບົ່ມຊ້ອນ ແລະ ຄວາມຕ້ອງການຂອງສອງພາກພື້ນດັ່ງກ່າວ ພ້ອມກັບບັນດາໝາກຜົນທີ່ໄດ້ຮັບການຮັບຮອງເອົາໃນກອງປະຊຸມສຳມະນາ, ກອງປະຊຸມສອງຝ່າຍ ແລະ ຫລາຍຝ່າຍ, ສັນຍາ FTA ລະຫວ່າງ EU - ASEAN ຈະເປັນຂີດໝາຍແຫ່ງການຮ່ວມມື ແລະ ແລກປ່ຽນການຄ້າໃຫມ່ລະຫວ່າງສອງຝ່າຍ:
“ພວກຂ້າພະເຈົ້າໄດ້ສຳເລັດເລື່ອງລົງນາມໃນສັນຍາ FTA ກັບປະເທດສະມາຊິກຫລັກແຫລ່ງຈຳນວນຫນຶ່ງຂອງ ອາຊຽນ ຄື: ສິງກະໂປ, ມາເລເຊຍ ແລະ ປະຈຸບັນ ພວມດຳເນີນການເຈລະຈາສັນຍາ FTA ກັບ ຫວຽດນາມ ແລະ ສືບຕໍ່ຜັນຂະຫຍາຍການເຈລະຈາກັບໄທ. ພວກຂ້າພະເຈົ້າມີຄວາມເຊື່ອໝັ້ນວ່າ ດ້ວຍການສະຫນັບສະຫນູນ ແລະ ການຮ່ວມມືຂອງລັດຖະບານບັນດາປະເທດ ອາຊຽນ, ສັນຍາ FTA ລວມລະຫວ່າງ ອີຢູ ແລະ ອາຊຽນ ຈະບັນລຸໄດ້ໂດຍໄວ.”
ປະຈຸບັນ, ຫວຽດນາມ ແມ່ນປະເທດສະມາຊິກ ອາຊຽນ ທີ 3 ພວມດຳເນີນການເຈລະຈາສັນຍາ FTA ກັບ EU ແລະ ປະຈຸບັນ EU ແມ່ນຫນຶ່ງໃນບັນດາຄູ່ຮ່ວມມືຕົ້ນຕໍຂອງ ຫວຽດນາມ ກ່ຽວກັບດ້ານເສດຖະກິດ, ການຄ້າ ແລະ ການລົງທຶນ. ຕາມກົມໃຫຍ່ສະຖິຕິແລ້ວ, ປີ 2012 ອີຢູ ໄດ້ບືນຕົວຂຶ້ນຢືນອັນດັບທີຫນຶ່ງ ກາຍເປັນຕະຫລາດສົ່ງອອກໃຫຍ່ສຸດຂອງ ຫວຽດນາມ ດ້ວຍວົງເງິນບັນລຸ 20,3 ຕື້ USD. ພາຍຫລັງການເຈລະຈາເປັນສອງຄັ້ງເມື່ອເດືອນ 10/2012 ແລະ ເດືອນ 1/2013 ຢູ່ ຮ່າໂນ້ຍ, ຢູ່ນອກກອງປະຊຸມສຸດຍອດ ອາຊຽນ - ອີຢູ ຄັ້ງນີ້, ຫວຽດນາມ ແລະ ອີຢູ ຈະສືບຕໍ່ເຈລະຈາຄັ້ງທີ 3 ເພື່ອສ້າງພື້ນຖານໃຫ້ແກ່ສັນຍາ FTA ລະຫວ່າງ ຫວຽດນາມ ແລະ ອີຢູ, ປະກອບສ່ວນມຸ່ງໄປເຖິງການເຊັນສັນຍາລວມ ອາຊຽນ - ອີຢູ ໃນອະນາຄົດ.